[A] [B-E] [Ə] [F-İ] [K-M] [M] [M-P] [R] [S] [Ş-T] [V-Z]

MEHRALI NƏZƏROV

Mehralı Avıd oğlu Nəzərov 1942-ci ildə Bolnisi rayonunun Saraclı kəndində anadan olmuşdur. 1950-ci ildə Saraclı kənd orta məktəbinə daxil olmuş, 1960-cı ildə məktəbi bitirmişdir. Elə həmin il Bakı şəhərindəki, 1 saylı Tibb texnikumuna daxil olmuşdur. 1964-cü ildə texnikumu bitirmiş və Belarusiya şəhərinə hərbi xidmətə göndərilmişdir. Xidməti dövründə klassik güləşlə məşğul olmuş, 1967-ci ildə Belarusiya birinciliyində yüksək yer tutaraq, idman ustası normasını yerinə yetirmişdir. 1968-ci ildə hərbi xidmətdən tərxis olunduqdan sonra vətənə qayıtmış və Faxralı kəndində baş feldşer vəzifəsində işləmişdir. 1971-ci ildə Bakıya qayıtmış və Bədən Tərbiyəsi institutuna daxil olmuşdur. Oxuduğu müddət ərzində institutun Azad Həmkarlar Təşkilatının sədri vəzifəsində işləmiş və 1975-ci ildə institutu fərqlənmə diplomu ilə bitirmiş və "Metrotuneltikinti" idarəsində idman komitəsinin sədri işləmişdir. 1977-ci ildə AzİMU-nun Bədən tərbiyəsi və idman kafedrasına müəllim vəzifəsinə işə düzəlmişdir.

1977-1989-cu illərdə Mehralı Nəzərov Yasamal rayonunun könüllü Xalq nəzarəti bölməsinin sədri vəzifəsində işləmişdir. 1977-ci ildən indiyədək Universitetdə mühafizə qərargahının rəisi kimi fəaliyyət göstərir. 1982-ci ildə Azərbaycan Respublikasının Ali Məktəblərinin birinciliyində 16 komanda arasında 1 yeri tutaraq SSRİ Ali Məktəblərinin birinciyliyinə vəsiqə almışdır. 1982-ci ildə ona SSRİ-nin idman ə’laçısı fəxri adı verilmişdir. Mehralı Nəzərovun rəhbərlik etdiyi Yunan-Roma güləşi üzrə komanda şəhər, Respublika ümumittifaq yarışlarında uğurla çıxış etmiş, mükafata layiq yerlər tutmuşdur. Bu günə qədər 10 nəfər idman ustası, 120 nəfər idman ustalığına namizəd, 160 nəfər 1 dərəcəli, 1 nəfər cavanlar arasında dünya birinciliyinin gümüş mükafatçısı, 1 nəfər Avropa çempionu yetişdirmişdir. 1995-ci ildə Respublikasının Fəxri Bədən Tərbiyəsi İşçisi adına layiq görülmüşdür. Yunan Roma güləşi üzrə yığma komandanın göstərdiyi yüksək göstəricilərə və nailiyyətlərə görə ona 1999-cu ildə "Azərbaycan Respublikasının Əməkdar Məşqçisi" adı verilmişdir.

Hazırda Azərbaycan İnşaat Mühəndisləri Universitetinin Bədən tərbiyəsi və idman kafedrasının dosenti və İdman klubunun və Mühafizə qərargahının sədridir. İki kitabın, 11 elmi əsərin müəllifidir.

MƏMMƏD İBRAHİMOV

Məmməd Məmmədəli oğlu İbrahimov 1948-ci il aprel ayının 15-də Faxralı kəndində fəhlə ailəsində anadan olmuşdur. Orta təhsilini əvvəlcə Faxralı məktəbində, 1959-cu ildən isə Marneuli şəhər interant məktəbində almış və 1966-cı ildə orta məktəbi bitirmişdir.

1967-ci ildən Sumqayıtda Boru yayma zavodunda çilingər işləmiş, 1971-1973-cü illərdə əsgəri xidmətdə olmuşdur. 1975-ci ildən zavodun göndərişi ilə Dnepropetrovsk şəhərində Metallurgiya institutunda oxumuş və 1980-ci ildə fərqlənmə diplomu ilə bitirmişdir.

Həmin il aspiranturaya daxil olmuş və 1986-cı ildə "Metalların təzyiq altında e’malı" ixtisası üzrə namizədlik dissertasiyası müdafiə etmişdir. 1986-cı ilin iyun ayından zavoda qayıtmışdır. Boru yayma zavodunun (indi "Azərboru" SC) texniki şö’bəsinin rəisi - baş mühəndisin müavini vəzifəsində çalışır.

Məmməd İbrahimov 8 ixtira və 30-dan çox elmi məqalənin müəllifidir. Dəfələrlə diplom müdafiəsi komissiyasının sədri olmuşdur. 4 nəfər dissertanta rəhbərlik etmişdir.

Məmməd İbrahimovun elmi və praktiki fəaliyyəti 15 elmi-praktiki əsərdə öz əksini tapmışdır. O, 10 ittifaq və respublika səviyyəli konfranslarda iştirak etmiş, materiallar çap etdirmişdir.

MƏMMƏD ŞƏRİFOV

Məmməd Xaləddin oğlu Şərifov 1943-cü ildə Bolnisi rayonunun Arıxlı kəndində anadan olmuşdur. 1950-ci ildə Arıxlı kənd orta məktəbinin birinci sinfinə daxil olmuş, həmin məktəbi 1960-cı ildə qızıl medalla bitirmişdir. 1961-ci ildə Azərbaycan Politexnik İnstitutunun avtomatika-telemexanika fakültəsinə daxil olmuşdur. 1966-cı ildə həmin institutu Metallurgiya istehsalatının avtomatlaşdırılması və kompleksli mexanikləşdirilməsi ixtisası üzrə ə’la qiymətlərlə bitirmişdir. 1967-ci il yanvar ayından dekabr ayına kimi L. Şmidt (indiki Səttarxan) adına Neft Maşınqayırma Zavodunda konstruktor vəzifəsində işləmişdir. 1967-ci ilin dekabrında Azərbaycan Politexnik İnstitutunda yeni yaradılmış "Qara və əlvan metalların metallurgiyası" kafedrasına baş laborant vəzifəsinə işə düzəlmişdir. 1968-ci ilin sentyabrından həmin kafedrada assistent vəzifəsində işləmişdir. 1972-ci ildə həmin kafedra üzrə əyani aspiranturaya daxil olmuş, 1976-cı ildə "Tökmə konstruksiya poladlarının yüksək temperaturlu termomexaniki e’malı" mövzusunda namizədlik dissertasiyası müdafiə etmişdir. Sonra yenidən həmin kafedrada (sonralar kafedra "metallurgiya və metalşünaslıq" adlandırılmışdır) assistent, baş müəllim olmuşdur. 1985-ci ildən isə dosent vəzifəsində çalışır.

Məmməd Şərifov 35-dən çox elmi əsər çap etdirmişdir. Əsərləri keçmiş SSRİ-nin və Azərbaycan Respublikasının elmi jurnallarında nəşr olunmuşdur. Onun iki metodik göstərişi və bir dərs vəsaiti işıq üzü görmüşdür. O, bir sıra İttifaq və respublika konfranslarında, müşavirə və simpoziumlarda çıxış etmişdir.

MƏMMƏD MƏMMƏDOV

Məmməd İsrafil oğlu Məmmədov 1930-cu ildə Borçalı mahalının Bolus nümayəndəliyinin Faxralı kəndində anadan olmuşdur. 1947-ci ildə Faxralı orta məktəbini bitirmişdir. 1954-cü ildə ADU-nun (indiki BDU-nun) jurnalistika şö’bəsini fərqlənmə diplomu ilə bitirmiş və tə’yinatla "Sovet kəndi" qəzeti redaksiyasına göndərilmişdir. Uzun müddət həmin qəzetdə rəhbər vəzifədə işləmişdir. Fəal təbliğatçılıq fəaliyyətinə görə Azərbaycan Respublikası Ali Sovetinin fəxri fərmanı ilə təltif edilmiş, Azərbaycan Respublikasının "Əməkdar mədəniyyət işçisi" fəxri adına layiq görülmüşdür. Elmi-tədqiqat işi ilə məşğul olmuş, 1972-ci ildə "Azərbaycan kolxozçusu" qəzeti Azərbaycan kəndinin yenidən qurulması uğrunda mübarizədə" mövzusunda dissertasiya müdafiə edərək tarix elmləri namizədi elmi dərəcəsi almışdır. 1978-ci ildən Texniki Universitetdə tarix kafedrasında müəllim işləmiş, BDU-nun mətbuat tarixi kafedrasında diplom rəhbəri kimi müntəzəm fəaliyyət göstərmişdir. Respublika mətbuatında elmi-publisistik yazılarla çıxış etmişdir. Çoxsaylı elmi-publisistik yazıların müəllifidir. Məmməd Məmmədovun elmi və pedaqoji fəaliyyəti 2 monoqrafiya və 20-ə yaxın elmi məqalədə əks olunmuşdur.

1994-cü ildə Bakıda vəfat etmişdir.

Məmməd Yəhya oğlu Əsədov 1955-ci ildə Bolnisi rayonun Qaradaş kəndində anadan olmuşdur.

1961-ci ildə Qaradaş kənd ibtidai məktəbinin 1-ci sinfinə getmiş, 1965-ci ildə təhsilini Arakol 8 illik məktəbində davam etdirmiş, orta məktəbi isə 1971-ci ildə bitirmişdir.

1972-ci ildə AzPİ-nin (indiki ATU-nun) hidromeliorasiya fakültəsinə daxil olmuş, 1977-ci ildə Azərbaycan İnşaat Mühəndisləri İnstitutunda mühəndis-hidrotexnika ixtisasını almışdır. 1977-ci ilin avqustundan 1990-cı ilə kimi Azərbaycan Elmi-Tədqiqat Hidrotexnika və Meliorasiya İnstitutunda işləmişdir.1980-1984-cü illərdə həmin institutda istehsalatdan ayrılmamaqla aspiranturada oxumuş və 1987-ci ildə namizədlik dissertasiyası müdafiə etmişdir. 1990-cı ildən 2000-ci ilə kimi "Azdövsutəsləyihə" institutunda layihə baş mühəndisi vəzifəsində işləmişdir. 2000-ci ildən Meliorasiya və Su Təsərrüfatı Komitəsində "Elm, Layihə və Ekspertiza" İdarəsinin rəisi vəzifəsində işləyir.

Məmməd Əsədovun elmi fəaliyyəti 40-a yaxın elmi əsərdə öz əksini tapmışdır.

O, ittifaq və respublika simpoziumlarında və konfranslarında çıxış etmiş, elmi məqalələr çap etdirmişdir.

MƏTANƏT MEHRABOVA

Mətanət Əhməd qızı Mehrabova 1964-cü ildə Bakı şəhərində anadan olmuşdur. 1980-cı ildə 20 saylı musiqi məktəbini, 1981-ci ildə 159 saylı orta məktəbi bitirmişdir.

1981-1986-cı illərdə Azərbaycan Dövlət Universitetinin fizika fakültəsində təhsil almış, tə’yinatla Azərbaycan EA Kosmik Tədqiqatlar İnstitutunda mühəndis vəzifəsinə işə düzəlmişdir. 1991-ci ildən Bakı Dövlət Universiteti nəzdində "Rifma" kiçik müəssisəsinin elmi işlər üzrə katibi vəzifəsində çalışmışdır.

Mətanət Mehrabova 1992-ci ildə "Yarımmaqnit yarımkeçiricilər və onların ölçüyə görə kvantlanmış lövhələrində zonalararası Faradey effekti" mövzusunda namizədlik dissertasiyası müdafiə etmişdir.

Hazırda elmi fəaliyyətini Azərbaycan Elmlər Akademiyası Radiasiya Tədqiqatları bölməsində davam etdirir və "Naxçıvan" özəl Universitetində fizika fənnindən dərs deyir.

Mətanət Mehrabovanın elmi fəaliyyəti 15-ə yaxın elmi əsərdə öz əksini tapmışdır.

O, bir sıra respublika səviyyəli konfranslarda çıxış etmiş və məqalələr çap etdirmişdir.

MİNAYƏ NƏBİYEVA

Minayə Yolçu qızı Nəbiyeva 1953-cü ildə Bolnisi rayonunun Faxralı kəndində anadan olmuşdur. 1960-cı ildə birinci sinfə getmiş, 1970-ci ildə isə orta məktəbi bitirmişdir. Həmin ildə Azərbaycan Dövlət Tibb İnstitutunun (indiki ADTU-nun) sanitariya-gigiyena fakültəsinə daxil olmuşdur. 1976-cı ildə ali təhsilini başa vurduqdan sonra 1976-1980-ci illərdə tə’yinatla Xanlar rayon Sanitar Epidemioloji Stansiyasında həkim-epidemioloq kimi fəaliyyət göstərmişdir. 1980-cı ildə o, müsabiqədən keçərək ATİ-nun (indiki ADTU-nun) əmək gigiyenası və peşə xəstəlikləri kafedrasına assistent vəzifəsinə seçilmişdir. 1994-cü ildə "İri sənaye şəhərinin atmosfer çirklənməsinin məktəbəqədər yaşlı uşaqların sağlamlığı vəziyyətinə və immunoloji göstəricilərinə tə’siri" mövzusunda namizədlik dissertasiyası müdafiə etmişdir.

Minayə Nəbiyevanın elmi fəaliyyəti 25 elmi məqalədə və 2 elmi metodik tövsiyədə öz əksini tapmışdır. Hal-hazırda uşaq və yeniyetmələr gigiyenası və əmək gigiyenası kafedrasında baş müəllim vəzifəsində işləyir.

MƏHƏMMƏDƏLİ BABAŞOV

Məhəmmədəli Allahverdi oğlu Babaşov 1959-cu il avqustun 6-da Bolnisi rayonunun Faxralı kəndində anadan olmuşdur. 1966-1976-cı illərdə Faxralı kənd orta məktəbində təhsil almışdır. 1976-cı ildə Azərbaycan Dövlət Universiteti şərqşünaslıq fakültəsinin ərəb filologiyası şö’bəsinə daxil olmuşdur. 1980-ci ildə IV kursdan sonra Yəmən Xalq Demokratik Respublikasına ərəb dili tərcüməçisi kimi e’zam olunmuşdur. 1980-1983-cü illərdə Yəmənin paytaxtı Ədən şəhərində tərcüməçi işləmişdir.

1983-cü ildə Yəməndən geri döndükdən sonra yenidən Universitetin V kursunda təhsilini davam etdirmişdir. 1984-cü ildə Universiteti bitirmiş və keçmiş SSRİ-nin Müdafiə Nazirliyinin xəttilə hərbi xidmət keçmək məqsədilə hərbi tərcüməçi olaraq Əlcəzairə göndərilmişdir. 1984-1986-cı illər ərzində Batna Ali Ümumqoşun hərbi məktəbində tərcüməçi və Biskra hərbi desant qüvvələri məktəbində baş tərcüməçi vəzifəsində xidmət etmişdir. 1987-ci ilin yanvar ayında baş leytenant rütbəsində ordudan tərxis olunmuşdur.

1987-ci ildə Azərbaycana dönərək "Bizim həyat" qəzetində tərcüməçi-müxbir vəzifəsində çalışmışdır. 1989-cu ildə SSRİ Jurnalistlər birliyinin üzvlüyünə qəbul olunmuşdur.

1989-cu ilin noyabr ayından e’tibarən Azərbaycan Respublikası Elmlər Akademiyası Əlyazmalar İnstitutunda baş laborant vəzifəsinə işə qəbul edilmişdir. 1994-cü ilin oktyabr ayına qədər həmin institutun "Ərəbdilli yazılı abidələr" şö’bəsində kiçik elmi işçi vəzifəsində elmi fəaliyyətini davam etdirmişdir. 1992-ci ilin sentyabr ayından 1995-ci ilin mart ayına qədər Türkiyənin xeyriyyəçi-maarifpərvər "Çağ" öyrətim işlətmələri şirkətinin Azərbaycan təmsilçisi olaraq fəaliyyət göstərmişdir. 1994-cü ilin oktyabr ayından "Qafqaz" Universitetinin xarici əlaqələr üzrə prorektoru vəzifəsində işləmişdir. Həmin dövrdən e’tibarən Universitetin dosenti, ilahiyyət fakültəsinin dekanı vəzifəsində çalışmışdır. Hal-hazırda həmin universitetin Dil tədrisi mərkəzinin müdiri və elm, tədris və xarici əlaqələr üzrə rektorun müşaviri vəzifəsində çalışmaqdadır.

1993-cü ildə Azərbaycan Respublikası EA Əlyazmaları İnstitutun dissertantı kimi başladığı "Şafii məzhəbi tərixində Yusif Ərdəbili və onun "əl-Ənvar li-’əməlil-əbrar" əsəri adlı tədqiqat işini tamamlamış və 20 iyun 1997-ci ildə ilahiyyat elmləri namizədi elmi dərəcəsi almaq üçün dissertasiyasını müdafiə etmişdir. İslamşünaslığa dair 2 kitabın tərcüməçisi, 16 elmi əsərin müəllifi və 2 kitabın elmi redaktoru olmuşdur.

MURTUZ MƏMMƏDOV

Murtuz Novruz oğlu Məmmədov 1943-cü ildə Bolnisi rayonunun Darvaz kəndində ziyalı ailəsində anadan olmuşdur.

1960-cı ildə Darvaz orta məktəbini ə’la qiymətlərlə bitirmişdir. 1960-cı ildə APRDƏİ-na (indiki BSU) daxil olmuş, 1965-ci ildə həmin institutu bitirmiş, tə’yinatla Lerik rayonunun Şingədulan kəndində müəllim kimi əmək fəaliyyətinə başlamışdır. Sonra pedaqoji fəaliyyətini Darvaz kənd orta məktəbində davam etdirmişdir. Təhsilini davam etdirmək həvəsi, elmi axtarışlara meyl onu Gəncə şəhərinə - H. Zərdabi adına Pedaqoji İnstituta gətirib çıxarmışdır. 1968-ci ildən burada pedaqoji fəaliyyətə başlamışdır. 1970-ci ildə "M. Qorki və Azərbaycan dramaturgiyası" mövzusunda namizədlik dissertasiyası müdafiə etmişdir. Respublikanın dövri mətbuatında elmi-publisistik, ədəbi-bədii yaradıcılıq nümunələri ilə müntəzəm çıxış etmişdir. 330-dan çox elmi-publisistik məqalənin, Azərbaycanda ilk dəfə nəşr olunmuş "İşgüzar rəsmi sənədlərin hazırlanması nümunələri" kitabının müəllifidir. Ömrünün sonunadək H. Zərdabi adına Gəncə Pedaqoji İnstitutunun "Rus və xarici dillər" kafedrasında dosent işləyən Murtuz Məmmədov "1900-1912-ci illərdə dövri mətbuatda ədəbi tənqid məsələləri" mövzusunda doktorluq dissertasiyasının müdafiyə hazır olduğu bir vaxtda, 1988-ci ildə vəfat etmişdir.

MUSA MEHRABOV

Musa Allahverdi oğlu Mehrabov 1950-ci ildə Bolnisi rayonunun Saraclı kəndində anadan olmuşdur. 1957-ci ildə Saraclı kənd orta məktəbinə getmiş, 1967-ci ildə həmin məktəbi qızıl medalla bitirmişdir. 1967-ci ildə Azərbaycan Politexnik İnstitutunun Avtomatika və hesablama texnikası fakültəsinə daxil olmuş, 1972-ci ildə həmin fakültəni fərqlənmə diplomu ilə başa vurmuşdur.

1972-ci ildə göndərişlə Ümumittifaq Neft ETTİ-na işə qəbul olunmuşdur. Musa Mehrabov bu elmi tədqiqat institutunda adi mühəndisdən baş məhəndisə kimi ucalmışdır

1984-cü ildə Cövhər Qala (Qroznı) şəhərində namizədlik dissertasiyası müdafiə edib, elmi dərəcə almışdır. Musa Mehrabov 1984-cü ildə institutun partiya təşkilatının katibi, yanğın və qaz təhlükəsizliyi laboratoriyasının müdiri vəzifəsində fəaliyyət göstərmişdir.

1993-cü ildə institutun baş mühəndisi tə’yin olunmuşdur.

1998-ci ildə institutun nəzdində fəaliyyət göstərən təcrübə sınaq şö’bəsinin bazasında yaradılmış Respublikanın Neft və qaz sənayesinə lazım olan alət, tərtibat və qurğular istehsal edən "İstehsalat mərkəzi" zavodunun baş mühəndisi vəzifəsinə tə’yin olunmuş və hazırda həmin vəzifədə fəaliyyət göstərir.

Musa Mehrabov keçmiş SSRİ Neft nazirliyinin fəxri fərmanı ilə təltif edilmişdir. O, neft və qaz quyularının əsaslı və yeraltı tə’mirində zəncirli boru və (48 mm-dən 114 mm) boru tutan universal ştanq açarlarının (12 mm, 26 mm) müəllifidir.

Musa Mehrabovun elmi fəaliyyəti 100-dən çox elmi əsərdə, o cümlədən: 24 müəlliflik şəhadətnaməsində öz əksini tapmışdır. 1987-ci ildə SSRİ Neft nazirliyi Musa Mehrabova SSRİ Neft ə’laçısı fəxri adı vermişdir.

MUSTAFA ƏLİYEV

Mustafa Alı oğlu Əliyev 1960-cı ildə Bolnisi rayonunun Saraclı kəndində anadan olmuşdur. 1978-ci ildə Saraclı kənd orta məktəbini bitirmiş və Azərbaycan Dövlət Universitetinin tətbiqi riyaziyyat fakültəsinə daxil olmuşdur.

1983-cü ildə ADU-nu (indiki BDU-da) ə’la qiymətlərlə başa vurduqdan sonra Azərbaycan Elmlər Akademiyasının Fizika İnstitutunda elmi fəaliyyətə başlamışdır. 1987-ci ildən Azərbaycan İnşaat Mühəndisləri Universitetinin "Qaz təchizatı və mikroiqlimi təmin edən sistemlər" kafedrasında dosent vəzifəsində çalışır.

1997-ci ildə "Regional qaz təchizatı sistemlərində qaz tələbatı rejimlərinin proqnozlaşdırılması" mövzusunda dissertasiya müdafiə edərək texnika elmləri namizədi elmi dərəcəsi almışdır. Hazırda Azərbaycan İnşaat Mühəndisləri Universitetində pedaqoji fəaliyyəti ilə yanaşı qaz təchizatı problemləri sahəsində elmi fəaliyyətini davam etdirir. İyirmi beşdən çox elmi əsərin, "Maye və qazların tətbiqi mexanikası" sahəsi üzrə monoqrafiyanın müəllifidir.

Mustafa Əliyev respublikanın ali məktəblərində keçirilən elmi konfranslarda çıxış etmiş, məqalələr çap etdirmişdir.