[A] [B-E] [Ə] [F-İ] [K-M] [M] [M-P] [R] [S] [Ş-T] [V-Z]

FAİQ NAMAZOV

Faiq Mirzəli oğlu Namazov 1972-ci il iyulun 3-də Bolnisi rayonunun Darvaz kəndində anadan olmuşdur. 1989-cu ildə Darvaz orta məktəbini bitirmiş və Azərbaycan Dövlət Universitetinin mexanika-riyaziyyat fakültəsinə daxil olmuşdur.

Faiq Namazov 1994-cü ildə universiteti fərqlənmə diplomu ilə bitirmiş və universitetdə saxlanmışdır.

1995-1999-cu illərdə Bakı Dövlət Universitetinin aspiranturasında oxumuşdur. Hazırda universitetin differensial tənliklər kafedrasında işləyir.

Faiq Namazov professor Karlen Xudaverdiyevin elmi rəhbərliyi ilə "Uzun dalğaların simmetrik requlyarizə edilmiş bir sinif yarımxətti tənlikləri üçün bir ölçülü qarışıq məsələnin həllinin tədqiqi" mövzusunda namizədlik dissertasiyası yazmış və 2001-ci ildə müdafiə etmişdir.

Bir sıra beynəlxalq və respublika səviyyəli elmi konfranslarda iştirakçı olmuş və elmi mə’ruzələrlə çıxış etmişdir.

Faiq Namazovun elmi və pedaqoji fəaliyyəti 10-dan çox elmi əsərdə öz əksini tapmışdır.

FƏRHAD NOVRUZOV

Fərhad Xanəhməd oğlu Novruzov 1936-cı ildə Qoçulu kəndində anadan olmuşdur. Orta məktəbi qızıl medalla bitirmiş və sənədlərini Birinci Moskva Tibb İnstitutuna vermişdir. 1961-ci ildə həmin institutu müvəffəqiyyətlə bitirdikdən sonra Fərhad Novruzov akademik B.A. Petrovun ordinaturasında çalışdıqdan sonra Sklifosovski adına Elmi-Tədqiqat İnstitutuna göndərilmiş və 1967-ci ildə burada tibb elmləri namizədi elmi dərəcəsi almaq üçün dissertasiya müdafiə etmişdir.

Fərhad Novruzov 1971-ci ildə SSRİ Səhiyyə Nazirliyi tərəfindən Keniyaya göndərilmiş və ölkənin paytaxtı Nayrobi şəhərinin baş cərrahı kimi fəaliyyət göstərmişdir. Onun bir neçə illik gərgin əməyi nəticəsində burada eksperimental cərrahiyyənin əsası qoyulmuşdur.

Geri döndükdən sonra Fərhad Novruzov SSRİ Səhiyyə Nazirliyi yanında 4-cü baş idarənin klinik xəstəxanasına də’vət olunmuşdur. O, burada baş cərrah vəzifəsində çalışmış, eyni zamanda elmi-tədqiqat işlərini davam etdirərək doktorluq dissertasiyası üzərində işləmişdir.

1984-cü ildə dissertasiyasının avtoreferatı çapdan çıxıb, müdafiə günü tə’yin olunsa da, vaxtsız ölüm iste’dadlı alim-cərrah Fərhad Novruzovun arzusunu gözündə qoymuşdur.

FİRUDİN MƏMMƏDOV

Firudin Osman oğlu Məmmədov 1957-ci ildə Bolnisi rayonunun Saraclı kəndində anadan olmuşdur.

1964-1974-cü illərdə Saraclı orta məktəbində oxumuş, 1974-cü ildə Azərbaycan Dövlət Universitetinin Mexanika riyaziyyat fakültəsinə daxil olmuşdur.

1979-cu ildə Universitetdə təhsilini başa vurduqdan sonra Lerik rayonunun Bistan kəndində dörd il riyaziyyat müəllimi işləmişdir. 1983-1984-cü illərdə Azərbaycan Politexnik İnstitutunun "Nairi 3-1" laboratoriyasında riyaziyyatçı-proqramçı vəzifəsində işləmiş, 1984-cü ildə həmin İnstitutda aspiranturanın əyani şö’bəsinə daxil olmuşdur.

1991-ci ildə "Differensial operatorlar üçün çəkili bərabərsizliklər və onların tətbiqi" mövzusunda dissertasiya müdafiə etmiş, fizika-riyaziyyat elmləri namizədi elmi dərəcəsi almışdır.

Azərbaycan Texniki Universitetinin "Ali riyaziyyat" kafedrasında laborant, baş müəllim vəzifəsində çalışmışdır. Hazırda həmin kafedranın dosentidir.

Firudin Məmmədovun elmi-pedaqoji fəaliyyəti 10 elmi məqalədə öz əksini tapmışdır. O, bir neçə elmi konfranslarda çıxış etmişdir.

FLORA ƏHMƏDOVA

Flora Ələddin qızı Əhmədova 1963-cü ildə Bolnisi rayonunun Cəfərli kəndində müəllim ailəsində anadan olmuşdur. 1970-ci ildə Cəfərli 8 illik məktəbində, 1978-ci ildən isə həmin rayonun Qoçulu kənd orta məktəbində oxumuşdur. 1982-ci ildə Azərbaycan Dövlət Pedaqoji institutunun (indiki ADPU-nun) kimya-biologiya fakültəsinin "Biologiya" şö’bəsinə daxil olmuş, 1987-ci ildə həmin fakültədə təhsilini fərqlənmə diplomu ilə başa vurmuşdur. 1987-ci ildən 1991-ci ilə qədər Bolnisi şəhərində pedaqoji fəaliyyət göstərmişdir. 1991-ci ildə Azərbaycan Respublikası Kənd Təsərrüfatı nazirliyinin Elmi-Tədqiqat Əkinçilik institutunda "Bitki fiziologiyası" ixtisası üzrə aspiranturaya daxil olmuşdur. 1996-cı ildə müvəffəqiyyətlə dissertasiya müdafiə edərək, biologiya elmləri namizədi elmi dərəcəsinə layiq görülmüşdür. Həmin ildən Elmi-Tədqiqat Əkinçilik institutunun "Bitki fiziologiyası" laboratoriyasında kiçik elmi işçi vəzifəsində çalışır. 10-dan çox elmi məqalənin müəllifidir.

Flora Əhmədova bir neçə ittifaq və respublika səviyyəli elmi konfransların iştirakçısı olmuş, məqalələr çap etdirmişdir.

HACI NOVRUZOV

Hacı Xanəhməd oğlu Novruzov 1932-ci il mayın 25-də Borçalı mahalının Bolus nümayəndəliyinin (Bolnisi rayonu) Qoçulu kəndində anadan olmuşdur. 1950-ci ildə Arıxlı kəndində orta məktəbi bitirmiş, həmin ildə APİ-nin (indiki ADPU-nun) coğrafiya fakültəsinə daxil olmuş, oranı 1954-cü ildə bitirmişdir. 1954-1962-ci illərdə Faxralı, İmirhəsən və Qoçulu orta məktəblərində müəllim işləmiş, 1962-ci ildə APİ-nin pedaqogika kafedrasında aspiranturaya daxil olmuş, oranı 1966-cı ildə bitirmişdir. Hacı Novruzov 1966-cı ildə "Şagirdlərin ateist tərbiyəsi" mövzusunda dissertasiya müdafiə etmiş, pedaqoji elmlər namizədi elmi dərəcəsi almışdır. 1966-cı ildən 1967-ci ilə kimi kafedrada baş laborant, 1970-ci ildən müəllim, baş müəllim və dosent vəzifələrində çalışmışdır. O, 1983-cü ildən 1988-ci ilə kimi coğrafiya fakültəsində dekan müavini vəzifəsini icra etmişdir.

Hacı Novruzov 150-dən çox elmi, pedaqoji kitab və jurnal məqalələrinin müəllifidir. Onun "Şagirdlərin ateist tərbiyəsi", "Şagirdlərin dünyagörüşünün formalaşdırılmasının elmi-pedaqoji əsasları", "Pedaqogikaya giriş", "Tələbələrin pedaqoji təcrübəsi", "Pedaqogika və şəxsiyyətin formalaşdırılması", və s. kimi kitabları pedaqoji ictimaiyyətə yaxşı mə’lumdur.

O, 1973-cü ildə Azərbaycan Maarif Nazirliyinin fəxri fərmanı ilə təltif olunmuş , ADPU-nun 60 illik yubileyi münasibətilə fəxri fərmanla mükafatlandırılmışdır. 1988-ci ildə uzunmüddətli pedaqoji fəaliyyətinə görə "Əmək veteranı" medalına layiq görülmüşdür. Hacı Novruzov uzun müddət qüsurusuz pedaqoji fəaliyyətinə görə 1993-cü ildə rektorluğun xüsusi yazılı təşəkkürünü almışdır.

HƏSƏNƏLİ ƏLİZADƏ

Həsənəli Əli oğlu Əlizadə 1922-ci ildə Borçalı mahalının Bolus nümayəndəliyinin Faxralı kəndində anadan olmuşdur. 1931-ci ildə Faxralı orta məktəbinin 1 sinfinə getmiş, 1941-ci ildə həmin məktəbi bitirmişdir. 1941-ci ildə hərbi xidmətə çağırılmış, 1942-ci ildə cəbhədə yaralanıb və həmin ilin sonunda ordudan tərxis olunmuşdur. 1943-1945-ci illərdə kolxozda mühasib işləmişdir. 1945-ci ildə Azərbaycan Xalq Təsərrüfatı İnstitutuna daxil olmuş, 1949-cu ildə həmin institutu bitirmişdir. 1949-1950-ci illərdə Mərkəzi Statistika İdarəsinin Tovuz rayon şö’bəsində müfəttiş, 1950-1952-ci illərdə mühasib, 1952-1955-ci illərdə Gəncə vilayət maliyyə şö’bəsində vergi üzrə baş müfəttiş vəzifələrində çalışmışdır. 1955-ci ildən ömrünün sonunadək Azərbaycan kənd təsərrüfatı Akademiyasının mühasibat uçotu və statistika kafedrasında dosent vəzifəsində çalışmışdır. 1971-ci ildə namizədlik dissertasiyasını müdafiə etmiş və iqtisad elmləri namizədi elmi dərəcəsi almışdır. 40-dan çox elmi, elmi-metodik göstərişin müəllifidir. Bir neçə dəfə keçmiş ittifaq və respublika konfranslarının iştirakçısı olmuş, məqalələr çap etdirmişdir.

Hüseyn Namaz oğlu Qurbanov 1948-ci ildə Bolnisi rayonunun Saraclı kəndində anadan olmuşdur. 1954-1965-ci illərdə kənd orta məktəbində təhsil almışdır.

Məktəbi gümüş medalla bitirdikdən sonra 1965-ci ildə Azərbaycan Dövlət Universitetinin kimya fakültəsinə daxil olmuş, 1970-ci ildə fərqlənmə diplomu ilə bitirmiş, tə’yinatla 2 il müəllim işləmişdir.

1972-ci ildən 1983-cü ilədək Azərbaycan Elmlər Akademiyasının Neft-Kimya Prosesləri İnstitutunda çalışmışdır. 1983-1986-cı illərdə həmin institutunun aspiranturasında oxumuş, 1988-ci ildə "Sintetik neopolyolların mürəkkəb efirlərinin sintezi, onların sürtkü materiallarının əsası və komponent kimi tədqiqi" mövzusunda dissertasiya müdafiə edib kimya elmləri namizədi elmi dərəcəsi almışdır. 1989-cu ildən "Sintetik sürtkü yağlarının sintezi və texnologiyası" laboratoriyasında baş elmi işçi vəzifəsində çalışır. 35 elmi əsərin, 4 patentin müəllifidir. 10-dan çox ittifaq və respublika konfranslarında iştirak edərək, elmi məqalələr çap etdirmişdir.

HÜSEYN MƏMMƏDOV

Hüseyn Sayad oğlu Məmmədov 1942-ci il martın 17-də Bolnisi rayonunun Aşağı Qoşakilsə kəndində anadan olmuşdur. Kənd 8 illik məktəbini bitirdikdən sonra Saraclı orta məktəbini bitirmişdir.

1958-ci ildə Azərbaycan Politexnik institutunun mexanika fakültəsinə daxil olmuş, 1963-cü ildə həmin institutu bitirmişdir. Tə’yinatla Mingəçevir şəhərində "Azərelektroizolyasiya" zavodunda mühəndis kimi işə başlamışdır.

1964-1966-cı illərdə hərbi xidmətdə olmuş, 1966-1969-cu illərdə həmin zavodda konstruktor şö’bəsinin rəisi, zavodun baş mexaniki vəzifəsində işləmişdir.

1969-1971-ci illərdə strateji raket qoşunlarında cihazların mühəndis - dövlət yoxlayıcısı vəzifəsində xidmət etmişdir.

1971-ci ildən Mingəçevirdə sənaye kombinatının direktor müavini, sonra həmin kombinatın direktoru işləmişdir.

1976-cı ildə Mingəçevir yol maşınları zavodunda çalışmışdır. Qısa müddət işlədikdən sonra müasir yol maşınları istehsalının əsasını qoymuşdur.

Hüseyn Məmmədov Qarşılıqlı İqtisadi Yardım Şurasında (QİYŞ) 1986-1991-ci illərdə İqtisadi və Elmi-Texniki əməkdaşlıq üzrə maşınqayırma sahəsinə aid beynəlxalq müşavirələrdə Polşada, Çexoslovakiyada, Rumıniyada, Macarıstanda və Yuqoslaviyada sədrlik etmişdir.

1988-ci ildə "Tütün çöplərini xırdalamaq üçün maşının əsas parametrlərinin optimallaşdırılması" mövzusunda namizədlik dissertasiyasını müdafiə edib, texnika elmləri namizədi elmi dərəcəsi almışdır.

O. 23 elmi əsərin, 2 ali məktəb dərsdiyinin və 14 ixtiranın müəllifidir.

HÜSEYN MUSAYEV

Hüseyn Mustafa oğlu Musayev 1947-ci il mayın 1-də Bolnisi rayonunun Saraclı kəndində anadan olmuşdur. Orta təhsilini 1954-1965- illərdə kənd məktəbində almışdır. O, Saraclı məktəbinin ilk qızıl medal alan mə’zunu olmuşdur.

1965-ci ildə Azərbaycan Dövlət Universitetinin mexanika-riyaziyyat fakültəsinə daxil olmuş, 1970-ci ildə ali təhsilini başa vurduqdan sonra hərbi xidmətə çağırılmışdır.

Elmi fəaliyyətinə 1972-ci ilin sentyabr ayından Azərbaycan Elmlər Akademiyasının Kibernetika İnstitutunda kiçik elmi işçi kimi başlamış, 1982-ci ildən isə paralel olaraq həm də Azərbaycan Dövlət Neft Akademiyasında pedaqoji fəaliyyətlə məşğul olmuşdur.

1985-ci ildə "Çoxfazalı süzülmə məsələlərinin dəyişən şəbəkələrdə ədədi həlli" mövzusunda dissertasiya müdafiə etmiş, fizika-riyaziyyat elmləri namizədi elmi dərəcəsi almışdır.

Hazırda Azərbaycan EA Kibernetika İnstitutunda "Ədədi modelləşdirmənin üsul və alqoritmləri" bölməsinə rəhbərlik edən Hüseyn Musayev 40-a qədər elmi əsərin müəllifidir.

XƏLİL ƏLİYEV

Xəlil Hüseyn oğlu Əliyev 1950-ci ildə Bolnisi rayonunun Babakişilər kəndində anadan olmuşdur. Doğma yurdda orta təhsilini aldıqdan sonra, 1969-cu ildə Kirovobad (indiki Gəncə) şəhərində H. Zərdabi adına Dövlət Pedaqoji İnstitutunun filologiya fakültəsinə daxil olmuş və 1974-cü ildə həmin fakültəni fərqlənmə diplomu ilə bitirmişdir.

Xəlil Əliyev tə’yinatla 3 il Qutqaşen (indiki Qəbələ) rayonunda işləmiş, 1980-cı ildən isə H. Zərdabi adına GDPİ-də çalışır, dosentdir, 1992-ci ildə namizədlik dissertasiyası müdafiə edib elmi dərəcə almışdır. Onun elmi pedaqoji fəaliyyəti 40-a yaxın elmi əsərdə öz əksini tapmışdır.

Xəlil Əliyevin çap olunmuş elmi məqalələri və kitabçaları "Onomastikanın" tədrisinə aiddir. "Onomastikanın" tədrisinə dair metodik tövsiyyə" adlı kitabı işıq üzü görmüşdür. Xəlil Əliyev "Gürcüstanın türk mənşəli toponimləri" mövzusunda doktorluq dissertasiyasını tamamlayıb, müdafiə şurasına təqdim etmişdir.

Xəlil Əliyev hal-hazırda pedaqoji fəaliyyəti ilə yanaşı elmi araşdırmalarını da davam etdirir.

XƏLƏDDİN ƏHMƏDOV

Xələddin Əmir oğlu Əhmədov 1941-ci il fevralın 1-də Bolnisi rayonunun Faxralı kəndində anadan olmuşdur. Xələddin Əhmədov 1947-ci ildə Cəfərli ibtidai məktəbinin 1-ci sinfinə daxil olmuş, 1951-ci ildə həmin məktəbin 4-cü sinfini ə’la qiymətlərlə başa vurmuş, Qoçulu kənd 8 illik məktəbinin 5-ci sinfinə daxil olmuşdur. Həmin məktəbi də ə’la qiymətlərlə bitirdikdən sonra 1955-ci ildə Bolnisi rayonunun Arıxlı orta məktəbinin 9-cu sinfinə daxil olmuşdur. Orta məktəbi 1958-ci ildə qızıl medalla bitirmiş, Azərbaycan Politexnik İnstitutunun mexanika fakültəsinə daxil olmuşdur. 1963-cü ildə institutu müvəffəqiyyətlə bitirmişdir. Həmin il göndərişlə Bakının leytenant Şmidt adına (indiki Səttarxan adına) neft maşınqayırma zavodunda mühəndis-konstruktor vəzifəsində əmək fəaliyyətinə başlamışdır. 1963-1965-ci illərdə hərbi xidmətdə olmuşdur. Ordudan tərxis olunduqdan sonra (1965-1966-cı illərdə) öz əvvəlki iş yerinə qayıtmışdır.

Elmə və texnikaya olan həvəsi 1966-cı ildə onu vaxtilə təhsil aldığı Azərbaycan Politexnik İnstitutunun maşınqayırma texnologiyası kafedrasına gətirmişdir. Burada o, pedaqoji fəaliyyətlə yanaşı elmi işlə də məşğul olmuşdur. 1971-ci ildə keçmiş SSRİ-nin ən qabaqcıl texniki ali təhsil ocağı olan N.E. Bauman adına Moskva Ali Texniki məktəbində əyani aspiranturanı bitirmiş, namizədlik dissertasiyası müdafiə edərək texnika elmləri namizədi elmi dərəcəsinə layiq görülmüşdür.

Ələddin Əhmədov Azərbaycanda maşın detallarının e’malı zamanı yaranan daxili gərginlikləri ətraflı tədqiqat edən ilk mütəxəssisdir. Elmi-texniki jurnallarda çap olunmuş 10-dan çox elmi məqalənin və tədris metodik vəsaitinin müəllifidir. Xələddin Əhmədov 1988-ci ildə T.Q. Şevçenko adına Kiyev Dövlət Universitetin nəzdində 10 aylıq xüsusi xarici dillər kurslarının fransız dili şö’bəsini müvəffəqiyyətlə bitirmiş, 1989-1992-ci illərdə Əcəzair Xalq Demokratik Respublikasının Beşar Texniki Universitetində müəllim işləmişdir. Hazırda o, Azərbaycan Texniki Universitetinin maşınqayırma fakültəsinin metalkəsən dəzgahlar və alətlər kafedrasının dosentidir.

XƏLƏF DAŞDƏMİROV

Xələf Yusif oğlu Daşdəmirov 1944-cü il mayın 6-da Bolnisi rayonunun Saraclı kəndində kolxozçu ailəsində anadan olmuşdur.

1962-ci ildə Saraclı orta məktəbini bitirmiş və həmin ildə Bakı elektrik rabitə texnikumuna daxil olmuşdur. 1964-1968-ci illərdə hərbi xidmətdə olmuşdur. 1971-ci ildə Azərbaycan Politexnik İnstitutunun (indiki ATU-nun) Hidromeliorasiya fakültəsinə daxil olmuşdur.

1977-ci ildə əmək fəaliyyətinə başlamışdır. 1995-ci ilə kimi, AzPİ-də və Azərbaycan İnşaat Mühəndisləri İnstitutunun "Hidrotexniki qurğular və hidravlika" kafedrasında laboratoriya müdiri, assistent, 1995-ci ildən isə kafedranın baş müəllimi vəzifəsində işləmişdir. 1997-ci ildə Azərbaycan İnşaat Mühəndisləri Universitetində namizədlik dissertasiyasını uğurla müdafiə etmiş, texnika elmlər namizədi elmi dərəcəsi almışdır. Azərbaycan İnşaat Mühəndisləri Universitetinin "Hidrotexniki qurğular və hidravlika" kafedrasının dosentidir.

Xələf Daşdəmirovun 55-dən çox elmi əsəri və bir neçə ixtirası var. Hal-hazırda doktorluq dissertasiyası üzərində işləyir. Apardığı elmi-tədqiqat işləri respublikanın su təsərrüfatı obyektlərində geniş tətbiq olunur.

İBADƏT MÖVLƏLİ (RÜSTƏMOV)

İbadət Məhəmməd oğlu Mövləli 1942-ci il aprel ayının 3-də Borçalıda-Bala Muğanlı kəndində anadan olmuşdur. 1949-cu ildə Bala Muğanlı ibtidai məktəbinə daxil olmuş, 1952-ci ildə təhsilini davam etdirmək üçün Qızılhacılı 7 illik məktəbinə daxil olmuşdur. 1956-57-ci tədris ilində həmin məktəbi bitirdikdən sonra Başkeçid (Dmanisi) rayonunun Kirovisi kəndində orta məktəbə daxil olmuş, 8-ci sinfi bitirmiş, sonra isə tam təhsilini Bolnisi rayonunun Arıxlı orta məktəbində davam etdirmişdir. 1958-1959-cu tədris ilində həmin məktəbi kamal attestatı ilə bitirmiş və 1960-cı ilin dekabr ayına kimi "N.Nərimanov" adına kolxozda işləmişdir.

1960-cı ildə ordu sıralarına çağırılmış və Sovet ordusunda hərbi xidmətdə olmuşdur.

1962-ci ilin sentyabr ayından 1963-cü ilin yayına kimi Bolnisi rayonunun Arıxlı südçülük-tərəvəzçilik sovxozunda fəhlə işləmişdir.

1963-cü ildə Bakıda M.F.Axundov adına APDİ-na daxil olmuş, 1968-ci ildə ali təhsilini başa vurmuşdur. Və həmin il İnstitut Elmi Şurasının qərarı ilə gənc mütəxəssis kimi institutda saxlanmışdır.

1966-cı ildən mətbuatda şe’rləri, elmi, elmi-publisistik məqalələri ilə çıxış edir. 200-dən artıq yazısı mətbuat səhifələrində dərc olunmuşdur.

1968-ci ildə M.F.Axundov adına APDİ-da nəşrə başlayan çoxtirajlı "Bilik" qəzetinin, 1989-cu ildə nəşrə başlayan "Xəzərin keşiyində" ordu qəzetinin, 1993-cü ildə nəşrə başlayan "Borçalı" jurnalının və "Borçalı" qəzetinin redaksiya hey’ətinin üzvlərindən olmuşdur. "Borçalı" jurnalında baş redaktor müavini olmuş, "Borçalı" qəzetindən isə şö'bə müdiri vəzifəsində çalışmışdır.

İki nüsxə qopuz düzəldib: "Ozan qopuzu"-(1990-cı il), Nizami muzeyinə bağışlanıb, "Qolca qopuz" (1992-ci il) müəllifin özündədir.

Elmi tədqiqatları əsasən aşıq yaradıcılığına meyllidir. Keçmiş ittifaqın Minsk, Tbilisi, Daşkənd şəhərlərində ümumittifaq elmi konfranslarında aşıq yaradıcılığına dair mə’ruzələrlə çıxışları olmuşdur. İbadət Mövləlinin 2 kitabı nəşr olunmuşdur. 3 kitabı isə nəşrə hazırdır.

İbadət Mövləli hazırda Bakı Slavyan Universitetinin fəlsəfə kafedrasının dosenti və "Borçalı" qəzetinin şö’bə müdiri vəzifəsində çalışır.

İBAD ƏHMƏDOV

İbad Əhməd oğlu Əhmədov 1944-cü il iyunun 20-də Bolnisi rayonunun Dəmirli kəndində kolxozçu ailəsində anadan olmuşdur.

Dəmirli kəndindəki ibtidai məktəbi 1955-ci ildə bitirmiş, təhsilini Aşağı Güləver kəndindəki 8-illik məktəbdə davam etdirmişdir. 1962-ci ildə Darvaz orta məktəbini bitirmişdir.

1962-ci ildə Azərbaycan Dövlət Tibb İnstitutuna (indiki ATU-na) daxil olmuş və 1968-ci ildə oranı bitirmişdir.

1968-ci ildən 1973-cü ilin mart ayına qədər Azərbaycanın müxtəlif rayonlarında işləmişdir.

1973-cü ilin mart ayında müsabiqə yolu ilə Dövlət Tibb İnstitutunun patoloji anatomiya kafedrasında assistent vəzifəsinə seçilmişdir. Hazırda həmin kafedrada çalışır.

1984-cü ildə Tbilisi şəhərində "Appendisitin müxtəlif morfoloji formaları zamanı onların sinir aparatlarının mikro və ultrostruktur dəyişikliyinə dair" mövzusunda namizədlik dissertasiyası müdafiə etmişdir. 1989-cu ildən kafedrada dossent vəzifəsində çalışır. 30-dan çox elmi məqaləsi çapdan çıxmışdır, elmi tibbi-metodik dərs vəsaitinin müəllifidir.

İBRAHİM GÜLƏHMƏDZADƏ

İbrahim İsmayıl oğlu Güləhmədzadə 1942-ci ildə Bolnisi rayonunun Darvaz kəndində anadan olmuşdur. 1949-cu ildə Darvaz orta məktəbinə getmiş, 1959-cu ildə həmin məktəbi bitirmişdir. 1959-cu ildə Azərbaycan Neft Kimya İnstitutuna daxil olmuş, 1964-cü ildə həmin institutu fərqlənmə diplomu ilə bitirmişdir. 1965-ci ildə Azərbaycan Dövlət Plan Komitəsinin nəzdindəki ETİİ-də kiçik elmi işçi, 1966-cı ildən isə böyük iqtisadçı vəzifəsində çalışmışdır.

1967-1970-ci illərdə Azərbaycan XTİ-nin əyani aspiranturasında oxumuş, 1971-ci ildə isə müvəffəqiyyətlə namizədlik dissertasiyası müdafiə etmişdir.1970-ci ildə sənaye iqtisadiyyatı kafedrasında müəllim və 1971-ci ildən 1978-ci ilə qədər baş müəllim işləmişdir. 1978-ci ildən 1988-ci ilə kimi həmin kafedrada dosent vəzifəsində çalışmışdır. 1988-ci ildən N.A. Voznesenski adına Leninqrad Maliyyə-İqtisad İnstitutunun Bakı filialının sənaye iqtisadiyyatı kafedrasına dosent seçilmişdir.

1988-ci ilin ikinci yarsından 1998-ci ilə qədər plan-iqtisad fakültəsinin dekan müavini vəzifəsini icra etmişdir. İbrahim Güləhmədzadənin 50-ə yaxın elmi əsəri çap olunmuşdur. O, dəfələrlə respublikada keçirilən elmi müşavirə və konfranslarda yaxından iştirak edib, elmi məqalələr çap etdirmişdir.

İbrahim Güləhmədzadə 1998-ci ildə Bakıda vəfat etmişdir.

İBRAHİM ƏLİZADƏ

İbrahim İlyas oğlu Əlizadə 1956-cı ildə Bolnisi rayonunun Faxralı kəndində anadan olmuş, 1973-cü ildə Faxralı kənd orta məktəbini bitirmişdir. Orta məktəbdə oxuduğu zaman fizikaya olan həvəsi onu Azərbaycan Dövlət Universitetinin fizika fakültəsinə gətirmiş və 1978-ci ildə həmin fakültəni müvəffəqiyyətlə bitirmişdir. Ağsu rayonunun İlxıçı kənd orta məktəbində bir il müəllim işlədikdən sonra, 1980-cı ildə "Azon" zavodunun xüsusi konstruktor bürosuna mühəndis-konstruktor vəzifəsinə işə düzəlmişdir. 1982-ci ildən Azərbaycan İnşaat Mühəndisləri İnstitutunun fizika kafedrasında baş laborant vəzifəsində işə başlamış və 1983-cü ildə "Bərk cisimlər fizikası" ixtisası üzrə əyani aspiranturaya daxil olmuşdur. 1984-cü ildən aspiranturadakı təhsilini Moskva Fizika Mühəndisləri İnstitutunda (MFMİ) məqsədli aspirant kimi davam etdirmişdir. 1986-cı ildə MFMİ-də fəaliyyət göstərən ixtisaslaşdırılmış elmi şurada vaxtından əvvəl namizədlik dissertasiyası müdafiə etmiş, fizika-riyaziyyat elmləri namizədi elmi dərəcəsi almışdır.

1991-ci ildən AzİMU-nun fizika kafedrasında baş elmi işçi vəzifəsində işləmişdir. İbrahim Əlizadənin aldığı elmi nəticələr respublikamızın və ABŞ, İtaliya, Türkiyə kimi ölkələrin elmi jurnal və toplularında çap olunmuşdur. İbrahim Əlizadə 1987-ci ildən AzİMU-nun "Fizika" kafedrasında əvvəlcə baş laborant, sonradan isə assistent işləmişdir. O, "Fizika" fənnindən laboratoriya dərslərində tədris-metodiki vəsaitinin müəlliflərindən biridir. 1991-ci ildə "Fizika", "Abituriyentlər üçün vəsait" kitabını çap etdirmişdir. 1996-cı ildə "Fizika, Ali məktəblərə daxil olmaq istəyənlər üçün testlər" kitabçasını çap etdirmişdir. Azərbaycan Respublikası Təhsil Nazirliyinin qrifi ilə Əcnəbi vətəndaşların hazırlıq fakültələri üçün "Fizika" fənni proqramının müəllifidir. 1993-1997-ci illərdə AzİMU-nun "Ümumi texniki fənlər" (sonralar "Ümumi hazırlıq fənləri") kafedrasının müdiri vəzifəsində işləmiş, 1995-ci ildən dosentdir. 1996-1999-cu illərdə eyni zamanda AzİMU-nun nəzdində fəaliyyət göstərən fizika-riyaziyyat təmayüllü litseyin direktor müavini vəzifəsində çalışmışdır. 1997-ci ildən indiyə qədər fizika kafedrasında dosent, kafedra müdirinin müavini vəzifəsində işləyir. O, 50-yə qədər elmi məqalənin, dərs vəsaitinin və metodik göstərişin müəllifidir.

İLQAR MEHRABOV

İlqar Abdulla oğlu Mehrabov 1971-ci il fevral ayının 13-də Bakı şəhərində anadan olmuşdur. 1977-ci ildə Bakı şəhərindəki 20 saylı orta məktəbdə birinci sinfə getmiş və 1987-ci ildə həmin məktəbi ə’la qiymətlərdə bitirmişdir.

İlqar Mehrabov 1987-ci ildə Azərbaycan İnşaat-Mühəndisləri Universitetinin İnşaatın idarə olunması və iqtisadiyyatı fakültəsinə daxil olmuşdur. 1989-cu ildən 1993-cü ilədək o, Varşava Texniki Universitetində təhsilini davam etdirmiş və inşaatın iqtisadiyyatı üzrə magistr elmi dərəcəsinə yiyələnmişdir. 1995-ci ildə Azərbaycan İnşaat-Mühəndisləri Universitetinin "İnşaatın iqtisadiyyatı" kafedrasında qiyabi aspiranturaya daxil olmuş və 1999-cu ildə aspiranturanı müvəffəqiyyətlə bitirmişdir. 1999-cu ilin sentyabrında BDU-nun nəzdindəki Elmi Şurada "Azərbaycan Respublikasında inşaat materialları və mə’mulatları sənayesi müəssisələrinin bazar iqtisadiyyatına keçidinin bə’zi problemləri" mövzusunda namizədlik dissertasiyası müdafiə etmiş və iqtisad elmləri namizədi elmi dərəcəsi almışdır.

İlqar Mehrabov hazırda İnşaat-Mühəndisləri Universitetinin "İnşaatın iqtisadiyyatı" kafedrasının baş müəllimidir. O, elmi araşdırmalarını davam etdirir. 11 elmi məqalənin müəllifidir. O, bir sıra elmi konfranslarda çıxış etmiş və məqalələr çap etdirmişdir.

İLHAM MUSAYEV

İlham Hümbət oğlu Musayev 1955-ci il yanvarın 11-də Bolnisi rayonunun İncəoğlu kəndində anadan olmuşdur.

1961-ci ildə İncəoğlu kənd səkkizillik məktəbinin birinci sinfinə getmiş, 1969-cu ildə Bakıda 1 saylı respublika fizika-riyaziyyat təmayüllü məktəbin 9-cu sinfinə daxil olmuş, 1971-ci ildə həmin məktəbi bitirmişdir.

1971-ci ildə Azərbaycan Dövlət Universitetinin mexanika-riyaziyyat fakültəsinə daxil olmuş, 1976-cı ildə isə gənc mütəxəssis kimi əmək fəaliyyətinə başlamışdır.

1978-ci ildə Azərbaycan EA Riyaziyyat və Mexanika İnstitutunda aspiranturaya qəbul olmuş, 1982-ci ildə namizədlik dissertasiyası işini müdafiə etmişdir.

1982-ci ildən 1993-cü ilə kimi həmin institutda kiçik elmi işçi, elmi işçi və baş elmi işçi vəzifələrində çalışmışdır.

1993-cü ildə Elm və Təhsil Mərkəzində "Təfəkkür" Universitetinin tədris işləri üzrə müdir vəzifəsinə irəli çəkilmişdir.

İlham Musayevin elmi və pedaqoji fəaliyyəti 30 elmi əsərdə və Moskva şəhərində çapdan çıxmış "Elastik-plastik və dağıla bilən konstruksiya elemntlərinin bə’zi məsələləri" adlı monoqrafiyada öz əksini tapmışdır. Bu kitab ali məktəb tələbələri, aspirantlar, elmi işçilər və mühəndis-konstruktor işçiləri üçün nəzərdə tutulmuşdur. Bu müddət ərzində 20 beynəlxalq, ittifaq və respublika səviyyəli konfranslarda çıxış edib, elmi məqalələr çap etdirmişdir.

İlham Musayev son 5 ildə 3 dəfə beynəlxalq konqresdə çıxış etmişdir. Bu çıxışlar "Bütöv mühit və konstruksiyaların dinamikası və texnoloji prosesləri"nə həsr olunmuşdur.

1997-ci ildə İndoneziyada elmi məqalə çap etdirmişdir.

Üç nəfər aspirantın opponenti olmuşdur.

"Açıq söz" qəzetinin redaksiya hey’ətinin üzvüdür. O, eyni zamanda Təhsil Nazirliyinin ali məktəblər üzrə normativ sənəd və əsasnamələri hazırlayan komissiyanın üzvüdür.

Hal-hazırda Təfəkkür Universitetinin ali riyaziyyat kafedrasının professorudur.

İSA BABAŞOV

İsa Səməd oğlu Babaşov 1939-cu il avqust ayının 1-də Bolnisi rayonunun Faxralı kəndində anadan olmuşdur. O, 1958-ci ildə Faxralı orta məktəbini bitirdikdən sonra AzPİ-nin mexanika fakültəsinə daxil olmuşdur. 1963-cü ildə həmin institutu fərqlənmə diplomu ilə bitirmişdir. 1964-1965-ci illərdə orduda xidmət etmiş, tərxis olunduqdan sonra Azərbaycan Politexnik İnstitutunun metallurgiya kafedrasında müəllim işləmişdir. 1968-1971-ci illərdə Moskva Polad və Ərintilər İnstitutunda aspiranturada oxumuş və "Dəmir-kükürd sisteminin təzyiq-temperatur-tərkib

koordinatlarındakı diaqramının tədqiqi" mövzusunda namizədlik dissertasiyasını müdafiə etmişdir. Sonra Azərbaycan Politexnik İnstitutunda müəllimlik fəaliyyətini davam etdirmişdir.

1973-cü ildə İsa Babaşov Moskva şəhərində yerləşən "Vsesoyuznıy Nauçno-İssledovatelskiy İnstitut Neorqoaniçeskix Materialov (VNİİNM)" institutuna işə də’vət olunmuş və həmin institutda 1985-ci ilin sentyabr ayına qədər baş elmi işçi və elmi qrupun rəhbəri vəzifəsində çalışmışdır. Sonrakı illərdə pedaqoji və elmi fəaliyyətini Azərbaycan Politexnik İnstitutunda və "Azərelektromaş" Elmi-İstehsalat Birliyinin Azərbaycan Elmi-Tədqiqat Elektrotexnika İnstitutunda davam etdirmişdir. İsa Babaşov 40 elmi əsərin müəllifidir. Elmi-tədqiqat işlərinin nəticələri haqqında Moskva, Leninqrad, Sverdlovsk və Bakı şəhərində keçirilən elmi konfranslarda çıxış etmişdir. Onun məqalələri Moskvada Bakıda çıxan jurnal və məcmuələrdə nəşr olunmuşdur. İsa Babaşov öz tədqiqatlarında metallurji proseslərin nəzəri və praktiki məsələlərin həllinə, riyazi üsulların elmi-tədqiqat işlərində tətbiq olunmasına geniş yer vermişdir. O, "Riyazi üsulların elmi-tədqiqat işlərinə tətbiqi" adlı kitabın müəlliflərindən biridir.

İSA XƏLİLOV

İsa Əli oğlu Xəlilov 1961-ci il may ayının 2-də Bolnisi rayonunun Faxralı kəndində ziyalı ailəsində anadan olmuşdur.

1968-1978-ci illərdə Faxralı kəndində orta təhsil almışdır. 1978-ci ildə məktəbi ə’la qiymətlərlə başa vurub elə həmin ildə də Azərbaycan Politexnik İnstitutunun (indiki Azərbaycan Texniki Universitetinin) maşınqayırma fakültəsinə daxil olmuşdur.

1983-cü ildə Azərbaycan Respublikası Təhsil Nazirliyi onun qaydadankənar (iki il tə’yinat üzrə işləmədən) aspiranturaya sənəd verməsi haqqında sərəncam vermişdir. 1984-cü ildə İsa Xəlilov aspiranturaya daxil olmuş, 1990-cı ildə "Dişli muftaların sistemli ehtimal hesabı alqoritminin yaradılması" mövzusunda namizədlik dissertasiyası müdafiə etmiş, texnika elmləri namizədi elmi dərəcəsi almışdır. 30-dan çox elmi əsərin müəllifidir. Əsərləri Azərbaycanda, Rusiyada, Türkiyədə, Almaniya Federativ Respublikasında nəşr edilmişdir. 4 elmi-metodik məcmuənin, 1 dərsliyin və 2 texniki lüğət kitabının müəllifidir. "Makine elemanları sözlüyü" adlı rusca-azərbaycanca-türkcə-ingiliscə texniki lüğət kitabı Türkiyədə nəşr edilmişdir. "Elevatorların layihələndirilməsi" adlı dərs vəsaiti bu sahədə azərbaycanca yazılmış ilk kitabdır. Azərbaycanda ilk dəfə olaraq "Maşınların yaradılmasının texniki əsasları" fənni üzrə mühazirələrin müəllifidir.

1987-1991-ci illərdə Azərbaycan Texniki Universitetinin "Maşın detalları və YQNM" kafedrasında assistent, 1991-ci ildən bu günə kimi isə dosent vəzifəsində çalışır. Bununla yanaşı 1990-1992-ci illərdə həmin universitetin "Robot texnikası" fakültəsində tədris işləri üzrə, 1993-1998-ci illərdə isə elmi işlər üzrə dekan müavini vəzifəsində çalışmışdır.

O, 1988-ci ildə Moskvada Bauman adına Ali Texnika Məktəbdə ixtisasartırma kursu keçmişdir. 1992-ci ildə Almaniya Federativ Respublikasının Akademik Mübadilələr İdarəsi İsa Xəlilovun elmi fəaliyyətini nəzərə alıb onu bir illik Boxum şəhərinin Ruhr Universitetinə elmi işə dəvət etmişdir. O, burada tamamilə yeni bir prinsiplə işləyən yumruqlu mexaniki ötürmənin kinematik hesabı alqoritmini tərtib etmişdir. 1998-ci ildə AFR Akademik Mübadilələr İdarəsi yenidən İsa Xəlilovu Almaniyanın Karlsrue Universitetinə elmi işə dəvət etmişdir.

İsa Xəlilov 1996-1997-ci illərdə AFR-nın 80 illik tarixi olan, bütün dünyada texniki-iqtisadi kadr mübadilələri aparan məşhur Karl Düysberq cəmiyyətinin dəvəti ilə yenidən Almaniyada olmuşdur.

İsa Xəlilov hal-hazırda Daymler Kraysler AC-nin Azərbaycan təmsilçiliyində satış şö’bəsinin müdiri vəzifəsində çalışır.

İSAXAN ÖMƏROV

İsaxan Mahmud oğlu Ömərov 1927-ci ildə Borçalının Qoçulu kəndində anadan olmuşdur. Orta məktəbi Faxralı kəndində bitirdikdən sonra təhsilini davam etdirmək üçün Bakıya gəlmiş, sənədlərini Azərbaycan Dövlət Universitetinin jurnalistika fakültəsinə vermişdir.

1950-ci ildə universiteti fərqlənmə diplomu ilə bitirən İsaxan Ömərov tə’yinatla Azərinforma işə göndərilmişdir. O, burada adi tərcüməçidən direktor müavini vəzifəsinədək yüksəlmiş və ömrünün sonunadək bu vəzifədə şərəflə çalışmışdır.

İsaxan Ömərov fəaliyyətə başladığı gündən ömrünün sonunadək kamil və peşəkar bir mütərcim kimi o dövrün bütün partiya, dövlət və hökumət xadimlərinin nitqlərinin, çıxışlarının və əsərlərinin tərcüməsində fəal iştirak etmişdir.

İsaxan Ömərov eyni zamanda elmi tədqiqatla da məşğul olmuşdur. O, 1960-cı ildə professor Cəfər Cəfərovun rəhbərliyi ilə filologiya elmləri namizədi elmi dərəcəsi almaq üçün dissertasiya müdafiə etmişdir.

Uzun illər mətbuatda gərgin və uğurlu fəaliyyətinə görə İsaxan Ömərov respublikanın əməkdar jurnalisti fəxri adına layiq görülmüşdür.

İ.Ömərov 1990-cı ildə vəfat etmişdir.

İSMƏT ƏHMƏDOV

İsmət Süleyman oğlu Əhmədov 1952-ci ildə Bolnisi rayonunun Saraclı kəndində anadan olmuşdur.

1969-cu ildə Saraclı orta məktəbini ə’la qiymətlərlə bitirmiş elə həmin ildə Azərbaycan Dövlət Universitetinin Fizika fakültəsinə daxil olmuşdur.

1974-cü ildə tə’yinatla Azərbaycan Elmi-tədqiqat Əkinçilik İnstitutunun Bitki Fiziologiyası şö’bəsinə qəbul olunmuşdur. 1975-ci ildə Leninqradda (indiki Sankt-Peterburqda) A.İ. İoffe adına Aqrofizika İnstitutunda bitkilərin biofizikası ixtisası üzrə əyani aspiranturaya daxil olmuşdur.

1979-cu ildə Tbilisi Dövlət Universitetinin elmi şurasında "Ali su bitkilərində membran potensialı və membran müqaviməti" mövzusunda namizədlik dissertasiyası müdafiə etmişdir.

1979-cu ildən 1991-ci ilə qədər Azərbaycan Elmi-Tədqiqat Əkinçilik İnstitutunun Bitki Fiziologiyası şö’bəsində əvvəlcə elmi işçi, sonralar isə baş elmi işçi vəzifələrində çalışmışdır.

İsmət Əhmədov dünyada ilk dəfə olaraq bitkilərdə ultrabənövşəyi şüaları udan molekulları aşkar etmişdir. Onun elmi və pedaqoji fəaliyyəti 80-dan çox elmi əsərdə öz əksini tapmışdır. Bu əsərlər SSRİ Elmlər Akademiyasının və dünyanın bir çox məşhur elmi jurnallarında rus və ingilis dillərində çap olunmuşdur.

İsmət Əhmədov bir çox beynəlxalq və keçmiş ittifaq miqyaslı elmi simpozium və konfranslarda çıxış etmişdir.

1991-ci ildə Azərbaycanda ilk özəl universitetlərdən biri olan Xəzər Universitetinin yaradılmasında iştirak etmiş, bu universitetin tibb fakültəsində ingilis, rus dillərində mühazirələr oxumuşdur.

1994-cü ildə Amerika İnformasiya Agentliyinin Fulbrayt Fondunun qrantı ilə Amerikanın məşhur Kornell Universitetində 4 aylıq e’zamiyyətdə olmuşdur. Bu universitetdə Fulbrayt mükafatı laureatı kimi dünya şöhrətli alim Roce Spensvikin laboratoriyasında çalışmış, Amerika təhsil sistemi ilə maraqlanmış və tibb fakültələrində biologiya fənninin tədrisinin təkmilləşdirilməsinə aid araşdırmalar aparmışdır.

Hal-hazırda Xəzər Universitetinin Bioloji Elmlər Departamentinin müdiri vəzifəsində çalışır.