[A] [B-E] [Ə] [F-İ] [K-M] [M] [M-P] [R] [S] [Ş-T] [V-Z]

ƏZİZ NƏSİBOV

Əziz Hümbət oğlu Nəsibov 1922-ci ildə Borçalı mahalının Bolus nümayəndəliyinin (Bolnisi) Şəmşoy (Samsevrisi) kəndində anadan olmuşdur. İbtidai və orta təhsilini həmin rayonunun Kəpənəkçi kəndində almışdır. 1942-1945-ci illərdə İkinci Dünya Müharibəsində iştirak etmiş, Qafqazdan Berlinə qədər döyüş yolu keçmişdir. Cəbhədə göstərdiyi şücaətlərə görə "Qırmızı ulduz" ordeni və bir çox medallarla təltif edilmişdir. 1949-cu ildə təhsilini davam etdirmək məqsədi ilə Borçalı Türk Pedaqoji Texnikumuna qəbul olunmuş və 1951-ci ildə oranı fərqlənmə diplomu ilə bitirmişdir. Həmin ili o, Azərbaycan Dövlət Universitetinin (indiki Bakı Dövlət Universitetinin) tarix fakültəsinə daxil olmuş və 1956-cı ildə oranı fərqlənmə diplomu ilə bitirmişdir. 1956-cı ildə tə’yinatla Azərbaycan Respublikasının Cəlilabad rayonuna müəllim göndərilmişdir. 1962-ci ildə Bakıya köçərək Yerli-Sənaye Texnikumunun axşam şö’bəsində çalışmışdır. 1969-cu ildən Azərbaycan Dövlət Tibb İnstitutunun siyasi-iqtisad kafedrasında baş müəllim vəzifəsində çalışmışdır.

Həmin dövrdə Əziz Nəsibov bir dərsliyin müəlliflərindən biri olmuşdur.

Əziz Nəsibov pedaqoji fəaliyyəti ilə yanaşı həm də 3 iri həcmli monoqrafiyanın həmmüəllifi olmuşdur.

Əziz Nəsibov 1969-cu ildən 1991-ci ilə qədər həmin institutun siyasi-iqtisad kafedrasında baş müəllim vəzifəsində çalışmışdır. Əziz Nəsibov 1991-ci ildə Bakıda vəfat etmişdir.

ƏLİ ƏLİZADƏ

Əli Mahmud oğlu Əlizadə 1933-cü ildə Borçalı mahalının Bolus nümayəndəliyinin (Bolnisi rayonu) Faxralı kəndində kəndli ailəsində anadan olmuşdur.

1941-ci ildə Faxralı orta məktəbinin 1-ci sinfinə daxil olmuş, 1952-ci ildə həmin məktəbi bitirmişdir. 1952-ci ilin sentyabrından 1953-cü ilin sentyabrınadək Faxralı orta məktəbində pioner baş dəstə rəhbəri işləmişdir.

1953-cü ildə Azərbaycan Kənd Təsərrüfatı İnstitutunun baytarlıq fakültəsinə daxil olmuş, 1958-ci ildə həmin institutu bitirmişdir.

1958-ci ilin avqust ayından 1962-ci ilin sentyabrınadək Faxralı kəndindəki "Qələbə" kolxozunda baş baytar həkimi işləmişdir.

1962-ci ilin sentyabrında istehsalatdan ayrılmaqla mərhum professor Məhəmməd Əsəd oğlu Mehtiyevin rəhbərliyi altında tədqiqat aparmış, 1965-ci ildə namizədlik dissertasiyası müdafiə edərək biologiya elmləri namizədi elmi dərəcəsinə layiq görülmüşdür.

1965-ci ilin sentyabrından Kənd Təsərrüfatı Akademiyasında assistent, 1968-ci ildən isə dosent olmuşdur. 1979-cu ildən 1984-cü ilədək "yoluxmayan xəstəliklər və klinik diaqnostika" kafedrasında müdir, 1984-cü ilin sentyabrından 1987-ci ilin oktyabrınadək institutunun hazırlıq şö’bəsində müdir, 1987-ci ildən 1989-cu ilədək baytarlıq fakültəsinin dekanı olmuşdur.

Hazırda "terapiya, klinik diaqnostika və cərrahiyyə" kafedrasının müdiri işləyir. Əli Əlizadə 60-a yaxın elmi əsərin, o cümlədən 5 dərs vəsaitinin müəllifidir.

Əli Əlizadə 1965-ci ildən 2000-ci ilədək 20 ittifaq və respublika səviyyəli elmi konfranslarda çıxış edib, məqalələr çap etdirmişdir.

ƏLİ ƏLİYEV

Əli Bayram oğlu Əliyev 1923-cü il mayın 28-də Borçalı mahalının Bolus nümayəndəliyinin (Bolnisi rayonu) Faxralı kəndində anadan olmuşdur. 1941-ci ildə Faxralı orta məktəbini ə’la qiymətlərlə bitirmiş, həmin il hərbi xidmətə çağırılmışdır. 1943-cü ildə Hərbi Topçuluq məktəbini bitirmiş, zabit rütbəsi almış və 1945-ci ilədək İkinci Dünya müharibəsində faşistlərə qarşı vuruşmuşdur.

Əli Əliyev 1945-ci ildən başlayaraq Faxralı kəndindəki "Qələbə" kolxozunda mühasib köməkçisi, baş mühasib, ilk partiya təşkilatının katibi və kolxoz idarə hey’ətinin sədri vəzifələrində çalışmışdır .

Əli Əliyev 1955-ci ildə Tbilisi Dövlət Universitetinə (indiki TDU) daxil olmuş, 1960-cı ildə bitirmişdir. Təhsilini Azərbaycan Kənd Təsərrüfatı İnstitutunun (Gəncə şəhər) aspiranturasında davam etdirmiş və "Azərbaycan SSR-nin Şəki-Zaqatala zonasında ipəkçiliyin müasir vəziyyəti və inkişaf prespektivləri" mövzusunda namizədlik dissertasiyası yazmış və 1964-cü ildə həmin dissertasiyanı müdafiə edib elmlər namizədi olmuşdur.

Əli Əliyev 1964-cü ildə Bolnisi rayon Sovet İcraiyyə Komitəsinin sədri vəzifəsinə irəli çəkilmiş, bu vəzifədə 1972-ci ilədək işləmişdir. 1972-ci ildən ömrünün sonuna kimi Bolnisi rayon Meliorasiya və Su Təsərrüfatı İdarəsinə başçılıq etmişdir.

Əli Əliyev Qırmızı Əmək Bayrağı ordeni, "Əməkdə fərqlənməyə görə", "İgidliyə görə", "Stalinqrad müdafiəsi uğrunda", "Alamaniya üzərində qəlbəyə görə" və s. medallarla təltif edilmişdir.

Əli Əliyev 1945-ci ildən Sov.İKP-nın üzvü olmuşdur. O, Gürcüstan KP MK üzvülüyünə namizəd seçilmiş, dəfələrlə Bolnisi rayon partiya komitəsinin üzvü və rayon sovetinin deputatı olmuşdur. Əli Əliyevin elmi-pedaqoji fəaliyyəti 10 məqalədə öz əksini tapmışdr.

Əli Əliyev 1973-cü ildə vəfat etmişdir.

ƏLİ HACIYEV

Əli Vəli oğlu Hacıyev 1949-cu ildə Bolnisi rayonunun Darvaz kəndində ziyalı ailəsində anadan olmuşdur. 1966-cı ildə Darvaz orta məktəbini ə’la qiymətlərlə bitirmişdir. Həmin ildə Bakıda qəbul imtahanlarını müvəffəqiyyətlə verib Azərbaycan Xalq Təsərrüfatı İnstitutuna daxil olmuşdur. Ali məktəbi bitirdikdən sonra aspiranturaya daxil olmuş, 1976-cı ildə namizədlik dissertasiyası müdafiə edib iqtisad elmləri namizədi elmi dərəcəsi almışdır. Elmi tədqiqatla yanaşı pedaqoji fəaliyyətlə də məşğul olmuş, Bədən Tərbiyəsi və Politexnik İnstitutlarında iqtisadiyyat fənnindən dərs demişdir. Bir neçə dərs vasaitinin və elmi məqalənin müəllifidir.

Hazırda İqtisad Universitetində elmi-pedaqoji fəaliyyətini davam etdirir. Əli Hacıyev elmi-pedaqoji fəaliyyəti ilə yanaşı, bir neçə elmi konfransda iştirak edib, məqalələr çap etdirmişdir. Əli Hacıyev 1980-ci ildən dosentdir. Doktorluq dissertasiyasını tamamlamış və müdafiə üçün təqdim etmişdir.

Əli Hacıyev 2001-ci ilin yanvarından İqtisad Universitetində kafedra müdiri, may ayından isə fakültə dekanıdır.

ƏLƏDDİN İMANOV

Ələddin Bayraməli oğlu İmanov 1938-ci ildə Borçalı mahalının Bolus nümayəndəliyinin (indiki Bolnisi rayonu) Faxralı kəndində anadan olmuşdur. 1946-cı ildə Faxralı kənd orta məktəbinin 1-ci sinfinə getmiş, 1957-ci ildə isə həmin məktəbi bitirmişdir. 1957-ci ildə Azərbaycan Dövlət Universitetinin fizika fakültəsinə daxil olmuş, 1962-ci ildə həmin fakültəni fərqlənmə diplomu ilə bitirmişdir. Həmin ildə tə’yinatla Moskva şəhərindəki Qapalı Ümumittifaq Elmi Tədqiqat Elektromexanika institutuna göndərilmişdir. O, burada elmi işlə məşğul olmuş, 1972-ci ildə dissertasiya işini müdafiə edib, fizika-riyaziyyat elmləri namizədi elmi dərəcəsi almışdır.

Ələddin İmanov elmin və texnikanın elə bir ixtisasına yiyələnmişdir ki, onun elmi əsərləri də qapalı jurnal və elmi kitablarda nəşr olunmuşdur. Onun işıq üzü görmüş əsərləri əsasən Moskva şəhərinin qapalı materiallar məcmuəsində çap olunmuşdur.

İşlədiyi bu müddətdə 4 ittifaq əhəmiyyətli ixtiranın və müəlliflik şəhadətnaməsinin müəllifi olmuşdur. O, bu şəhadətnamələri 1970,1978, 1980 və 1981-ci illərdə almışdır. Ələddin İmanovun ixtiraları SSRİ Kosmik Tədqiqatlar sahəsində istifadə edilmişdir.

Ələddin İmanov 1993-cü il yanvar ayında Bakı şəhərində vəfat etmişdir.

Ələddin Məcid oğlu Məmmədəlizadə 1945-ci il avqust ayının 3-də Borçalının (keçmiş) Bolnisi rayonunun Həsənxocalı kəndində ziyalı ailəsində anadan olmuşdur. 1952-1955-ci illərdə Həsənxocalı kənd ibtidai məktəbində, 1955-1963-cü illərdə isə Bolnisi raoynunun Arıxlı kənd orta məktəbində təhsil almışdır.

1963-1971-ci illərdə indiki Bakı Dövlət Uinversitetinin geologiya fakültəsində oxumuşdur.

1964-1967-ci illərdə ordu sıralarında xidmətdə olmuşdur.

1971-ci ildə Azərbaycan SSR Elmlər Akademiyasının Geologiya İnstitutunda əmək fəaliyyətinə başlamışdır. O, əvvəlcə laborant, baş laborant, sonra isə böyük elmi işçi vəzifələrində işləmişdir.

1975-1979-cu illərdə Azərbaycan Elmlər Akademiyasının Geologiya İnstitutunun aspiranturasında təhsil almışdır.

1980-ci ildə namizədlik dissertasiyası müdafiə edib, alimlik dərəcəsi almışdır.

Ələddin Məmmədəlizadə 40 elmi əsərin və 1 monoqrafiyanın müəllifidir. 1985-ci ildən 1990-cı ilə qədər Qafqaz İdarələrarası Stratiqrafiya komitəsinin elmi katibi vəzifəsində işləmişdir. O, bir çox beynəlxalq və ümumittifaq konfranslarının, simpozium və müşavirələrin iştirakçısı olmuş və elmi məqalələr çap etdirmişdir.

Əlyar Dünyamalı oğlu Namazov 1953- cü il yanvarın 29- da Bolnisi rayonunun Aşağı Güləver kəndində anadan olmuşdur. Səkkizillik təhsilini Aşağı Güləver kəndindəki məktəbdə almış, 1970- ci ildə Darvaz orta məktəbini bitirmişdir.

Əlyar Namazov 1970-ci ildə Azərbaycan Dövlət Universitetinin (indiki BDU) fizika fakültəsinə daxil olmuş və 1975- ci ildə həmin fakültəni bitirmişdir. 1975-1978-ci illərdə tə’yinatla Cəlilabad rayonunun Privolnoye kənd orta məktəbində müəllim işləmişdir.

1978-1990-cı illərdə Azərbaycan EA-nın Fizika institutunda kiçik elmi işçi, elmi işçi vəzifələrində işləmişdir.1986-cı ildə "Bə’zi maqnit yarımkeçiricilərin maqnit və elektrik xassələri" mövzusunda namizədlik dissertasiyası müdafiə edib elmi dərəcə almışdır.

Əlyar Namazov Azərbaycan Dövlət Pedaqoji Universitetinin Şuşa filialı yaradılarkən ixtisaslı kadrlara ehtiyac olduğundan könüllü olaraq Şuşaya getmiş, 1990-1993-cü illərdə həmin filialda işləmiş, bilavasitə onun iştirakı ilə qısa müddətdə 4 tədris və bir elmi-tədqiqat laboratoriyası yaradılmışdır.

1993-1995-ci illərdə Bakı Ali Hərbi Dənizçilik Məktəbinin (BAHDM) "Elektrotexnika" kafedrasında dosent vəzifəsində işləmiş, 1995-ci ildə hərbi xidmətə çağırılaraq 1998-ci ilə qədər "Elektrotexnika" kafedrasının rəis müavini və rəisi vəzifələrində xidmət etmişdir. Hazırda BAHDM-in "Gəminin quruluşu, davamlığı və elektrik avadanlıqları" kafedrasının dosentidir, kapitan rütbəsində hərbi xidmətini davam etdirir. Elmi, pedaqoji və hərbi xidmətə görə dəfələrlə məktəb komandanlığı tərəfindən fəxri fərman və qiymətli hədiyyələrlə təltif olunmuşdur.

Ölkəmizdə və xarici mətbuatda 35-dən artıq elmi məqalələri çap olunmuşdur. "Zirehli tank texnikasının (ZTR) elektrik avadanlıqları" , "Elektrotexnikanın əsasları", "Elektrotexnikanın əsaslarına dair metodiki vəsait", "Gəmi elektrik maşınları və elektrik intiqalları fənni üzrə laboratoriya işləri" və "Gəmi elektrik enerji sistemləri"(I -hissə) kitablarının müəllifidir.

"Gəmi avtomatik idarəetmə sistemləri", "Gəmi elektrik mişınları və elektrik intiqalları" və "Gəmi elektrik enerji sistemlləri" (II - hissə) kitabları çapa hazırdır.

BAHDM-in "Elmi əsərlər" jurnalının mə'sul katibidir.

Əlyar Namazov elmi-pedaqoji fəaliyyətini davam etdirərək doktorluq dissertasiyası üzərində işləyir.

Əlləz İsa oğlu Daşdəmirov 1938-ci ildə Borçalı mahalının Bolus rayonunun Saraclı kəndində anadan olmuşdur. 1947-1958-ci illərdə kənd orta məktəbində təhsil almışdır.

Saraclı orta məktəbinin ilk mə’zunlarından olan Əlləz Daşdəmirov elə həmin il indiki Azərbaycan Dövlət İqtisad Universitetinə qəbul olunmuş və 1959-cu ildə həmin Universiteti bitirmişdir.

1963-cü ildə universitetin mühasib-iqtisadçı ixtisasını fərqlənmə diplomu ilə bitirən Əlləz Daşdəmirov tə’yinatla Abşeron raoynunun Zirə südçülük-tərəvəzçilik sovxozuna baş mühasib vəzifəsinə göndərilmişdir. 11972-ci ilə kimi əmək fəaliyətini burada davam etdirən Əlləz Daşdəmirov elə həmin il Azərbaycan Elmi-Tədqiqat Kənd Təsərrüfatının İqtisadiyyatı və təşkili İnstitutunun aspiranturasının əyani şö’bəsinə daxil olmuşdur.

1975-ci ildə "Sovxozlarda əsas fondların təkrar istehsalı və onlardan istifadənin iqtisadi faydalılığı" mövzusunda dissertasiya müdafiə edərək iqtisad elmləri namizədi-alimlik dərəcəsi almışdır. Həmin institutda kiçik elmi işçi, baş elmi işçi və şö’bə müdiri vəzifəsində çalışan Ə.Daşdəmirov 1984-cü ildə müsabiqə yolu ilə Azərbaycan Dövlət Xalq Təsərrüfatı İnstitutunda dosent vəziyəsinə seçilmiş, elmi işini və pedaqoji fəaliyyətini davam etdirir.

Əlləz Daşdəmirov elmi-pedaqoji fəaliyyəti 80-dən artıq elmi əsərdə, o cümlədən "əsas fondların təkrar istehsalı", "Əsas istehsal fondlarının normativləri" və "İstehsalda itkilərə qarşı mübarizə tədbirləri" (monoqrafiya, "Azərnəşr", 1982) adlı kitablarda, həmçinin iki dərs vəsaitində öz əksini tapmışdır.

ƏMİRXAN BABAŞOV

Əmirxan Mehralı oğlu Babaşov 1947-ci il fevralın 5-də Bolnisi rayonunun Faxralı kəndində kəndli ailəsində anadan olmuşdur.

1954-cü ildə Faxralı kənd orta məktəbinin 1-ci sinfinə getmiş, 1965-ci ildə həmin məktəbin XI sinfini bitirmiş, 1965-ci ildə Azərbaycan Dövlət Universitetinin iqtisad fakültəsinə daxil olmuş, 1966-cı ildə iqtisad fakültəsi yeni təşkil edilmiş Azərbaycan Xalq Təsərrüfatı İnstitutuna verilmiş və 1969-cu ildə həmin institutun Əmtəəşünaslıq və ticarətin təşkili fakültəsini Fərqlənmə diplomu ilə bitirmişdir. Gənc mütəxəssis kimi bir müddət Ticarət Nazirliyi sistemində işləmiş, 1969-cu ilin oktyabr ayından 1971-ci ilin may ayına kimi Azərbaycan SSR Dövlət Plan Komitəsi nəzdində Elmi-Tədqiqat İqtisad İnstitutunda (ETİİ) kiçik elmi işçi vəzifəsində çalışmışdır. 1971-ci ilin may ayından 1972-ci ilin may ayına kimi hərbi xidmətdə olmuşdur.

1972-1975-ci illərdə əvvəlcə Bakı şəhərində, sonra isə Moskva şəhərində SSRİ Dövlət Plan Komitəsi yanında İqtisadiyyat Elmi-Tədqiqat İnstitutunda əyani aspiranturada oxumuş, "Azərbaycan SSR əhalinin sosial qruplarının həyat səviyyəsinin yaxşılaşdırılması problemləri (iqtisadi təhlil və planlaşdırma məsələləri)" mövzusunda namizədlik dissertasiyasını müdafiə etmiş, iqtisad elmləri namizədi elmi dərəcəsi almışdır.

1975-ci ilin noyabrından 1994-cü ilin may ayına kimi Azərbaycan Respublikası İqtisadiyyat Nazirliyinin ETİİ-də kiçik elmi işçi vəzifəsindən şö’bə müdiri vəzifəsinədək yüksəlmiş, 1994-cü ilin may ayından Azərbaycan Respublikası Milli Məclisinin İqtisadi qanunvericilik şö’bəsində baş məsləhətçi vəzifəsində çalışır. Bazar iqtisadiyyatının tələblərinə uyğun iqtisadi qanunvericilik bazasının yaradılmasında fəal iştirak edir.

Əmirxan Babaşov "1976-1990-cı illərdə Azərbaycan SSR-də məhsuldar qüvvələrin inkişafı və yerləşdirilməsinin əsas istiqamətləri" (Bakı, 1978), "2000-ci ilə qədər Azərbaycan SSR-nin məhsuldar qüvvələrinin inkişafı və yerləşdirilməsi sxemi" (Bakı, 1982), "1985-2005-ci illərdə Azərbaycan SSR-də elmi-texniki tərəqqinin Kompleks Proqramı" (Moskva, 1983), "1991-2010-cu illərdə SSRİ-də elmi-texniki tərəqqinin Kompleks Proqramı (Regional bölmə)" (Moskva, 1989) fundamental sənədlərin müəlliflərindən biri olmuşdur.

Ə. Babaşov Bakı, Moskva, Kiyev, Minsk, Tbilisi və digər şəhərlərdə keçirilən simpozium və konfranslarda elmi məruzələrlə çıxış etmiş və həmin şəhərlərdə 50-dən çox elmi əsəri çap olunmuşdur. O, 3 kitabçanın və 20-yə qədər elmi məqalənin müəllifidir. O, "İqtisadiyyat və həyat" jurnalında və bir çox kitabların nəşrində elmi redaktor olmuşdur.

Ə. Babaşov elmi və qanunvericilik bazasının yaradılması ilə yanaşı Neft Akademiyasında, İnşaat Mühəndisləri Universitetində, Əmtəəşünaslıq-Kommersiya İnstitutunda, Təfəkkür Universitetində iqtisadçı bakalavr və magistrantlara iqtisad elminin aktual problemlərindən mühazirə oxuyur, elmi işçi, aspirant və magistrantlara elmi rəhbərlik edir.

ƏMİRXAN ƏSGƏROV

Əmirxan Qurban oğlu Əsgərov 1935-ci il noyabrın 11-də Borçalı mahalının Bolus nümayəndəliyinin Qoçulu kəndində anadan olmuşdur. 1943-1944-cü tədris ilində Qoçulu 8 illik məktəbinə daxil olmuş, İmirhəsən orta məktəbini bitirmişdir. 1955-1958-ci illərdə hərbi xidmətdə olmuşdur. 1962-1963-cü tədris ilində Azərbaycan Dövlət Universitetinin iqtisad fakültəsinə daxil olmuş, 1967-ci ildə Xalq Təsərrüfatı İnstitutunu (indiki ADİU) bitirmişdir. 1965-1983-cü illərdə Maliyyə Nazirliyində məsul vəzifədə işləmişdir. 1987-ci ildə "Plan göstəriciləri sisteminin təkmilləşdirilməsi yolları" mövzusunda dissertasiya müdafiə edərək elmi dərəcə almışdır. Əmirxan Əsgərovun elm sahəsində və praktikada gördüyü işlər 17 elmi əsərdə öz əksini tapmışdır. O, dəfələrlə istər elmi və istərsə də təcrübi əməyinin məhsuluna dair respublikanın mötəbər konfranslarında və nazirliyin kollegiyasında çıxış edib, məqalələr dərc etdirmişdir.

Əmirxan Əsgərov hazırda Azərbaycan Respublikası Maliyyə Nazirliyində əmək fəaliyyətini davam etdirir.

ƏMİRASLAN ƏLİYEV

Əmiraslan İbrahim oğlu Əliyev 1949-cu il fevralın 5-də Bolnisi rayonunun Saraclı kəndində anadan olmuşdur. 1966-cı ildə orta məktəbi gümüş medalla bitirmiş, Azərbaycan Politexnik İnstitutunun elektron hesablama maşınları fakültəsinə daxil olmuşdur. 1971-ci ildə institutu fərqlənmə diplomu ilə bitirmiş və 2 il Leninqrad şəhərində (indiki Sank-Peterburq) Ümumittifaq Elmi-Tədqiqat Radio Cihazları İnstitutunda mühəndis vəzifəsində işləmişdir.

1973-cü ildə Bakıya qayıtmış, Azərbaycan Elmlər Akademiyasının Kibernetika İnstitutunda işə qəbul edilmiş və dərinlik ştanqlı neft nasoslarının işini diaqnostika etmək üçün metodların və xüsusiləşdirilmiş hesablama qurğularının yaradılması məsələləri ilə məşğul olmuşdur.

1975-ci ildə EA-nın Kibernetika institutun aspiranturasına daxil olmuş və "Dərinlik neft quyularının idarə edilməsi və diaqnostikasının təkmilləşdirilməsi" mövzusunda dissertasiya işi yazaraq 1982-ci ildə Moskvada Ümumittifaq Elmi-Tədqiqat Neft İnstitutunda namizədlik dissertasiyası müdafiə etmişdir.

1993-cü ilin iyul ayında Elmlər Akademiyasının Avtomatlaşdırılmış İdarəetmə Sistemləri (AİS) şö’bəsinin layihə baş mühəndisi vəzifəsinə keçirilmiş və həmin ilin noyabr ayında laboratoriya müdiri təyin edilmişdir. AİS şö’bəsinə işə keçəndən sonra Əmiraslan Əliyev çoxmaşınlı hesablama komplekslərinin yaradılması, EHM-lər arasında informasiya mübadiləsi təşkili məsələləri ilə məşğul olmuşdur. 1985-ci ildən başlayaraq Elmlər Akademiyası və Dövlət Plan Komitəsi üçün lokal Akademiya şəbəkəsinin, Avropa Elmi-Tədqiqat və Akademiya İnstitutları şəbəkəsinin (EARM) Azərbaycan qovşağının yaradılması ilə məşğul olmuşdur. 1993-cü ildən Əmiraslan Əliyev Beynəlxalq INTERNET şəbəkəsində Azərbaycan qovşağının yaradılması, beynəlxalq qovşağın genişləndirilməsi və onun respublikada infrastrukturunun yaradılması ilə məşğul olan şö’bəyə rəhbərlik edir.

Ə. Əliyev 22 elmi məqalənin və 9 ixtiranın müəllifidir. Bunların çox hissəsi keçmiş ümumittifaq və beynəlxalq elmi mətbuatda dərc edilmişdir.

Ə. Əliyev həm də pedaqoji fəaliyyətlə məşğul olur. O, 1980-ci ildən bu günə kimi Azərbaycan Texniki Universitetinin Elektron Hesablama Maşınları kafedrasının dosentidir.

ƏNVƏR ƏLLƏZOV

Ənvər Əli oğlu Əlləzov 1945-ci ildə Bolnisi rayonunun Qoşakilsə kəndində ziyalı ailəsində anadan olmuşdur. 1962-ci ildə Faxralı orta məktəbini bitirdikdən sonra Azərbaycan Dövlət Universitetinin mexanika-riyaziyyat fakültəsinə daxil olmuşdur. 1964-1967-ci illərdə hərbi xidmətdə olmuşdur. 1970-ci ildə ali təhsilini başa vurmuş və həmin ildən Azərbaycan EA-nın Kibernetika institutunda və Respublikanın digər institut və müəssisələrində əmək fəaliyyətini davam etdirmişdir. 1980-ci ildə Moskva Polad və ərintilər institutunun kibernetika kafedrasında avtomatlaşdırılmış idarəetmə sistemləri ixtisası üzrə əyani aspiranturaya qəbul olmuş, 1984-cü ildə namizədlik dissertasiyası müdafiə etmişdir. 20-ə yaxın elmi məqalənin müəllifidir. Şahmat üzrə birinci dərəcə, sambo güləşi üzrə idman ustalığına namizədlik normasını yerinə yetirmişdir. Ənvər Əlləzovun elmi və pedaqoji fəaliyyəti 15 elmi əsərdə öz əksini tapmışdır. O, 7 elmi konfransda çıxış edib, materiallar çap etdirmişdir. Hal-hazırda Gəncə elm-istehsalat birliyində baş direktor vəzifəsində çalışır və paralel olaraq elmi-pedaqoji fəaliyyətini davam etdirir.

ƏNVƏR ŞABANOV

Ənvər Hüseyn oğlu Şabanov 1940-cı ildə Bolnisi rayonunun Dəmirli kəndində anadan olmuşdur.

1947-ci ildə Dəmirli ibtidai məktəbinin birinci sinfinə getmiş, Aşağı Güləvər kənd səkkizillik məktəbini, 1958-ci ildə isə Darvaz kənd orta məktəbini bitirmişdir. Dörd ilə yaxın kolxozda işləmiş, 1962-ci ildə isə Azərbaycan Dövlət Tibb İnstitutunun (indiki ADTU-nun) sanitar gigiyena fakültəsinə daxil olmuş, 1968-ci ildə həmin fakültəni bitirmişdir.

1968-ci ildə tə’yinatla Xaçmaz rayon xəsiəxanasında, sonra isə Sumqayıt şəhər xəstəxanasında həkim kimi fəaliyyət göstərmişdir.

1969-1970-ci illərdə Bakı şəhər Tə’cili Tibbi Yardım stansiyasında həkim işləmişdir. 1970-ci illərin axırlarında Tibb Universitetinin Histologiya kafedrasında assistent, sonra isə baş müəllim işləmişdir. 1990-cı ildə dissertasiya müdafiə edib tibb elmləri namizədi elmi dərəcəsi almışdır.

Ənvər Şabanovun elmi və pedaqoji fəaliyyəti 20 elmi əsərdə və 1 metodik göstərişdə öz əksini tapmışdır. O bu müddət ərzində 5 keçmiş ittifaq və respublika səviyyəli konfranslarda çıxış edib elmi məqalələr çap etdirmişdir.

Ənvər Şabanov hal-hazırda Azərbaycan Tibb Universitetinin Histologiya kafedrasında baş müəllim vəzifəsində öz elmi və pedaqoji fəaliyyətini davam etdirir.

ƏFƏNDİ NƏSİBOV

Əfəndi Nəsib oğlu Nəsibov 1962-ci ildə Bolnisi rayonunun İmirhəsən kəndində müəllim ailəsində anadan olmuşdur. 1978-ci ildə ADU-nin tətbiqi riyaziyyat fakültəsinə qəbul olunmuşdur. 1983-cü ildə həmin Universiteti fərqlənmə diplomu ilə bitirmiş, fakültə elmi şurasının zəmanəti əsasında Azərbaycan EA Kibernetika İnstitutunun əyani aspiranturasına qəbul olunmuş və elmi işlərini davam etdirmək üçün Moskvaya SSRİ EA Mərkəzi İqtisadi Riyaziyyat İnstitutuna e’zam olunmuşdur. 1987-ci ildə riyazi kibernetika istiqaməti üzrə "Bə’zi sinif qeyri səlis riyazi proqramlaşdırma məsələlərinin tədqiqi və onların həll alqoritmlərinin qurulması" mövzusunda namizədlik dissertasiyası müdafiə edib fizika-riyaziyyat elmləri namizədi elmi dərəcəsi almışdır. Əmək fəaliyyətinə Azərbaycan EA Kibernetika İnstitutunda elmi işçi kimi başlayaraq, müxtəlif illərdə "Azərbsutikinti" Konsernində şö’bə müdiri, Azərbaycan Respublikası Təhsil Nazirliyində "Təhsil sisteminin inkişafı və proqnozlaşdırılması problemləri üzrə elmi-tədqiqat laboratoriyası"nın müdiri kimi mə’sul vəzifələrdə çalışmışdır. Bütün bu işlərlə yanaşı 1987-ci ildən Azərbaycan Dövlət Neft Akademiyasının dosenti olmuşdur. Hal-hazırda Azərbaycan EA Kibernetika İnstitutunda "Qeyri səlis informasiya şəraitində qərar qəbul etmə məsələləri" laboratoriyasının müdiri, Bakı Dövlət Universitetinin dosentidir.

Əsası dahi Amerikan alimi, əslən azərbaycanlı olan Lütfi Zadə tərəfindən qoyulmuş "Qeyri səlis çoxluqlar" nəzəriyyəsinin Azərbaycanda ilk tədqiqatçılarından biri Əfəndi Nəsibovdur. Hələ 1983-cü ildən bu nəzəriyyə ilə məşğul olan alim indi də Rusiyada, Amerika, İsrail, Türkiyə və bir sıra digər ölkələrdə bu sahədə çalışan tanınmış alimlərlə sıx əməkdaşlıq edir. Hal-hazırda bu sahədə "Qərar qəbul etmə məsələlərində qeyri səlis informasiyanın işlənməsinin dekompozisyon üsulları" mövzusunda doktorluq dissertasiyasını tamamlamışdır. Əfəndi Nəsibov öz fəaliyyətinə görə Lütfi Zadə adına Beynəlxalq Müasir Elmlər Akademiyasının akademiki seçilmişdir.

Yuxarıda deyilənlərlə yanaşı Əfəndi Nəsibov Azərbaycanda təhsil sisteminin informatlaşdırılması və kompüter texnologiyasının tətbiqi sahəsində tanınmış mütəxəsislərdəndir və bir müddət nəşr olunmuş "Kompüter" adlı elmi-kütləvi jurnalın yaradıcısı və baş elmi məsləhətçisi olmuşdur. Əfəndi Nəsibov 50-yə qədər elmi məqalənin, bir neçə monoqrafiya və dərsliklərin müəllifidir.

ƏFLATUN ORUCOV

Əflatun Nəbi oğlu Orucov 1935-ci il may 15-də Bolnisi rayonunun Molla-Əhmədli kəndində kəndli ailəsində anadan olmuşdur. 1942-ci ildə ibtidai sinfə getmiş, 1956-cı ildə həmin rayonun Arıxlı orta məktəbini bitirmişdir. 1959-1961-ci illərdə hərbidə xidmət etmişdir. 1962-ci ildə Azərbaycan Politexnik institutuna daxil olmuş, 1967-ci ildə "Tikiş mə’mulatlarının texnologiyası" ixtisasını bitirib, mühəndis-texnoloq diplomu almışdır. 1968-ci ildən 1978-ci ilə qədər Azərbaycan Politexnik institutunda baş laborant, sonra assistent işləmişdir.

1978-ci ildən 1984-cü ilin yanvar ayına kimi Bakı 1 saylı Tikiş Fabrikində baş mühəndis vəzifəsində işləmişdir.

1984-cü ildə müsabiqə yolu ilə Azərbaycan Texnologiya İnstitutunda assistent vəzifəsinə qəbul olunmuş, 1989-cu ildən müsabiqə yolu ilə baş müəllim vəzifəsinə seçilmişdir.

1996-cı ildən yenidən müsabiqə yolu ilə Bakı Dövlət Əmtəəşünaslıq-Kommersiya İnstitutunda dizayn kafedrasının baş müəllimi seçilmişdir.

2000-ci ildən bu vaxta qədər Azərbaycan Dövlət İqtisad Universitetində dizayn kafedrasında baş müəllim vəzifəsini icra edir.

Əflatun Orucovun elmi və pedaqoji fəaliyyəti 50 elmi əsərdə, o cümlədən 5 dərs vəsaiti, 2 metodiki göstəriş və 2 proqramda öz əksini tapmışdır. Əflatun Orucov 20 elmi-pedaqoji konfranslarda iştirak edib, elmi məqalələr çap etdirmişdir.

Hal-hazırda Azərbaycan Dövlət İqtisad Universitetində dosent kimi fəaliyyət göstərir.

ƏHMƏD ƏHMƏDOV

Əhməd Qulu oğlu Əhmədov 1938-ci il mayın 5-də Borçalı mahalının Bolus nümayəndəliyinin (Bolnisi rayonu) Saraclı kəndində anadan olmuşdur. 1946-cı ildə Saraclı orta məktəbinin birinci sinfinə getmiş, 1957-ci ildə həmin məktəbi bitirmişdir. 1960-cı ildə ordu sıralarında olmuşdur. 1963-cü ildə Azərbaycan Dövlət Kənd Təsərrüfatı Akademiyasının Baytarlıq fakültəsinə daxil olmuş, 1968-ci ildə həmin fakültəni bitirmişdir. 1969-cu ildə aspiranturaya daxil olmuş, 1974-cü ildə "Azərbaycan şəraitində inək və camışlarda hövrə gəlmənin tənzimi" mövzusunda namizədlik dissertasiyası müdafiə etmişdir. Əhməd Əhmədovun pedaqoji fəaliyyəti 30-dan artıq elmi əsərdə öz əksini tapmışdır. 2 monoqrafiyanın müəllifidir.

Hazırda Azərbaycan Dövlət Kənd Təsərrüfatı Akadmiyasının baytarlıq fakültəsinin farmokologiya, anatomiya və mamalıq kafedrasında dosent vəzifəsində işləyir. 10-a qədər respublika səviyyəli konfranslarda çıxış edib, material dərc etdirmişdir.

ƏHMƏD CƏFƏROV

Əhməd Süleyman oğlu Cəfərov 1937-ci ildə Borçalı mahalının Bolus nümayəndəliyinin Babakişilər (Musopriani) kəndində anadan olmuşdur. 1943-cü ildə 1-ci sinfə getmiş, 1954-cü ildə orta məktəbi bitirmişdir.

1954-1958-ci illərdə Azərbaycan Dövlət Xalq Təsərrüfatı İnstitutunun (indiki ADİU-nun) mühasibat uçotu fakültəsində oxumuşdur. Əhməd Cəfərov əmək fəaliyyətinə 1958-ci ildə Respublikanın Həmkarlar Komitəsində təlimatçı kimi başlamışdır. 1961-ci ildə Universitetin mühasibat uçotu kafedrasında müəllim işləmişdir. 1966-cı ildən Azərbaycan Dövlət Xalq Təsərrüfatı İnstitutunun mühasibat uçotu və təhlil kafedrasında müəllim işləmişdir.

1969-cu ildə dissertasiya müdafiə edib, elmi dərəcə almışdır. 1972-ci ildə kafedranın dosenti seçilmişdir. 1967-ci ildən iqtisadiyyatın uçotu fakültəsinin axşam və qiyabi şö’bəsinin dekanı, 1968-ci ildən isə sənayenin iqtisadiyyatı fakültəsində dekan müavini işləmişdir. 1969-cu ildən iqtisadiyyatın uçotu fakültəsinin dekan müavini tə’yin olunmuşdur. 1970-ci ildən iqtisadi uçot fakültəsinin dekanı vəzifəsində çalışmışdır.

Əhməd Cəfərovun elmi və pedaqoji fəaliyyəti 40-a yaxın elmi məqalədə öz əksini tapmışdır.

Əhməd Süleyman oğlu Cəfərov 1992-ci ildə vəfat etmişdir.