[A] [B-E] [Ə] [F-İ] [K-M] [M] [M-P] [R] [S] [Ş-T] [V-Z]

BAYRAM ƏFƏNDİYEV

Bayram Rüstəm oğlu Əfəndiyev 1933-cü ildə Borçalının Bolus rayonunun (indiki Bolnisi) Aşağı Qoşakilsə kəndində kolxozçu ailəsində anadan olmuşdur. 1941-ci ildə doğma kəndinin 8 illik məktəbində oxumuş, 1949-cu ildə Arıxlı orta məktəbində təhsilini davam etdirmiş və 1952-ci ildə orta məktəbi müvəffəqiyyətlə bitirmişdir. 1952-ci ildə Azərbaycan Dövlət Universitetinin fizika-riyaziyyat fakültəsinə daxil olmuş, 1957-ci ildə isə həmin fakültəni başa vurmuşdur.

1957-1960-cı illərdə Gürcüstanın Bolnisi rayonunda Kənd Təsərrüfatı Texnikumunda və eyni zamanda orta məktəbdə öz ixtisası üzrə müəllim işləmişdir. 1960-cı ilin noyabr ayında Azərbaycan Pedaqoji İnstitutnun aspiranturasına qəbul olmuş və eyni zamanda Politexnik İnstitutunun ali riyaziyyat kafedrasında müəllim işləmişdir. 1965-ci ildə namizədlik dissertasiyası müdafiə etmişdir. 1966-cı ildə Politexnik İnstitutunun ali riyaziyyat kafedrasına dosent seçilmişdir. 1977-ci ildə Ümumittifaq Elmi Tədqiqat İnstitutunda elmi işçi kimi fəaliyyət göstərmişdir. 1991-ci ildən Bakı Dövlət Universitetinin nəzəri-mexanika kafedrasında işləmiş, 1993-cü ildən isə həmin universitetdə ali riyaziyyat metodikası və onun tədrisi kafedrasında dosent kimi çalışmışdır. 1995-ci ildən Elm və Təhsil Mərkəzi "Təfəkkür" Universitetinin ali riyaziyyat kafedrasında müdir, eyni zamanda Bakı Dövlət Universitetində riyaziyyat və onun tədrisi metodikası, cəbr və topologiya kafedrasının professoru işləməklə yanaşı müntəzəm elmi axtarışlarını davam etdirmişdir.

Bayram Əfəndiyevin elmi və pedaqoji fəaliyyətinin təzahürü kimi qeyd olunmalıdır ki, işlədiyi müddət ərzində 50-ə yaxın aspirant və dissertantlara elmi məsləhətlər vermiş, rəhbərlik etmişdir.

BAYRAM HƏNDƏMOV

Bayram Həndəm oğlu Həndəmov 1958-ci ildə Bolnisi rayonunun Arakol kəndində anadan olmuşdur.

1975-ci ildə Tbilisi şəhrində orta məktəbi bitirmiş və elə həmin il Rusiyanın Novosibirsk şəhrindəki Tibb İnstitutuna daxil olmuşdur. 1981-ci ildə həmin institutu bitirmiş və Kurqan şəhərində cərrahiyyə üzrə internatura keçmiş, 1988-ci ilədək burada cərrah-ordinator işləmişdir.

1988-ci ildə Gürcüstana qayıtmış, Bolnisi rayonundakı Kazreti qəsəbəsindəki xəstəxanada cərrah işləmişdir.

Bayram Həndəmov 1992-ci ildən Bakıda "Azərsutikinti" xəstəxanasında baş ordinator işləyir.

Moskva, Tümen və Novokuznetsk şəhərlərində cərrahlıq üzrə ixtisas kurslarında olmuşdur.

Bayram Həndəmov praktik cərrah işləməklə yanaşı elmi tədqiqat işlərilə də məşğul olur. Tədqiqatldarı əsasən mə’də yarası xəstəliklərinə həsr olunmuş və bu sahədə dissertasiya müdafiə etmişdir. Tibb elmləri namizədidir.

12 elmi əsərin müəllifidir. Bir sıra elmi konfransların iştirakçısı olmuşdur.

BAHƏDDİN NƏBİYEV

Bahəddin Alı oğlu Nəbiyev 1948-ci ildə Bolnisi rayonunun Faxralı kəndində anadan olmuşdur. O, 1955-ci ildə Faxralı orta məktəbinin birinci sinfinə getmiş və 1966-cı ildə həmin məktəbi bitirmişdir. Bahəddin Nəbiyev 1966-cı ildə Azərbaycan Dövlət Universitetinin (indiki BDU-nun) Kimya fakültəsinə daxil olmuş və 1972-ci ildə həmin Universiteti fərqlənmə diplomu ilə bitirmişdir. Bahəddin Nəbiyev bir il Əli Bayramlı şəhərində 5 saylı orta məktəbdə kimya müəllimi işləmişdir. O, 1972-ci ildə Azərbaycan Respublikası EA Qeyri Üzvi və Fiziki Kimya İnstitutunda aspiranturaya daxil olmuş və keçmiş SSRİ-nin N.D.Zelinski adına Üzvi Kimya İnstitutuna (Moskva şəhəri) elmi e’zamiyyətə göndərilmişdir. Bahəddin Nəbiyev 1976-cı ildə həmin İnstitutda namizədlik dissertasiyası müdafiə etmiş və kimya elmləri namizədi elmi dərəcəsi almışdır. Bahəddin Nəbiyev 1976-1978-ci illərdə Azərbaycan Respublikası EA Qeyri-Üzvi və Fiziki Kimya İnstitutunda mühəndis və kiçik elmi işçi vəzifəsində işləmişdir. O, 1978-ci ildən indiki Azərbaycan Dövlət Kənd Təsərrüfatı Akademiyasının kimya kafedrasında dosent vəzifəsində işləyir. Bahəddin Nəbiyev 50-dən çox elmi və elmi metodik məqalələrin və dərs vəsaitinin müəllifidir. Ali məktəblərə daxil olanlar üçün çox faydalı olan "Kimya" dərsliyini nəşr etdirmişdir.

Bahədddin Nəbiyev 10-dan çox ittifaq və respublika səviyyəli konfranslarda çıxış edib materiallar çap etdirmişdir.

BƏXTİYAR ƏLİYEV

Bəxtiyar Mustafa oğlu Əliyev Şahbuz şəhərində anadan olmuş, orta təhsilini 1963-1973-cü illərdə Goranboy və Gəncə şəhərlərində almışdır.

Bəxtiyar Əliyevin valideyinləri Borçalının Saraclı kəndindəndir.

1974-cü ildə Gəncə Kənd Təsərrüfatı İnstitutunun mexanizasiya fakültəsinə daxil olmuş, 1979-cu ildə Göyçay şəhərinə tə’yinat almış və üç il öz ixtisası üzrə işləmişdir.

1982-ci ildə Moskvada Ümumittifaq Mexanizasiya İnstitutunun aspiranturasına daxil olmuş, 1985-ci ildə elmi işini müvəffəqiyyətlə müdafiə edib texnika elmləri namzədi elmi dərəcəsi almışdır.

Onun elmi və pedaqoji fəaliyyəti 15 elmi əsərdə öz əksini tapmışdır.

Bəxtiyar Əliyev dəfələrlə ittifaq və respublika səviyyəli konfranslarda çıxış etmiş və məqalələr çap etdirmişdir.

Hazırda Moskva şəhrində yaşayan Bəxtiyar Əliyev Azərbaycan Kənd Təsərrüfatı Nazirliyinin Moskvadakı nümayəndəsidir.

BƏHMƏN NAZIYEV

Bəhmən İlyas oğlu Nazıyev 1956-cı il avqustun 11-də Bolnisi rayonunun Saraclı kəndində anadan olmuşdur.

1963-cü ildə Saraclı kənd orta məktəbinin 1-ci sinfinə getmiş, 1973-cü ildə həmin məktəbi bitirmişdir.

1973-cü ildə indiki Bakı Dövlət Universitetinin tarix fakültəsində müsabiqədən keçməmişdir. Bir il Sumqayıt şəhərində Sintetik Kauçuk Zavodunda fəhlə işləmiş və 1974-cü ildə BDU-nun jurnalistika fakültəsinə qəbul imtahanları vermiş, lakin müsabiqədən keçməmişdir. 1974-1976-cı illərdə əsgəri xidmətdə olmuşdur. Hərbidən tərxis olunduqdan sonra üç (1976-1979) il Sumqayıt Kimya zavodunda fəhlə işləmişdir.

1979-cu ildə BDU-nun hüquq fakültəsinə daxil olmuş və 1985-ci ildə həmin fakültəni başa vurmuşdur.

1986-cı ildə Azərbaycan Respublikasının prokurorluq orqanlarında əmək fəaliyyətinə başlamışdır.

1986-1990-cı illərdə Bakı nəqliyyat prokurorluğunda köməkçi vəzifəsini icra etmişdir. Respublika prokurorluğunun sərəncamı əsasında iki il (1990-1992) Ağdam rayon prokurorluğunda prokurorun köməkçisi işləmişdir.

1992-1995-ci illərdə Masallı rayon prokurorunun köməkçisi işləmişdir.

1996-2000-ci illərdə BDU-nun hüquq fakültəsinin kriminallaşdırmanın nəzəri problemləri kafedrasının dissertantı olmuş və 2000-ci ildə namizədlik dissertasiyası müdafiə edib, hüquq elmləri namizədi elmi dərəcəsi almışdır.

Bəhmən Nazıyev bir müddət Nizami rayon prokurorunun köməkçisi, sonra isə Bakı şəhəri prokurorluğunda "Cinayət işləri üzrə məhkəmə qərarlarının qanuniliyinə nəzarət" şö’bəsinin rəis əvəzi və həmin şö’bənin prokuroru vəzifələrində işləmişdir.

1997-ci ilin avqustundan Xətai rayon prokurorluğunda baş müstəntiq, hazırda isə Xətai rayon prokurorunun köməkçisi vəzifəsini icra edir.

Bəhmən Nazıyevin elmi və əmək fəaliyyəti 12 elmi əsərdə və "Kriminallaşdırmanın nəzəri problemləri" (1998) kitabında öz əksini tapmışdır. Bəhmən Nazıyev əmək fəaliyyəti ilə yanaşı elmi işini də davam etdirir. O, doktorluq dissertasiyasını tamamlamaq üzrədir.

BİNNƏT BAYRAMOV

Binnət Yunus oğlu Bayramov 1942-ci il noyabrın 15-də Borçalı mahalının Bolnisi rayonunun Saraclı kəndində anadan olmuşdur. 1960-cı ildə kənd orta məktəbini gümüş medalla bitirmişdir. Elə həmin il də Azərbaycan Politexnik İnstitutuna daxil olmuşdur. Ali təhsilini 1965-ci ildə fərqlənmə diplomu ilə başa vurduqdan sonra Ümumittifaq Neft-Maşınqayırma Layihə-Texniki Elmi-Tədqiqat İnstitutuna tə’yinat almışdır.

1967-ci ilə kimi mühəndis vəzifəsində işləyən B.Bayramov elə həmin il ordu sıralarına çağırılmışdır.

1968-ci ildə əsgəri xidmətdən tərxis olunduqdan sonra Azərbaycan Politexnik İnstitutunda "Maşınqayırmanın texnologiyası" ixtisası üzrə aspiranturanın əyani şö’bəsinə daxil olmuşdur.

1971-ci ildən həmin kafedranın assisenti vəzifəsinə tə’yin olunan Binnət Bayramov 1976-cı ildə "Qıfıl yivli birləşmələrin hesablanma dəqiqliyini tə’min edən şərtlərin tədqiqi" mövzusunda dissertasiya müdafiə etmiş, texnika elmləri namizədi elmi dərəcəsi almışdır.

Neft və qaz sənayesində geniş tətbiq olunan bu dissertasiya o zaman müdafiə olunan ən yaxşı işlərdən biri hesab olunmuşdur.

1979-cu ildə baş müəllim vəzifəsinə tə’yin edilmiş, sonra fakültə dekanının müavini işləmişdir. 1980-ci ildən pedaqoji fəaliyyətini dosent vəzifəsində davam etdirən B.Bayramov 1982-1986-cı illərdə Afrikada-Tunisin Milli Mühəndislər İnstitutunda çalışmışdır.

1986-cı ildə yenidən vətənə qayıtdıqdan sonra elmi-pedaqoji fəaliyyətini Az.Pİ-də davam etdirmişdir. 100-ə qədər elmi əsəri, bir neçə dərs vəsaiti var. "maşınqayırma texnologiyası" (1995) dərsliyinin müəlliflərindən biridir.

Binnət Bayramov uzun sürən xəstəlikdən sonra 1997-ci ildə vəfat etmiş, Bakı şəhərində Xırdalan qəbristanlığında dəfn olunmuşdur.

BULUD SADIQOV

Bulud Cahangir oğlu Sadıqov 1962-ci ildə Bolnisi rayonunun Saraclı kəndində anadan olmuşdur. 1969-1979-cu illərdə Saraclı orta məktəbində oxumuş, orta təhsilini başa vurduqdan sonra elə həmin ildə Azərbaycan Kənd Təsərrüfatı İnstitutunun kənd təsərrüfatının iqtisadiyyatı və təşkili fakültəsinin mühasibat uçotu şö'bəsinə daxil olmuşdur.

Əmək fəaliyyətinə 1983-cü ildə həmin fakültəni fərqlənmə diplomu ilə bitirdikdən sonra Abşeron Reproduktor fabrikində mühasib kimi başlamışdır. 1984-1985-ci illərdə hərbi xidmətdə olmuşdur. 1985-1990-cı illərdə Yeni Bakı Broyler Fabrikində baş mühasib vəzifəsində işləmişdir. 1990-cı ildə Azərbaycan Elmi-Tədqiqat Kənd Təsərrüfatının İqtisadiyyatı və Təşkili İnstitutuna keçərək elmi işlə məşğul olmuş, 1992-ci ildə "Yeni Təsərrüfatçılıq şəraitində "Azərquşsənaye" birliyində istehsalatın səmərəliliyini yüksəltməyin iqtisadi problemləri" mövzusunda dissertasiya müdafiə etmiş, iqtisadi elmlər namizədi elmi dərəcəsi almışdır. 10-dan artıq elmi məqalənin müəllifidir. Hazırda Azərbaycan Dövlət İqtisad Universitetində işləyir.

CALAL NOVRUZOV

Calal Əbdülrəhman oğlu Novruzov 1949-cu ildə Bolnisi rayonunun Qoçulu kəndində anadan olmuşdur. 1955-ci ildə həmin kəndin orta məktəbinə daxil olmuş və 1968-ci ildə həmin məktəbi bitirmiş və Azərbaycan Dövlət Pedaqoji İnstitutunun (indiki ADPU-nun) coğrafiya fakültəsinə daxil olmuşdur. 1972-ci ildə institutu bitirdikdən sonra Bakı şəhərindəki 88 saylı orta məktəbə coğrafiya müəllimi tə’yin olunmuşdur. 1975-ci ildən elmi fəaliyyətə başlayaraq Azərbaycan Respublika EA Tarix İnstitutu Arxeologiya və Etnoqrafiya sektorunun müasir dövr şö’bəsində elmi işçi vəzifəsində çalışmışdır. 1985-ci ildən "Gürcüstanda yaşayan azərbaycanlıların müasir maddi mədəniyyəti" adlı dissertasiyasının üzərində işləyərək 1992-ci ildə namizədlik dissertasiyası müdafiə etmişidir. Həmin mövzuya dair bir monoqrafiya və 30-ə qədər elmi məqalə çap etdirmişdir. Eyni zamanda Respublikanın bir sıra ali məktəblərində keçirilən konfrans və müşavirələrdə çıxış etmiş, elmi məqalələr çap etdirmişdir.

Hazırda Arxeolologiya və Etnoqrafiya institutunda baş elmi işçi vəzifəsində çalışır.

CƏLİL ƏLİYEV

Cəlil Vəli oğlu Əliyev 1938-ci ildə Borçalı mahalının Bolnisi rayonunun Babakişilər kəndində anadan olmuşdur. 1956-cı ildə Darvaz kənd orta məktəbini bitirərək, həmin ildə Azərbaycan Kənd Təsərrüfatı İnstitutunun mexanikləşdirmə fakültəsinə daxil olmuşdur. 1961-ci ildə institutu bitirdikdən sonra tə’yinatla Gürcüstanın Dmanisi rayonuna işə göndərilmişdir. Burada o, 1968-ci ilə qədər Rayon texniki tə’mir stansiyasında mühəndis vəzifəsində çalışmışdır. 1968-ci ildə Azərbaycan Elmi-Tədqiqat Mexanikləşdirmə və Elektrikləşdirmə İnstitutunun nəzdində aspiranturaya daxil olmuşdur.

1974-cü ildə dissertasiya müdafiə edib texnika elmləri namizədi elmi dərəcəsi almışdır. 1974-cü ildən 1990-cı ilə kimi Elmi-Tədqiqat İnstitutunda elmi işçi və laboratoriya müdiri vəzifəsində işləmişdir. 1990-cı ildən 1997-ci ilə kimi Azərbaycan Dövlət Kənd Təsərrüfatı Akademiyasının dosenti olmuşdur.

İşlədiyi müddətdə o, 60-dan çox elmi və metodiki əsərlərin, dərs vəsaitlərinin müəllifi olmuşdur.

Cəlil Əliyev 1997-ci ildə vəfat etmişdir.

DÖVLƏT ÇIRAQOV

Dövlət Paşa oğlu Çıraqov 1955-ci il iyunun 2-də Bolnisi rayonunun Qoçulu kəndində anadan olmuşdur. 1972-ci ildə Qoçulu orta məktəbini bitirmiş, Bakıda Azərbaycan Politexnik İnstitutunun (indiki ATU-nun) inşaat fakültəsinə daxil olmuşdur. 1977-ci ildə Azərbaycan İnşaat Mühəndisləri İnstitutunu başa vurmuş və əmək fəaliyyətinə başlamışdır.

Tə’yinatla 1977-ci ildən 1980-ci ilədək Kuybışev vilayətinin Nefteqorsk qəsəbəsində "Kuybışev neft tikinti" trestində usta, iş icraçısı vəzifəsində işləmişdir. 1984-cü ildə Azərbaycan İnşaat Mühəndisləri İnstitutunun "Qruntlar mexanikası, əsaslar və özüllər" kafedrasının nəzdində aspiranturaya daxil olmuş, həmin ildən də kafedrada kiçik elmi işçi, laboratoriya müdiri vəzifəsində çalışmışdır. 1988-ci ildə namizədlik dissertasiyası müdafiə etmişdir.

Hal-hazırda Azərbaycan İnşaat Mühəndisləri Universitetinin tərsimi həndəsə və mühəndis qrafikası kafedrasında dosent vəzifəsində işləyir.

Dövlət Çıraqovun elmi fəaliyyəti 15-ə yaxın elmi əsərdə öz əksini tapmışdır.

Dövlət Çıraqov 20 elmi məqalənin, 1 metodik göstərişin və dərs vəsaitinin müəllifidir.

DÜNYAMALI ŞƏRİFOV

Dünyamalı İsa oğlu Şərifov 1957-ci il dekabr ayının 1-də Bolnisi rayonunun Faxralı kəndində anadan olmuşdur. 1995-ci ildə Faxralı səkkizillik məktəbinin birinci sinfinə daxil olmuş, 1975-ci ildə Faxralı orta məktəbini ə’la qiymətlərlə bitirmişdir. 1976-cı ildə Azərbaycan Dövlət Kənd Təsərrüfatı İnstitutunun meyvə-tərəvəzçilik və üzümçülük fakültəsinə daxil olmuş, 1981-ci ildə həmin fakültədə təhsilini fərqlənmə diplomu ilə başa vurmuşdur . İnstitutun göndərişi ilə 1982-1985-ci illərdə Moskvada əyani aspiranturaya qəbul olmuş və 1985-ci ildə Ümumittifaq Tərəvəz Təsərrüfatı İnstitutunda "Tərəvəz bitkilərinin sənaye texnologiyası ilə becərilməsinin əsasları" mövzusunda dissertasiya müdafiə etmişdir. 1985-1990-cı illərdə Respublika Aqrar Sənaye Komitəsinin ET Tərəvəzçilik İnstitutunda elmi işçi, aparıcı elmi işçi və şö'bə müdiri işləmişdir. 1991-1993-cü illərdə Səhiyyə Nazirliyinin "Farmakologiya və Xalq Təbabəti" EİB-də şö'bə rəisi vəzifəsində, 1993-1996-cı illərdə "Azəriqaz" Dövlət Şirkətində baş mütəxəssis kimi işləmişdir. 1997-ci ildən indiyə qədər Dövlət Neft Şirkətinin Quruda Neft və Qazçıxarma İstehsalat Birliyinin tabeliyində olan yardımçı təsərrüfat idarəsinin rəisi vəzifəsində işləyir.

Dünyamalı Şərifovun elmi fəaliyyəti 18 elmi əsərdə öz əksini tapmışdır. O, bir neçə beynəlxalq və respublika səviyyəli konfransların iştirakçısı olmuş, elmi məqalələr çap etdirmişdir.

QURBAN ƏLİYEV

Qurban İsa oğlu Əliyev 1949-cu ildə Bolnisi rayonunun Aşağı Qoşakilsə kəndində anadan olmuş, 1966-cı ildə orta məktəbi bitirib, Azərbaycan Dövlət Universitetinin mexanika-riyaziyyat fakültəsinə daxil olmuş və 1971-ci ildə həmin universiteti başa vurub Sovet hərbi hissələrində zabit kimi qulluq etmişdir.

1973-1975-ci illərdə SSRİ EA Sibir Şö'bəsinin Novosibirsk şəhərinin yaxınlığında olan Elmi Tədqiqat İnstitutunda elmi işçi vəzifəsində işləmişdir. 1974-cü ildə Leninqrad şəhərində kompüter üzrə ixtisasartırma institutunu qurtarmışdır. 1981-ci ildə Novosibirsk Dövlət Universitetinin aspiranturasına daxil olmuş və dissertasiyasını 1984-cü ildə müvəffəqiyyətlə müdafiə etmişdir. 20-dən çox elmi məqalə və metodik vəsaitin müəllifidir. Moskva, Leninqrad, Novosibirsk, Səmərqənd, Buxara, Ulan-Ude və digər şəhərlərdə elmi konfranslarda iştirak edib, elmi işlə əlaqədar məqalələr çap etdirmişdir.

1985-ci ildən N.Tusi adına ADPU-nun "İnformatika və hesablama riyaziyyatı" kafedrasında dosent vəzifəsində işləyir.

ELDAR ACALOV

Eldar Fərhad oğlu Acalov 1947-ci ildə Bakı şəhərində ziyalı ailəsində anadan olmuşdur. Onun valideynlərinin hər ikisi Borçalıdan olmuşdur.

1954-cü ildə Bakının 189 saylı orta məktəbinin birinci sinfinə getmiş, 1965-ci ildə həmin məktəbi bitirmişdir.

1965-ci ildə Azərbaycan Dövlət Bədən Tərbiyəsi İnstitutuna daxil olmuş, 1970-ci ildə həmin institutu bitirmişdir.

1967-1969-cu illərdə İnstitut komsomol təşkilatının 1-ci katibi vəzifəsində işləmişdir.

1971-1975-ci ilərdə Bədən Tərbiyəsi İnstitutunda müəllim işləmişdir.

1976-cı ildən 1980-ci ilə qədər Leninqrad Pedaqoji İnstitutunun dissertantı olmuş, 1987-ci ildə isə dissertasiya müdafiə edib, pedaqoji elmlər namizədi elmi dərəcəsinə layiq görülmüşdür.

1990-cı ildən dosentdir.

Eldar Acalov 1979-1989-cu illərdə respublika Təhsil Nazirliyində idarə rəisi, 1994-1996-cı illərdə Təfəkkür Universitetində prorektor olmuş, son illərdə isə dekan vəzifəsində çalışır.

Eldar Acalovun elmi və pedaqoji fəaliyyəti 100-dən çox elmi əsərdə və 15 dərslik və monoqrafiyada öz əksini tapmışdır.

Eldar Acalov 1998-ci ildən Azərbaycan Respublikası Fəxri Bədən tərbiyəsi işçisi, 1985-ci ildən respublika dərəcəli hakim, 1992-ci ildən isə Respublika Milli Olimpiya Komitəsinin icrakomunun üzvüdür.

O, indiyə qədər 50 beynəlxalq, ittifaq və respublika səviyyəli konfranslarda çıxış etmiş, elmi məqalələr çap etdirmişdir.

Hazırda Təfəkkür Universitetinnin pedaqogika və metodika kafedrasının müdiridir.

ELDAR MƏMMƏDOV

Eldar Hüseynqulu oğlu Məmmədov 1949-cu il may ayının 5-də Bolnisi rayonunun Faxralı kəndində anadan olmuşdur. 1955-ci ildə Faxralı orta məktəbinin 1-ci sinfinə getmiş, 1965-ci ildə ekstern yolu ilə Bakı şəhərinin 190 saylı məktəbini bitirmişdir. 1965-ci ildə Azərbaycan Neft və Kimya İnstitutuna (indiki ADNA) qəbul olmuş, 1969-cu ildə Azərbaycan Xalq Təsərrüfatı İnstitutunu bitirmişdir. 1969-1991-ci illərdə Azərbaycan Dövlət Plan Komitəsi nəzdində Elmi-Tədqiqat İqtisadiyyat İnstitutunda kiçik elmi işçi, baş elmi işçi, qrup rəhbəri, bölmə və şö'bə müdiri vəzifəsində işləmişdir. 1987-ci ildə iqtisad elmləri namizədi elmi dərəcəsi almaq üçün "Pedaqoji kadrların hazırlanmasının, planlaşdırılmasının və istifadəsinin təkmilləşdirilməsi məsələləri" mövzusunda dissertasiya müdafiə etmişdir.

Eldar Məmmədov "2000-ci ilə qədər Azərbaycan SSR-nin məhsuldar qüvvələrinin inkişafı və yerləşdirilməsi sxemi" iki cildliyinin (Bakı 1982), "1985-2005-ci illərdə Azərbaycan SSR-də elmi-texniki tərəqqinin Kompleks Proqramı (regional bölmə)" (Moskva 1989) və s. Dövlət əhəmiyyətli fundamental elmi-tədqiqatların müəlliflərindən biri olmuşdur.

Eldar Məmmədov Bakı, Moskva, Kiyev, Minsk, Alma-Ata, Tbilisi, Yerevan, Riqa şəhərlərində keçirilən simpozium və konfranslarda elmi mə’ruzələrlə çıxış etmişdir. Azərbaycan, rus, ingilis və erməni dillərində 80 elmi əsərin (o cümlədən bir kitab) müəllifidir.

Hal-hazırda Azərbaycan Respublikası Əmək və Əhalinin Sosial Müdafiəsi Nazirliyində idarə rəisinin müavini vəzifəsində işləyir.

ELXAN MƏMMƏDLİ

Elxan Hüseynqulu oğlu Məmmədli 1946-cı il yanvar ayının 1-də Borçalının Bolnisi rayonunun Faxralı kəndində müəllim ailəsində anadan olmuşdur. 1962-ci ildə Faxralı kənd orta məktəbinin 9-cu sinfini bitirdikdən sonra ailəliklə Bakı şəhərinə köçmüşlər. 1962-1963-cü dərs ilində Bakıdakı 23 saylı orta məktəbi bitirmişdir. Həmin illərdə Bakıda bir sıra zavod və fabriklərdə çalışmışdır. 1965-ci ildə ADU-nun (indiki BDU-nun) filologiya fakültəsinə daxil olmuş, 1971-ci ildə ali təhsilini uğurla başa vurmuşdur . Elmi fəaliyyətə "Şair Nəbinin həyat və yaradıcılığı"na həsr etdiyi diplom işi ilə başlamışdır. 1969-cu ildən folklorumuzun toplanması və təbliği ilə bağlı geniş fəaliyyət göstərir. Həmin ildən e’tibarən Azərbaycan radiosunda fəaliyyət göstərən "Bulaq" verlişinin aparıcı müəlliflərindən biri kimi tanınmışdır. Yaradıcı ömrünün on ildən çoxunu "Bulağ"a həsr edən Elxan Məmmədli 80-ci illərin əvvəlindən başlayaraq Azərbaycan televiziyasında saz-söz sənətkarlarına həsr etdiyi bir sıra verilişləri ilə də yadda qalmışdır.

1979-cu ildən öz taleyini Nizami adına Ədəbiyyat İnstitutunun folklor şö'bəsi ilə bağlayan tədqiqatçı-alim bu illər ərzində bir sıra folklor kitablarının işıq üzü görməsində əlindən gələni əsirgəməmişdir. Belə ki, iki cilddən ibarət "Azərbaycan aşıqları və el şairləri" (1984-cü il), "Azərbaycan bayatıları" (1984-cü il), "Cinaslar" (1985-ci il), "Bayatı, qoşma, təcnis" (1988-ci il), "Borçalı şair Nəbi" (1991-ci il) kimi kitabların tərtib və toplanması məhz Elxan Məmmədlinin yorulmaz əməyinin məhsuludur.

Filologiya elmləri namizədi elmi dərəcəsi almaq üçün yazdığı "Təcnis sənətkarlığı" dissertasiyası nəzəri baxımdan kamil poetika əsəri kimi mütəxəssislər tərəfindən yüksək qiymətləndirilmişdir. 50-dən çox elmi məqalənin və bir sıra monoqrafiyanın müəllifidir. 1992-ci ildən bu günə kimi Azərbaycan radiosunda "Sarıtel" və "Gözəlləmə" həftəlik musiqili verilişlərin aparıcısı kimi sazın-sözün təbliği işində əvəzsiz xidmət göstərir.

Elxan Məmmədov hazırda üç cildlik "Borçalı folkloru" kitabları üzərində işləyir.

Filologiya elmləri namizədi Elxan Məmmədli doktorluq işini başa vurmaq üzrədir.

E’TİMAD AYVAZOV

Etimad Bayram oğlu Ayvazov 1951-ci il martın 14-də Borçalının Faxralı kəndində qulluqçu ailəsində anadan olmuşdur. 1958-ci ildə Faxralı orta məktəbinə daxil olmuş və 1968-ci ildə həmin məktəbi ə’la qiymətlərlə bitirmişdir. 1968-ci ildə Azərbaycan Politexnik İnstitutunun (indiki ATU-nun) mexanika fakültəsinə daxil olmuş və oranı bitirdikdən sonra Bakı Məişət Kondisionerləri Zavodunun Xüsusi Layihə Konstruktor Texnoloji bürosunda müxtəlif vəzifələrdə çalışmışdır. 1974-cü ildən həyatını ali məktəblə bağlayıb, yə’ni 4 ilə yaxın Politexnik İnstitutunda tələbələrin diplom işlərinə rəhbərlik etmişdir.

1978-ci ildən isə Azərbaycan İnşaat Mühəndisləri İnstitutunda materiallar müqaviməti fənnindən dərs deməklə yanaşı həm də həmin institutda əyani aspiranturaya daxil olmuşdur. 1983-cü ildə isə aspiranturanı bitirərək müdafiə etmiş, fizika-riyaziyyat elmləri namizədi elmi dərəcəsi almışdır. 1983-cü ildən Azərbaycan Təhsil Nazirliyinin göndərişi ilə yenə həmin Universitetin nəzəri mexanika kafedrasına tə’yinatla göndərilərək müəllim kimi fəaliyyət göstərmişdir.

İlk dəfə olaraq Etimad Ayvazov tərəfindən latın qrafikalı şriftlə ali məktəblər üçün "Nəzəri mexanika" fənni üzrə yüksək tirajlı dərslik yazılmışdır. Etimad Ayvazov 100-ə qədər elmi məqalənin, o cümlədən ali məktəb tələbələri və aspirantlar üçün 6 elmi metodik əsərin müəllifidir. Hazırda Etimad Ayvazov İnşaat Mühəndisləri Universitetinin nəzəri mexanika kafedrasında dosent vəzifəsində çalışmaqla yanaşı, həm də Azərbaycan Respublikası Dövlət Əmlak Nazirliyində şö'bə rəisi vəzifəsində işləyir.