[A] [B-E] [Ə] [F-İ] [K-M] [M] [M-P] [R] [S] [Ş-T] [V-Z]

VAQİF QULİYEV

Vaqif Məhərrəm oğlu Quliyev 1950-ci ildə noyabr ayının 10-da Bolnisi rayonunun Ayorta (Akaurt) kəndində anadan olmuşdur. 1967-ci ildə həmin kənddə orta məktəbi bitirmiş, 1968-ci ildə Azərbaycan Xalq Təsərrüfatı İnstitutuna (indiki ADİU) daxil olmuşdur. 1972-ci ildə həmin İnstitutu bitirmiş, iqtisadçı-mühasib ixtisasına yiyələnmişdir. Vaqif Quliyev öz əmək fəaliyyətinə Azərbaycan SSR Əmək Əmanət Kassaları idarəsində mühasib kimi başlamış və 1973-cü ildə hərbi xidmətdə olmuşdur. Hərbi xidmətdən tərxis olunduqdan sonra, yə’ni 1974-cü ildən Azərbaycan Elmi Tədqiqat Kənd Təsərrüfatının İqtisadiyyatı və Təşkili İnstitutunda işə başlamış, 1976-cı ildə həmin institutun əyani aspiranturasına daxil olmuş və elə həmin il Moskva şəhərindəki Ümumittifaq Elmi Tədqiqat Kənd Təsərrüfatının İqtisadiyyatı institutuna e’zam olunmuşdur. 1981-ci ildə dissertasiya müdafiə edib elmi dərəcə almış, ETKTİ və Tİ-na qayıtmış, orada baş laborant vəzifəsindən tutmuş elmi katib vəzifəsinə qədər yüksəlmişdir. 1988-ci ildə müsabiqə yolu ilə Azərbaycan Dövlət İqtisad Universitetinin "Mühasibat uçotu" kafedrasına müəllim keçmişdir. 1996-cı ildən həmin İnstitutun mühasibat uçotu və audit kafedrasının dosentidir.

İqtisadiyyatın mühasibat uçotu və təhlilinə dair Vaqif Quliyev 50-ə yaxın elmi məqalənin və dərs vəsaitinin müəllifidir.

VAQİF NƏBİYEV

Vaqif Nəbi oğlu Nəbiyev 1953-cü ildə Bolnisi rayonunun Faxralı kəndində anadan olmuşdur. 1970-ci ildə Faxralı orta məktəbini ə’la qiymətlərlə bitirmişdir. Elə həmin ildə Azərbaycan Dövlət Tibb İnstitutunun (indiki ADTU-nun) müalicə-profilaktika fakültəsinə qəbul olmuşdur.

1976-cı ildə institutu müvəffəqiyyətlə bitirmiş, bir il Kirovabad (Gəncə) şəhər təcili yardım xəstəxanasında internatura keçmişdir. 1978-1981-ci illərdə tə’yinatla Xanlar rayonu mərkəzi xəstəxanasında həkim-onkoloq işləmişdir. 1983-cü ildən şəhər onkoloji dispanserində endoskopiya şö'bəsinin müdiridir. Onun sə’yi nəticəsində endoskopiya şö'bəsinin bazasında şəhər endoskopiya mərkəzi yaradılmışdır. Hazırda həmin mərkəzə Vaqif Nəbiyev başçılıq edir.

Vaqif Nəbiyev 1990-cı ildə Leninqrad (indiki S.Peterburq) şəhərində SSRİ Səhiyyə Nazirliyinin S.M.Kirov adına Həkimləri təkmilləşdirmə İnstitutunun endoskopiya kafedrasının müdiri professor L.N.İnşakovun rəhbərliyi altında "Yemək borusu xərçənginin erkən diaqnostikasının təkmilləşdirilməsi yolları" mövzusunda namizədlik dissertasiyası müdafiə etmişdir.

15 elmi məqalənin müəllifidir. Onkologiya və endoskopiya üzrə tibbi kadrların hazırlanmasında xüsusi xidmətləri var. ATU-da, 2 saylı tibb məktəbində, orta tibb işçilərinin ixtisasartırma kursunda dərs deyir. Bakı şəhərinin baş endoskopistidir. Daxili qoşunlar hospitalının məsləhətçisi və endoskopistidir.

Doktorluq işini müdafiə şurasına təqdim etmişdir.

VAQİF İSRAFİLOV

Vaqif İsmayıl oğlu İsrafilov 1959-cu il iyun ayının 17-də Bolnisi rayonunun Arakol kəndində anadan olmuşdur. İlk təhsilini doğma kəndində almışdır.

1973-1974-cü illərdə Arakol kənd 8 illik məktəbini ə’la qiymətlərlə bitirmiş, təhsilini 1975-1976-cı illərdə qonşu Sol Göyəç kəndində davam etdirmişdir. İki il həmin rayonun Bəytəkər kənd 8 illik məktəbində katib işlədikdən sonra 1978-ci ildə N.Tusi adına ADPİ-nin (indiki ADPU-nun) filologiya fakültəsinə daxil olmuş və 1982-ci ildə müvəffəqiyyətlə həmin fakültəni başa vurmuşdur.

1982-ci ildə təhsilini başa vurub, tə’yinatla Cəlilabad rayonunun Novoqolovka kənd orta məktəbində müəllimlik fəaliyyətinə başlamışdır. 1987-ci ildə Azərbaycan Respublikası EA-nın müxbir üzvü, Əməkdar elm xadimi, professor Afat Qurbanovun rəhbərliyi və məsləhəti ilə dissertant qəbul olunmuş, "Gürcüstan SSR-nin Azərbaycandilli oronim və hidronimləri" mövzusunda tədqiqata başlamışdır. 1989-cu ildə ADPU-nun ixtisaslaşdırılmış müdafiə şurasında dissertasiya müdafiə edib, filologiya elmləri namizədi elmi dərəcəsi almışdır.

1990-cı ildə gənc alim doğma kollektivə işə qəbul olunmuş, Onomastika problem laboratoriyasında baş laborant, baş elmi işçi vəzifələrində işləmişdir.

Vaqif İsrafilov 1995-ci ildən həmin Universitetin Azərbaycan dilçiliyi kafedrasında dosent vəzifəsində çalışır. "Uluslararası Türk Dil Qurumu" konqresində dəfələrlə iştirak etmişdir. "Türk Dil Qurumu"nun üzvüdür. Əsərləri Türkiyədə dəfələrlə çap edilmişdir.

1999-cu ildə Azərbaycan Respublikası Təhsil Nazirliyi təərfindən ali məktəb tələbələri üçün "Azərbaycan oronim və hidronimlərinin Gürcüstan arealı" dərs vəsaiti çap olunmuşdur. Bir neçə kitab və bioqrafiyanın tərtibatçısı və altmışdan çox elmi-publisistik məqalələrin müəllifidir.

Vaqif İsrafilov hal-hazırda ADPU-da elmi-pedaqoji fəaliyyətini davam etdirir.

ALMAS MİKAYILOV

Almas Abdu oğlu Mikayılov 1936-cı il martın 1-də Borçalı mahalının Bolus rayonunun (indiki Bolnisi) Faxralı kəndində anadan olmuşdur. O, 1946-cı ildə Faxralı kənd orta məktəbinin 1-ci sinfinə daxil olmuş, 1956-1957-ci tədris ilində Faxralı kənd orta məktəbinin XI sinfini bitirmişdir. 1957-ci ildə Azərbaycan Dövlət Universitetinin geologiya-coğrafiya fakültəsinə daxil olmuşdur. 1962-ci ildə həmin fakültəni fiziki-coğrafiya ixtisası üzrə bitirmiş, tə’yinatla Azərbaycan Respublikası EA Coğrafiya İnstitutunun əyani aspiranturasına (Geomorfologiya ixtisası) daxil olmuşdur. 1967-ci ildə aspiranturanı bitirmişdir. 1968-ci ilin yanvar ayında Coğrafiya İnstitutunun "Landşaftşünaslıq" şö’bəsində kiçik elmi işçi vəzifəsində fəaliyyətə başlamışdır. O, 1971-ci ildən indiyə kimi Azərbaycan EA Coğrafiya İnstitutunun "Landşaftşünaslıq" şö'bəsində baş elmi işçi, laboratoriya müdiri, aparıcı elmi işçi vəzifəsində çalışaraq, landşaftşünaslıq və geomarfologiya elmi sahələri üzrə elmi tədqiqat işləri aparmışdır. Onun rəhbərliyi altında 4 nəfər müdafiə edərək coğrafiya elmləri namizədi elmi dərəcəsi almışdır. Almas Mikayılov həmçinin son 15 il ərzində Azərbaycan EA Coğrafiya İnstitutunun nəzdində fəaliyyət göstərən ixtisaslaşdırılmış müdafiə elmi şurasının elmi katibi olmuşdur. Almas Mikayılov 100-dən çox elmi əsərin, 2 monoqrafiyanın, 20-yə qədər elmi hesabatın müəllifidir. Onun 1978-ci ildə nəşr olunmuş "Qusar maili düzənliyinin geomorfologiyası" və "Yeni tektonik hərəkətlərlə əlaqədar Cənub-Şərqi Qafqaz Landşaftının formalaşması və inkişafı" (həmmüəllif) əsərləri mütəxəssislər tərəfindən yüksək qiymətləndirilmişdir.

VEYS MEHDİLİ

Veys Mehdi oğlu Mehdili 1935-ci il martın 5-də Borçalının Aşağı Qoşakilsə kəndində anadan olmuşdur.

O, 1941-ci ildə Aşağı Qoşakilsə kəndində 8 illik məktəbə daxil olmuş, 1949-cu ildə məktəbi bitirdikdən sonra Arıxlı 11 illik orta məktəbinə keçmiş və 1952-ci ildə məktəbi qızıl medalla bitirib həmin il Bakı Dövlət Universitetinin fizika-riyaziyyat fakültəsinə imtahansız qəbul olunmuşdur.

Veys Mehdili 1957-ci ildə ADU-nu ə’la qiymətlərlə bitirmiş və tə’yinatla Azərbaycan Respublikası Elmələr Akademiyasının Neft Ekspedisiyası elmi tədqiqat institutuna göndərilmişdir.

1960-cı ildə aspiranturaya daxil olmuş və aspiranturanı 1963-cü ildə bitirmişdir.

1963-cü ildə Azərbaycan Neft və Kimya İnstitutunun nəzəri mexanika kafedrasına assistent vəzifəsinə qəbul edilmişdir. Hazırda kafedrada dosent vəzifəsində işləyir.

1969-cu ildə neft-mexanika fakültəsinin axşam və qiyabi şö'bələri üzrə dekan müavini, 1970-1978-ci illərdə həmin şö'bələr üzrə dekan vəzifəsində işləmişdir .

Hazırda Veys Mehdili neft-mexanika fakültəsinin axşam və qiyabi şö'bələri üzrə dekan vəzifəsində işləyir.

Veys Mehdili fədakar əmək uğurlarına görə 8 dəfə fəxri mükafata layiq görülmüşdür.

1965-ci ildə o Bakı Dövlət Universitetində "İkigözlü mayenin ayrılıqda hərəkətinin hidrodinamik tədqiqi" mövzusunda dissertasiya müdafiə etmişdir və fizika-riyaziyyat elmləri namizədi Veys Mehdilinin elmi və elmi-pedaqoji fəaliyyətinin nəticələri 95 elmi əsərdə öz əksini tapmışdır.

Veys Mehdili Beynəlxalq Eko-Energetika Akademiyasında neft-mexanika elminin inkişaf etdirilməsində və təhsil sisteminin təşkilində səmərəli işlər görmüşdür. Ona görə də Eko-Energetika Akademiyasının neft bölməsi Veys Mehdilinin elmi-pedaqoji fəaliyyətini nəzərə alaraq ona elmlr doktoru və professor adı vermişdir.

VƏLİ SULTANOV

Vəli Daryax oğlu Sultanov 1928-ci ildə Borçalı mahalının Bolus nümayəndəliyinin (indiki Bolnisi rayonu) Faxralı kəndində anadan olmuşdur. Orta məktəbi Faxralı kəndində bitirdikdən sonra, 1950-ci ildə Azərbaycan Sənaye İnstitutuna daxil olmuş və 1955-ci ildə Neft və qaz quyularının qazılması ixtisasına yiyələnmişdir. Bir müddət neft buruqlarında işləmiş, 1958-ci ildə "ÜİTTETİ-də" (ümumittifaq Təhlükəsizlik Texnikası Elmi Tədqiqat İnstitutu) çalışmışdır.

1968-ci ildə namizədlik dissertasiyası müdafiə etmişdir. Həmin ildən e’tibarən AzPİ-nin (indiki ATU-nun) əmək mühafizəsi və təhlükəsizlik texnikası kafedrasında dosent vəzifəsində işləmişdir. 1977-ci ildə xəstəliklə əlaqədar olaraq işdən azad edilmişdir. Vəli Sultanovun elmi və pedaqoji fəaliyyəti 20-dən çox elmi əsərdə öz əksini tapmışdır. O cümlədən iki kitabın müəllifi, 4 kitaba isə həmmüəllif olmuşdur. Vəli Sultanov 15-ə qədər ittifaq və respublika səviyyəli konfranslarda mə’ruzələr etmiş və elmi materiallar çap etdirmişdir.

Vəli Daryax oğlu Sultanov 1998-ci il iyun ayında Bakıda vəfat etmişdir.

VƏKİL BAYRAMOV

Vəkil Əsəd oğlu Bayramov 1938-ci ildə Bolnisi rayonunun Dəmirli kəndində anadan olmuşdur. 1958-ci ildə Darvaz kənd orta məktəbini bitirdikdən sonra 1961-ci ilədək ordu sıralarında xidmət etmişdir. 1961-ci ildə Azərbaycan Dövlət Kənd Təsərrüfatı İnstitutunun zootexnika fakültəsinə daxil olmuş, 1966-cı ildə oranı fərqlənmə diplomu ilə başa vurmuşdur. Bir il istehsalatda işlədikdən sonra, 1967-ci ildə fakültə elmi şurasının zəmanəti ilə aspiranturaya daxil olmuş, 1970-ci ildə namizədlik dissertasiyası müdafiə etmişdir.

1970-ci ildən 1990-cı ilə kimi Azərbaycan Elmi-Tədqiqat Heyvandarlıq İnstitutunda elmi işçi və şö'bə müdiri vəzifəsində çalışmışdır. Uzun müddət həmin institutda partiya təşkilatı katibi olmuşdur. 1990-cı ildən Azərbaycan Dövlət Kənd Təsərrüfatı Akademiyasının dosentidir.

İşlədiyi müddətdə o, respublika heyvandarlığının inkişafına samballı töhfələr vermişdir. Respublikada yetişdirilən mal-qaranın məhsuldarlıq və damazlıq keyfiyyətinin yaxşılaşdırılmasına dair 80-dən artıq elmi və 50-dən çox qəzet məqalələrinin, bir sıra dərslik və dərs vəsaitinin müəllifidir.

Vəkil Bayramov bu müddət ərzində 10-a yaxın ittifaq və respublika səviyyəli konfranslarda çıxış edib məqalələr çap etdirmişdir.

VƏKİL XƏLİLOV

Vəkil Səməd oğlu Xəlilov 1937-ci ildə Borçalının Bolus nümayəndəliyinin (Bolnisi rayonu) Əsmələr kəndində anadan olmuşdur. İbtidai təhsilini öz doğma kəndində aldıqdan sonra, 1949-cu ildə Qoçulu natamam orta məktəbiində davam etdirmiş, 1953-cü ildə Arıxlı orta məktəbinin IX sinfinə qəbul olmuş və 1956-cı ildə həmin məktəbi bitirmişdir. Bir il istehsalatda işlədikdən sonra 1958-ci ildə Azərbaycan Dövlət Universitetinin (indiki BDU-nun) biologiya fakültəsinə daxil olmuşdur. 1964-cü ildə Universiteteti bitirmişdir. 1968-ci ildə Azərbaycan EA Botanika institutunda geobotanika ixtisası üzrə aspiranturaya daxil olmuşdur. Dissertasiya işi "Kiçik Qafqazın (Azərbaycan SSR ərazisində) yay otlaq və biçənəklərinin "E" vitaminli yem bitikiləri" mövzusunda olmuşdur. Tədqiqat işini Moskvada Ümumittifaq Vitamin institutunda aparmışdır. 1971-ci ildə Azərbaycan EA Botanika İnstitutunda dissertasiya müdafiə edib biologiya elmləri namizədi elmi dərəcəsi almışdır. 1984-cü ilə qədər Gürcüstanın Bolnisi rayonunun Qoçulu orta məktəbində kimya-biologiya müəllimi, 1984-cü ildən 1999-cu ilə kimi həmin məktəbdə direktor vəzifəsində çalışmışdır. 1971-ci ildə Ümumittifaq botanika cəmiyyətinin V konfransında (Bakıda keçirilən), 1974-cü ildə isə həmin cəmiyyətin Stavropolda keçirilən VI konfransda mə’ruzə ilə çıxış etmişdir. Vəkil Xəlilov Gürcüstanın Əməkdar müəllimi adına layiq görülmüşdür. 1977-ci ildə Gürcüstan müəllimlərinin IV qurultayının, 1987-ci ildə VI qurultayının nümayəndəsi olmuş və mə’ruzə ilə çıxış etmişdir. Vəkil Xəlilovun elmi və pedaqoji fəaliyyəti 8 elmi əsərdə öz əksini tapmışdır. İşlədiyi müddətdə dəfələrlə kənd, rayon və şəhər sovetlərinin deputatı, rayon partiya komitəsinin üzvü seçilmişdir.

VÜQAR MEHRABOV

Vüqar Abdulla oğlu Mehrabov 1969-cu il avqust ayının 17-də Bakı şəhərində anadan olmuşdur. 1976-cı ildə Bakı şəhəri 20 saylı orta məktəbin birinci sinfinə getmiş və 1986-cı ildə həmin məktəbi qızıl medalla bitirmişdir. O, 1985-ci ildə Azərbaycan məktəblilərinin riyaziyyat üzrə olimpiadasında 2-ci yeri, 1986-cı ildə isə 1-ci yeri tutmuşdur. Bundan əlavə o, 1985-ci ildə SSRİ EA-nın "Kvant" jurnalının qalibi olmuşdur. 1986-cı ildə məktəblilərin riyaziyyat üzrə Ulyanovsk şəhərində keçirilən SSRİ üzrə olimpiadasında iştirak etmiş və II yeri tutmuşdur.

Vüqar Mehrabov 1986-cı ildə BDU-nun mexanika-riyaziyyat fakültəsinə daxil olmuş və 1992-ci ildə həmin fakültəni fərqlənmə diplomu ilə bitirmişdir. 1992-ci ildə BDU-nun "Funksional analiz və funksiyalar nəzəriyyəsi" kafedrasında əyani aspiranturaya daxil olmuş və 1995-ci ildə aspiranturanı müvəffəqiyyətlə bitirmişdir. 1996-cı ilin fevralında Azərbaycan Respublikası EA-nın Mexanika və Riyaziyyat İnstitutunun nəzdindəki Elmi Şurada "Periodik əmsallı Pauli operatorunun spektri" mövzusunda namizədlik dissertasiyası müdafiə etmiş və fizika-riyaziyyat elmləri namizədi elmi dərəcəsi almışdır.

Vüqar Mehrabov hazırda BDU-nun mexanika-riyaziyyat fakültəsinin "Riyazi analiz" kafedrasının dosentidir. O, elmi araşdırmalarını davam etdirir. 6 elmi məqalənin və 1 kitabın müəllifidir.

Vüqar Mehrabov 10-a yaxın beynəlxalq və respublika səviyyəli konfransların iştirakçısı olmuş, məqalələr çap etdirmişdir.

YADİGAR HÜSEYNOV

Yadigar Yusif oğlu Hüseynov 1955-ci il may ayının 3-də Bolnisi rayonunun Saraclı kəndində anadan olmuşdur.

1961-ci ildə Saraclı kənd orta məktəbinə daxil olmuş və 1972-ci ildə həmin məktəbi ə’la qiymətlərlə bitirmişdir. 1972-ci ildə Azərbaycan Dövlət Universitetinin (indiki BDU) fizika fakültəsinə daxil olmuş, 1977-ci ildə Universiteti fərqlənmə diplomu ilə bitirmişdir.

1977-ci ildən Qəbələ rayonunda pedaqoji fəaliyyətə başlamışdır. 1981-ci ildə Bakı Dövlət Universitetinin yarımkeçiricilər fizikası elmi-tədqiqat laboratoriyasına kiçik elmi işçi vəzifəsinə qəbul edilmişdir. 1985-ci ildə aspiranturaya daxil olmuş və 1989-cu ildə namizədlik dissertasiyasını müdafiə edib, fizika-riyaziyyat elmləri namizədi elmi dərəcəsinə layiq görülmüşdür.

1990-1991-ci illərdə I Roma Universitetində elmi e’zamiyyətdə olmuşdur. 1992-ci ildən 2000-ci ilin iyun ayına kimi BDU-nun yarımkeçiricilər fizikası elmi-tədqiqat laboratoriyasında baş elmi işçi vəzifəsində çalışmışdır. 2000-ci ilin iyun ayından Sumqayıt Dövlət Universitetinin elmi işlər üzrə prorektoru və həmçinin "Fizika" kafedrasının dosenti işləyir.

Bir çox Beynəlxalq elmi konfranslarda və simpoziumlarda çıxış etmişdir. 70-dən çox elmi məqalənin, bir neçə metodiki göstəriş və dərs vəsaitinin müəllifidir.

Hal-hazırda bərk cisim elektronikasında yeni istiqamət hesab edilən "İnteqral-həssas elementlərin siqnal çevirən sxemlərlə və fərdi qidalanma ilə vahid texnoloji tsikldə uyğunlaşması" mövzusunda doktorluq dissertasiyasını tamamlayıb müdafiə şurasına təqdim etmişdir.

YOLÇU ƏLİZADƏ

Yolçu Əhməd oğlu Əlizadə 1922-ci ildə Borçalı mahalının Bolus nümayəndəliyinin Faxralı kəndində anadan olmuşdur. 1946-cı ildə Faxralı orta məktəbini qızıl madalla bitirmiş, Azərbaycan Dövlət Universitetinin filologiya fakültəsinə daxil olmuşdur. 1941-ci ildə Böyük Vətən müharibəsinin başlanması ilə əlaqədar olaraq həmin ilin avqust ayında Ordu sıralarına çağırılmış, 1941-1945-ci illərdə ön cəbhədə vuruşmuşdur. Müharibədə iştirakı zamanı orden və medallarla təltif edilmişdir.

Müharibədən tərxis olunduqdan sonra, Azərbaycan Xalq Təsərrüfatı İnstitutuna daxil olmuş, 1956-cı ildə oranı bitirmişdir. 1946-cı ildən 1968-ci ilə kimi Bolnisi rayonunun bir sıra kəndlərində kolxoz və sovxozların baş mühasibi vəzifəsində işləmişdir. 1964-cü ildə Azərbaycan Kənd Təsərrüfatı İnstitutunun iqtisadiyyat fakültəsinə aspiranturaya daxil olmuş, 1968-ci ildə isə aspiranturanı bitirmişdir. Sonra Gürcüstan Elmlər Akademiyasının İqtisadiyyat İnstitutunda dissertasiya müdafiə edib iqtisad elmlər namizədi elmi dərəcəsi almışdır. 1968-ci ilin sentyabr ayının 1-dən 1999-cu ilin sentyabrına kimi Azərbaycan Dövlət İqtisad İnstitutunun mühasibat uçotu kafedrasında dosent vəzifəsində işləmişdir. 1969-1974-cü illərdə həmin ali məktəbin "Mühasibat uçotu və maliyyə-kredit" fakültəsində dekan müavini və dekan vəzifələrində işləmişdir. Mühasibat uçotuna və onun təkmilləşməsinə aid 35 elmi məqalənin və 3 dərs vəsaitinin müəllifidir. Bu sahə üzrə elmi konfranslarda fəal iştirak etmiş, məqalələr çap etdirmişdir.

1985-1990-cı illərdə Azərbaycan Ali məhkəməsinin iclasçısı olmuşdur. II dərəcəli müharibə əlilidir.

YUSİF MUSAYEV

Yusif Əli oğlu Musayev 1942-ci ildə Bolnisi rayonunun Faxralı kəndində kolxozçu ailəsində anadan olmuşdur. 1948-ci ildə Faxralı orta məktəbinin 1-ci sinfinə daxil olmuş və 1958-ci ildə orta məktəbi bitirib, Azərbaycan Politexnik İnstitutunun maşınqayırma fakültəsinə daxil olmuşdur. 1963-cü ildə institutu bitirmiş, tə’yinat üzrə "Bakelektroştamp" zavodunda mühəndis-texnoloq işləmişdir. 1964-1965-ci illərdə ordu sıralarında xidmət etmişdir. 1965-1968-ci illər ərzində Azərbaycan Politexnik institutunun "Maşın detalları və yükqaldıran-nəqlədici maşınlar" kafedrasında assistent işləmişdir. 1968-1971-ci illərdə Moskvada SSRİ EA-nın "Maşınşünaslıq" elmi tədqiqat institutunda aspirant olmuş, orada texnika elmləri namizədi elmi dərəcəsi almaq üçün dissertasiya müdafiə etdikdən sonra Azərbaycan Politexnik İnstitutunun "Maşın detalları və YQNM" kafedrasında assistent, baş müəllim və dosent vəzifəsində işləmişdir. 1975-1976-cı illər və 1998-ci ildə Almaniya Federativ Respublikasının Münxen Texniki Universitetində elmi e’zamiyyətdə olmuşdur. 1981-1982-ci illərdə Moskvada Moris Torez adına Xarici Dillər İnstitutunda ingilis dili öyrənmiş və 1983-1987-ci illər ərzində Efiopiyada Bahr-Dar Politexnik institutunda müəllim işləmişdir. O, maşın və mexanizmlərdə "Sürtünmə, yeyilmə və yağlama" problemləri ilə məşğuldur. 50-dən çox elmi məqalənin, 10-a qədər müəlliflik şəhadətnaməsinin müəllifidir. 9 dərs vəsaiti çap etdirmişdir (onlardan 4-ü ingilis dilində Efiopiyada çap olunmuşdur). Digər müəlliflərlə birlikdə rusça-azəricə-türkcə-ingiliscə "Makina elemanları sözlüyü" (325 s) Türkiyədə çap olunmuşdur (1997). Elmi məqalələri əsasən Rusiya, Almaniya, Türkiyə, Yuqoslaviya və s. dövlətlərdə çap olunmuşdur.

ZEYNAL SOFİYEV

Zeynal Paşa oğlu Sofiyev 1935-ci il fevral ayının 15-də Borçalı mahalının Bolus nümayəndəliyinin Saraclı kəndində anadan olmuşdur. 1951-ci ildə kənddəki səkkizillik məktəbi bitirmişdir.

1954-1957-ci illərdə hərbi xidmətdə olmuşdur. Ordudan tərxis olunduqdan sonra 1957-1962-ci illərdə Azərbaycan Dövlət Universitetinin biologiya fakültəsində oxumuşdur. Universiteti bitirdikdən sonra Azərbaycan Elmlər Akademiyasının Tarix İnstitutunda antropoloq kimi əmək fəaliyyətinə başlamışdır. 1963-cü ildə Akademiyanın Zoologiya İnstitutunun hidrobiologiya laboratoriyasına kiçik elmi işçi vəzifəsinə keçmişdir. 1965-1968-ci illərdə İnstitutunun nəzdindəki aspiranturanı bitirmiş və 1969-cu ildə "Naxçıvan MSSR hövzələrinin bentik faunası" mövzusunda dissertasiya müdafiə etmiş, biologiya elmləri namizədi elmi dərəcəsi almışdır. Zeynal Sofiyevin 10-dan artıq elmi əsəri çap olunmuşdur. Zeynal Sofiyev işlədiyi müddət ərzində 10-a yaxın respublika səviyyəli müşavirə və konfranslarda iştirak edib elmi məqalələr çap etdirmişdir.

1970-ci ildə Cənubi Xəzər Balıqçılıq İdarəsinə böyük mühəndis vəzifəsinə tə’yin olunmuş, iki il idarə rəisinin müavini vəzifəsində çalışmışdır.

1972-ci il iyulun 29-da vəfat etmişdir.