ELMLƏR NAMİZƏDLƏRİ

TİFLİS (TBİLİSİ) BÖLGƏSİ

[A-İ] [M-R] [S-Z]

SƏMAYƏ BEKTAŞİ (XEYİR-ZADƏ)

Səmayə Həsən qızı Bektaşi 1935-ci il sentyabrın 10-da Tbilisi şəhərində müəllim ailəsində anadan olmuşdur. Əvvəlcə Tbilisi şəhərinin 3 saylı orta məktəbində oxumuş, 1959-cu ildə Bakı şəhərində 85 saylı məktəbi bitirmişdir. Həmin il Azərbaycan Dövlət Universitetinin kimya fakültəsinə daxil olmuş və 1964-cü ildə universiteti bitirmişdir.

1964-1969-cu illərdə EA Y.Məmmədəliyev adına Neft Kimya Prosesləri İnstitutunda kiçik elmi işçi vəzifəsində çalışmışdır.

1969-cu ildən 1982-ci ilə kimi Azərbaycan Dövlət Universitetində yüksək molekullar birləşmələri kafedrasında işləmişdir. 1982-1984-cü illərdə Politexnik Texnikumunda müəllim işləmişdir.

1984-cü ildə "Polixerftal turşuların sintezi və onların çevrilməsi" mövzusunda namizədlik dissertasiyası müdafiə etmişdir. 1984-cü ildən 1995-ci ilə qədər EA Qeyri-Üzvi və Fiziki Kimya İnstitutunda elmi işçi vəzifəsində çalışmışdır.

Səmayə Bektşinin elmi fəaliyyəti 20 elmi əsərdə və bir neçə ixtiralarda əks olunmuşdur.

SƏMAYƏ İBRAHİMOVA (ƏLİYEVA)

Səmayə Əli qızı İbrahimova (Əliyeva) 1939-cu il sentyabrın 17-də Tbilisi şəhərində anadan olmuşdur. 1946-cı ildə Tbilisi şəhərindəki 64 saylı rus orta məktəbinə getmiş, 1957-ci ildə oranı bitirmişdir. 1966-cı ildə Tbilisi Dövlət Universitetinin iqtisadiyyat fakültəsini qiyabi bitirmişdir. 1965-ci ildə Bakıya köçmüş, Dövlət Plan Komitəsinin nəzdində olan Elmi-Tədqiqat İqtisadiyyat İnstitutunda kiçik elmi işçi vəzifəsindən bölmə müdiri vəzifəsinə qədər yüksəlmişdir. 1968-ci ildə əyani aspiranturaya daxil olmuş və 1973-cü ildə "Azərbaycan SSR-də yeyinti sənayesinin sahə və ərzaq sutrukturunun təkmilləşdirilməsi məsələləri" mövzusunda namizədlik dissertasiyası müdafiə etmişdir. 1979-1980-ci illərdə Azərbaycan Dövlət Plan Komitəsinin nəzdindəki Elmi-Tədqiqaqt İqtisadiyyat İnstitutunun mühəndis qüvvələrinin inkişafı və yerləşdirilməsi bölməsinin müdiri olmuşdur. 1982-1984-cü illərdə Azərbaycan Texnologiya İnstitutunda müəllim, 1984-cü ildən Azərbaycan Dövlət Plan Komitəsinin İqtisadiyyat İnstitutunda baş müəllim, sonradan dosent vəzifəsini tutmuşdur. 60-a qədər əsəri çap olunmuşdur (o cümlədən 7 kitabça və 1 dərs vəsaiti).

SƏİD SULTANOV

Səid Heydər oğlu Sultanov 1921-ci ildə Tiflis şəhərində qulluqçu ailəsində anadan olmuşdur. 1928-ci ildə Tiflis şəhər orta məktəbinin 1-ci sinfinə daxil olmuş, 1938-ci ildə həmin məktəbi bitirmişdir. 1938-ci ildə Tbilisi Politexnik İnstitutunun maşınqayırma texnologiyası fakültəsinə daxil olmuş, 1943-cü ildə həmin fakültəni bitirmişdir. Əmək fəaliyyətinə Tbilisi 13 saylı avtonəqliyyat tə’miri zavodunda mühəndis-mexanik vəzifəsində başlamış, burada 1945-ci ilə qədər işləmişdir. 1948-ci ildə namizədlik dissertasiyası müdafiə etmişdir.

1948-ci ildən tə’yinatla Bakı şəhərinə göndərilmiş, 1950-ci ilə qədər Neft və Kimya İnstitutunda (indiki ADNA) assistent işləmişdir. 1950-ci ildən 1958-ci ilə qədər Azərbaycan Politexnik İnstitutunda müəllim, sonra dosent vəzifəsində çalışmışdır. 1958-ci ildə müsabiqə yolu ilə L.Şmidt adına maşınqayırma (indiki Səttərxan) zavodunda SKB-yə rəis vəzifəsinə göndərilmiş, 1961-ci ildə isə həmin zavodun baş mühəndisi, 1962-ci ildə elmi hissə üzrə direktor müavini vəzifəsinə irəli çəkilmişdir. 1964-cü ildən 1973-cü ilin sonuna kimi Ümumittifaq Layihə-Texnologiya elmi-tədqiqat institutunda (indiki Azərbaycan Maşınqayırma Texnologiyası institutunda) elmi işlər üzrə direktor müavini işləmişdir.

Səid Sultanov 1958-ci ildən 1968-ci ilə qədər mütəmadi olaraq xarici dövlətlərdə elmi və praktiki e’zamiyyələrdə (Bolqarıstan, Yuqoslaviya, Polşa, İtaliya və s.) olmuşdur.

Səid Sultanov Respublikada Maşınqayırmanın Texnologiyasına dair iki sanballı kitab və onlarla elmi məqalələr çap etdirmişdir.

O, 50-ə yaxın beynəlxalq və respublika səviyyəli simpozium və konfransların iştirakçısı olmuş, elmi məqalələr çap etdirmişdir.

Səid Sultanov 1981-ci ildə Bakıda vəfat etmişdir.

Siyavuş Məmmədiyə oğlu Alxazov 1935-ci ildə hərbi qulluqçu ailəsində anadan olmuşdur. 1943-cü ildə Tbilisinin Ortaçala məhəlləsində yerləşən 31 saylı kişi beynəlmiləl məktəbində 1-ci sinfə daxil olmuşdur. Siyavuş Alxazov 1949-cu ildə təhsilini 37 saylı Azərbaycan orta ümumtəhsil məktəbində (indiki 73 saylı) davam etdirmiş, 1954-cü ildə orta məktəbi qızıl medalla bitirmişdir.

1959-cu ildə Azərbaycan Neft və Kimya İnstitutunun (indiki ADNA) geoloji-kəşfiyyat fakültəsinin "Faydalı qazıntı yataqlarının axtarışı və kəşfiyyatının geofiziki üsulları" ixtisası üzrə bitirmiş, Neft Daşlarında, Dəniz Mə’dən-Geofizikası Ekspedisiyasında texnik-operator, mühəndis-operator, dəstə rəisi və ekspedisiya rəisinin müavini vəzifələrində işləmişdir. Onun beş səmərələşdirici təklifi tətbiq olunmuş və beş elmi işi dərc edilmişdir.

Neft Daşlarında işlədiyi müddətdə burada "Xəzərin səsi" yerli radiostudiyası yaratmış, ona rəhbərlik etmiş, "Neft Daşları" və "Neftənie Kamni" çoxtirajlı qəzetlərin açılmasının (1967) təşəbbüskarı və onların redaksiya hey’ətlərinin üzvü olmuşdur. "Xəzərfilm" studiyası yaratmış (1975) və iki il onun kinorejissoru vəzifəsində işləmişdir. 1969-cu ildən SSRİ Jurnalistlər İttifaqının üzvü olmuşdur. O, 1962-ci ildə 73 saylı fəhlə-gənclər məktəbində, 1967-ci ildə isə Bakı Axşam Neft Texnikumunun filialında Geologiya və Geodeziyadan dərs deməyə də’vət olunmuşdur. 30 il iqtisadi məktəbin rəhbəri, 10 il partiya təşkilatı katibi olmuşdur. Sonrakı illərdə Bakının 214 saylı orta ümumtəhsil məktəbində fizikadan və Bakı Kompüter Litseyində coğrafiyadan dərs demişdir. Ali kateqoriyalı müəllimdir.

1990-cı ildə elmi işə keçən Siyavuş Alxazov əvvəlcə Ümumittifaq Neft Elmi-Tədqiqat Təhlükəsizlik Texnikası İnstitutunda, 1994-cü ildə isə "Dənizneftqazlayihə" Dövlət Elmi-Tədqiqat və Layihə İnstitutunda böyük elmi işçi vəzifəsində işləmişdir.

Hazırda "Dənizneftqazlayihə" DETLİ neftqazmə’dən geofizikası laboratoriyasının aparıcı elmi işçisi, texnika elmləri namizədi və institutun doktorantıdır. 100-ə qədər elmi işin, o cümlədən 5 ixtiranın, 25 elmi mə’ruzənin müəllifidir. Azərbaycan Milli Geofiziklər Komitəsinin, Azərbaycan Jurnalistlər Birliyinin üzvüdür. "Rəşadətli əməyə görə" və "Əmək veteranı" medalları ilə təltif olunmuşdur.

SİYAVUŞ MAHMUDOV

Siyavuş Əli oğlu Mahmudov 1933-cü il aprelin 12-də Naxçıvan şəhərində anadan olmuşdur. Onun soykökünün Tiflis-Borçalı ilə sıx bağlılığı vardır.

1940-cı ildə Tbilisi Azərbaycan orta məktəbinin 1-ci sinfinə daxil olmuş, 1950-ci ildə həmin məktəbi bitirmişdir. 1951-1956-cı illərdə Azərbaycan Dövlət Universitetinin geoloji-coğrafiya fakültəsinin təlbəsi olmuş və geoloji-kəşfiyyat mühəndisi ixtisasına yiyələnmişdir. 1956-cı ildə Azərbaycan EA Geologiya İnstitutunun geoloji-kəşfiyyat şö’bəsində laborant işləmiş, sonralar kiçik elmi işçi, aspirant, baş elmi işçi, riyazi metodların geologiyaya tətbiqi qrupuna və mineral laboratoriyasına rəhbərlik etmişdir.

1962-ci ildə namizədlik dissertasiyası müdafiə etmişdir. Onun elmi fəaliyyəti 80 elmi əsərdə, o cümlədən üç monoqrafiya və bir müəlliflik şəhadətnaməsində öz əksini tapmışdır. Siyavuş Mahmudovun elmi fəaliyyətinin nəticələri 2 dəfə SSRİ EA-nın baş elmi katibi tərəfindən illik hesabatın ən aktual işi kimi qeyd olunmuş və müəllif rəhbərlik tərəfindən mükafata layiq görülmüşdür. Dəfələrlə institutun elmi şurasının üzvü olmuşdur. 1989-1994-cü illərdə BDU-da pedaqoji fəaliyyətlə də məşğul olmuşdur. İki namizədlik işinə rəhbərlik etmişdir.

SOLMAZ ƏLİYEVA

Solmaz Əli qızı Əliyeva 1929-cu il fevralın 9-da Tiflis şəhərində qulluqçu ailəsində anadan olmuşdur.

1938-ci ildə 94 saylı Tiflis rus orta məktəbinin 1-ci sinfinə daxil olmuş, 1949-cu ildə isə həmin məktəbi bitirmişdir.

1950-ci ildə Azərbaycan Dövlət Tibb İnstitutunun pediatriya fakültəsinə qəbul olmuş, 1956-cı ildə ə’la qiymətlərlə həmin fakültəni bitirmişdir. Əmək fəaliyyətinə 1956-cı ildə Bakı şəhər uşaq klinik xəstəxanasında həkim-pediatr kimi başlamışdır.

1963-1966-cı illərdə Azərbaycan Tibb İnstitutunun (indiki ADTU-nun) aspiranturasında oxumuşdur. 1967-ci ildə dissertasiya müdafiə edib tibb elmləri namizədi elmi dərəcəsi almışdır.

1967-ci ildə Azərbaycan Tibb İnstitutunun uşaq xəstəlikləri kafedrasında assistent işləmiş, 1971-ci ildə dosent seçilmişdir.

Solmaz Əliyeva 1974-cü ildə "Əmək rəşadəti" medalı ilə təltif olunmuşdur. Onun elmi və pedaqoji fəaliyyəti 68 elmi əsərdə öz əksini tapmışdır. Bu müddət ərzində beynəlxalq, ittifaq və respublika səviyyəli 20 simpoziumda və konfranslarda çıxış edib, elmi məqalələr çap etdirmişdir.

Solmaz Əliyevanın elmi əsərləri 40-a yaxın tibb jurnallarında və bülletenlərində dərc edilmişdir.

Solmaz Əliyeva hal-hazırda uşaqlarda xroniki xəstəliklərin müalicəsi kafedrasında dosent vəzifəsində işləyir.

SÜRƏYYA QASIMOVA

Sürəyya Məcid qızı Qasımova 1934-cü ilin sentyabrında Tbilisi şəhərində anadan olmuşdur.

Sürəyya Qasımova 1953-cü ildə 49 nömrəli Tbilisi qadın rus orta mətəbini ə’la qiymətlərlə bitirmiş, həmin ildə də Azərbaycan Xarici Dillər İnstitutunun alman dili fakültəsinə daxil olmuşdur.

Oxuduğu illərdə Bakı şəhərində keçirilən bir sıra elmi-praktik konfranslarda yaxından iştirak edib, mə’ruzələrlə çıxış etmişdir.

Sürəyya Qasımova hələ Tbilisidə orta məktəbdə oxuduğu vaxt 5 ilə yaxın Gürcüstan SSR-nin gənclərdən ibarət yığma basketbol komandasının ən fəal oyunçusu, sonra isə kapitanı olmuşdur.

Respublikanın tələbələrdən ibarət yığma komandasının tərkibində Sürəyya Qasımova Moskva, Sankt-Peterburq, Tbilisi, Bakı, Gəncə və s. şəhərlərdə oynamışdır.

O, Moskvada VI Ümumdünya Mahnı və Rəqs Olimpiadasında uğurla çıxış etmişdir.

1958-ci ildə Sürəyya institutu ə’la qiymətlərlə bitirib laborant vəzifəsində işə başlamışdır. Bir müddət sonra həmin kafedrada alman dilinin qrammatikası və leksikası üzrə müəllim tə’yin edilmişdir. Burada işləyə-işləyə Bədən Tərbiyəsi İnstitutunda, Tibb Universitetində alman dilini tədris etmişdir. 1961-1966-cı illərdə Azərbaycan Dövlət Universitetində, 1966-cı ildən isə Azərbaycan Xalq Təsərrüfatı İnstitutunda fəaliyyət göstərmişdir.

Sürəyya Məcid qızı Qasımova hazırda Bakı Dövlət İqtisadiyyat Universitetinin baş müəllimidir. O, 25 elmi əsərin və 2 dərsliyin müəllifidir.

ŞƏFİQƏ TOPÇİYEVA

Şəfiqə Ənvər qızı Topçiyeva 1951-ci ildə Tbilisi şəhrində anadan olmuşdur.

1958-ci ildə 63 saylı Tbilisi rus orta məktəbinin 1-ci sinfinə getmiş, 1968-ci ildə həmin məktəbi ə’la qiymətlərlə bitirmişdir. 1970-ci ildə Azərbaycan Dövlət Tibb İnstitutunun (indiki ADTU-nun) əczaçılıq fakültəsinə daxil olmuş, 1975-ci ildə həmin fakültəni bitirmişdir. 1975-ci ildə tə’yinatla Naxçıvan şəhərindəki 3 saylı əczaxanada işə düzəlmişdir. 1976-cı ilin mart ayından Azərbaycan Baş Apteklər idarəsində inspektor-müfəttiş vəzifəsində işə cəlb olunmuşdur.

1976-cı ilin may-iyun aylarında Tbilisi şəhərinin baş apteklər idarəsində mühəndis-əczaçı vəzifəsində işə düzəlmişdir. 1980-ci ildən Tbilisi Dövlət Tibb İnstitutunun əczaçılıq kimyası kafedrasında kiçik elmi işçi vəzifəsinə işə qəbul olunmuşdur. 1989-cu ildən Seçenov adına Moskva şəhəri 1 saylı Tibb İnstitutunun elmi şurasında namizədlik dissertasiyası müdafiə etmişdir. Ailə vəziyyəti ilə əlaqədar olaraq 4 il əmək fəaliyyətindən kənar olmuşdur.

1993-cü ildən Azərbaycan Respublikasının EA Zoologiya İnstitutunda elmi işçi, baş elmi işçi vəzifələrində elmi fəaliyyətini davam etdirmişdir. Şəfiqə Topçiyevanın bu müddət ərzində 40-dan çox elmi əsəri, o cümlədən 2 metodik göstərişi, 1 müəlliflik şəhadətnaməsi, 4 prioriteti işıq üzü görmüşdür. Bu elmi məqalələrin əksəriyyəti beynəlxalq jurnal və məcmuələrdə (Afina, İstanbul, Ankara, Osaka, Moskva, Tbilisi və s.) çap olunmuşudr.

1994-1995-ci tədris ilində Azərbaycan Dövlət Tibb Universitetinin Tibbi-Biologiya fakültəsində müəllim işləmişdir. Hazırda Azərbaycan EA Zoologiya İnstitutunda böyük elmi işçi vəzifəsində çalışır. Doktorluq işini elmi şuraya təqdim etmişdir.

ŞƏFİQƏ HƏMİDOVA

Şəfiqə Paşa qızı Həmidova 1934-cü ildə Tbilisi şəhərində anadan olmuşdur. 1943-cü ildə 37 saylı orta məktəbi bitirmiş, 1954-cü ildə Tbilisidə A.S.Puşkin adına Tbilisi Dövlət Pedaqoji İnstitutunun Azərbaycan bölməsinnin tarix-dil və ədəbiyyat fakültəsinə daxil olmuş, 1959-cu ildə həmin fakültəni bitirmişdir. 1959-1961-ci illərdə həmin institutun tarix kafedrasında laborant vəzifəsində işləmişdir. 1961-ci ilin martında Azərbaycan EA Tarix İnstitutunun tələbi ilə gürcü dilini bilən mütəxəssis kimi Bakı şəhərinə də’vət olunmuşdur. Həmin vaxtdan "Orta əsrlər tarixi" şö’bəsində kiçik elmi işçi kimi çalışmışdır. 1963-1965-ci illərdə Azərbaycan EA Tarix İnstitutu və EA Rəyasət Hey’ətinin məsləhəti ilə qədim gürcü dilini öyrənmək üçün Gürcüstan EA Dil və Ədəbiyyat İnstitutunda baş elmi işçi vəzifəsində işləyir. 1961-ci ildən bu günə qədər Azərbaycan-Gürcüstan əlaqələri üzrə elmi fəaliyyətini davam etdirir. 15 elmi məqalənin və çapdan çıxmış bir kitabın, iki monoqrafiyanın müəllifidir.

TAMİLƏ ƏMİRASLANOVA

Tamilə İsmayıl qızı Əmiraslanova 1937-ci il fevral ayının 16-da Tiflis şəhərində anadan olmuşdur.

1944-cü ildə Tiflisdəki 73 saylı şəhər Azərbaycan orta məktəbinin 1-ci sinfinə getmiş, 1956-cı ildə həmin məktəbi bitirmişdir. 1956-cı ildə Azərbaycan Dövlət Universitetinin biologiya fakültəsinə daxil olmuş, 1960-cı ildə həmin fakültəni müvəffəqiyyətlə bitirmişdir.

Tamilə Əmiraslanova əmək fəaliyyətinə Universitetin dördüncü kursunda oxuyarkən Azərbaycan EA nəzdində fəaliyyət göstərən mikrobiologiya şö’bəsində başlamışdır.

1963-cü ildə əyani aspiranturaya daxil olmuş və Daşkənd şəhərinə e’zam olunmuşdur. 1967-ci ildə namizədlik dissertasiyası müdafiə etmişdir.

1974-cü ildə müsabiqə yolu ilə xarici dillər institutunun "Psixologiya" kafedrasına baş müəllim vəzifəsinə keçmişdir. 1976-cı ildə həmin kafedranın dosenti seçilmişdir. 1982-ci ildə Moskvada Müəllimlərin Təkmilləşdirilməsi İnstitutunda 3 aylıq kurs bitirmişdir. O, Bakıda və keçmiş ittifaqın bir sıra mərkəzi şəhərlərində keçirilən elmi konfranslarda çıxış etmiş, biologiya və psixologiya elmlərinə aid məqalələr nəşr etdirmişdir.

Tamillə Əmiraslanova pedaqoji fəaliyyətini davam etdirir.

TAHİRƏ ƏFƏNDİYEVA

Tahirə Ziyəddin qızı Əfəndiyeva 1941-ci ildə Tbilisi şəhərində müəllim ailəsində anadan olmuşdur. Orta təhsilini Tbilisi şəhər 73 saylı orta məktəbdə almışdır. 1958-ci ildə həmin məktəbi qızıl medalla bitirmiş və Azərbaycan Tibb İnstitutunun (indiki ADTU-nun) pediatriya fakültəsinə daxil olmuş, 1964-cü ildə institutu bitirdikdən sonra əvvəlcə Gəncə şəhərində yaşamış, 1965-ci ilin may ayından 1970-ci ilin iyun ayına kimi isə Belarusiyanın Qomel şəhərində, 1970-ci ilin avqust ayından 1985-ci ilə kimi Azərbaycanın müxtəlif müalicə-profilaktika müəssisələrində, o cümlədən 1970-1971-ci illərdə Sabirabad Mərkəzi rayon xəstəxanasında, 1971-1972-ci illərdə Respublika Klinik xəstəxanasında, 1973-1978-ci illərdə Azərbaycan Tibb İnstitutunda (kafedranın assissenti), 1978-1981-ci illərdə uşaq nevroloji xəstəxanasında, 1981-1985-ci illərdə ET Pediatriya İnstitutunda işləmişdir. 1985-ci ildən Səhiyyə Nazirliyində inspektor, idarə rəisinin müavini, baş mütəxəssis vəzifəsində çalışmış və hazırda ana və uşaqlara müalicə -pofilaktika yardım şö’bəsinin rəisi vəzifəsində işləyir.

1994-1999-cu illərdə ÜST və YUNİSEF tərəfindən təşkil edilmiş beynəlxalq seminarlarda iştirak etmiş və inspektor kimi müvafiq sertifikatlar almışdır.

1997-ci ildə türkdilli ölkələrin Azərbaycanda keçirilmiş 4-cü regional konqresinin iştirakçısı olmuşdur. 2000-ci ildə Azərbaycan Respublikası Prezidenti yanında İdarəçilik Akademiyasında "Dövlətin sosial siyasəti: mahiyyət, prioritetlər və həyata keçirilmə mexanizmləri" üzrə ixtisasartırma kursu keçmişdir.

1994-cü ildən başlayaraq Səhiyyə Nazirliyi ilə BMT-nin Uşaq Fondu YUNİSEF-in birgə iş planına müvafiq olaraq "KRİ və diareyalı xəstəliklərlə mübarizə" proqramı üzrə respublikanın şəhər və rayonlarında fasilitator kimi seminar məşğələləri keçirir, İMSİ proqramı işçi qurpunun üzvü, "Təhlükəsiz analıq və yenidoğulmuşlara qulluq" proqramının milli koordinatorudur.

Çap olunmuş 2 elmi məqalənin müəllifidir. ÜST və YUNİSEF-in çap etdiyi "Döşlə düzgün əmizdirmə" broşürasını və "Kiçik yaşlı uşaqlarda kəskin respirator infeksiyaların ambulator müalicəsi" vəsaitini Azərbaycan dilinə tərcümə etmişdir. Hal-hazırda ÜST və YUNİSEF-in təqdim etdiyi "Təhlükəsiz analıq və yenidoğulmuşlara qulluq" proqramının respublika şəraitinə uyğunlaşdırılması və tərcüməsi üzərində işləyir.

VAHİD MURSAQULOV

Vahid Rüstəm oğlu Mursaqulov 1931-ci ildə Tiflis şəhərində anadan olmuşdur. Orta məktəbi Gəncə şəhərində bitirmiş, 1950-ci ildə H.Zərdabi adına Kirovabad Dövlət Pedaqoji İnstitutunun Azərbaycan dili və ədəbiyyatı fakültəsinə daxil olmuş və 1954-cü ildə həmin institutu fərqlənmə diplomu ilə bitirmişdir. O, 1954-1964-cü illərdə Səfərəliyev rayonu və Kirovabad (Gəncə) şəhəri orta məktəblərində dil-ədəbiyyat müəllimi və dərs hissə müdiri vəzifələrində çalışmışdır.

Vahid Mursaqulov 1962-1964-cü illərdə Azərbaycan Kənd Təsərrüfatı İnstitutunun dillər kafedrasında müəllim, 1964-cü ildən isə H.Zərdabi adına KDPİ-nin Azərbaycan dilçiliyi kafedrasında assistent, dosent (1964-1978) kafedra müdiri (1978-1984) və sonrakı dövrlərdə kafedranın dosenti vəzifəsində işləmişdir.

Vahid Mursaqulov 1970-ci ildə Azərbaycan Respublikası EA Dilçilik İnstitutunda "Azərbaycan sovet romanlarında dialektizmlər" mövzusunda namizədlik dissertasiyası müdafiə etmiş və filologiya elmləri namizədi elmi dərəcəsi almışdır. Onun qəzet və jurnallarda 60-dan çox elmi məqaləsi, 3 metodik vəsaiti nəşr olunmuşdur. O, 1979-cu ildə "Sosializm yarışının qalibi" döş nişanı, 1989-cu ildə isə "Əmək veteranı" medalı ilə təltif olunmuşdur.

YAŞAR İSMAYILOV

Yaşar Kərim oğlu İsmayılov 1949-cu il iyunun 20-də Tbilisi şəhərində anadan olmuşdur. 1956-cı ildə Tbilisi şəhərinin 72 saylı orta məktəbinin 1-ci sinfinə getmiş, 1966-cı ildə həmin məktəbi bitirmişdir. Həmin il Azərbaycan Dövlət Universitetinin şərqşünaslıq fakültəsinə daxil olmuşdur. III kursu bitirdikdən sonra 1970-1972-ci illərdə İranda tərcüməçi işləmişdir. 1971-ci ildə İranda "Rusca-farsca dağ mə’dən istilahlarına" dair lüğət çap etdirmişdir. Xarici e’zamiyyətdən vətənə qayıtdıqdan sonra BDU-da təhsilini davam etdirmiş, 1973-cü ildə oranı bitirmişdir. 1973-1975-ci illərdə Əfqanıstanda hərbi xidmətdə olmuşdur. 1975-ci ilin dekabrından 1980-ci ilin avqustuna qədər Azərbaycan EA-nın elmi mə’lumat mərkəzində kiçik elmi işçi işləmişdir. 1978-ci ildə Azərbaycan EA-nın Şərqşünasılıq İnstitutunun aspiranturasına qəbul olunmuşdur.

1980-ci ilin avqustunda yenidən Əfqanıstana SSRİ Səfirliyinə II katib vəzifəsində işləməyə e’zam edilmişdir. 1982-ci ilin iyununda Azərbaycana qayıtmışdır. 1983-cü ilin yanvarından 1998-ci ilin aprelinə qədər Azərbaycan EA-nın Şərqşünasılıq İnstitutunda kiçik elmi işçi, elmi işçi, baş elmi işçi vəzifələrində çalışmışdır. 1985-ci ildə "Əfqanıstanda mütləqiyyətin süqutu" mövzusunda namizədlik dissertasiyasını müdafiə edərək, tarix elmləri namizədi elmi dərəcəsi almışdır. Əfqanıstanın müasir tarixində (1960-1970-ci illərdə) gedən mürəkkəb ictimai-siyasi proseslərə aid bir sıra elmi əsərlərin müəllifidir. Bu əsərlər Moskvada nəşr olunmuşdur.

1999-cu ilin avqustundan indiyə kimi Təhsil Nazirliyi təhsil problemləri üzrə elmi metodik mərkəzində baş metodist vəzifəsində çalışır.

Yunis Məsmalı oğlu Nəsibli 1953-cü ildə Tbilisidə anadan olmuşdur. Orta məktəbi 1970-ci ildə Tbilisidə bitirmiş, 1970-ci ildə indiki Bakı Dövlət Universitetinin tarix fakültəsinə daxil olmuşdur. 1975-ci ildə Azərbaycan Respublikası EA Tarix İnstitutuna işə də’vət olunmuşdur. 1976-1978-ci illərdə Azərbaycan EA-nın göndərişi əsasında SSRİ EA Şərqşünaslıq İnstitutunda (Leninqradq bölməsi) araşdırıcı - stajer vəzifəsində çalışmışdır.

1979-cu ildə Azərbaycan EA Tarix İnstitutunun aspiranturasına qəbul olunmuş və 1980-ci ildə Gürcüstan EA Tarix, Arxelogiya və Etnoqrafiya İnstitutuna e’zam olunmuşdur. Orta çağ gürcü mənbələrindən tərcümələr etmiş və bir neçə elmi məqalə çap etdirmişdir. Y.Nəsibli 1985-ci ildə "Azərbaycan V-XII əsrin birinci yarısında (qədim gürcü mənbələri üzrə)" adlı namizədlik dissertasiyasını müdafiə etmiş, tarix elmləri namizədi elmi dərəcəsinə layiq görülmüşdür.

Y.Nəsibli 1992-ci ildən Bakı Dövlət Universitetinin Azərbaycan tarixi kafedrasında pedaqoji fəaliyyətlə məşğuldur. Eyni zamanda Azərbaycan EA "Etnososiologiya" şö’bəsində aparıcı elmi işçi vəzifəsini icra edir.

1988-1990-cı illər "Elm" qəzetinin redaksiya şurasının üzvü, 1997-ci ildə "Kavkaz" analitik jurnalının redaktoru olmuşdur. Bir çox elmi konfransların (Moskva, Tiflis, Ankara, Alma-Ata) iştirakçısı olmuşdur. 50-yə yaxın elmi məqəalə müəllifidir. Azərbaycan Sovet Ensiklopediyasında məqalələr və çoxcildli "Azərbaycan tarixi"ndə (II cild) iki bölümün müəllifidir.

Hal hazırda BDU-da elmi-pedaqoji fəaliyyətini davam etdirir.

ZAKİR MURSAQULOV

Zakir Əli oğlu Mursaqulov 1934-cü ildə Tiflis şəhərində anadan olmuşdur.

1953-cü ildə Tbilisi şəhərinin 30 saylı orta məktəbini bitirmişdir.

1958-ci ildə Moskva Dövlət Universitetinin Geologiya fakültəsini bitirmişdir. Əmək fəaliyyətinə Neft sənayesi sistemində başlamışdır.

1972-ci ildə "Manqışlaqneft", "Türkmənneft", "Azneft", "Gürcüstanneft", "Xəzərdənizneft", "Dağneft", "Qrozneft", "Krasnodarneftqaz", "Stavropolneftqaz" ərazilərinin neftqazlılığının tədqiqi əsasında "Cənubi-Xəzər çökəkliyinin və ətraf neftqazlı ərazilərin qaz ehtiyatlarının təqsim olunmasının xüsusiyyətləri" mövzusunda dissertasiya müdafiə edib elmi dərəcə almışdır. Sonrakı illərdə Zakir Mursaqulovun fəaliyyəti neftqaz sahəsinin müxtəlif iqtisadi məsələləri ilə bağlı olmuş və dərc etdirdiyi elmi işlər əsasında ona 1987-ci ildə Ali Attestasiya Komissiyası "Sənayenin və onun sahələri üzrə iqtisadiyyatı planlaşdırma və idarəetmənin təşkili" ixtisası üzrə "Baş elmi işçi" diplomu vermişdir. 1988-1993-cü illərdə Zakir Mursaqulov Azərbaycan Neft Akademiyasının Mühəndis-iqtisadiyyatı fakültəsinin dossenti olmuşdur. 1993-cü ilin mart ayından başçılıq etdiyi kollektivdə 60-dan çox elmi əsər çap etdirmişdir. Zakir Mursaqulovun əsərlərindən 15 elmi məqaləsi xarici dövlətlərdə keçirilən beynəlxalq elmi simpoziumların və konfransların materiallarında çap olunmuşdur.

Zakir Mursaqulov hal-hazırda "Dənizneftqaz layihə" DETLİ laboratoriyasının müdiri və ADNA-da dosent vəzifəsində çalışır.