ELMLƏR NAMİZƏDLƏRİ

TİFLİS (TBİLİSİ) BÖLGƏSİ

[A-İ] [M-R] [S-Z]

MZİYA MİRZƏYEVA

Mziya Əli qızı Mirzəyeva 1945-ci il oktyabrın 14-də Tbilisi şəhərində qulluqçu ailəsində anadan olmuşdur.

1963-cü ildə 49 saylı orta məktəbi bitirmiş və həmin ildə Azərbaycan Neft və Kimya İnstitutunun kimya-texnologiya fakültəsinin axşam şö’bəsinə qəbul olmuşdur. 1966-cı ildən Azərbaycan EA Aşqarlar Kimyası İnstitutunda əmək fəaliyyətinə başlamış və baş laborant, mühəndis, böyük mühəndis, kiçik elmi işçi vəzifələrində çalışmışdır.

1981-ci ildə "Merkaptosirkə turşusunun bə’zi törəmələrin sintezi və onların sürtgü yağlarına aşqarlar kimi tədqiqi" mövzusunda namizədlik dissertasiyası müdafiə etmiş, neft kimaysı ixtisası üzrə kimya elmləri namizədi dərəcəsinə layiq görülmüşdür. Mziya Mirzəyeva hal-hazırda həmin institutun "Metalların korroziyaya qarşı davamlılığını artıran inkibitorların sintezi və tədqiqi" laboratoriyasında böyük elmi işçi vəzifəsində çalışır. Mziya Mirzəyevanın apardığı elm tədqiqat işlərinin əsas istiqaməti tərkibində kükürd, azot saxlayan müxtəlif üzvi birləşmələrin sintezi və onların sürtkü yağlarına aşqar kimi və eləcə də müxtəlif aqressiv mühitlərdə korroziyaya qarşı inkibitorların tədqiqinə həsr olunmuşdur. Onun bilavasitə iştirakı və rəhbərliyi ilə sürtkü yağlarının keyfiyyətini yaxşılaşdıran İXP-401 polifunksional aşqar işlənib hazırlanmış, geniş laboratoriya və sənaye sınaqlarından keçirilmiş və istehsalata tətbiq üçün tövsiyə edilmişdir.

M.Mirəzyeva 40-dan artıq elmi əsərin, o cümlədən 11 müəlliflik şəhadətnaməsinin (ixitarnın) müəllifidir. Onun elmi əsərləri Moskva, Leninqrad, Kazan, Ufa və başqa şəhərlərdə çıxan kitab və jurnallarda çap olunmuşdur. O, bir çox beynəlxalq və respublika elmi konfranslarının aktiv iştirakçısı olmuş və elmi ictimaiyyətin qarşısında maraqlı mə’ruzələrlə çıxış etmişdir.

MİRVARİ NAİBOVA

Mirvari Kəyan qızı Naibova 1946-cı ildə Dağ Borçalısının Başkeçid (Dmanisi) yaylağında anadan olmuşdur. Valideynləri Tbilisi şəhərində yaşadığından, orta təhsilini Tbilisi şəhərinin 66 saylı rus məktəbində almışdır. 1964-cü ildə Azərbaycan Dövlət Universitetinin (indiki BDU) mexanika-riyaziyyat fakültəsinə daxil olmuşdur. 1969-cu ildə həmin fakültəni bitirib, Azərbaycan Neft və Kimya İnstitutunun (ADNA) ali riyaziyyat kafedrasında assistent vəzifəsinə işə düzəlmişdir. 1972-ci ildən tətbiqi riyaziyyat kafedrasında çalışır. O, 1972-ci ildə qiyabi aspiranturaya daxil olmuş, 1976-cı ildə Azərbaycan EA-nın Riyaziyyat İnstitutunda namizədlik dissertasiyası müdafiə etmişdir.

1976-cı ildə Mirvari Naibova Varşava Universitetində 10 aylıq elmi-pedaqoji e’zamiyyətdə olmuşdur. 1977-ci ildən baş müəllim, sonra isə dosent vəzifəsində çalışır. Onun elmi və pedaqoji fəaliyyəti 12 elmi əsərdə öz əksini tapmışdır. Bu müddət ərzində Mirvari Naibovanın 5 metodik vəsaiti çap olunmuşdur.

Elmi məqalələri əsas ittifaq və respublikanın məşhur elm ocaqlarında keçirilmiş konfransların materiallarında nəşr olunmuşdur.

NAMİQ ƏLİYEV

Namiq Həsən oğlu Əliyev 1956-cı il mayın 19-da Bakı şəhərində anadan olmuşdur. Namiq Əliyevin valideynləri Tbilisi şəhərindəndir. 1963-1973-cü illərdə Bakı şəhərindəki 160 saylı orta məktəbdə təhsil almışdır. 1978-ci ildə Azərbaycan Dövlət Universitetinin hüquq fakültəsini fərqlənmə diplomu ilə bitirmişdir.

Əmək fəaliyyətinə 1978-ci ildə Azərbaycan nəqliyyat prokurorluğunun müstəntiqi vəzifəsində başlamışdır. Namiq Əliyev 1989-cu ildə aspirantura yolu ilə Moskvada dissertasiya müdafiə edib, huquq elmləri namizədi elmi dərəcəsi almışdır. 1979-1991-ci illərdə Bakı Ali Partiya Məktəbində kiçik elmi işçi, müəllim, baş müəllim, dosent, dekan, dövlət quruculuğu və hüquq kafedrasının müdiri, 1992-ci il yanvarın 10-dan Azərbaycan Respublikası Ali Soveti Katibliyinin hüquq mühafizə orqanları və müdafiə məsələləri şö’bəsinin müdiri vəzifələrində çalışmışdır. 1993-cü il dekabrın 1-dən Azərbaycan Respublikası Milli Məclisi Katibliyinin Konstitusiya qanunvericiliyi şö’bəsinin müdiri olmuşdur. 1996-cı il fevralın 27-dən Azərbaycan Respublikası Milli Məclisi Aparatının Dövlət quruculuğu üzrə qanunvericilik şö’bəsinin müdiri işləmişdir.

Namiq Əliyevin elmi-pedaqoji fəaliyyəti beş dildə və dörd ölkədə çap olunmuş doqquz monoqrafiyada, səksən məqalədə və yüzdən artıq (həmmüəllif) qanun layihəsinin hazırlanmasında öz əksini tapmışdır. O, 1999-cu ildə ABŞ-ın Nebraska və Linkoln ştatlarının fəxri vətəndaşı seçilmişdir.

Namiq Əliyev 1996-cı ildə Azərbaycan Respublikasının Fəxri ovçusu adına layiq görülmüşdür.

2000-ci il dekabrın 20-dən Bakı Dövlət Universitetinin hüquq fakültəsinin dekanı vəzifəsində çalışır.

NAĞI YAQUBOV

Nağı İbrahim oğlu Yaqubov 1955-ci il mayın 5-də Ermənistan Respublikası Spitak rayonunun Qursalı kəndində anadan olmuşdur. Ulu babası IV Sultan Muradın vaxtında Sultanın əmri ilə Tiflis qiyamını yatırtmaq üçün oraya göndərilmişdir. Uzun müddət onlar Tbilisidə yaşamışlar. Sonra XIX əsrin ortalarından Marneuli rayonunun Ağəmmədli kəndinə köçmüşlər. XX əsrin əvvəllərindən isə mə’lum dövlət çevrilişi ilə əlaqədar Qursalı kəndinə köçmüşlər. 1973-cü ildə orta məktəbi bitirmişdir. Azərbaycan Dövlət Universitetinin Kimya fakültəsinə qəbul olmuş, 1978-ci ildə həmin universitetin kimya fakültəsinin ümumi və qeyri-üzvi kimya kafedrasına laborant vəzifəsinə tə’yin olunmuşdur. 1980-ci ildə BDU-da qiyabi aspiranturaya daxil olmuş və 1990-cı ildə namizədlik dissertasiyası müdafiə edib, kimya elmləri namizədi elmi dərəcəsi almışdır. 1980-ci ildən BDU-da dosent vəzifəsində çalışır. Hazırda BDU-nun ümumi və qeyri-üzvü kimya kafedrasının dosentidir, 1999-cu ildən kimya fakültəsinin dekan müavini vəsifəsini icra edir.

Nağı Yaqubovun elmi və pedaqoji fəaliyyəti 20 elmi əsərdə öz əksini tapmışdır. O, ittifaq və respublika konfranslrında iştirak etmiş, məqalələr çap etdirmişdir.

NƏRİMAN NƏRİMANOV

Nəriman Rüstəm oğlu Nərimanov 1940-cı ildə Bakı şəhərində anadan olmuşdur. Orta məktəbi 1958-ci ildə bitirmişdir.

1958-ci ildən 1963-cü ilə kimi Azərbaycan Neft və Kimya İnstitutunun tələbəsi olmuşdur. Tə’yinatla Türkmənistanda, Azərbaycanda geoloji xəritəalma partiyalarında fəhlə, texnik və Özbəkistanda dərin kəşfiyyat qazması ekspedisyasında geoloq kimi fəaliyyət göstərmişdir. 1964-cü ildən isə indiki Azərbaycan Dövlət Neft Akademiyasında (ADNA) işləmişdir. O, burada mühəndis, aspirant, assistent və baş müəllim vəzifəsində işləmişdir. 1972-1977-ci illərdə Əlcəzairin Bumerdes şəhərində yerləşən Milli Karbohidrogenlər İnstitutunda və 1983-1986-cı illərdə Bamako şəhərində (Mali Respublikası) Mühəndislər məktəbində dosent işləmişdir.

1973-cü ildə dissertasiya müdafiə edib, geologiya-minerologiya elmləri namizədi elmi dərəcəsinə layiq görülmüşdür. Nəriman Nərimanov istər Azərbaycanda və istərsə də xarici dövlətlərdə işlədiyi müddətdə də beynəlxalq və respublika tabeliyində keçirilən konfranslarda yaxından iştirak etmiş, məqalələr çap etdirmişdir. Nəriman Nərimanovun elmi pedaqoji fəaliyyəti 60-a yaxın elmi məqalədə, o cümlədən 1 dərs vəsaiti, 1 metodik göstəriş (fransız dilində) və 1 kitabında öz əksini tapmışdır. Onun əsas tədqiqat obyekti Fatmayı-Zığ, Sənkəçal-dəniz, Duvannı-dəniz, Bulla adası, Balaxanı, Sabunçu, Ramana və bütün Abşeron arxipelaqı bölmələri olmuşdur. Nəriman Nərimanovun elmi məqalələri əsasən "Neft və Qaz" jurnalında, "Azərbaycan neft məhsulları" jurnalında və s. dərc olunmuşdur.

NİZAMİ NƏBİYEV

Nizami Nəbi oğlu Nəbiyev 1961-ci ildə Tbilisi şəhərində anadan olmuşdur. 1968-ci ildə Bolnisi şəhəri rus orta məktəbinə getmiş, 1978-ci ildə həmin məktəbi ə’la qiymətlərlə bitirmişdir.

Həmin il Azərbaycan Dövlət Tibb İnstitutunun (indiki ATU-nun) müalicə-profilaktika fakültəsinə daxil olmuşdur. 1985-ci ildə Universiteti bitirmiş, tə’yinatla Respublika dispanserinin nəzdində əhalinin əmək və ekspertizası və Əlillərin sosial-əməyinin bərpası idarəsində həkim, sonra isə kabinet müdiri, 1987-ci ildən isə bərpa şö’bəsinin müdiri vəzifəsində işləmişdir. 1988-ci ildə müsabiqə yolu ilə Təbii bitki faktorlarının Tibbi bərpa elmi tədqiqat İnstitutunun əsəb-sinir xəstəlikləri şö’bəsinə kiçik elmi işçi vəzifəsinə keçmişdir.

1998-ci ildə Nizami Nəbiyev dissertasiya işini yekunlaşdırıb müdafiə etmiş, Tibb elmləri namizədi elmi dərəcəsi almışdır. Nizami Nəbiyevin elmi və praktik fəaliyyəti 30-dan çox elmi əsərdə öz əksini tapmışdır. 3 təklif və metodik göstərişin müəllifidir.

Nizami Nəbiyev 1997-ci ildən Respublika Təbii Bitkilərlə bərpa Elmi Tədqiqat İnstitutunda fizioterapiya şö’bəsində müdir vəzifəsini icra edir.

O, ittifaq və respublika səviyyəli 10 konfransda çıxış etmiş, məqalələr çap etdirmişdir.

OKTAY MƏMMƏDOV

Oktay Qulamzadə oğlu Məmmədov 1926-cı ildə Tiflis şəhərində qulluqçu ailəsində anadan olmuşdur. 1945-ci ildə Tiflisdə orta məktəbi bitirmiş, Sovet ordusu sıralarına səfərbər olunmuşdur. 1952-ci ildə Gürcüstan Kənd Təsərrüfatı İnstitutuna daxil olmuşdur. 1956-cı ildə həmin institutu fərqlənmə diplomu ilə bitirmişdir. Həmin ildə Bakıya gəlmiş və Azərbaycan Elmlər Akademiyasının Torpaqşünaslıq və Aqrokimya İnstitutunda kiçik elmi işçi vəzifəsində işə başlamışdır.

1962-ci ildə dissertasiya müdafiə etmişdir. 1971-ci ildə baş elmi işçi, 1975-ci ildən 1991-ci ilədək laboratoriya müdiri vəzifəsində çalışmışdır. 1991-ci ildən baş elmi işçi vəzifəsində işləyir. 1963-cü ildə Kuba Respublikasında bir il müddətində ixtisası üzrə elmi e’zamiyyətdə olmuşdur. 1968-ci ildən 1971-ci ilin fevral ayına qədər Birma dövlətində elmi e’zamiyyətdə olmuş, Birləşmiş Millətlər Təşkilatının eksperti vəzifəsini icra etmişdir. Oktay Məmmədovun elmi fəaliyyəti 100-dən çox elmi məqalədə, 5 kitabçada və 5 cildlik Terminalogiya kitabında öz əksini tapmışdır. Oktay Məmmədov işlədiyi 40 ildə 60-dan çox beynəlxalq, keçmiş ittifaq, respublika və zona simpozium, qurultay və konfranslarında çıxışlar etmiş və məqallər çap etdirmişdir.

SSRİ silahlı qüvvələrinin 30 illiyi medalı, Leninin 100 illiyi medalı, "Əmək rəşadəti" və "Əmək veteranı" medalları ilə təltif olunmuşdur.

ORXAN ƏFƏNDİYEV

Orxan Ziyadətdin oğlu Əfəndiyev 1946-cı il fevralın 8-də Tbilisi şəhərində ziyalı ailəsində anadan olmuşdur.

1952-ci ildə Tbilisi şəhəri 73 saylı orta məktəbinin 1-ci sinfinə getmiş və həmin məktəbi 1962-ci ildə bitirmişdir. Elə həmin il Azərbaycan Politexnik İnstitutunun "Avtomatika və hesablama texnikası" fakültəsinə daxil olmuşdur. 1962-ci il oktyabr ayından 1964-cü il yanvar ayına kimi Maşınqayırma Zavodunda tornaçı işləmişdir.

1967-ci ildə institutu bitirmiş və tə’yinatla Politexnik institutunun hesablama texnikası və istehsalat proseslərinin avtomatlaşdırılması kafedrasında baş laborant vəzifəsinə tə’yin olunmuşdur. 1968-ci ilin noyabrından 1969-cu ilin dekabrına kimi hərbi xidmətdə olmuşdur. Hərbi xidmətdən tərxis olunduqdan sonra əvvəlki işinə bərpa olunmuşdur. 1970-ci ilin sentyabrında müsabiqə yolu ilə "Hesablama texnikası və istehsalat proseslərinin avtomatlaşdırılması" kafedrasına assistent vəzifəsinə keçmiş, 1980-ci il yanvar ayından isə müsabiqə yolu ilə həmin kafedrada baş müəllim vəzifəsinə keçmişdir.

1984-cü ildə qiyabi aspiranturaya qəbul olunmuş və 1987-ci ildə Moskva Maşınqayırma İnstitutunda dissertasiya müdafiə etmişdir.

1988-ci il mart ayından 1993-cü il dekabr ayına kimi "Avtomatika və hesablama texnikası" fakültəsində dekan müavini vəzifəsində çalışmışdır. 1996-cı ilin sentyabrına kimi Azərbaycan Texniki Universitetində "İstehsal Proseslərinin avtomatlaşdırılması və robottexnik sistemlər" kafedrasında dosent vəzifəsində işləmişdir.

1996-cı ilin sentyabrında Milli Aviasiya Akademiyasına də’vət olunmuşdur. Həmin vaxtdan "Avtomatika və aviasiya cihazları" kafedrasının müdiri və 1998-ci ilin dekabr ayından indiyə kimi tədris işləri üzrə prorektor vəzifəsində çalışır.

İki dəfə Moskva Avtomexanika İnstitutunun ixtisasartırma fakültəsində təhsilini artırmışdır. 40-a qədər elmi və metodik əsərlərin müəllifidir. SSRİ Xalq Təsərrüfatı Nailiyyətləri Sərgisində qızıl medal və Budapeşt şəhərindəki sərgidə hazırladığı eksponata görə diplomla təltif olunmuşdur.

Orxan Əfəndiyev bir sıra beynəlxalq, ittifaq və respublika səviyyəli konfranslarda çıxış etmiş, elmi məqalələr çap etdirmişdir.

PƏRVİZ TAĞIZADƏ

Pərviz Əli oğlu Tağızadə 1919-cu ildə Tiflisdə anadan olmuşdur. İbtidai məktəbin dördüncü sinfinə qədər Tiflisdəki 97 saylı məktəbdə oxumuşdur. 1929-cu ildə Zaqafqaziya Ölkə Partiya Komitəsinin qərarı ilə atası Ermənistana mə’sul vəzifəyə tə’yin edildiyindən, 1933-1937-ci illərdə Yeravan Pedaqoji Texnikumunda təhsil almışdır. 1937-ci ildə xüsusi qərarla Pərviz Tağızadə Volsk hərbi hava donanma məktəbinə göndərilmişdi. 1940-cı ildə həmin məktəbi bitirdikdən sonra 1948-ci ilə qədər Sovet ordusu sıralarında zabit kimi xidmət etmişdir. 1941-ci il iyun ayının 22-dən müharibənin sonuna qədər əvvəl qərb cəbhəsində, sonra isə 3-cü Belarusiya cəbhəsində döyüşlərdə iştirak etmişdir. 1945-ci il iyun ayında hərbi hava donanma alayında Monqolustana göndərilmişdir. Döyüşlərdə fəal iştirak etdiyinə görə orden və medallarla təltif olunmuşdur. 1948-ci ilin dekabr ayında Tağızadə ailəsilə Ermənistandan məcburi olaraq köçürülmüş və həmin ildən Bakı şəhərində yaşayırlar. Pərviz Tağızadə 1949-cu ilin sentyabr ayında Azərbaycan Sənaye İnstitutuna daxil olmuş və 1954-cü ildə geofizika ixtisası üzrə diplom almışdır. Həmin ildən o, geoloji kəşfiyyat fakültəsinin axtarış və kəşfiyyat kafedrasına assistent vəzifəsinə qəbul edilmişdir. 1955-ci ildə aspiranturaya daxil olmuşdur. 1958-ci ildə Pərviz Tağızadə aspiranturanı bitirmişdir. 1959-cu ildə namizədlik dissertasiyası müdafiə edərək geologiya-minerologiya elmləri namizədi elmi dərəcəsi almışdır. Həmin ildən kafedranın dosenti vəzifəsinə seçilmiş və hazırda geoloji kəşfiyyat fakültəsinin neft-qaz mə’dən geologiyası kafedrasında dosent vəzifəsində çalışır. Geoloji kəşfiyyat məsələlərinin mə’dən geofizika üsulları ilə öyrənilməsi ilk dəfə Pərviz Tağızadə tərəfindən işlənilmişdir.

Pərviz Tağızadənin 40-dan artıq elmi əsəri dərc olunmuşdur. Zaqafqaziya ali məktəblərinin elmi konfranslarında elmi mə’ruzələrlə çıxış etmiş, məqalələr çap etdirmişdir. Pərviz Tağızadə Ali texniki məktəblər üçün üç dərs vəsaitinin müəllifidir. 1961-1973-cü illərdə geoloji kəşfiyyat fakültəsinin dekanı, sonralar axşam və qiyabi şö’bələr üzrə dekan vəzifəsində çalışmışdır. Sovet Səfirliyinin göstərişi ilə ilk azərbaycanlı mütəxəssisi kimi Əfqanıstanın qaz yataqlrının istismarı üçün elmi-tədqiqat işləri aparmış və yeni neft yataqlarının aşkar edilməsi üçün xüsusi məsləhətlər vermişdir.

O, institutun partiya komitəsinin katibi, dəfələrlə institutun qəbul komissiyasının mə’sul katibi, şəhər partiya komitəsinin üzvü və dəfələrlə rayon sovetinə deputat seçilmişdir. Müharibədən sonra institutda bərpa edilmiş çoxtirajlı "Neft kadrları uğrunda" qəzetinin ilk redaktoru olmuşdur.

Hazırda ADNA-da veteranlar şurasının sədridir.

ROZA ƏLİYEVA

Roza Əliqulu qızı Əliyeva 1946-cı ilin dekabr ayının 14-də Tbilisi şəhərində qulluqçu ailəsində anadan olmuşdur. 1965-ci ildə Tbilisi şəhərindəki 101 saylı orta məktəbi bitirdikdən sonra Azərbaycan Kənd Təsərrüfatı İnstitutuna daxil olmuşdur. 1966-cı ildə təhsilini davam etdirmək üçün Azərbaycan Dövlət Universitetinin iqtisadiyyat fakültəsinə (1970) keçmiş, "Xalq təsərrüfatının planlaşdırılmsı" ixtisası kursunu başa vurmuşdur. 1970-1972-ci illərdə Politexnik İnstitutunun siyasi iqtisad kafedrasında baş laborant vəzifəsində işlədikdən sonra Moskva Dövlət Universitetinin əyani aspiranturasına qəbul olunmuş və 1976-cı ildə namizədlik dissertasiyasını müdafiə etmişdir. 1975-ci ildən başlayaraq Politexnik İnstitutunda (indiki Texniki Universitetdə) elmi kommunizm kafedrasının baş laborantı, istehsalatın iqtisadiyyatı və planlaşdırılması" kafedrasının assistenti (1977), avtomobil nəqliyyatının və rabitənin idarə olunmasının təşkili və planlaşdırılması kafedrasının assistenti (1980) və baş müəllim vəzifələrində işləmişdir. 1988-ci ildən indiyədək həmin kafedrada dosent vəzifəsində işləyir.

25-ə yaxın elmi-təcrübi məqalələr çap etdirmişdir. Onun 2000-ci ildə monoqrafiyası çapdan çıxmışdır. Roza Əliyeva respublikada təşkil olunan Asiya-Avropa (Yevroasiya) fondunun "İşçi qadın" kursunu bitirmişdir. 2000-ci ildə isə ona ikinci belə bir sertifikat sənədi Bakı Dövlət Unqiversiteti tərəfindən təqdim olunmuşdur. Hal-hazırda Roza Əliyeva Respublika Qadınlar Şurasının üzvüdür.