AKİF QULİYEV

Akif Ələkbər oğlu Quliyev 1942-ci il martın 20-də Gəncə şəhərində anadan olmuşdur. 1949-cu ildə o, Gəncə şəhərində 4 saylı məktəbə daxil olmuş və 1959-cu ildə oranı müvəffəqiyyətlə bitirmişdir.

Elə həmin ildə Akif Quliyev Azərbaycan Kənd Təsərrüfatı İnstitutunun aqronomluq fakültəsinə qəbul olmuş və 1961-ci ilədək orada təhsil almışdır. Sonra, təhsilini Azərbaycan Dövlət Universitetinin (indiki Bakı Dövlət Universiteti) biologiya fakültəsində davam etdirmişdir. Axırıncı kursda təhsil alarkən, o, həm də bitki fiziologiyası kafedrasında laborant vəzifəsində işləmişdir.

Akif Quliyev 1964-cü ildə BDU-nun biologiya fakültəsini bitirmiş və fakültənin Elmi Şurasının zəmanəti ilə aspiranturaya daxil olmuşdur.

1966-cı ilin dekabr ayından o, Praqa Universitetinə göndərilmiş və 1967-ci ilin oktyabr ayında Bakıya qayıtdıqdan sonra, bitki fiziologiyası kafedrasına assistent vəzifəsinə tə’yin edilmiş, 1968-ci ilin fevral ayında isə müvəffəqiyyətlə namizədlik dissertasiyası müdafiə etmişdir.

Kafedrada assistent, sonra isə baş müəllim (1969) və dosent (1972) vəzifələrində işləyərək Akif Quliyev problem laboratoriyası yaratmış və bir qrup gənc mütəxəssislərin məhsuldar fəaliyyətini təşkil etmişdir. Bu mütəxəssislər sonralar 1972-ci ildə yaradılmış biokimya kafedrasının özəyini təşkil etmişlər. Yaradıldığı gündən hal-hazıra qədər bu kafedraya Akif Quliyev rəhbərlik edir.

Onun rəhbərliyi altında 7 namizədlik dissertasiyası müdafiə edilmişdir. O, xarici və respublika elmi jurnallarında 60-dan çox elmi məqalələr nəşr etdirmişdir. Akif Quliyev bir neçə müəlliflik şəhadətnaməsinin müəllifidir.

Akif Quliyev 1989-cu ildə doktorluq dissertasiyasını müvəffəqiyyətlə müdafiə etmişdir.

Akif Quliyev 1988-ci ildə fakültə dekanı seçilmişdir. 1990-cı ildən isə Akif Quliyev professordur.

Akif Quliyev 1990-cı ildə Bakı Dövlət Universitetinin I prorektoru vəzifəsinə tə’yin edilmiş və bu vəzifədə 1992-ci ilədək işləmişdir.

Akif Quliyev hazırda respublika biokimyaçılar cəmiyyətinin üzvüdür. O, həm də EA Nəbatat İnstitutu nəzdində fəaliyyət göstərən elmlər namizədi və elmlər doktoru elmi dərəcəsi almaq üçün xüsusiləşdirilmiş elmi şuranın üzvü və həmsədridir.

Akif Quliyevin valideynləri Tiflis şəhərindən olmuşlar.

AYDIN MƏMMƏDOV

Aydın İsmayıl oğlu Məmmədov 1924-cü ildə Tiflis şəhərində anadan olmuşdur. Orta məktəbi bitirdikdən sonra bir müddət istehsalatda işləmişdir. 1946-cı ildə Azərbaycan Dövlət Universitetinin geoloji-coğrafiya fakültəsinə daxil olmuş, 1951-ci ildə isə geoloq-geokimyaçı ixtisası üzrə bitirmişdir. Əmək fəaliyyətinə 1951-ci ildə Azərbaycan EA-nın Geologiya institutunda başlamış və böyük elmi işçi, laboratoriya rəhbəri, aparıcı elmi işçi, baş elmi işçi vəzifələrində işləmiş, 1955-ci ildə namizədlik dissertasiyası müdafiə edib, elmi dərəcə almışdır. 1973-cü ildə doktorluq dissertasiyası müdafiə etmişdir.

Aydın Məmmədovun elmi fəaliyyəti 80-dən çox elmi əsərdə, o cümlədən 2 monoqrafiyada, 5 müəlliflik şəhadətnaməsində öz əksini tapmışdır. O, üç faydalı qazıntı yatağı və müəyyən təzahürlər aşkarlamış, 1:50000 miqyaslı geoloji xəritənin müəllifi olmuşdur. Onun elmi tədqiqatlarının nəticələri dəfələrlə keçmiş SSRİ-nin müxtəlif şəhərlərində və Bakıda EA-nın illik hesabatlarında, müxtəlif elmi jurnallarda çap olunmuşdur. Aydın Məmmədov 30-a yaxın Beynəlxalq və respublika simpozium və konfranslarında çıxışlar etmiş, elmi məqalələr çap etdirmişdir. Onun rəhbərliyi ilə iki elmlər namizədi hazırlanmış və bir doktorluq işinə məsləhət vermişdir. O, xüsusiləşdirilmiş elmi şuranın üzvü olmuşdur.

Aydın Məmmədov 1993-cü il mart ayında Bakıda vəfat etmişdir.

DİLARƏ ƏLİYEVA

Dilarə Ələkbər qızı Əliyeva 1929-cu il dekabırın 14-də Tbilisi şəhərində dəmirçi ailəsində anadan olmuşdur. Burada 97 nömrəli şəhər Azərbaycan orta məktəbini bitirdikdən sonra ADU-nun (indiki BDU-nun) şərqşünaslıq fakültəsində təhsil almışdır (1945-1950). 1950-ci ildə Azərbaycan EA Nizami adına Dil və Ədəbiyyat İnstitutunun aspiranturasına daxil olmuş, sonra Gürcüstan EA-nın Şota Rustaveli adına Ədəbiyyat İnstitutuna e’zam olunmuşdur. Burada "Azərbaycan-gürcü ədəbi əlaqələrinin XIX əsr ədəbiyyatında in’ikası" mövzusunda namizədlik dissertasiyasını tamamlamış, 1954-cü ildə müdafiə etmişdir. Azərbaycan EA Nizami adına Dil və Ədəbiyyat İnstitutunda elmi işçi, Nizami adına Ədəbiyyat Muzeyində baş elmi işçi (1957-1959), qədim və orta əsrlər ədəbiyyatı şö’bəsində müdir (1959-1972), sonra Nizami adına Ədəbiyyat İnstitutunun ədəbi əlaqələr şö’bəsində böyük elmi işçi (1972-1979), nizamişünaslıq şö’bəsində böyük elmi işçi (1979-1986), institutun ədəbi əlaqələr şö’bəsində aparıcı elmi işçi (1986-cı ildən) olmuş, eyni zamanda bölmə müdiri kimi də fəaliyyət göstərmişdir.

"Nizami və gürcü ədəbiyyatı" mövzusunda doktorluq dissertasiyası müdafiə etmişdir.

Dilarə Ələkbər qızı Əliyeva ədəbiyyatşünas, tərcüməçi, 1960-cı ildən Yazıçılar Birliyinin üzvü, Gürcüstanın əməkdar mədəniyyət işçisi (1980), filologiya elmləri doktoru (1985), aparıcı elmi işçi (1987), Azərbaycan Respublikası Ali Sovetinin deputatı (1990) olmuşdur.

1991-ci il aprelin 19-da avtomobil qəzasında faciəli şəkildə həlak olmuş, Bakıda Fəxri Xiyabanda dəfn edilmişdir.

Xatirəsini əbədiləşdirmək üçün bir sıra tədbirlər həyata keçirilmişdir. Yaşadığı evin qarşısında xatirə lövhəsi vurulmuşdur. Qadın hüquqlarını müdafiə cəmiyyəti onun adını daşıyır.

 ELDAR İSMAYILOV

Eldar Məmməd oğlu İsmayılov 1954-cü il sentyabrın 1-də Tbilisi şəhərində anadan olmuşdur. 1961-1971-ci illərdə 72 saylı Tbilisi orta məktəbində təhsil almışdır. 1971-1976-cı illərdə Azərbaycan Xalq Təsərrüfatı İnstitutunun tələbəsi olmuşdur. 1976-1980-ci illərdə SSRİ EA-nın Mərkəzi İqtisadi Riyaziyyat İnstitutunun aspiranturasında oxumuşdur. 1981-1985-ci illərdə Azərbaycan EA-nın İqtisadiyyat İnstitutunda kiçik elmi işçi vəzifəsində çalışmışdır. 1984-cü ildə Moskva şəhərində SSRİ EA-nın Mərkəzi Riyaziyyat və İqtisadiyyat İnstitutunun müdafiə şurasında namizədlik dissertasiyası müdafiə edib elmi dərəcə almışdır. 1985-1991-ci illərdə Bakı Ali Partiya Məktəbinin Tikinti və Sənaye məhsullarının təşkili və iqtisadiyyatı kafedrasında baş müəllim və dosent vəzifələrində işləmişdir. 1991-1997-ci illərdə Bakı Politologiya və Sosial İdarəetmə İnstitutunda menecment və Sosial İdarəetmə kafedrasının müdiri vəzifəsində işləmişdir. 1992-1995-ci illərdə "Renassans" Kommersiya Bankının Prezidenti vəzifəsini icra etmişdir. 1996-cı ildən "Qafqaz İnkişaf" Birgə Kommersiya Bankının Prezidenti vəzifəsini icra edir.

1999-cu ildən Azərbaycan "Qafqaz Strateji İnkişaf Tədqiqatları" İnstitutunun elmi şurasının sədridir.

Eldar İsmayılovun 30-dan çox elmi əsəri çap olunmuşdur. Bu elmi məqalələr iqtisadiyyata, maliyyəyə və menecmentə həsr olunmuşdur.

HAMLET İSMAYILOV

Hamlet Yəhya oğlu İsmayılov 1945-ci ildə Tbilisi şəhərində anadan olmuş, 1962-ci ildə 72 saylı Tbilisi orta məktəbini bitirmişdir. 1968-ci ildə Azərbaycan XTİ-ni bitirmiş, 1977-ci ildə namizədlik dissertasiyası müdafiə edərək iqtisad elmləri namizədi elmi dərəcəsi almışdır.

1988-ci ildə Moskva şəhərində doktorluq dissertasiyası müdafiə etmişdir. 1989-cu ildən professordur. 25 ilə qədər Dövlət Plan Komitəsində mə’sul vəzifədə işləmiş və Elmi-Tədqiqat İqtisadiyyat İnstitutunun elmi işlər üzrə direktor müavini, normativ tədqiqat mərkəzinin direktoru olmuşdur. Hazırda Azərbaycan Dövlət Neft Akademiyasında kafedra müdiri vəzifəsində işləyir. 12 monoqrafiya, 7 dərs vəsaiti, 150-dən çox elmi məqalə çap etdirmişdir.

Respublika və beynəlxalq səviyyədə mikro və makro iqtisadiyyat üzrə tanınmış mütəxəssis olmaqla elmi kadrların hazırlanmasında fəal iştirak edir. 1981-1991-ci illərdə İqtisadçıların Avropa Assosiasiyasının üzvü olmuş, 1998-ci ildə Almaniya İqtisadiyyat Akademiyasının həqiqi üzvü seçilmişdir.

Hamlet İsmayılovun elmi və pedaqoji fəaliyyəti 50 elmi əsərdə öz əksini tapmışdır. O, beynəlxalq, ittifaq və respublika səviyyəli 20 simpozium, konqres və konfranslarda çıxış etmiş, geniş həcmli məqalələr çap etdirmişdir.

Hamlet İsmayılov 2000-ci ilin noyabrında respublikanın əməkdar elm xadimi adına layiq görülmüşdür.

TAHİR HÜSEYNOV

Tahir İsmayıl oğlu Hüseynov 1939-cu il aprelin 16-da Tbilisi şəhərində qulluqçu ailəsində anadan olmuşdur.

Tbilisi şəhərində 73 saylı orta məktəbi bitirdikdən sonra ordu sıralarında xidmət etmişdir.

Hərbi qulluğu başa vurduqdan sonra 1961-ci ildə Azərbaycan Dövlət Universitetinin (ADU) kimya fakültəsinə qəbul olmuş və 1966-cı ildə oranı bitirdikdən sonra neft sənayesində əmək fəaliyyətinə başlamışdır. 1966-cı ildən e’tibarən Azərbaycan Elmi-Tədqiqat Qazma İnstitutunda mühəndis vəzifəsində çalışmışdır. 1970-1973-cü illərdə Azərbaycan EA Qeyri-Üzvi və Fizika Kimya İnstitutu "Kolloid kimya" laboratoriyasının ə’yani aspirantı olmuşdur.

1974-cü ildə kimya elmləri namizədi elmi dərəcəsini almaq üçün dissertasiya müdafiə etmişdir. Həmin ildən "Dənizneftqazlayihə" Dövlət Elmi-Tədqiqat və Layihə İnstitutunda (DETLİ) "Dispers sistemlərinin fiziki-kimyəvi üsullarla təmizlənməsi və işlədilməsi" laboratoriyasının müdiri vəzifəsində çalışmışdır.

Onun rəhbərliyilə işlənib hazırlanmış SBOU 6.25/6-İ1 aqreqat dünya analoqları ilə müqayisə edilə bilən ixtira olmuş, Leypsik yarmarkasının Qızıl medalına layiq görülmüşdür.

Onun Çexiyanın Kutno-Qora şəhərində fəaliyyət göstərən elmi mərkəzlərin birində dərc edilmiş "Mineral sərvətlərin istifadəsi məqsədi ilə dəniz və okeanların tədqiq edilməsi" informasiya toplusu tədqiqatçı alimlərin böyük marağına səbəb olmuşdur.

O, İqtisadi Əməkdaşlıq Birliyi Ölkələrinin "Dəniz və okeanların mühafizəsi" daimi komissiyasının Fəxri eksperti seçilmişdir.

1994-cü ildə "Qazma məhlullarının xassələrini tənzim etmək üçün neft e’malı sənayesinin əlavə məhsulları əsasında yeni kimyəvi reagentlərin alınması" mövzusunda doktorluq dissertasiyası müdafiə etmişdir.

Tahir Hüseynov 2 monoqrafiyanın, 120-dən çox elmi əsərin, o cümlədən 24 müəlliflik şəhadətnaməsinin, 3 patentin müəllifidir.

Tahir Hüseynovun rəhbərliyi altında 3 elmlər namizədi və 1 elmlər doktoru müdafiə etmişdir.

Tahir Hüseynov Beynəlxalq Əməliyyat Şirkəti nəzdində fəaliyyət göstərən "Günəşli-Azəri-Çıraq, Şah-Dəniz" proyektlərinin, Azərbaycan Dövlət Neft Şirkətinin "Quyuların qazılması" bölməsinin, Azərbaycan Respublikası Dövlət Ekologiya və Ətraf Mühitin Mühafizəsi Komitəsinin ekspertidir, "Dənizneftqazlayihə" DETLİ-nin Elmi Şurasının üzvüdür.