[A-Z]

FƏRMAN CEYRANOV

Fərman Cahan oğlu Ceyranov 1957-ci ildə Saqareco rayonunun Ləmbəli kəndində anadan olmuşdur. 1964-cü ildə Ləmbəli səkkizillik məktəbinin birinci sinfinə getmiş, 1974-cü ildə Yor-Muğanlı kənd orta məktəbini bitirmişdir. 1974-cü ildə Azərbaycan Dövlət Tibb İnstitutunun (indiki ATU-nun) müalicə-profilaktika fakültəsinin birinci kursuna daxil olmuş, 1980-ci ildə Tbilisidəki 1 nömrəli şəhər klinik xəstəxanasında cərrahiyyə üzrə internatura keçmişdir.

1981-ci ildən 1991-ci ilədək Seçenov adına Moskva Tibb Akademiyasında Cərrahiyyə xəstəlikləri kafedrasında əvvəlcə baş laborant, kiçik elmi işçi, böyük elmi işçi və sonra isə baş elmi işçi vəzifəsində işləyərək elmi laboratoriyaya rəhbərlik etmişdir.

1985-ci ildə "Mexaniki sarılıqlı ahıl və orta yaşlı xəstələrin kompleks cərrahi müalicəsində hemasorbsiyanın rolu və xüsusiyyətləri" mövzusunda namizədlik dissertasiyası, müdafiə edib, tibb elmləri namizədi elmi dərəcəsinə layiq görülmüşdür.

1990-cı ildə doktorluq dissertasiyası müdafiə etmişdir.

Fərman Ceyranov 1992-ci ildə Bakıya köçmüş, Azərbaycan Respublikası Səhiyyə Nazirliyinin nəzdində ilk dəfə yaranmış olan elmi idarənin rəhbəri, sonradan akademik Mustafa Topçubaşov adına Elmi Tədqiqat Klinik və Ekspermental Cərrahlıq İnstitutunda elmi işlər üzrə direktor müavini, direktor işləmişdir. İşlədiyi bu illər ərzində Fərman Ceyranovun respublikanın tibb və səhiyyə sahəsinə aid çox böyük elmi-praktik fəaliyyəti olmuşdur. Onun qayğıkeşliyi, rəhbərliyi altında dəfələrlə elmi, elmi-praktik müşavirə və konfranslar keçirilmişdir.

Fərman Ceyranovun xəstələr üzərində apardığı ağır cərrahiyyə əməliyyatları haqqında dəfələrlə qəzet və jurnallarda məqalələr çap olunmuş, televiziya və radio verlişlərində isə daha geniş və ətraflı mə’lumatlar verilmişdir.

İnstitutda işlədiyi müddətdə dünya alimlərinə çatdırmış olduğu "Ürək-damar", "Döş qəfəsi", "Endokrin", "Qastroentrologiya" və s. elmi işləri ilə yanaşı, onun son iki ildə türk alimləri ilə birgə aktiv bioenergetik indofirent maddələrin tibbdəki tatbiqi sahəsində elmi-praktik iş aparması Ceyranovun ölkəmizin hüdudlarından kənarda da yaxşı cərrah kimi tanınmasına misaldır.

Fərman Ceyranov 1997-ci ildən Azərbaycan Respublikasının baş cərrahıdır.

HƏMZƏ XƏLİLOV

Həmzə Atakişi oğlu Xəlilov 1949-cu ildə Qaraçöpün Tüllər kəndində anadan olmuşdur. 1966-cı ildə Yor-Muğanlı kənd orta məktəbini və 1971-ci ildə Azərbaycan Dövlət Xalq Təsərrüfatı İnstitutunu bitirmişdir. Elə həmin ildən də elmi-pedaqoji fəaliyyətə başlamışdır.

Həmzə Xəlilov 1976-cı ildə namizədlik, 1992-ci ildə doktorluq dissertasiyası müdafiə etmişdir.

Həmzə Xəlilov 1993-cü ildən Bakı Dövlət Universitetinin iqtisadi nəzəriyyə kafedrasına rəhbərlik edir. O, elmi, elmi-pedaqoji fəaliyyətini davam etdirir, iqtisadi nəzəriyyəyə dair dərsliklərin hazırlanmasında iştirak edir. Onun 60-a yaxın elmi əsəri işıq üzü görmüşdür.

Həmzə Xəlilov bu müddət ərzində 20 ittifaq və respublika səviyyəli konfranslarda çıxış etmiş, elmi məqalələr çap etdirmişdir.

Həmzə Xəlilov BDU-nun böyük şurasının və müdafiə şurasının üzvüdür.

Hal-hazırda BDU-nun iqtisadi nəzriyyə kafedrasının pofessoru və həmin kafedranın müdiridir.

LƏTİF TALIBLI

Lətif Xəlil oğlu Talıblı 1952-ci il dekabrın 25-də Qaraçöp nahiyəsinin Keşəli kəndində anadan olmuşdur. 1968-ci ildə Keşəli kənd orta məktəbini bitirmişdir. 1968-ci ildə Azərbaycan Dövlət Universitetinin mexanika-riyaziyyat fakültəsinə daxil olmuş, 1973-cü ildə həmin fakültəni bitirmişdir. 1973-cü ildə tə’yinatla Azərbaycan SSR EA-nın Riyaziyyat və Mexanika İnstitutuna işə qəbul olunmuş, həmin ildə də əyani aspiranturaya daxil olmuş və Lomonosov adına Moskva Dövlət Universitetinə e’zam edilmişdir.

1979-cu ildə Kiyev şəhərində namizədlik dissertasiyası müdafiə etmişdir. 1979-cu ildən EA-nın Riyaziyyat-Mexanika İnstitutunda kiçik elmi işçi, elmi işçi, baş elmi işçi vəzifələrində işləmiş, 1996-cı ildə dissertasiya müdafiə etmişdir. 1996-cı ildə şö’bə müdiri vəzifəsinə seçilmişdir. Lətif Talıblının elmi və pedaqoji fəaliyyəti 50-ə yaxın əsərdə öz əksini tapmışdır. O, 20-yə yaxın beynəlxalq, respublika və ali məktəb səviyyəsində keçirilən simpozium və konfranslarda iştirak etmiş, elmi məqalələr çap etdirmişdir.

Lətif Talıblı indiyə kimi 8 nəfər aspiranta elmi rəhbər olmuşdur. 1999-cu ildən Azərbaycan Respublikası Prezidenti yanında Ali Attestasiya Komissiyasında riyaziyyat və mexanika ixtisasları üzrə ekspert şurasının üzvüdür. Azərbaycan EA-nın "Xəbərləri" jurnalının "Riyaziyyat və Mexanika" buraxılışının, Azərbaycan EA-nın "Riyaziyyat Mexanika" jurnalının redaksiya hey’ətinin üzvü və İnstitutunun elmi şurasının üzvüdür.

Hal-hazırda Riyaziyyat və Mexanika İnstitutunun mexanika şöbəsində müdir vəzifəsində çalışır. Lətif Talıblı 1996-cı ildən həmin institutun professorudur.

LOĞMAN MƏMMƏDOV

Loğman Abbas oğlu Məmmədov 1950-ci il iyulun 10-da Saqareco rayonunun Düzəyrəm kəndində müəllim ailəsində anadan olmuşdur.

1967-ci ildə Düzəyrəm kənd orta məktəbini ə’la qiymətlərlə bitirmiş, həmin ildə də Azərbaycan Dövlət Tibb İnstitutunun (indiki ADTU) müalicə-profilaktika fakültəsinə daxil olmuşdur.

1973-cü ildə həmin fakültədə təhsilini başa vurmuş, operativ cərrahlıq və topoqrafik anatomiya kafedrasında əmək fəaliyyətinə başlamışdır.

1974-1989-cu illərdə İ.M.Seçenov adına I Moskva Tibb Akademiyasında elmi və əmək fəaliyyətini davam etdirmişdir. O, bu illərdə Akademiyanın Eksperimental cərrahlıq laboratoriyasının elmi işçisi və rəhbəri kimi fəaliyyət göstərmiş, 1978-ci ildə namizədlik dissertasiyası, 1989-cu ildəsə doktorluq dissertasiyasını uğurla müdafiə edib tibb elmləri doktoru elmi dərəcəsi almışdır.

Loğman Məmmədov eyni zamanda Moskva İctimai Elmlər Universitetinin fəlsəfə fakültəsini və Moskva İctimai Patentşünaslıq İnstitutunu bitirmiş, Ümumittifaq Elmi -Tədqiqat Patent Ekspertizası İnstitutunun və Dövlət Farmakologiya Komitəsinin ictimai əsaslarla xüsusi səlahiyyətli eksperti kimi çalışmış, Moskvada Azərbaycan diasporunun təşkilatçılarından olmaqla onun tədbirlərində yaxından iştirak etmişdir.

Loğman Məmmədovun elmi və pedaqoji fəaliyyəti 100 elmi əsərdə, o cümlədən 1 kəşfdə, 6 dərman preparatında və vəsaitində, 130 elmi işdə,22 ixtirada və ümumi həcmi 100 çap vərəqi olan 6 dərs vəsaitində öz əksini tapmışdır.

O, ixtiraçılıq fəaliyyətinə görə "Dövlət ixtiraçısı" döş nişanı ilə təltif olunmuş, səmərəli elmi fəaliyyəti dəfələrlə diplom, medal, fəxri fərman və pul mükafatlarına layiq görülmüşdür.

Loğman Məmmədov elmi əsərlərinin, kəşf və ixtiralarının müəlliflik haqqını həmişə Ümumdünya Uşaq fonduna köçürmüşdür.

Loğman Məmmədov 1989-cu ildə müsabiqə yolu ilə Azərbaycan Tibb Universitetinin Operativ Cərrahlıq və Topoqrafik anatomiya kafedrasına professor keçmiş, 1992-ci ildə kafedra müdiri vəzifəsinə seçilmiş və indiyədək bu vəzifədə çalışır. O, Azərbaycan Respublikası Səhiyyə Nazirliyinin Elmi-Tibbi Şurasının, Təhsil Nazirliyinin Elmi Şurasının və onun nəzdində fəaliyyət göstərən doktorluq müdafiəsi üzrə ixtisaslaşdırılmış Elmi Şuranın üzvüdür.

Loğman Məmmədov elmi-pedaqoji fəaliyyəti ilə yanaşı həm də respublikamızın suverenliyi, ərazi bütövlüyü, milli dövlətçiliyi yolunda ardıcıl və prinsipial mübarizə aparan vətənpərvər alimdir.

O, bu müddət ərzində 50 beynəlxalq, ittifaq və respublika səviyyəli konqres və konfransların iştirakçısı olmuş, iri həcmli elmi məqalələr çap etdirmişdir.

Loğman Məmmədov ağac mə’mulatından düzəldilmiş tarixi-me’marlıq incilərinin bilicisi və sənətkarıdır.

Loğman Məmmədov 2000-ci il oktyabr ayının 17-də Gürcüstan Respublikası Kaxet quberniyasının Saqareco şəhərinin fəxri vətəndaşı adına layiq görülmüşdür.

VƏLİ QURBANOV

Vəli Məhərrəm oğlu Qurbanov 1962-ci il yanvarın 22-də Saqareco rayonunun Düzəyrəm kəndində müəllim ailəsində anadan olmuşdur.

1969-cu ildə Düzəyrəm kənd orta məktəbinin 1-ci sinfinə getmiş, 1977-ci ildə Bakıya gəlmiş və 1 saylı fizika-riyaziyyat təmayüllü məktəbdə təhsilini davam etdirmişdir.

1979-cu ildə Azərbaycan Dövlət Universitetinin (indiki BDU) tətbiqi-riyaziyyat fakültəsinə daxil olmuş, 1982-ci ildə isə M.V.Lomonosov adına Moskva Dövlət Unversitetində təhsilini davam etdirmişdir. O, buranı fərqlənmə diplomu ilə başa vurmuşdur (1985). Elə həmin ildə ümumi riyaziyyat kafedrasının aspirantı olmuş, 1989-cu ildə MDU-da dissertasiya müdafiə edib elmi dərəcə almışdır.

1989-cu ilin axırlarından Azərbaycan Dövlət Pedaqoji İnstitutunun riyazi analiz kafedrasında laborant, müəllim, baş müəllim, dosent vəzifələrində işləmişdir.

1998-ci ildə doktorluq dissertasiyasını tamamlamaq üçün M.V.Lomonosov adına MDU-ya e’zam olunmuşdur. 2000-ci ilin mayında həmin universitetdə doktorluq dissertasiyası müdafiə etmişdir.

Vəli Qurbanovun elmi və pedaqoji fəaliyyəti 23 elmi əsərdə öz əksini tapmışdır. Əsərlərinin çox hissəsi mərkəzi jurnallarda çap olunmuşdur. Bu müddət ərzində o bir neçə dəfə beynəlxalq konfranslarda iştirak etmiş, elmi məqalələr çap etdirmişdir.