ADİLXAN ABDULLAYEV

Adilxan Məhəmməd oğlu Abdullayev 1936-cı ildə Qarayazı nümayəndəliyinin Nəzərli kəndində anadan olmuşdur. 1956-cı ildə Kosalı kənd orta məktəbini qızıl medalla bitirdikdən sonra, 1957-ci ildə Azərbaycan Dövlət Universitetinin kimya fakültəsinə daxil olmuşdur. 1962-ci ildə həmin fakültəni bitirdikdən sonra Universitetin kimya fakültəsinin "qeyri-üzvi kimya" kafedrasında əyani aspiranturaya daxil olmuş, 1967-ci ildə "Mis, manqan və nikel neftenantlarının sintezi və xassələrinin tədqiqi" mövzusunda dissertasiya müdafiə etmişdir. 1966-cı ildən Qeyri-üzvi kimya kafedrasında əvvəlcə müəllim, 1969-cü ildən baş müəllim vəzifəsində çalışmışdır. 1973-cü ildən dosentdir. 1990-cı il noyabr ayının 2-də Daşkənddə Özbəkistan Elmlər Akademiyası Kimya İnstitutunda "Keçici metal neftenantlarının sintezi, xassələri və tətbiqi" mövzusunda doktorluq dissertasiyası müdafiə etmişdir.

1993-cü ildən professordur, 1993-cü il sentyabr ayından Türkiyə Yüuksək Öyrətim Kurulu (YÖK) tərəfindən rəsmi də’vət olunaraq Ədirnə şəhərində Trakya Universitəsi fənn-ədəbiyyat fakültəsinin kimya bölümündə professor vəzifəsində çalışır.

Bu müddət ərzində onun 80-ə yaxın elmi əsəri "Koordinasyon kimyası", "Ümumi və qeyri-üzvi kimya" məcmuələrində (Moskva şəhəri), Azərbaycan Dövlət Universiteti və Özbəkistan Elmlər Akademiyasının, Özbəkistan Elmlər Akademiyasının Kimya İnstitutunun məcmuələrində, Türkiyədəki kimya məcmuələrində və konfrans materiallarında çap edilmişdir.

1990-cı ildə "Sintetik naftenantlar" adlı kitabı Moskvada, "Təməl koordinasyon kimyası" kitabı Ədirnədə (Türkiyə) çap olunmuşdur. "Qeyri-üzvi kimyada seçilmiş bəhslər", "Qeyri-metal kimyası" və "Ümumi kimya" dərslikləri isə çapa təqdim olunmuşdur.

1989-cu ildə Azərbaycan Təhsil Nazirliyi tərəfindən "Maarif ə’laçısı" adına layiq görülmüşdür. Dəfələrlə Azərbaycan Dövlət Universiteti (indiki BDU), Azərbaycan Maarif Nazirliyi və Azərbaycan Kimya Olimpiadası Şurası tərəfindən fəxri fərmanlar və təşəkkürnamələrlə təltif edilmişdir.

CABBAR MƏMMƏDOV

Cabbar Mirzə oğlu Məmmədov 1932-ci ildə Qarayazıda anadan olmuşdur.

1941-ci ildə Qarayazı Azərbaycan orta məktəbinin 1-ci sinfinə daxil olmuş 1951-ci ildə həmin məktəbi bitirmişdir.

1951-ci ildə Azərbaycan Politexnik institutunun "Maşınqayırmanın Texnologiyası" fakültəsinə daxil olmuş, 1956-cı ildə həmin fakültəni bitirmiş və tə’yinatla Tbilisi şəhərinə - S.M. Kirov adına dəzgahqayırma zavoduna göndərilmişdir. O, zavodda 2 il mühəndis vəzifəsində çalışmışdır. 1958-1959-cu illərdə Qardabani (Qarayazı) şəhərində Maşın Tə’miri Stansiyasında mühəndis vəzifəsində, 1959-1960-cı illərdə isə Rustavi Yol Nəqliyyatının Lahiyə-Konstruktor İnstitutunda işləmişdir.

1960-cı ilin mart ayında AzPİ-nin Maşınqayırmanın Texnologiyası fakültəsinə assistent vəzifəsinə işə qəbul olunmuşdur. 1962-ci ildə Cabbar Məmmədov Moskva Dəzgah alətləri institutunun aspiranturasına daxil olmuşdur. 1964-cü ildə burada baş müəllim vəzifəsinə irəli çəkilmişdir.

1965-ci ildə namizədlik dissertasiyası müdafiə etmişdir, 1968-ci ildə Maşınqayırma Texnologiyası kafedrasında dosent vəzifəsində çalışmışdır. Həmin ildə Cabbar Məmmədov institutun mexanika fakültəsində dekan müavini vəzifəsinə tə’yin olunmuş, bu vəzifədə 7 il işlədikdən sonra Maşınqayırma fakültəsinin metalkəsmə və dəzgahlar kafedrasına başçılıq etmişdir. 1981-ci ildən 1993-cü ilə qədər "Metal kəsən dəzgahlar və alətlər" kafedrasında dosent vəzifəsində çalışmışdır. 1991-ci ildə Bauman adına Moskva Ali Texniki Məktəbində doktorluq dissertasiyası müdafiə etmişdir. Cabbar Məmmədovun elmi və pedaqoji fəaliyyəti 50-dən çox elmi əsərdə öz əksini tapmışdır. Onun bir neçə vəsaiti və metodiki göstərişi, 3 kitabı və bir monoqrafiyası çapdan çıxmışdır. Beynəlxalq, ittifaq və respublika səviyyəli 20-dən çox konfransda çıxış etmiş, məqalə çap etdirmişdir.

Cabbar Məmmədov 1993-cü ildə Bakı şəhərində vəfat etmişdir.

CAMAL MUSTAFAYEV

Camal Vəli oğlu Mustafayev 1928-ci ildə Qarayazının (indiki Qardabani) Kosalı kəndində anadan olmuşdur. 1935-ci ildə Kosalı kənd orta məktəbinin birinci sinfinə getmiş, 1945-ci ildə həmin məktəbi bitirmişdir.

1952-ci ildə Moskva Dövlət Universitetinin fəlsəfə fakültəsini bitirmişdir. İki il Qarayazı rayonunda pedaqoji fəaliyyətlə məşğul olmuşdur.

1954-cü ildə SSRİ EA Fəlsəfə İnstitutunun əyani aspirantı olmuşdur. Aspirantura illərində onun elmi araşdırmaları "Nizaminin fəlsəfəsi, etik görüşləri" mövzusuna aid olmuşdur. O bu mövzuda dissertasiya müdafiə etmişdir.

1957-1968-ci illərdə C. Mustafayev Azərbaycan EA Fəlsəfə və Hüquq İnstitutunda kiçik elmi işçi, elmi işçi və baş elmi işçi vəzifələrində işləmişdir.

1968-ci ildə o, Azərbaycan Dövlət Universitetinin müdafiə şurasında "Nizaminin ideyalar aləmi, müasirlik" mövzusunda doktorluq dissertasiyası müdafiə edib, fəlsəfə elmləri doktoru elmi dərəcəsinə layiq görülmüşdür.

1968-1976-cı illərdə Azərbaycan Pedaqoji Xarici Dillər İnstitutunda fəlsəfə kafedrasının müdiri işləmişdir.

1976-cı ildən indiyədək Azərbaycan Dövlət Universitetinin (indiki Bakı Dövlət Universiteti) professorudur. 1985-1991-ci illərdə universitetdə etika-estetika kafedrasının müdiri vəzifəsində çalışmışdır.

1981-ci ildə ona Azərbaycan SSR Əməkdar elm xadimi fəxri adı verilmişdir.

C. Mustafayev orta əsrlər Azərbaycan fəlsəfi fikri sahəsində bir sıra samballı əsərlər çap etdirmişdir. Xüsusən onun Nizami fəlsəfəsinə, XII əsr Azərbaycan düşüncəsinə aid əsərləri geniş oxucu kütləsinə bəllidir. Moskva və başqa şəhərlərin nüfuzlu jurnallarında əsərləri çap olunmuşdur. Onun Müsəlman şərq sosial utopiyasına aid tədqiqat işləri və s. əsərləri xarici dillərə tərcümə olunmuşdur.

C. Mustafayev Azərbaycan fəlsəfəsi, etika və estetikası sahəsində neçə-neçə elmlər namizədi, elmlər doktoru yetişdirmişdir. O. Eyni zamanda müasir Azərbaycan şe’rinin əsas tədqiqatçılarındandır.

C. Mustafayevin elmi və pedaqoji fəaliyyəti 200 elmi əsərdə və 100-dən çox publisistik materialda, 10 kitabda, 5 fundamental monoqrafiyada öz əksini tapmışdır. O, 100-dən artıq beynəlxalq, ittifaq, respublika səviyyəli konqresdə, simpozium və konfransda iştirak etmiş, məqalələr çap etdirmişdir.

C. Mustafayev BDU-nun, Azərbaycan EA-nın Fəlsəfə və Hüquq İnstitutunun müdafiə şuralarının üzvü olmuşdur. 2000-ci ildən e’tibarən isə Xəzər Universitetində tərcümə mərkəzinin direktoru və həmin Universitetin professorudur.

ƏKBƏR ƏLİYEV

Əkbər Bayram oğlu Əliyev 1950-ci ildə Qarayazı (Qardabani) rayonunun Qaracalar kəndində müəllim ailəsində anadan olmuşdur.

1967-ci ildə Qaracalar orta məktəbini ə’la qiymətlərlə bitirmiş və həmin ildə Azərbaycan Dövlət Universitetinin (indiki BDU-nun) mexanika-riyaziyyat fakültəsinə qəbul olunmuşdur. 1972-ci ildə universiteti fərqlənmə diplomu ilə bitirmiş və tə’yinatla universitetin hesablama mərkəzinə göndərilmişdir. O, 1972-ci ildə Azərbaycan EA Riyaziyyat və Mexanika institutunun aspiranturasına qəbul olmuş, 1976-cı ildə "Evolyusion tənliklərin və xüsusi törəməli hiperbolik tənliklərin həllərinin xarakteri" mövzusunda namizədlik dissertasiyası müdafiə etmişdir.

1975-1980-ci illərdə Əkbər Əliyev Azərbaycan EA Riyaziyyat və Mexanika institutunda kiçik elmi işçi və sonra baş elmi işçi vəzifələrində çalışmışdır. 1976-cı ildən pedaqoji fəaliyyətə başlamış və 1981-ci ildən 1989-cu ilədək Azərbaycan Politexnik İnstitutunda (indiki Azərbaycan Texniki Universitetində) dosent vəzifəsini icra etmişdir. Əkbər Əliyev doktorluq işini tamamlamaq üçün 1985-1987-ci illərdə Moskva Energetika İnstitutuna e’zam olunmuş və 1988-ci ildə Razmadze adına Tbilisi riyaziyyat institutunda "Hiperbolik operatorlar üçün qlobal həll olunan məsələlər" adlı doktorluq dissertasiyasını müdafiə etmişdir.

Əkbər Əliyev 1989-cu ildən Azərbaycan Texniki Universitetində "Riyaziyyat 2" kafedrasına rəhbərlik etmişdir. O eyni zamanda "Bə’zi qeyri stasionar proseslərin riyazi modelləşməsi" elmi tədqiqat laboratoriyasına rəhbərlik edir və paralel olaraq Azərbaycan EA Riyaziyyat və Mexanika İnstitutunda baş elmi işçi vəzifəsində çalışır.

Əkbər Əliyev 1996-cı ildə Türkiyədə elmi ezamiyyətdə olmuş və NATO Doproq proqramı çərçivəsində elmi tədqiqat işi aparmışdır.

70-dən artıq elmi məqalənin müəllifi olan Əkbər Əliyev namizədlik və doktorluq elmi dərəcəsi verən elmi şuraların üzvü olmuş və hal-hazırda Bakı Dövlət Universitetinin nəzdində fəaliyyət göstərən doktorluq elmi dərəcəsi verən şuranın üzvüdür.

1993-1994-cü illərdə Azərbaycan Təhsil nazirliyi yanında "Vahid elmi metodiki şura"nın riyaziyyat bölməsinə rəhbərlik etmişdir və hazırda həmin bölmədə sədr müavini kimi fəaliyyət göstərir. O, 1994-1996-cı illərdə Azərbaycan Respublikası Prezidenti yanında Ali Atestasiya Komisiyasının riyaziyyat və mexanika bölməsi üzrə ekspert komisiyasının üzvü olmuşdur.

O, AzTU-nin elmi metodika komissiyasının, Azərbaycan Riyaziyyat cəmiyyətinin idarə hey’ətinin üzvüdür.

ƏLƏDDİN MAHMUDOV

Ələddin Pirqasım oğlu Mahmudov 1934-cü ildə Qarayazı bölgəsinin Təzəkənd kəndində anadan olmuşdur. 1959-cu ildə Azərbaycan Dövlət Universitetinin fizika-riyaziyyat fakültəsini bitirmiş və təhsilini aspiranturada davam etdirmişdir. 1963-cü ildə dissertasiya müdafiə edərək fizika-riyaziyyat elmləri namizədi elmi dərəcəsi almışdır.

Ələddin Mahmudov 1960-1970-ci illərdə qeyri-xətti Hammerşteyn tipli inteqral tənliklərin həllərinin varlığı haqqında məşhur alman riyaziyyatçısı H. Şeferin verdiyi üsulu ilk dəfə inkişaf etdirmişdir.

Ələddin Mahmudov 1985-ci ildə Moskvada "Qeyri-xətti tənliklərin məxsusi elementlərinin tamlığı" mövzusunda dissertasiyanı uğurla müdafiə etmiş, fizika-riyaziyyat elmləri doktoru elmi dərəcəsi almışdır.

Ələddin Mahmudov riyaziyyat elmi sahəsində göstərdiyi xidmətlərə görə keçmiş ittifaqın müxtəlif orden və medalları ilə təltif olunmuş, 1994-cü ildə nüfuzlu Amerika Riyaziyyatçılar Cəmiyyətinin üzvü, 1995-ci ildə isə Nyu-York Elmlər Akademiyasının həqiqi üzvü seçilmişdir.

Ələddin Mahmudov 50-yə qədər elmi məqalənin, bir neçə monoqrafiyanın müəllifidir. Keçmiş ittifaqın nüfuzlu elmi nəşrlərində, Rumıniya, Amerika, Almaniya və İranda çap olunmuş elmi məqalələri ona geniş şöhrət qazandırmışdır.

Ələddin Mahmudov uzun illər Bakı Dövlət Universitetinin mexanika-riyaziyyat fakültəsinin dekan müavini və 6 ilə qədər dekanı vəzifəsində işləmişdir. O, 10 ildən yuxarı həmin fakültədə mexanika-riyaziyyat üzrə namizədlik və doktorluq müdafiə şurasının üzvü olmuşdur.

Ələddin Mahmudovun çoxillik fəaliyyətinin əsas yekunları onun 1997-ci ildə "Elm" nəşriyyatı tərəfindən 25 çap vərəqi həcmində nəşr olunmuş "Qeyri-xətti məxsusi qiymətlər məsələsi və bifurkasiya nəzəriyyəsi" adlı monoqrafiyasında öz əksini tapmışdır.

HAMLET İSAXANLI (İSAYEV)

Hamlet Abdulla oğlu İsaxanlı 1948-ci il martın 2-də Qarayazı bölgəsində anadan olmuşdur. 1965-ci ildə Kosalı kənd orta məktəbini qızıl medalla bitirmişdir. 1965-1970-ci illərdə Azərbaycan Dövlət Universitetinin mexanika-riyaziyyat fakültəsində oxumuş və oranı fərqlənmə diplomu ilə bitirmişdir. Əmək fəaliyyətinə Azərbaycan Elmlər Akademiyasının Riyaziyyat və Mexanika İnstitutunda baş laborant kimi başlamışdır.

1970-1973-cü illərdə Moskva Dövlət Universitetində aspiranturada oxumuşdur. 1973-cü ildə müvəffəqiyyətlə namizədlik dissertasiyası müdafiə etmiş, elmi dərəcə almışdır.

1973-1988-ci illərdə Azərbaycan Elmlər Akademiyasının Riyaziyyat və Mexanika İnstitutunda kiçik elmi işçi, baş elmi işçi, aparıcı elmi işçi, qrup rəhbəri vəzifələrində işləmişdir.

1975-1976-cı illərdə Moskva Dövlət Universitetində elmi tədqiqat işi aparmışdır.

1979-1981-ci illərdə Azərbaycan Dövlət Universitetinin funksiyalar və funksional analiz kafedrasında baş müəllim işləmişdir.

1981-1982-ci illərdə SSRİ Elmlər Akademiyası V.A. Steklov adına Riyaziyyat İnstitutunda (Moskva) elmi tədqiqat işi aparmış, 1983-cü ildə doktorluq dissertasiyası müdafiə etmişdir.

1987-ci ildən Leninqrad Maliyyə və İqtisadiyyat İnstitutunun Bakı filialında kafedra müdiri vəzifəsində işləmişdir.

1990-1991-ci illərdə Azərbaycan Respublikası Nazirlər Kabinetinin sərəncamına əsasən Bakıda ingilisdilli universitetin yaradılması üçün sənədləşmə işləri aparmışdır. 1991-ci ildən e’tibarən Azərbaycan Respublikası Nazirlər Kabinetinin 41 saylı qərarına əsasən yaradılan ingilisdilli Azərbaycan Universitetinə (indiki Xəzər Universitetinə) rəhbərlik etməyə başlamışdır.

1991-ci ilin axırlarında Türkiyənin İstanbul və Mərmərə universitetlərinin professoru olmuşdur.

1992-ci ildən Xəzər Universitetinin tə’sisçisi və rektorudur.

1993-cü ildən "Xəzər" Teleşirkətinin prezidenti və 1995-ci ildən isə "Xəzər-Xəbər" jurnalının baş redaktorudur.

Riyaziyyat, riyazi-fizika, riyazi iqtisadiyyat, təhsil, siyasi elmlər, tarix və mədəniyyət problemləri istiqamətində tədqiqatlar aparmış, nəticələr əldə etmişdir. Hamlet İsaxanlı "Çoxparametrli spektral nəzəriyyə haqqında mühazirələr" (1985, ingilis dilində) adlı monoqrafiyanın, 65 elmi məqalənin, 30-a qədər elmi-populyar və publisistik materialların müəllifidir. O, 20-yə qədər beynəlxalq, 30-a qədər ittifaq, 50-yə qədər isə respublika səviyyəli konqres, simpozium və konfransların iştirakçısı olmuş, məqalələr çap etdirmişdir.

Hamlet İsaxanlı 1970-2000-ci illərdə ABŞ, İngiltərə, Kanada, Şotlandiya, Almaniya, Hollandiya, Fransa, Avstriya, Polşa, Bolqarıstan, Türkiyə, İran, Hindistan, Çin, Rusiya, Ukrayna, Belarus, Litva, Latviya, Estoniya, Gürcüstan, Qazaxıstan, Türkmənistan və s. ölkələrdə elmi və pedaqoji e’zamiyyətlərdə olmuşdur.

1976-1983-cü illərdə Hamlet İsaxanlının elmi əsərləri SSRİ Elmlər Akademiyasında bir neçə dəfə ən yaxşı elmi-tədqiqat işləri siyahısına daxil edilmişdir.

1994-cü ildə Y. Məmmədəliyev adına mükafata layiq görülmüşdür.

1994-cü ildə Qlobal Keyfiyyət Menecmenti (London) mükafatına layiq görülmüş, Londan-Debret "Keçmiş Sovet İttifaqında Kim Kimdir" ensiklopediyasına daxil edilmiş, haqqında geniş yazı verilmişdir.

1995-ci ildə Amerika İctimai İdarəetmə Cəmiyyətinin üzvü, 1996-cı ildə Azərbaycan Rektorlar Şurasının sədr müavini, 1997-ci ildə Avro-Asiya fondu Qafqaz direktorlar şurasının üzvü, 1998-ci ildə Açıq Cəmiyyət İnstitutu (Soros fondu) Azərbaycan idarə hey’ətinin üzvü, Milli Coğrafiya Cəmiyyətinin (ABŞ) üzvü seçilmiş, 1999-cu ildə Amerika Bioqrafiya İnstitutunun Beynəlxalq Şərəf ordeni mükafatına layiq görülmüşdür. 2000-ci ildə Beynəlxalq Bioqrafiya Mərkəzinin (İngiltərə, Kembric) vitse prezidenti seçilmiş, xüsusi səlahiyyəi diplomu almışdır.

Hamlet İsaxanlı 2001-ci ildən özəl ali təhsil müəssisələri Assosiasiyasının prezidentidir.

Hamlet İsaxanlı eyni zamanda 1999-cu ildən Azərbaycan Çempionatının yüksək liqasında çıxış edən "Xəzər Universitəsi" professional futbol klubunun prezidentidir.

Hazırda H. İsaxanlı ingilisdilli Xəzər Universitetinin rektorudur.

HİDAYƏT HÜSEYNOV

Hidayət Məhəmməd oğlu Hüseynov 1952-ci ildə Qardabani rayonunun Ağtəhlə kəndində anadan olmuşdur. Orta təhsilini doğma kəndində aldıqdan sonra, 1968-ci ildə Azərbaycan Dövlət Universitetinin mexanika-riyaziyyat fakültəsinə daxil olmuşdur. 1973-cü ildə oranı bitirmiş, 1978-ci ildə "Dirak sistem tənlikləri üçün səpilmənin tərs məsələsi" mövzusunda namizədlik dissertasiyası müdafiə etmişdir. 1998-ci ildə "Adi differensial tənliklər üçün Yost həllərinin göstərilişi və tərs məsələlər" mövzusunda doktorluq dissertasiyası müdafiə etmişdir. 50-dən çox elmi məqaləsi çap olunmuşdur. Bakı Dövlət Universitetinin tətbiqi riyaziyyat kafedrasının professorudur. Şredinger və Dirak tənlikləri üçün spektral analizin və səpilmə nəzəriyyəsinin tərs məsələləri sahəsində uzun müddət açıq qalmış, bə’zi mühüm məsələləri həll etmişdir. Onun rəhbərliyi altında 5 nəfər namizədlik dissertasiyası müdafiə etmişdir. Elmi əsərləri tanınmış elmi jurnallarda çap olunmuşdur.

10-dan çox beynəlxalq, keçmiş İttifaq və respublika konfranslarının iştirakçısı olmuşdur.

Hidayət Hüseynov bu müddət ərzində bir neçə metodiki göstəriş və dərs vəsaiti çap etdirmişdir.

XƏMMƏD GÖZƏLOV

Xəmməd Bayram oğlu Gözəlov 1937-ci ildə Borçalı mahalının Qarayazı nümayəndəliyinin Birlik kəndində kolxozçu ailəsində anadan olmuşdur.

O, 1945-ci ildə orta məktəbin birinci sinfinə getmiş, 1956-cı ildə orta məktəbi bitirmişdir. 1956-cı ildə Azərbaycan Dövlət Universitetinin fizika fakültəsinə daxil olmuş, təhsilini 1957-ci ildə Leninqrad Dövlət Universitetində davam etdirmişdir. 1962-ci ildə Xəmməd Gözəlov həmin universiteti bitirmiş, və Azərbaycan Elmlər Akademiyasının Fizika İnstitutunda elmi fəaliyyətə başlamışdır. Bir müddət burada çalışdıqdan sonra 1963-cü ildə keçmiş SSRİ Elmlər Akademiyasının Fizika İnstitutunda Nobel mükafatı laureatı, akademik A.M. Proxorovun yanında kurs keçmiş, 1964-cü ildə professor L.S. Kompaneesin Nəzəri və Riyazi Fizika üzrə aspirantı olmuşdur. 1968-ci ildə fizika riyaziyyat elmləri namizədi elmi dərəcəsi almışdır. Həmin ildən İ.V. Kurçatov adına Atom Enerjisi İnstitutunun aparıcı rəhbərlərindən biri olan akademik V.A. Leqasovun bilavasitə rəhbərliyi altında "Hidrogen enerjisinin bərk cisimlərə radiasiya tə’siri problemləri" üzərində çalışaraq 1981-ci ildə elmlər doktoru elmi dərəcəsinə layiq görülmüşdür.

Bu müddətdən e’tibarən fizika-riyaziyyat elmləri doktoru Xəmməd Gözəlov Azərbaycan Elmlər Akademiyasında Kimyəvi-fizika laboratoriyasının təşkilatçısı və rəhbəri kimi fəaliyyət göstərmişdir. Bu illər ərzində 18 elmlər namizədi və üç elmlər doktoru yetişdirmişdir.

Xəmməd Gözəlovun bu günə qədər 250 elmi əsəri, o cümlədən 35 müəlliflik şəhadətnaməsi işıq üzü görmüşdür, üç fundamental elmi kitabın müəllifidir. O, 1983-cü ildə SSRİ-nin əməkdar ixtiraçısı adına layiq görülmüşdür. Onun elmi əsərləri Amerika, İngiltərə və Almaniyanın jurnallarında, SSRİ-nin isə mərkəzi və mö’təbər jurnallarında çap olunmuşdur. İxtiralarından üçü keçmiş SSRİ xalq təsərrüfatında, o cümlədən Azərbaycanda çox geniş tətbiq olunmuşdur.

Kamil Şamil oğlu Qəhrəmanov 1937-ci ildə Qarayazı (indiki Qardabani) rayonunun Soğanlıq kəndində anadan olmuşdur. 1956-cı ildə Marneuli rayonunda rus orta məktəbini bitirmiş və Bakı Dövlət Universitetinin fizika fakültəsinə daxil olmuşdur. 1962-ci ildə həmin fakültəni bitirmiş və Tbilisi Elektroqaynaq zavodunda işə düzəlmişdir. 1962-ci ilin dekabrında yenidən Bakıya qayıtmış və Elmlər Akademiyasının Fizika institutunda əmək fəaliyyətinə başlamışdır. 1963-1964-cü illərdə Leninqrad Yarımkeçiricilər institutuna e’zam olunaraq elmi işlərini orada davam etdirmişdir.

1969-cu ildə namizədlik, 1983-cü ildə doktorluq dissertasiyasını müdafiə etmişdir. 1985-ci ildən professordur. 1963-cü ildən 1968-ci ilə kimi elmi işçi, 1968-1977-ci illərdə laboratoriya müdiri, 1977-1992-ci illərdə "Tellur" xüsusi konstruktor bürosunun müdiri vəzifəsini icra etmişdir. 1992-ci ildən indiyə kimi "Selen" ETB baş direktorunun elmi işlər üzrə müavini işləyir. Kamil Qəhrəmanov 150-yə yaxın elmi əsərin müəllifidir. O, dəfələrlə Beynəlxalq, ümumittifaq və respublika elmi simpoziumlarında, konfrans və elmi müşavirələrdə çıxışlar etmiş, fundamental problemlər haqqında materiallar çap etdirmişdir.

Kamil Qəhrəmanov sırf elmi problemlərlə yanaşı, elmi-kütləvi kitablar da çap etdirmişdir.

Kamil Qəhrəmanov hazırda ETB-nin baş direktorunun müavini, mərkəzin böyük şurasının və elmi müdafiə şurasının üzvüdür.

KAMİL ŞƏRİFOV

Kamil Əli oğlu Şərifov 1919-cu il noyabrın 12-də Qarayazıda yoxsul kəndli ailəsində anadan olmuşdur. İbtidai təhsilini Qarayazı məktəbində aldıqdan sonra 1937-ci ildə Tbilisi Azərbaycan Pedaqoji Məktəbində oxumuş və həmin məktəbi fərqlənmə diplomu ilə bitirmişdir. Bir neçə il doğma Qarayazı bölgəsinin Kosalı kəndində müəllimlik etmiş, 1939-cu ildə isə Azərbaycan Dövlət Universitetinin (indiki BDU) kimya fakültəsinə daxil olmuşdur. Lakin Böyük Vətən müharibəsi başqaları kimi onu da təhsildən uzaqlaşdırmış, o, müharibəyə getmişdir. Müharibədən qayıtdıqdan sonra Qarayazıda bir il rus məktəbində kimya fənnindən dərs demişdir.

Kamil Şərifov yenidən Bakıya qayıtmış, yarımçıq qalmış təhsilini davam etdirmişdir. 1947-ci ildə universitetin rektorluğu qabaqcıl tələbə kimi onu M.V. Lomonosov adına Moskva Dövlət Universitetinin kimya fakültəsində təhsilini davam etdirməyə göndərmişdir. O, 1949-cu ildə Moskva Dövlət Universitetinin kimya fakültəsini fərqlənmə diplomu ilə başa vurmuşdur. Kamil Şərifov Moskvada aspiranturanı bitirmiş, namizədlik dissertasiyası müdafiə etmişidr.

1955-ci ildə SSRİ Ali Attestasiya Komissiyası ona baş elmi işçi diplomu təqdim etmişdir.

1958-1970-ci illərdə Kamil Şərifov Azərbaycan Respublikası EA Fizika İnstitutunda yarımkeçiricilər kimyası laboratoriyasına rəhbərlik etmişdir.

1969-cu ildə Kamil Şərifov "Yarımkeçiricilərin termodinamik xassələri ilə qadağan olunmuş zonanın eni arasında qarşılıqlı əlaqə" mövzusunda doktorluq dissertasiyası müdafiə etmişdir. Həmin ildən professordur.

Kamil Şərifov elmdə birtipli maddələrin entiropiyasını hesablamaq üçün düstur təklif etmişdir ki, bu da hesabatlar metodunun inkişafı üçün mühüm töhfədir. Onun elmi və pedaqoji fəaliyyəti 100-dən çox elmi məqalədə və 10 müəlliflik şəhadətnaməsində öz əksini tapmışdır. Kimyanın tədrisi metodikasına dair kitabçaları və proqramları çap olunmuşdur.

Kamil Şərifov beynəlxalq və keçmiş SSRİ məkanında 20-yə yaxın elmi simpozium və konfranslarda çıxış etmiş və irihəcmli materiallar dərc etdirmişdir.

MƏHƏD SOFİYEV

Məhəd Mahmud oğlu Sofiyev 1932-ci ildə Qarayazının Qaracalar kəndində anadan olmuşdur.

1948-ci ildə Qarayazının Qaracalar kəndində 8 illik orta məktəbi bitirmişdir. Həmin ilin sentyabrında Marneuli Pedaqoji məktəbinə daxil olmuşdur.

1952-1957-ci illərdə Azərbaycan Dövlət Universitetinin (indiki BDU-nun) tarix fakültəsi nəzdində olan Yaxın Şərq tarixi şö’bəsində təhsil almışdır.

1961-1963-cü illərdə BDU-nun aspirantı olmuşdur.

1965-ci ildə BDU-nun Müdafiə Şurasında "1918-1923-cü illərdə Türkiyədə milli-azadlıq hərəkatı" mövzusunda namizədlik dissertasiyası müdafiə etmişdir.

1986-cı ildə BDU-da "SSRİ-Türkiyə əlaqələrində Zaqafqaziya respublikalarının iştirakı (1922-1936-cı illər)" mövzusunda doktorluq dissertasiyası müdafiə etmişdir.

1968-ci ildə dosent vəzifəsinə snçilmişdir.

1987-ci ildən tarix elmləri doktoru, professor, 1991-ci ildən Asiya və Afrika ölkələri tarixi kafedrasının müdiridir.

Bir neçə tarix elmləri namizədi hazırlamışdır. Əsasən Türkiyə tarixinin problemləri ilə məşğul olur. Türkiyə-Azərbaycan əlaqələrinin keçmiş və bu günkü durumu ilə bağlı məsələləri araşdırır. 1981-ci ildə İstanbulda YUNESKO xətti ilə keçirilən M.K. Atatürkün anadan olmasının 100 illiyinə həsr edilmiş beynəlxalq elmi konfransda mə’ruzə etmişdir.

1997-ci ildə Bakıda "Azərbaycan və qonşu ölkələr: XX əsrin əvvələrində ictimai-siyasi fikir və ideoloji reallıqlar" mövzusunda keçirilən beynəlxalq elmi konfransda mə’ruzə etmşdir.

1998-ci il dekabrın 10-12-də Ankarada Türkiyə Respublikasının 75-ci ildönümünə həsr olunmuş beynəlxalq elmi konfransda mə’ruzə etmişdir.

Bunlardan başqa Moskva və Tbilisidə təşkil olunmuş bir sıra elmi konfranslarda da mə’ruzə ilə çıxış etmişdir.

Məhəd Sofiyevin elmi və pedaqoji fəaliyyəti, 3 kitabda, 35-dən artıq məqalədə və bir neçə proqramda öz əksini tapmışdır.

NAMİQ MEHDİYEV

Namiq Murad oğlu Mehdiyev 1956-cı il avqustun 27-də Qarayazı (indiki Qardabani) rayonunun Qaracalar kəndində anadan olmuşdur.

1964-1974-cü illərdə Qaracalar kənd orta məktəbində təhsil almışdır.

1974-1980-ci illərdə Kuybışev şəhərində Tibb İnstitutunun Müalicə fakültəsində oxumuşdur. 1987-1989-cu illərdə Başqırdıstan Tibb institutunun 2 saylı cərrahiyyə kafedrasında 2 illik ordinaturada təhsilini davam etdirmişdir. 1991-ci ildə namizədlik dissertasiyası müdafiə etmişdir. 1995-ci ildən Başqırdıstanda işləmişdir. 1996-cı ildə AO "Kauçuk" Tibbi sanitariya hissəsinin bazası əsasında Başqırdıstan Tibb Universitetinin cərrahiyyə kafedrasının filialı təşkil edilmişdir və Namiq Mehdiyev həmin gündən kafedranın asisstenti, 2000-ci ildən isə dosenti vəzifəsində çalışır. Namiq Mehdiyev pedaqoji fəaliyyətlə yanaşı həm də elmi işini davam etdirir. 1999-cu ildə o, doktorluq dissertasiyası müdafiə etmişdir. Namiq Mehdiyevin elmi və pedaqoji fəaliyyəti 7 kəşf, 23 təklif, 65 elmi əsər və 1 mə’lumat kitabçasında öz əksini tapmışdır.

1997-ci ildən şəhərin baş cərrahı, eyni zamanda Başqırdıstan respublikasının Cərrahlar Asossiyasiyasının üzvüdür.

RZA MAHMUDOV

Rza Nadir oğlu Mahmudov 1952-ci il yanvar ayının 23-də Qardabani rayonunun Kosalı kəndində anadan olmuşdur. 1968-ci ildə Kosalı kənd orta məktəbini bitirmiş, 1970-ci ildə Azərbaycan Dövlət Universitetinin Coğrafiya fakültəsinə daxil olmuşdur. 1975-ci ildə Universiteti fərqlənmə diplomu ilə bitirmiş və Zaqafqaziya Elmi-Tədqiqat Hidrometeorologiya institutunun Bakı Bölməsinə tə’yinatla işə göndərilmişdir.

İşlədiyi müddətdə texnikdən, laboratoriya müdiri vəzifəsinə qədər yüksəlmişdir. 1983-cü ildə namizədlik, 1997-ci ildə doktorluq dissertasiyası müdafiə etmişdir. Əsas işləri təhlükəli hidrometeoroloji hadisələrin tədqiqinə, müasir iqlim dəyişmələrinə və onun hidrometeoroloji ünsürlərə göstərdiyi tə’sirin tədqiqinə həsr olunmuşdur.

Rza Mahmudov uzun müddət respublika televiziyasında "İdrak", "Amal", "İşıq", "Elm və həyat" kimi elmi-kütləvi verilişlər aparmışdır. O, 1990-cı ildən müsabiqə yolu ilə BDU-nun Hidrometeorologiya kafedrasının dosenti vəzifəsinə keçmiş, hazırda isə həmin kafedranın professorudur. O, Azərbaycan Dövlət Hidrometeorologiya institutunun direktoru, komitənin Elmi Metodiki Şurasının sədri, "Hidrometeorologiya və ətraf mühitin monitorinqi" jurnalının baş redaktorunun müavini, Respublikanın fövqaladə hallar komissiyasının Ekspertlər Şurasının üzvü və bir sıra müdafiə şuralarının və elmi-populyar jurnalların redaksiya heyətinin üzvüdür. 75-ə qədər elmi əsərin, bir dərslik və bir monoqrafiyanın müəllifidir. Hidrometeorologiyanın müxtəlif sahələrinə həsr olunmuş respublika və beynəlxalq əhəmiyyətli konfranslarda iştirak etmiş, "Böyük İpək Yolunun hidrometeoroloji təhlükəsizliyinin tə’minatı" bukletini hazırlamışdır.

SABİR ƏLİYEV

Sabir Xəlil oğlu Əliyev 1935-ci ildə Qarayazı (Qardabani) rayonunun Qaracalar kəndində anadan olmuşdur. 1944-1952-ci illərdə Qaracalar səkkizillik məktəbində, 1952-1955-ci illərdə Qardabani Azərbaycan orta məktəbində oxumuşdur. 1955-ci ildən 1960-cı ilədək ADU-nun (indiki BDU-nun) filologiya fakültəsinin Azərbaycan dili və ədəbiyyatı şö’bəsində təhsil almışdır.

1960-cı ilin sentyabr ayından 1967-ci ilin dekabr ayına kimi Azərbaycan SSR Elmlər Akademiyasının Nizami adına Ədəbiyyat və Dil institutunda əvvəlcə kiçik elmi işçi, sonra aspirant olmuş, 1966-cı ildə akademik H. Araslının rəhbərliyi altında "Klassik Azərbaycan şe’rinin şəkilləri" mövzusunda namizədlik dissertasiyası müdafiə etmişdir.

1967-ci ilin dekabrından indiyə kimi H. Zərdabi adına Gəncə Dövlət Pedaqoji institutunun Azərbaycan ədəbiyyatı kafedrasında işləyir. 1990-cı ildə filologiya elmləri üzrə doktorluq işini müdafiə etmiş, 1993-cü ildən kafedranın professorudur. 1994-cü ildə Sabir Əliyevə birinci dərəcəli Beynəlxalq Füzuli mükafatı verilmişdir.

Sabir Əliyev institut müdafiə şurasının və böyük şuranın üzvüdür. 50-yə qədər məqalənin və bir neçə metodiki göstərişin, 4 iri həcmli kitabın müəllifidir.

ŞƏRİF ƏFƏNDİYEV

Şərif Mürsəl oğlu Əfəndiyev 1940-cı il oktyabrın 25-də Qarayazı bölgəsinin Qaratəpə qəsəbəsində müəllim ailəsində anadan olmuşdur.

1959-cu ildə Qardabani rus orta məktəbini bitirmiş, Azərbaycan Dövlət Universitetinin (BDU) fizika fakültəsinə daxil olmuş və həmin fakültəni 1964-cü ildə müvəffəqiyyətlə bitirmişdir. Tə’yinatla BDU-nun fizika fakültəsində laborant vəzifəsində saxlanmışdır. 1965-ci ildə A.F. İoffe adına Leninqrad Fizika-Texnika İnstitutunun aspiranturasına qəbul olunmuşdur.

Aspiranturanı bitirdikdən sonra BDU-nun elmi-tədqiqat sektorunda kiçik elmi işçi vəzifəsində işləmişdir. 1970-ci ildə Kişinyov Dövlət Universitetində (Moldaviya) "Amorf yarımkeçiricilərdə elektroudulma hadisəsi" mövzusunda namizədlik dissertasiyası müdafiə etmişdir.

1970-ci ildən BDU-nun yarımkeçiricilər fizikası Elmi-Tədqiqat Problem laboratoriyasında (ETPL) kiçik elmi işçi, 1971-ci ildən isə həmin laboratoriyada baş elmi işçi, 1981-ci ildən 1987-ci ilədək şö’bə müdiri, 1987-1989-cu illərdə isə həmin laboratoriyada aparıcı elmi işçi vəzifəsində çalışmışdır.

1989-cu ildən Azərbaycan Texniki Universitetinin fizika kafedrasında dosent, 1993-cü ildən isə həmin kafedrada professor vəzifəsində çalışır.

1992-ci ildə Bakı Dövlət Universitetinin İxtisaslaşdırılmış Elmi Şurasında "Keçid metalların oksid birləşmələri əsasında geniş zolaqlı kristalların elektron və rəqs hallarının spektroskopiyası" mövzusunda doktorluq dissertasiyası müdafiə etmişdir.

1973-1974 və 1984-1985-ci illərdə İtaliyada (Roma Universiteti, Roma şəhərində, İtaliya Nüvə Mərkəzi, Fraskati şəhərində) elmi ezamiyyətdə olmuşdur.

Xarici və ölkə elmi jurnallarında çap olunmuş 150-dən çox elmi məqalənin müəllifidir. Bir çox Beynəlxalq, Ümumittifaq və Respublika elmi konfranslarının iştirakçısıdır.

1988-ci ildə "Halkoqenid və oksid yarımkeçiricilərin elektron rəqs hallarının spektroskopiyası. Elektrik və deformasiya sahələrinin tə’siri" işlər silsiləsi üçün Elm və Texnika üzrə Azərbaycan Respublikasının Dövlət mükafatına layiq görülmüşdür.

1993-cü ildə Beynəlxalq Soros Qrantını almışdır.

1995-ci ildə Nyu-York Akademiyasının həqiqi üzvü seçilmişdir.

1999-cu ildən Lütfi-zadə adına Beynəlxalq Müasir Elmlər Akademiyasının həqiqi üzvüdür.

7 aspirant yetişdirmiş, 3 doktorluq dissertasiyalarının məsləhətçisi olmuşdur.

VƏLİ MUSAYEV

Vəli Mustafa oğlu Musayev 1941-ci ildə Qarayazının (indiki Qardabani) Ağtəhlə kəndində anadan olmuşdur. Orta məktəbi 1958-ci ildə gümüş medalla bitirmiş və həmin il Azərbaycan Dövlət Universitetinin mexanika-riyaziyyat fakültəsinə qəbul olunmuşdur. 1963-cü ildə bu fakültəni müvəffəqiyyətlə başa vurub elmi şuranın qərarı ilə universitetin nəzdində aspiranturaya daxil olmuş və 1967-ci ildə aspiranturanı müvəffəqiyyətlə bitirərək namizədlik dissertasiyası müdafiə etmişdir.

Vəli Musayev 1967-ci ildən Azərbaycan Dövlət Pedaqoji İnstitutunda (indiki ADPU-da) əvvəlcə müəllim, dosent olmuş, professor vəzifəsinə qədər yüksəlmişdir.

1995-ci ildə Kiyev şəhərində doktorluq dissertasiyası müdafiə etmiş, fizika-riyaziyyat elmləri doktoru elmi dərəcəsi almışdır. 60 elmi məqalənin, 2 monoqrafiya, 5 tədris vəsaiti, 3 metodiki göstərişin müəllifidir. Hazırda Pedaqoji Universitetdə hesablama riyaziyyatı və ehtimal nəzəriyyəsi kafedrasının müdiri vəzifəsində çalışır. İndiyədək beynəlxalq və respublika səviyyəli 20 konfransda iştirak edib məqalələr çap etdirmişdir.

VÜQAR VÜQARLI (ƏLİYEV)

Vüqar Əmir oğlu Vüqarlı (Əliyev) 1955-ci il avqust ayının 28-də Qardabani rayonunun Soğanlıq kəndində anadan olmuşdur.

1971-ci ildə Soğanlıq kənd orta məktəbini ə’la qiymətlərlə bitirmiş, Azərbaycan Dövlət Universitetinin fizika fakültəsinə daxil olmuşdur.

1976-cı ildə universitetin Elmi Şurasının qərarı ilə Azərbaycan Elmlər Akademiyasının aspiranturasına göndərilmişdir. Erkən elmi fəaliyyətə başlayan Vüqar Vüqarlının ilk elmi əsəri tələbəlik illərində işıq üzü görmüşdür.

Aspirant olduğu illərdə Bakı, Moskva, Leninqrad və Kiyev şəhərlərindəki elmi mərkəzlərdə tədqiqatlar aparmış və dissertasiya müdafiə edərək fizika-riyaziyyat elmləri namizədi elmi dərəcəsi almışdır (1983). Namizədlik dissertasiyasında aldığı mühüm nəticələr SSRİ Kosmonavtika Federasiyasının Fəxri Fərmanı ilə təltif olunmuşdur (1983). Bundan sonra elmi tədqiqat işlərini davam etdirməklə bərabər ali məktəblərdə pedaqoji fəaliyyət də göstərmişdir.

Vüqar Vüqarlı 1991-1995-ci illərdə Belorusiya Elmlər Akademiyasının Bərk cisimlər və yarımkeçiricilər fizikası institutunda doktorantura hazırlığı keçdikdən sonra dissertasiya işini müdafiə edərək, fizika-riyaziyyat elmləri doktoru elmi dərəcəsi almışdır (1998).

Hazırda Vüqar Vüqarlı dünyanın 15 ölkəsində çap olunmuş 110 elmi əsərin müəllifidir. Amerika Fizika Cəmiyyətinin və Nyu-York Elmlər Akademiyasının həqiqi üzvü seçilmiş Vüqar Vüqarlı öz ixtiralarına görə SSRİ İxtiralar və Kəşflər Komitəsinin 4 şəhadətnaməsini almışdır.

Vüqar Vüqarlı Azərbaycan Yazıçılar Birliyinin üzvüdür, böyük gürcü şairi Şota Nişnianidzenin şe’rlərini, Revaz Mişveladzenin novellalarını Azərbaycan dilinə çevirmiş və kitab şəklində nəşr etdirmişdir.

İ. Məmmədovun psixologiyaya dair monoqrafiyasını isə Azərbaycan dilindən gürcü dilinə çevirmişdir.

Vüqar Vüqarlının 10-dan çox elmi, elmi-populyar kitabları çapdan çıxmışdır.

Vüqar Vüqarlı Azərbaycan Jurnalistlər Birliyinin üzvüdür.

Vüqar Vüqarlının filologiya sahəsində tədqiqatları xüsusi maraq doğurur. O, aşıq poeziyasında işıq, od, səma cisimləri obrazlarını tədqiq etmiş, "Aşıq poeziyasında çıraq obrazı" fundamental monoqrafiyasını və "Günəş, od, ocaq, məş’əl, şam, çıraq" folklor toplusunu nəşr etdirmişdir.

Vüqar Vüqarlının "Soğanlıq kənd şivəsinin lüğəti" kitabı türkoloq alimlərin böyük marağına səbəb olmuşdur.

Vüqar Vüqarlı nankorluğun psixologiyası sahəsində apardığı maraqlı tədqiqatlarına görə, görkəmli alim, professor Bivarın təqdimatı ilə Böyük Britaniya və İrlandiya Asiya Kral Cəmiyyətinin üzvü seçilmişdir.

Vüqar Vüqarlının bioqrafiyası İngiltərədə nəşr olunan "Beynəlxalq intelektuallar: Kim kimdir?" ensiklopediyasının 13-cü nəşrinə daxil edilmiş və çoxşaxəli elmi fəaliyyətinə görə Beynəlxalq Bioqrafiya Mərkəzinin Qızıl Medalı ilə təltif olunmuşdur (1998).

Xalqımızın taleyinə qaçqınlıq düşdüyü vaxtdan əsl vətənpərvər kimi Vüqar Vüqarlı xeyriyyəçilik fəaliyyətinə başlamış, qaçqın uşaq bağçalarına, qaçqın uşaqların təhsil aldığı məktəblərə, həmçinin bir sıra mətbuat orqanlarına və kitab nəşrinə mütamadi olaraq xeyriyyə köməyi göstərir.

Təsadüfi deyildir ki, BMT-nin Qaçqınların İşləri Üzrə Ali Komissarlığının rəhbərliyi Vüqar Vüqarlıya xüsusi minnətdarlıq məktubu göndərmişdir. Onun xeyriyyəçilik fəaliyyəti qədirbilən xalqımız tərəfindən yüksək qiymətləndirilmiş və H.Z. Tağıyev adına Fəxri mükafata layiq görülmüşdür (1997).

Vüqar Vüqarlı ölkəmizi beynəlxalq elmi məclislərdə ləyaqətlə təmsil edir. O, Beynəlxalq Ekoenergetika Akademiyasının və Gürcüstanın Milli Akademiyasının akademikidir. Vüqar Vüqarlı Y.Məmmədəliyev adına Fəxri mükafata və Medala layiq görülmüşdür (1998). 2000-ci ildə bədii tərcümə sahəsində "Humay" mükafatının laureatıdır.

Hazırda Vüqar Vüqarlı Azərbaycan EA-nın Fizika İnstitutunda "İnformasiya və beynəlxalq əlaqələr" şö’bəsinin müdiri, Bakı Dövlət Universitetinin "Ətraf mühiti mühafizə və təbii sərvətlərdən səmərəli istifadə" kafedrasının müəllimidir.

ZİYƏDDİN SADIQOV

Ziyəddin Əjdər oğlu Sadıqov 1934-cü il dekabrın 22-də Qarayazının Qaratəhlə kəndində qulluqçu ailəsində anadan olmuşdur. 1941-ci ildə Qaratəhlə kənd orta məktəbinin birinci sinfinə daxil olmuş, 1954-cü ildə oranı qızıl medalla bitirmişdir. Həmin il Azərbaycan Dövlət Universitetinin (indiki BDU) kimya fakültəsinə daxil olmuş, 1959-cu ildə oranı Fərqlənmə diplomu ilə başa vurmuşdur. Fakültə elmi şurasının qərarı ilə aspiranturada saxlanılmışdır. 1959-1962-ci illərdə BDU-nun kimya fakültəsinin aspiranturasında oxumuşdur. Aspiranturanı bitirdikdən sonra BDU-nun üzvi kimya kafedrasında assistent, baş müəllim vəzifələrində işləmişdir. 1965-ci ildən "Yüksək molekullu birləşmələr kimyası" kafedrasının dosenti olmuş, 1965-1983-cü illərdə isə həmin kafedraya rəhbərlik etmişdir.

1963-cü ildə namizədlik, 1980-cı ildə isə Moskva şəhərində doktorluq dissertasiyasını müdafiə etmişdir.

Ziyəddin Sadıqovun elmi-tədqiqat işləri əsasən stirol və onun bə’zi törəmələrinin izobutilen ilə birgə sopolimerləşmə reaksiyasına, alınmış məhsulların özlülük aşqarı kimi tədqiqinə və alınmış sopolimerlərin destruksiyasının qanunauyğunluqlarına həsr edilmişdir. Onun elmi-pedaqoji fəaliyyəti 60 məqalədə, o cümlədən 3 müəlliflik şəhadətnaməsində əks olunmuşdur. Onun rəhbərliyi ilə 6 elmlər namizədi hazırlanmışdır.

O dəfərlərlə beynəlxalq və ümumittifaq elmi konfrans və simpoziumlarında iştirak etmişdir.

Ziyəddin Sadıqov kimya fakültəsinin ictimai həyatında fəal iştirak etmiş, fakültə partiya bürosunun katibi, BDU-nun "Elmi əsərləri" kimya seriyasının mə’sul katibi və redaktor müavini olmuşdur.

Onun əməyi "Əməkdə fərqlənməyə görə" medalı, "Ə’laçı ali məktəb işçisi" fəxri döş nişanı, Elmi biliklərin təbliği və yayılması sahəsindəki səmərəli fəaliyyətinə görə Respublika "Bilik" cəmiyyətinin Fəxri Fərmanı ilə təltif edilmişdir.

Ziyəddin Sadıqov 1983-cü il yanvarın 9-da vəfat etmişdir.