ELMLƏR NAMİZƏDLƏRİ

[A] [B-E] [Ə-G] [H-X] [İ-Q] [M-N] [R-S] [S-Ş] [T-V] [V-Z]

Salman Əsgər oğlu Culfayev 1933-cü il mayın 9-da Borçalının Əzizkənd kəndində anadan olmuşdur. 1952-ci ildə orta məktəbi bitirmiş, 1953-cü ildə Azərbaycan Kənd Təsərrüfatı İnstitutunun (indiki Dövlət Kənd Təsərrüfatı Akademiyası) baytarlıq fakültəsinə daxil olmuşdur. 1958-ci ildə həmin fakültəni müvəffəqiyyətlə bitirib və institutun baytarlıq fakültəsinin epizootologiya kafedrasında ordinator vəzifəsində saxlanılmışdır. 1961-ci ildə aspiranturanı bitirib, namizədlik dissertasiyası müdafiə etmişdir. 1968-ci ildən dosentdir. 1965-ci ildən doktorluq dissertasiyası üzrərində işləmişdir. Hazırda epizootologiya kafedrasında dosent işləyir. İndiyə qədər 80-dən çox elmi məqalə, kitab, kitabça, təlimat və s. çap etdirmişdir.

SƏ’Dİ İSMAYILOV

Sə’di Binnət oğlu İsmayılov 1956-cı ildə Borçalının Əzizkənd kəndində fəhlə ailəsində anadan olmuşdur.

1963-cü ildə Əzizkənd kənd orta məktəbinin 1-ci sinfinə daxil olmuş və 1973-cü ildə həmin məktəbi bitirmişdir.

1974-cü ildə Gəncə şəhrində Azərbaycan Kənd Təsrrüfatı İnstitutunun kənd təsərrüfatının mexanikləşdirilməsi fakültəsinə daxil olmuş və həmin institutu 1979-cu ildə fərqlənmə diplomu ilə bitirmişdir.

1979-cu ilin dekabr ayında tə’yinat üzrə Azərbaycan Elmi-Tədqiqat Tərəvəzçilik İnstitutuna (AzETTİ) işə göndərilmişdir.

1979-cu ilin dekabrından 1986-cı ilin fevralınadək həmin institutda elmi işçi vəzifəsində çalışmışdır.

1980-ci ildə qiyabi aspiranturaya daxil olmuş və Moskva şəhərində Ümumittifaq Elmi-Tədqiqat Kənd Təsərrüfatı Maşınqayırma İnstitutuna (VİSXOM) e’zam edilmişdir.

Həmin institutda "Azərbaycan SSR-in subtropik zonasında faraş ağbaş kələmyığan maşının və yığım texnologiyasının əsaslandırılması" mövzusu üzrə elmi-tədqiqat işi aparmışdır. O, 1983-cü ildə elmi-tədqiqat işini vaxtından əvvəl yerinə yetirmiş və xüsusi mükafata layiq görülmüşdür. 1984-cü ildə elmi-tədqiqat işini müvəffəqiyyətlə müdafiə etmiş və texnika elmləri namizədi elmi dərəcəsi almışdır.

1986-1987-ci illərdə Azərbaycan Dövlət Aqrar-Sənaye Komitəsinin baş elmi idarəsində baş mühəndis-iqtisadçı vəzifəsində çalışmışdır.

1987-ci ilin fevralından hal-hazıradək Gəncə şəhərində yerləşən Azərbaycan Dövlət Kənd Təsərrüfatı Akademiyasının maşın hissələri kafedrasında dosent kimi fəaliyyət göstərir.

1988-ci ildən "Azərbaycan Respublikasında qarpız toxumunun tullantısız texnologiya ilə istehsalı üçün mexanikləşdirmə vasitələrinin və maşınlar sisteminin işlənib hazırlanması" mövzusunda doktorluq dissertasiyası üzərində çalışır.

O, 70 elmi əsərin, o cümlədən 25-ədək ixtiranın, patentin, dərslik və dərs vəsaitinin müəllifidir.

Sə’di İsmayılov 15-ə qədər beynəlxalq və respublika səviyyəli konfranslarda iştirak edib məqalələr çap etdirmişdir.

SEYRAN BABAYEV

Seyran Xoca oğlu Babayev 1942-ci il iyul ayının 2-də Borçalının Ağqula kəndində anadan olmuşdur. Orta məktəbi Sadaxlı kəndində bitirmişdir. 1959-cu ildə Azərbaycan Dövlət Pedaqoji İnstitutunun (indiki Azərbaycan Dövlət Pedaqoji Universiteti) fizika-riyaziyyat fakültəsinə daxil olmuşdur. 1964-cü ildə təhsilini başa vurub bir müddət Xaçmaz rayonunun Xudat şəhər məktəbində ixtisası üzrə müəllim işləmişdir. 1970-ci ildə Azərbaycan EA-nın Fizika İnstitutunun aspiranturasına qəbul olmuşdur. 1975-ci ildə "Yarımkeçiricilər və dispektriklər" sahəsində namizədlik dissertasiyasını müdafiə edib elmi dərəcə almışdır. Bir müddət akademiyanın fizika institutunda işləmiş, sonra Neft və Kimya institutunun (indiki ADNA) Sumqayıt filialında dərs demiş, daha sonra isə "AZON" zavodunda laboratoriya rəisi işləmişdir. Bakı, Moskva, Leninqrad, Kiyev və keçmiş SSRİ-nin digər aparıcı elm mərkəzlərində 40-dan artıq elmi məqaləsi dərc olunmuşdur.

Seyran Babayev 1991-ci ildə vəfat etmişdir.

SEYFƏDDİN TAĞIYEV

Seyfəddin Rəhim oğlu Tağıyev 1953-cü il martın 15-də Borçalının Əzizkənd kəndində anadan olmuşdur. Seyfəddin Tağıyev 1969-cu ildə Əzizkənd orta məktəbini bitirmiş, iki il sovxozda fəhlə işləmişdir. 1971-ci ilin mayından 1973-cü ilin may ayınadək hərbi xidmətdə olmuşdur. Ordudan tərxis olunduqdan sonra yenə həmin sovxozda fəhlə işləmişdir.

1974-cü ildə APİ-nin (indiki ADPU-nun) coğrafiya fakültəsinə daxil olmuş və 1978-ci ildə həmin fakültəni başa vurmuşdur.

1978-1981-ci illərdə tə’yinatla İsmayıllı rayonunun Ağbulaq kəndində coğrafiya müəllimi işləmişdir.

1981-1985-ci illərdə Azərbaycan Respublikası EA-nın Coğrafiya İnstitutunun aspirantı olmuşdur. 1991-ci ildə "Böyük Qafqazın Cənub Şərq hissəsinin Şimal-Şərq yamacının dağ meşə landşaftlarının keyfiyyət cəhətdən qiymətləndirilməsi" mövzusunda namizədlik dissertasiyası müdafiə etmiş və kənd təsərrüfatı elmləri namizədi elmi dərəcəsi almışdır.

1992-ci ildə Dövlət Torpaq Komitəsinə işə cəlb olunmuşdur. Ali məktəb tələbələri üçün "Meşəşünaslıq" adlı dərslik yazmış və onu çapa təqdim etmişdir. "Böyük Qafqazın meşə torpaqlarının keyfiyyət cəhətdən qiymətləndirilməsi" adlı monoqrafiya üzərində işləyir. 30-dan çox elmi əsərin müəllifidir.

Seyfəddin Tağıyev hal-hazırda Dövlət Torpaq Komitəsində torpaqşünas alim kimi fəaliyyət göstərir.

Səyyad Həsən oğlu Vəliyev 1920-ci ildə Borçalı mahalının Qaçağan kəndində anadan almuşdur. 1937-ci ildə Azərbaycan Respublikasının Zaqatala rayonundakı pedaqoji texnikumu bitirdikdən sonra, həmin rayonun Mosul kəndinə müəllim tə’yin edilmişdir. 1941-1945-ci illərdə Böyük Vətən müharibəsində sıravi əsgərdən polkovnik rütbəsinə qədər yüksəlmişdir. İlk döyüşə 1942-ci ilin əvvəlində Krasnodar ölkəsinin Kerç boğazı sahilindəki Teymuruk uğurunda gedən döyüşlərdən başlayan S.Vəliyev, düşmənə qarşı mübarizəni Novorossiyskdə, Rjev, Velikiye Luki şəhərləri uğurunda gedən döyüşlərdə davam etdirmişdir. Müharibə illərində 1-ci və 3-cü Ukrayna cəbhələrində Rumıniya, Bolqarıstan, Macarıstan, Avstriyanın azad olunması uğurunda gedən ağır döyüşlərdə igidlik göstərmişdir. Avstriyanın paytaxtı Vyananın azad olunması uğrunda gedən dörd illik ağır döyüşün iştirakçısı olmuşdur. Vətən uğrunda apardığı uzun döyüş yolunu S.Vəliyev 1945-ci il mayın 9-da Avstriya altında qələbə ilə başa vurmuşdur. Müharibədən sonrakı illərdə S.Vəliyev polk komandiri, Qırmızı Bayraqlı Belarusiya hərbi Dairəsində şö’bə müdiri vəzifələrində çalışmışdır. S.Vəliyev pedaqoji fəaliyyəilə də məşğul olmuş, ömrünün son günlərinə kimi baş müəllim kimi hərbi texnikanın sirlərini Minsk Politexnik İnstitutunda təhsil alan gənclərə həvəslə öyrətmişdir. Cəbhə yollarındakı igidliklərinə görə S. Vəliyev Qırmızı Bayraq, Aleksandr Nevski, dörd II dərəcəli "Vətən müharibəsi", iki Qırmızı Ulduz, "dövlət sentyabr" (Bolqarıstan) ordenləri, 14 medal və Belarusiya SSR Ali Sovetinin Rəyasət hey'ətinin fəxri fərmanı ilə təltif olunmuşdur.

Səyyad Vəliyev 1985-ci ildə 65 yaşında qəflətən vəfat etmişdir.

SÖHBƏT TAĞIYEV

Söhbət İmran oğlu Tağıyev 1950-ci il may ayının 20-də Borçalının Qasımlı kəndində anadan olmuşdur. 1967-ci ildə Qasımlı kənd orta məktəbini bitirmişdir.

1972-ci ildə Azərbaycan Dövlət Universitetinin fizika fakültəsini başa vurmuşdur. 1972-ci ildən 1977-ci ilə qədər Quba rayonunun İslik kənd orta məktəbində ixtisası üzrə müəllim işləmişdir. 1977-ci ildən indiyə qədər Azərbaycan Texniki Universitetinin fizika kafedrasında (laborant, baş laborant və baş müəlim vəzifəsində) işləmişdir.

1988-ci ildə fizika kafedrasında aspiranturaya daxil olmuş və 1992-ci ildə aspiranturanı bitirmişdir.

1997-ci ildə "Maleinat və Benzoatların geniş hal parametrlərində istilikkeçirmə və sıxlığı" mövzusunda texnika elmləri namizədi elmi dərəcəsi almaq üçün dissertasiya müdafiə etmişdir.

25 elmi məqalənin müəllifidir. Elmi əsərləri Rusiyanın və Respublikanın nüfuzlu jurnallarında çap olunmuşdur. Söhbət Tağıyev hazırda ADPU-nun fizika-2 kafedrasında baş müəllim kimi fəaliyyət göstərir.

SÖHRAB MURADOV

Söhrab Sədrəddin oğlu Muradov 1948-ci ildə Borçalının Kosalı kəndində müəllim ailəsində anadan olmuşdur. 1965-ci ildə Tbilisi şəhərinin Samqori rayonunda orta məktəbi bitirmiş və həmin il Kuybışev (indiki Samara) Tibb institutuna qəbul olmuşdur. 1971-ci ildə həmin ali məktəbdə təhsilini müvəffəqiyyətlə başa vurduqdan sonra səhiyyə nazirliyinin tə’yinatı ilə Çuvaş Muxtar Vilayətinə işə göndərilmiş və orada cərrah işləmişdir. 1970-1980-ci illərdə Qorki şəhərində ordinatura keçmiş, sonralar Çeboksarı şəhərində xəstəxanada cərrahiyyə şö’bəsinin müdiri vəzifəsində çalışmışdır. Vətəndən uzaqlarda işlədiyi dövrdə Söhrab Muradov birinci dərəcəli cərrah adına layiq görülmüşdür.

1982-ci ildən isə Marneuli şəhər mərkəzi xəstəxanasında çalışır.

Söhrab Muradov 2000-ci ildə Tbilisi Tibb Akademiyasında tibb elmləri namizədi elmi dərəcəsi almaq üçün dissertasiya müdafiə etmişdir. Müdafiə Gürcüstan səhiyyə işçilərinin böyük marağına səbəb olmuşdur. Gürcüstan Tibb Elmləri Akademiyasının professoru, tibb elməlri doktoru B.K.Arçvadze Söhrab Muradovun elmi işini yüksək qiymətləndirərək tibb sahəsində əvəzi olmayan yenilik adlandırmışdır. Söhrab Muradovun elmi və cərrahi fəaliyyəti 10 elmi əsərdə öz əksini tapmışdır.

Söhrab Muradov 15 beynəlxalq və respublika səviyyəli elmi-praktik konfransların iştirakçısı olmuş, elmi materiallar dərc etdirmişdir.

ŞƏMMƏD İBRAHİMOV

Şəmməd İdris oğlu İbrahimov 1933-cü ildə Borçalının Sarvan kəndində (indiki Marneuli şəhərində) kəndli ailəsində anadan olmuşdur. Şəmməd İbrahimov 1950-ci ildə Marneuli orta məktəbini bitirib və həmin ildə ADU-nun (indiki BDU-nun) fizika-riyaziyyat fakültəsinin riyaziyyat bölməsinə daxil olmuşdur. Oranı 1955-ci ildə başa vurub H.B. Zərdabi adına Pedaqoji İnstitutda assistent və sonra isə baş müəllim işləmişdir. Şəmməd İbrahimov 1959-1962-ci illərdə Bakıya qayıdıb ADU-nun Funksiyalar nəzəriyyəsi və funksional analiz kafedrasının əyani aspirantı olmuşdur.

1962-ci ildə həmin kafedranın assistenti vəzifəsində saxlanılmış, 1964-1966-cı illərdə isə baş müəllim olmuşdur. Şəmməd İbrahimov 1966-cı ildə yeni yaradılmış riyazi analiz kafedrasına müəllim keçmiş və bu günə kimi oranın dosentidir. 1964-cü ildə akademik Z.İ. Xəlilovun elmi rəhbərliyi altında "Abstrakt fəzalarda düzxətli metodu" mövzusunda dissertasiya müdafiə edib, riyaziyyat elmləri namizədi elmi dərəcəsinə layiq görülmüşdür. O, 16 elmi məqalənin müəllifidir.

ŞƏMİSTAN BAĞIROV

Şəmistan Namaz oğlu Bağırov 1931-ci il aprel ayının 24-də Borçalının Ağməmmədli kəndində anadan olmuşdur. O, ilk təhsilini Ağməmmədli kəndində aldıqdan sonra 1948-1951-ci illərdə Qaçağan orta məktəbində oxumuş və oranı ə’la qiymətlərlə bitirmişdir.

1951-ci ildə Azərbaycan Politexnik İnstitutuna qəbul olunmuş, 1956-cı ildə isə fərqlənmə diplomu ilə oranı bitirmişdir. 1956-1957-ci illərdə Azərbaycan respublikasının su təsərrüfatı və meliorasiya tikinti obyektində mühəndis kimi əmək fəaliyyətinə başlamışdır. 1958-ci ildən Azərbaycan Politexnik institutunda meliorasiya kafedrasında müəllim işləmiş, 1959-cu ildə isə Azərbaycan EA-nın nəzdində əyani aspiranturaya daxil olmuş və 1962-ci ildə müvəffəqiyyətlə namizədlik dissertasiyası müdafiə etmişdir. 1963-cü ildən bu vaxta qədər Şəmistan Bağırov öz elmi pedaqoji fəaliyyətini baş müəllim və dosent kimi Azərbaycan Politexnik institutu (indiki ATU-nun) "Meliorasiya" kafedrasında, sonralar isə (1976-cı ildən) Azərbaycan İnşaat Mühəndisləri institutunda davam etdirmişdir.

1988-ci ildə SSRİ Nazirlər Soveti nəzdində Dövlət Attestasiya Komissiyası tərəfindən Şəmistan Bığırovun çox illik elmi-pedaqoji fəaliyyəti və ali texniki məktəblər üçün nəşr etdirdiyi çox saylı dərslik, dərs vəsaiti və elmi məqalələrinə görə ona professor adı verilmişdir.

Azərbaycan İnşaat Mühəndisləri Universitetində işlədiyi dövrdə təhsil və xalq təsərrüfatı üçün əhəmiyyəti olan 2 dərslik, 8 dərs vəsaiti və metodik göstrişlər, 80-a yaxın elmi məqalə nəşr etdirmişdir. Bu elmi məqalələrin bə’ziləri xarici ölkələrdə - Avstraliya, Türkiyə, İsraildə nəşr olunmuşdur. O, Universitetin Elmi Şurasının, Su təsərrüfatı tikintisi və ekologiya fakültəsinin Elmi şurasının bir sıra metodik və nəşriyyat şurasının üzvüdür. V.İ. Lenin anadan olmasının 100 illiyi yubiley medalı ilə təltif olunmuşdur.

ŞƏMİSTAN ƏLİYEV

Şəmistan İlyas oğlu Əliyev 1937-ci ildə Borçalının Əzizkənd kəndində anadan olmuşdur. 1952-ci ildə Əzizkənd 8-illik məktəbini bitirmiş, orta təhsilini, Azərbaycanın Qazax şəhərində tamamlamışdır. 1955-ci ildə Azərbaycan Dövlət Xalq Təsərrüfatı İnstitutunun (indiki ADİU-nun) "Sənayenin İqtisadiyyatı" fakültəsinə daxil olmuş, 1959-cu ildə isə Azərbaycan Dövlət Universitetinin eyni adlı fakültəsini başa vurmuşdur. Əmək fəaliyyətinə 1959-cu ildə Marneuli rayonun yerli sənaye kombinatında böyük mühəndis vəzifəsində başlamışdır. 1960-1964-cü illərdə Bakıda mühəndis, baş mühəndis və rəis vəzifələrində işləmişdir. 1964-1966-cı illərdə Azərbaycan Dövlət Universitetinin (indiki BDU-nun) aspirantı olmuşdur. 1966-cı ildə Azərbaycan SSR Yüngül sənaye nazirliyinin əmək, məişət və əmək haqqı şö’bəsinin rəis müavini vəzifəsində işləmişdir. 1966-1967-ci illərdə Azərbaycan Xalq Təsərrüfatı (indiki ADİU-nun) institutunda baş müəllim, 1967-1968-ci illərdə isə dekan müavini işləmişdir. 1967-ci ildə namizədlik dissertasiyası müdafiə edib elmi dərəcə almışdır. 1968-ci ildə "Sənayenin İqtisadiyyatı" fakültəsində dosent vəzifəsinə seçilmişdir. 1974-cü ildən 1978-ci ilə qədər sənaye iqtisadiyyatı fakültəsində dekan vəzifəsində işləmişdir.

Şəmistan Əliyevin elmi və pedaqoji fəaliyyəti 24 elmi məqalədə, monoqrafiyada və elmi hesabatlarda öz əksini tapmışdır.

1990-cı ildə vəfat etmişdir.

ŞƏMİSTAN MƏMMƏDOV

Şəmistan Fərəməz oğlu Məmmədov 1926-cı ildə Borçalının Sarvan kəndində anadan olmuşdur. Sarvan yediillik məktəbinə getmiş, 1944-cü ildə isə tam orta məktəbini bitirmişdir. Şəmistan Məmmədov 1947-ci ildə Kirovabadda (indiki Gəncə şəhərində) Həsənbəy Zərdabi adına Azərbaycan Dövlət Pedaqoji İnstitutuna qəbul olunmuşdur.

1951-ci ildə həmin fakültəni müvəffəqiyyətlə başa vurub Borçalıya qayıtmış, əvvəlcə Sadaxlı orta məktəbinə işə düzəlmiş, sonra isə Marneuli 1 saylı orta məktəbində riyaziyyatdan dərs deməyə başlamışdır.

Şəmistan Məmmədov orta məktəbdə dərs deməklə yanaşı həm də elmi işlə yaxından məşğul olmuşdur. 1963-cü ildə yenidən Bakıya qayıtmış Azərbaycan Pedaqoji İnstitutunda (indiki ADPU-nun) aspiranturaya daxil olmuşdur. 1966-cı ilin noyabrında "Sərhəd funksiyaların mə’nasında daxil olma teoremlərinin dəqiqliyi" mövzusu üzrə namizədlik dissertasiyası müdafiə edib elmi dərəcəsi almışdır. O, 1967-ci ildən 1998-ci ilə kimi riyazi-analiz kafedrasında müəllim, baş müəllim və dosent işləmişdir.

Onun 18 elmi əsəri, bir neçə dərs vəsaiti və metodiki göstərişləri işıq üzü görmüşdür. Onun əsərləri respublikamızda, Moskvada və xarici mətbuatda çap olunmuşdur. O, iyirmi il fakültənin partiya təşkilatının katibi vəzifəsində işləmişdir.

Şəmistan Məmmədov 2000-ci ildən təqaüdə çıxmışdır.

Şərəf Məhəmməd qızı Cəlilli 1971-ci ildə Marneuli rayonunun İmir kəndində anadan olmuşdur. Orta məktəbi doğma kəndlərində bitirmişdir. 1990-cı ildə indiki BDU-nun jurnalistika fakültəsinə daxil olmuşdur. 1994-cü ildə isə jurnalistika fakültəsini bitirmişdir. 1997-ci ildə Azərbaycan Milli Elmlər Akademiyasının Beynəlxalq Münasibələr İnstitutunda aspriranturanı bitirmiş və elmi işçi kimi həmin institutda saxlanmışdır. "Azərbaycan-Türküstan ədəbi əlaqələri" namizədlik dissertasiyası müdafiə üçün Ali Attestasiya Komissiyasına təqdim etmişdir.

Əmək fəaliyyətinə 1989-cu ildə Azərbaycan Dövlət Teleradio Verilişləri Şirkətində başlamışdır. Öncə televiziyanın "Xəbərlər", "Xoş gördük" proqramlarında redaktor, sonralarsa radionun Güney Azərbaycana verilişləri baş redaksiyasında, "Gənclik" redaksiyasında işləmişdir. Uzun müddət "Tələbəlik", "Represiya burulğanı", "Türkün söz yaddaşı", "Elin yaddaşı", "Borçalı" verililərinin aparıcı müəllifi, həm də redaktoru olmuşdur. Özünün ideyası ilə yaradılan bu verilişlərin sırasına 1993-cü ildən "Səhər" informasi proqramı əlavə olunub. "Kitabi Dədə-Qorqud", "Xoca Yunus İmrə", "Bəktaşlik və bəktaşilər", "Xocalıdan ucalan dərd", "Murovda girov dərdim" , "Sənsiz" telefilmlərinin müəllifidir. 1993-1998-ci illərdə müxtəlif fasilələrlə "Ana Vətən" qəzetində redaktor və baş redaktor vəzifələrində çalışmışdır. "Azərbaycan-Türküstan ədəbiyyatından milli azadlıq ideyaları" monoqrafiyasının, "Ömür dedikləri…", "Ömür yolu" elmi-publisistik, "Könül Tanrı dərgahıdır", "Tanrı duaları" şe’r kitablarının müəllifi və adlarını sadalamadığımız bir neçə kitabın redaktoru olmuşdur. Bunlarla yanaşı, müxtəlif ali təhsil ocaqlarında türk xalqların ədəbiyyatından mühazirələr oxuyur. Kütləvi infonrmasiya vasitələrindəki xidmətlərinə, publisistik yazılarına görə, on doqquz mükafata layiq görülüb. Qopub gəldiyini Tanrı, inam yerini BOZ QURD, güman yerini səsini bir də qələmini sayır.

Şərəf Cəlillinin elmi və publisistik fəaliyyəti 5 elmi məqalədə, 100-dən artıq publisistik materiallarda öz əksini tapmışdır.

Hal-hazırda "Xəbərlər" baş redaksiyasında redaktor vəzifəsində elmi və yaradıcılıq fəaliyyətini davam etdirir.