ELMLƏR NAMİZƏDLƏRİ

[A] [B-E] [Ə-G] [H-X] [İ-Q] [M-N] [R-S] [S-Ş] [T-V] [V-Z]

HAMLET MƏMMƏDOV

Hamlet Mehdi oğlu Məmmədov 1939-cu il noyabrın 18-də Borçalının Sarvan qəsəbəsində ziyalı ailəsində anadan olmuşdur. 1946-cı ildə 1saylı Marneuli rus orta məktəbinin 1-ci sinfinə getmiş, 1958-ci ildə həmin məktəbi bitirmişdir. Həmin ildə M.F. Axundov adına rus dili və ədəbiyyatı İnstitutuna daxil olmuş və 1963-cü ildə həmin institutu bitirmişdir. Tə’yinatla Kəlbəcər rayon məktəbinə müəllim göndərilmişdir. Hamlet Məmmədov bir il Kəlbəcərdə işlədikdən sonra Marneuliyə qayıtmış və pedaqoji fəaliyyətlə məşğul olmuşdur. 1965-ci ildə Bakıya qayıtmış və Azərbaycan Tibb İnstitutunun rus dili və ədəbiyyatı kafedrasına müəllim düzəlmişdir. 1966-cı ildən isə Azərbaycan Pedaqoji İnstitutuna işə düzəlmişdir. 1973-cü ildə namizədlik dissertasiyası müdafiə edib filologiya elmləri namizədi elmi dərəcəsi almışdır. 1976-cı ildən indiki ADPU-nun rus dili və ədəbiyyatı kafedrasında asisstent, baş müəllim və dosent kimi fəaliyyət göstərmişdir. 1985-ci ildə həmin kafedranın müdiri vəzifəsinə keçmiş və 10 il bu vəzifədə işləmişdir. Hal-hazırda kafedranın professorudur. Hamlet Məmmədovun elmi və pedaqoji fəaliyyəti 30 elmi əsərdə, 3 dərs vəsaitində, metod göstərişdə və 1 fundamental "Rus dilinin ibtidai siniflərdə tədrisi metodikasına" dair dərslikdə öz əksini tapmışdır.

HƏMİD ABBASOV

Həmid Murtuzəli oğlu Abbasov 1938-ci ildə Borçalının Ağməmmədli kəndində kəndli ailəsində anadan olmuşdur. 1957-ci ildə Qaçağan orta məktəbini gümüş medalla bitirərək, Azərbaycan Neft Kimya İnstitutunun (İndiki Neft Akademiyası) mühəndis-iqtisad fakültəsinə daxil olmuşdur. 1962-ci ildə "Neft və qaz sənayesinin iqtisadiyyatı və təşkili" ixtisasını fərqlənmə diplomu ilə başa vurmuşdur. 1962-ci ildən Neft Akademiyasında işləyir. 1971-ci ildə "Elektrik maşınqayırma müəssisələri rentabelliyinin yüksəldilməsi ehtiyatları" mövzusunda namizədlik dissertasiyası müdafiə edib, iqtisad elmləri namizədi elmi dərəcəsi almışdır.

1976-cı ildən maşınqayırma sənayesinin iqtisadiyyatı və menecment kafedrasının dosenti olmuşdur. 1974-1984-cü illərdə Azərbaycan Dövlət Neft Akademiyasının mühəndis-iqtisad fakültəsinin dekanı, 1984-1998-ci illərdə Universitetin Elmi işlər üzrə prorektorunun müavini və 1999-cu ildən 2001-ci ilin iyununa qədər həmin Universitetin tədris-metodiki şö’bəsinin müdiri işləmişdir. Hal-hazırda ADNA-da fakültə dekanı işləyir

Respublikanın iqtisadiyyatına həsr olunmuş 45 elmi iş nəşr etdirmişdir, onlardan 6-sı dərs vəsaitidir.

Həmid Abbasov respublikanın ali məktəblərində keçirilən elmi, metodiki və pedaqoji konfranslarında mütamadi çıxış edib, elmi məqalələr çap etdirmişdir.

Həmid Abbasov 2000-ci ilin noyabrından respublikanın Əməkdar müəllimi adına layiq görülmüşdür.

Həmid Abbasov 2001-ci ildə ADNA-da fakültə dekanı seçilmişdir.

HƏMİD VƏLİYEV

Həmid Alı oğlu Vəliyev 1939 il iyulun 15-də Borçalının Sadaxlı kəndində anadan olmuşdur. 1960-1966-cı illərdə Azərbaycan Dövlət Universitetinin filologiya fakültəsinin jurnalistika bölməsində qiyabi təhsil almış, 1975-1978-ci illərdə Moskvada Ali Partiya Məktəbində təhsilini qiyabi davam etdirmişdir. Azərbaycan EA Nizami adına Ədəbiyyat İnstitutunda namizədlik dissertasiyası müdafiə etmişdir (1980), filologiya elmləri namizədidir. Əmək fəaliyyətinə 1958-ci ilin noyabr ayından başlamış, doğma kənddəki məktəbdə pioner baş dəstə rəhbəri işləmiş, bir neçə aydan sonra Gürcüstanın Marneuli rayon qəzetində korrektor vəzifəsinə keçmişdir. 1960-cı ildən "Sovet Gürcüstanı" qəzetində korrektor, baş korrektor, şö’bə müdiri, 1973-cü ildən 1991-ci ilədək həmin qəzetdə redaktor müvaini işləmiş, 1991-ci ildə Bakıya köçmüş və iyul ayından respublika prezidentinin himayəsi ilə nəşrə başlayan "Yurd" jurnalının (Azərbaycan dilində buraxılışının) redatkoru tə’yin olunmuş, Bakıda işlədiyi dövrdə "El qəzeti"nin və "Mübarizə" qəzetinin baş redaktoru olmuşdur. "Azərbaycan folkloru və ədəbiyyatı gürcü mənbələrində" kitabının ("Yazıçı", 1984), müəllifi, "Dni Qruzii" və "Deleqat prişel na sjezd" kitablarının şərikli müəllifi (Tbilisi, 1981), Amerika yazıçısı və publisisti Deyl Karneginin "Dostu necə qazanmalı" kitabının ("İşıq", 1993) tərcüməçisidir. Satirik hekayələri də çap edilmişdir. Gürcü-Azərbaycan ədəbi əlaqələri, jurnalistikanın bu və ya digər problemləri, xüsusilə beynəlxalq jurnalistika məsələllərinə dair 160-dan artıq çap olunmuş məqalənin müəllifidir. "Şərq ölkələrinin mətbuatı" və "Gürcüstanda Azərbaycan dilli mətbuat" kitablarını nəşrə hazırlamışdır.

Həmid Vəliyev jurnalistika ilə məşğul olmaqla yanaşı, pedaqoji fəaliyyətini də davam etdirir. 1991-ci ildən Bakı Dövlət Universitetində beynəlxalq jurnalistika üzrə dərs deyir. 1997-ci ildən universitetin beynəlxalq münasibətlər və beynəlxalq hüquq fakültəsində beynəlxalq jurnalistika bölməsinin aparıcı müəllimlərindən biridir. 1999-cu ilin sentyabrından e’tibarən jurnalistika fakültəsinin dosenti və Azərbaycan Səhiyyə Nazirliyinin "Şəfqət" qəzetinin baş redaktorudur.

Gürcüstan Respublikasının Əməkdar jurnalisti fəxri adına layiq görülmüş (1988), Gürcüstan Ali Soveti Rəyasət Hey’ətinin fəxri fərmanı, "Əməkdə fərqlənməyə görə" medalı ilə təltif olunmuşdur.

HƏMZƏ ƏZİZBƏYOV

Həmzə Ömər oğlu Əzizbəyov 1961-ci ildə Borçalının Sadaxlı kəndində anadan olmuşdur.

1967-ci ildə 2 saylı Sadaxlı kənd orta məktəbinin birinci sinfinə getmiş, 1977-ci ildə həmin məktəbi ə’la qiymətlərlə bitirmişdir. 1978-ci ildə Azərbaycan Tibb İnstitutunun (indiki ADTU-nun) pediatriya fakültəsinə daxil olmuş, 1984-cü ildə isə həmin fakültəni fərqlənmə diplomu ilə başa vurmuşdur. Bir il internatura keçmiş və sonra tə’yinatla Sumqayıt şəhər poliklinikasına göndərilmişdir.

Həmzə Əzizbəyov Sumqayıtda 2 il 6 ay çalışmışdır.

1989-cu ildə Tibb Universitetinin uşaq cərrahlıq kafedrasında aspiranturaya qəbul olunmuş, 1994-cü ildə "Uşaqlarda yanıq yaralarının dinamikasına maqnit şüasının tə’siri" mövzusunda dissertasiya müdafiə edib tibb elmləri namizədi elmi dərəcəsi almışdır.

Həmzə Əzizbəyovun elmi və pedaqoji fəaliyyəti 32 elmi əsərdə, o cümlədən ingilis dilində çıxmış bir elmi əsərdə və "Uşaqlarda yanıqdan sonrakı cərrahi əməliyyat" adlı kitabda öz əksini tapmışdır.

Həmzə Əzizbəyov bu müddət ərzində 15 beynəlxalq, ittifaq və respublika səviyyəli konfrans və müşavirələrdə çıxış edib, elmi məqalələr çap etdirmişdir. O, 1989-cu ildən e’tibarən M. Nağıyev adına Tə’cili Tibbi Yardım Xəstəxanasında uşaq cərrahı ixtisası üzrə işləyir.

HƏSƏN VƏLİYEV

Həsən Paşa oğlu Vəliyev 1948-ci il dekabrın 21-də Borçalının Qaçağan kəndində fəhlə ailəsində anadan olmuşdur. 1966-cı ildə Qaçağan orta məktəbini qızıl medalla bitirmiş və həmin il ADU-nun mexanika-riyaziyyat fakültəsinin birinci kursuna daxil olmuşdur. 1971-ci ildə Həsən Vəliyev indiki BDU-nun mexanika-riyaziyyat fakültəsini uğurla başa vurmuşdur.

1971-1987-ci illərdə Azərbaycan EA Kibernetika İnstitutunda çalışmış və təhsilini aspiranturanın qiyabi şö’bəsində davam etdirmişdir. 1983-cü ildə Tbilisidə namizədlik dissertasiyasını müdafiə edib, fizika-riyaziyyat elmləri namizədi elmi dərəcəsi almışdır. 1987-ci ildən Azərbaycan Texniki Universitetində işləyir. Hazırda "Riyaziyyat-2" kafedrasının dosentidir.

33 elmi-metodiki əsərin müəllifidir. Elmi işləri əsasən "bir və çoxölçülü çanta məsələsinin dəqiq və təqribi həlli" problemlərinə həsr edilmişdir.

HƏSƏN XEYİRLİ (XEYİR-ZADƏ)

Həsən Məhəmməd oğlu Xeyirli (Həsən Xeyir-zadə) 1908-ci ildə Borçalının Kürtlər kəndində anadan olmuşdur.

Həsən Xeyirli ilk təhsilini ibtidai məktəbdə almışdır.1923-cü ildə Qocoridə, sonra 1925-ci ildə Başkeçiddə müəllimlik kurslarında təhsilini davam etdirmişdir. 15 yaşında ikən 1923-cü ildə Kürtlər kəndində ibtidai əmək məktəbini açmış, 1924-cü il sentyabrın 1-də Tbilisi Türk Pedaqoji Txnikumuna göndərilmiş və 1928-ci ildə oranı bitirmişdir. Həmin ildə texnikumun buraxılış məclisinin qərarı əsasında Respublikanın Maarif komisarlığı onu təhsilini artırmaq üçün Bakıya, Azərbaycan Dövlət Universitetinə göndərmişdir. Orada oxuyarkən Azərbaycan Tikinti Sənayesi kombinatında müəllimlik etmişdir. 1932-ci ildə tarix-ictimaiyyət fakültəsini bitirmiş və Tbilisiyə qayıtmışdır.

1933-1935-ci illərdə Müəllimlərin İxtisasartırma İnstitutunun türk şö’bəsində və Tbilisi Pedaqoji texnikumunda, 1936-1945-ci illərdə isə Tbilisi Dövlət Universitetinin nəzdində olan Azərbaycan şö’bəsində (4 fakültə) müdir vəzifəsində işləmiş və dosent elmi dərəcəsinə layiq görülmüşdür.

Həsən Xeyirli Zaqafqaziya Kənd Təsərrüfatı Texnikumunda, Tbilisi Yol Nəqliyyatı Mühəndislər institutunda, Gürcüstan Kommunist Universiteti və Ali Kommunist Məktəbində dərs deyib müəllimlik etmişdir.

1941-1952-ci illərdə Puşkin adına Tbilisi Dövlət Pedaqoji İnstitutunda Azərbaycan şö’bəsinin dekanı vəzifəsində işləmiş və SSRİ tarixi fənnindən dərs demişdir. 1956-cı ildə Bakıya köçərək 1971-ci ilə kimi Azərbaycan Dövlət Universitetinin Siyasi iqtisad kafedrasında və Xalq Təsərrüfatı İnstitutunun (indiki ADPU-nun) iqtisadi tarix kafedrasında baş müəllim, dosent kimi işləmişdir.

Həsən Xeyirlinin elmi və pedaqoji fəaliyyəti bir neçə metodik göstərişdə, dərs vəsaitində və iri həcmli elmi məqalələrdə öz əksini tapmışdır.

Həsən Xeyirli 1979-cu ildə vəfat etmişdir.

HƏSƏN HƏSƏNOV

Həsən Mehdi oğlu Həsənov 1940-cı ildə Borçalının Qasımlı kəndində kolxozçu ailəsində anadan olmuşdur. 1958-ci ildə Qasımlı kənd orta məktəbini qızıl medalla bitirmiş və Azərbaycan Politexnik İnstitutunun hidromeliorasiya fakültəsinə daxil olmuşdur. 1963-cü ildə İnstitutu fərqlənmə diplomu ilə bitirdikdən sonra, Azərbaycan Elmi-Tədqiqat Hidrotexnika və Meliorasiya İnstitutunda kiçik elmi işçi kimi fəaliyyətə başlamışdır.

1966-cı ildə Moskva Hidromeliorasiya İnstitutunun nəzdində məqsədli aspiruanturaya daxil olmuş və 1970-ci ildə namizədlik dissertasiyası müdafiə etmişdir.

1970-ci ildən Azərbaycan Elmi-Tədqiqat Hidrotexnika və Meliorasiya İnstitutunda baş elmi işçi kimi fəaliyyət göstərmiş və 1978-ci ildə müsabiqə yolu ilə hidrotexniki laboratoriyanın müdiri seçilmişdir.

Həsən Həsənov bir çox orden və medallarla təltif edilmişdir. 1975-ci ildə Moskvada keçirilən "İrriqasiya və drenaj-75" beynalxalq sərgidə "Balıqqoruyucu qurğunun" yeni konstruksiyası müvəfəqqiyyətlə nümayiş etdirilmiş, Həsən Həsənov sərginin "gümüş" medalı ilə təltif edilmişdir. 1981-ci ildə SSRİ Ali Sovetinin fərmanı ilə xalq təsərrüfatının inkişafında əldə etdiyi nailiyyətə görə "Şərəf nişanı" ordeni ilə təltif edilmişdir. 1985-ci ildə Moskva Xalq Təsərrfüfatı Nailiyyətləri sərgisində nümayiş etdirilmiş "Balıqqoruyucu qurğunun" təkmilləşdirilmiş konstruksiyasına görə həmin sərginin "bürünc" medalına layiq görülmüşdür.

Həsən Həsənovun rəhbərliyi ilə hidrotexniki laboratoriya quraşdırılmış və yeni avadanlıqla təchiz olunmuşdur.

Müxtəlif illərdə keçmiş SSRİ-nin bir çox şəhərlərində - Moskva, Kiyev, Aşqabad, Həştərxan, Novoçerkassk, Saratov, Mahaçkala, Tbilisidə konfranslarda iştirak etmiş, elmi-praktik məqalələr çap etdirmişdir.

Həsən Həsənov 66 elmi işin və monoqrafiyaların müəllifi olmuşdur. Eyni zamanda H.Həsənov 4 ixtiraya görə müəlliflik şəhadətnaməsi almışdır.

Həsən Həsənov 1966-cı ildə "Suvarma sistemlərinin suburaxıcı və balıqqoruyucu qurğularının layihələşdirilməsinin elmi əsasları" mövzusunda doktorluq dissertasiyası müdafiə etmişdir.

Onun rəhbərliyi altında bir çox aspirantlar namizədlik dissertasiyası müdafiə etmişlər.

Həsən Həsənov 1999-cu ildə vəfat etmişdir.

HÜSEYN SƏMƏDZADƏ

Hüseyn Səməd oğlu Səmdzadə 1957-ci ildə Borçalının Sarvan kəndində anadan olmuşdur.

1964-cü ildə 1 saylı Marneuli rus orta məktəbinə getmiş və 1974-cü ildə həmin məktəbi bitirmişdir.

1974-cü ildə Daşkənd Yüngül Sənaye və Toxuculuq İnstitutuna daxil olmuş və 1978-ci ildə həmin institutu bitirmişdir.

1978-1980-ci illərdə hərbi xidmətdə olmuşdur.

1980-cı ildən Moskva Toxuculuq Kombinatında mühəndis vəzifəsində əmək fəaliyyətinə başlamışdır.

1984-cü ildə indiki Azərbaycan Dövlət İqtisad Universitetinə daxil olmuş və 1987-ci ildə həmin universiteti bitirmişdir.

1988-1990-cı illərdə Çin Xalq Respublikasında "Stonkogksport"un sədr müavini işləmişdir.

1990-cı ildə SSRİ Diplomatiya Akademiyasına daxil olmuş, sonra isə Almaniyanın Hamburq şəhərində təhsilini davam etdirmişdir.

1991-ci ildə Hüseyn Səmədzadə "Çinin iqtisadiyyatı" mövzusunda namizədlik dissertasiyası müdafiə edib elmi dərəcə almışdır.

1991-ci ildən SSRİ Diplomatiya Akademiyasının nəzdində təşkil olunmuş "XXI əsrin liderləri" Beynəlxalq humanitar təşkilatının Azərbaycan şö’bəsinin prezidenti tə’yin olunmuşdur.

1994-cü ildə "Azərbaycan-Çin" federasiyası beynəlxalq ictimai təşkilatının Prezidenti seçilmişdir.

1996-cı ildən Ümumdünya İqtisadçılar Assosiasiyasının üzvü seçilmişdir.

2001-ci ildə "Azərbaycan-Yaponiya" Beynəlxalq İqtisadi fondunun Prezidenti seçilmişdir.

Hüseyn Səmədzadə bir neçə elmi hesabatın və elmi əsərin müəllifidir. O, 10 beynəlxalq konqres və simpoziumların iştirakçısı olmuşdur.

Hüseyn Səmədzadə hazırda "Azərbaycan-Çin" beynəlxalq ictimai təşkilatının Prezidenti və Azərbaycan-Yaponiya əməkdaşlıq fondunun prezidentidir. O, eyni zamanda "Azərbaycan işgüzarlar" kompaniyasının təşkilatçısı və rəhbəri kimi öz fəaliyyətini davam etdirir.

O. Həm də "Bakılı" ictimai-siyasi qəzetinin baş direktoru və xeyriyyəçisidir.

XALİD ƏLİZADƏ

Xalid Şəmsi oğlu Əlizadə 1934-cü il may ayının 24-də Borçalının Lecbəddin kəndində ziyalı ailəsində anadan olmuşdur. Atası Şəmsi Əlizadə Borçalıda böyük nüfuza malik qabaqcıl maarif xadimlərindən olmuşdur. Anası Həcər xanım Birinci Kosalı Mədəd ağanın qızı, məşhur Əhməd Soltanın qız nəticəsi idi.

Xalid Əlizadə ibtidai məktəbə doğma kəndlərində getmiş, natamam orta məktəbi isə Muğanlı kəndində bitirmişdir. Sonra isə təhsilini davam etdirmək üçün Marneuli Pedaqoji Texnikumuna daxil olmuş, 1952-ci ildə həmin texnikumu bitirmişdir.

1952-ci ildə Azərbaycan Dövlət Universitetinin (indiki BDU-nun) geoloji-coğrafiya fakültəsinə daxil olmuş, 1957-ci ildə isə fərqlənmə diplomu ilə geologiya ixtisası üzrə bitirmişdir. Tə’yinatla Orconikidze (indiki Suraxanı) rayonunun nəzdində olan 6-cı neft mə’dənində əmək fəaliyyətinə başlamışdır. O, eyni zamanda Marksizm-Leninizm Universitetini də bitirmişdir.

Xalid Əlizadə elmi axtarışlarla yanaşı, ingilis və rus dillərini mükəmməl öyrənmişdir. Müəyyən kursları bitirdikdən sonra hər iki dili öz ana dili kimi mənimsəmişdir.

Xalid 1960-cı illərdə yerli komsomol təşkilatının katibi seçilmiş, plenum və konfranslarda, respublika daxili istehsalat və təsərrüfat müşavirələrində elmi əsaslarla çıxış edib, materiallar dərc etdirmişdir.

1958-ci ildə Xalid Əlizadə Orconikidze rayon Komsomol Komitəsinin birinci katibi vəzifəsinə seçilmişdir. Bir müddət sonra partiya sıralarına daxil olmuş, dəfələrlə rayon Xalq Deputatları Sovetinə deputat seçilmişdir.

1960-cı ilin əvvəlində Azərbaycan Dövlət Universitetinin rektoru, akademik Şəfayət Mehdiyevə ərizə ilə müraciət edib geologiya üzrə aspiranturaya daxil olmuşdur. Aspirant dövründə Xalid Əlizadə rus və ingilis dillərində elmi konfranslarda çıxış etmiş, elmi məqalələr çap etdirmişdir.

1961-ci ildə Xalid Əlizadə "Assimetrik neft yataqlarının geoloji quruluşu və xüsusiyyətləri" adlı dissertasiya işini tamamlamışdır. Onun elmi nəticələri Elmi Şuranın üzvləri tərəfindən yüksək qiymətləndirilmişdir.

İntellektual biliyə və dərin savada malik olan alim-geoloq Xalid Əlizadə son illərdə həyatla barışmaz olmuşdur. Onun özünəməxsus həyat tərzi və həyata baxışı var idi.

Xalid Əlizadə 1961-ci ildə Bakıda vəfat etmişdir.