ELMLƏR NAMİZƏDLƏRİ

[A] [B-E] [Ə-G] [H-X] [İ-Q] [M-N] [R-S] [S-Ş] [T-V] [V-Z]

BƏKİR VƏLİYEV

Bəkir Səməd oğlu Vəliyev 1933-cü il may ayının 2-də Borçalının Sadaxlı kəndində anadan olmuşdur. O, ilk təhsilini Sadaxlı kəndində almışdır. Azərbaycan Pedoqoji İnstitutunun kimya-biologiya fakültəsinə daxil olmuş və 1954-cü ildə həmin fakültəni başa vurmuşdur. Qardabani rayonunun Qaracalar, sonra isə Kosalı orta məktəbində (1954-1956-cı illərdə), Sadaxlı orta məktəbində kimya-biologiya müəllimi işləmişdir.

1961-ci ildə Bakıya gəlmiş, Azərbaycan Pedaqoji İnstitutunun (indiki APU) kimya kafedrasının nəzdində analitik kimya ixtisası üzrə aspiranturaya daxil olmuş və 1964-cü ildə aspiranturanı bitirmişdir. 1966-cı ildə nadir torpaq elementləri sırasına daxil olan "İttiriumun areenat üsulu ilə yodometrik tə’yini" mövzusunda namizədlik dissertasiyası müdafiə edib kimya elmləri namizədi elmi dərəcəsi almışdır. 1964-cü ildən indiyə kimi Azərbaycan Respublikası EA Qeyri-Üzvi Kimya İnstitutunda əvvəlcə laborant, sonra kimyaçı mühəndis, daha sonra kiçik elmi işçi və 1965-ci ildən isə baş elmi işçi vəzifəsində işləyir. Bu müddət ərzində analitik kimya və mineral maddələrin texnologiyası sahəsində apardığı elmi tədqiqat işlərinin nəticəsi olaraq 60-a yaxın elmi məqalələri işıq üzü görmüşdür.

CAVANŞİR HÜSEYNOV

Cavanşir Dilman oğlu Hüseynov 1951-ci ildə Borçalının Qasımlı kəndində müəllim ailəsində anadan olmuşdur.

1958-ci ildə Qasımlı kənd orta məktəbinə getmiş və 1968-ci ildə oranı bitirib Azərbaycan Neft və Kimya İnstitutunun neft mexanika fakültəsinə daxil olmuşdur. 1974-cü ildə institutu bitirib təyinatla indiki Bakı neft mə’dən maşınqayırma zavoduna göndərilmişdir.

1974-1980-ci illərdə zavodda sex ustasından zavodun baş mexaniki vəzifəsinə qədər işləmişdir. 1980-ci ildə zavodun müdiriyyəti tərəfindən o, İ.V. Qubkin adına Moskva Neft Kimya və Qaz İnstitutuna məqsədli aspiranturaya göndərilmişdir. 1984-cü ildə aspiranturanı bitirib, "Çox şpindelli aqreqat dəzgahlarının köməyi ilə kövdə detallarında deşik sistemlərinin e’malı zamanı dəqiqliyin və məhsuldarlığın artırılması" adlı mövzunu müvəffəqiyyətlə müdafiə edib, texnika elmləri namizədi elmi dərəcəsi almışdır. 1994-cü ildə yenidən SSRİ Neft və Kimya Maşınqayırma nazirliyi tərəfindən ikinci dəfə Bakı neft mə’dən maşınqayırma zavoduna göndərilmişdir.

1984-1985-ci illərdə zavodda baş konstruktorun müavini vəzifəsində işləmişdir. 1985-ci ildə "Bakneftmaş" birliyi tərəfindən indiki 28 may adına neft mə’dən maşınqayırma zavoduna baş mühəndis tə’yin edilmişdir.

1985-1987-ci illərdə zavodda baş mühəndis vəzifəsində işləmişdir. 1987-ci ildə 28 may adına neft mə’dən maşınqayırma zavodu ilə Keşlə maşınqayırma zavodu SSRİ Neft və Kimya Maşınqayırma Nazirliyinin əmri ilə birləşdiyi üçün 28 may adına neft maşınqayırma zavodu Keşlə maşınqayırma zavodunun 2-saylı istehsalat sahəsinə çevrilmiş və o, Keşlə maşınqayırma zavodunun texniki direktor müavini vəzifəsinə tə’yin edilmişdir. 1988-ci ilə kimi bu vəzifədə işləmişdir.

1988-ci ildən Montin adına Bakı neft mə’dən maşınqayırma zavodunda (indiki Bakı neft mə’dən maşınqayırma zavodunda) baş mühəndisin texniki məsələlər üzrə müavini vəzifəsində işləmişdir.

1994-cü ildən İnstrument Elmi İstehsalat Birliyinin Baş direktoru vəzifəsində işləyir.

20-ə yaxın elmi məqaləsi çap olunmuşdur.

CÜMŞÜD ABBASOV

Cümşüd Rüstəm oğlu Abbasov 1934-cü il aprelin 5-də Borçalının Qaçağan kəndində kəndli ailəsində anadan olmuşdur. 1954-cü ildə Qaçağan orta məktəbini bitirdikdən sonra həmin ildə Azərbaycan Dövlət Universitetinin coğrafiya fakültəsinə daxil olmuşdur. 1959-cu ildə universiteti bitirdikdən sonra iqtisadi coğrafiya ixtisası üzrə Azərbaycan EA Coğrafiya İnstitutuna tə’yinat almış, institutda bir müddət kiçik elmi işçi vəzifəsində işlədikdən sonra 1963-cü ildə institutun nəzdindəki Xəzər Problemləri Bölməsində əyani aspiranturaya daxil olmuşdur. Leninqrad Elmi-Tədqiqat Qalurgiya İnstitutunun laboratoriya müdiri, professor A.İ. Dzens-Litovskinin rəhbərliyi altında "Xəzər dənizinin qalurgiya təsərrüfatının müasir vəziyyəti və inkişaf perspektivləri" mövzusunda namizədlik dissertasiyası müdafiə etmişdir.

O, 1968-ci ildən 1975-ci ilədək Coğrafiya İnstitutunun Xəzər Problemləri Bölməsində baş elmi işçi vəzifəsində işləmişdir. 1975-1977-ci illərdə Xəzər elmi mərkəzində baş elmi işçi vəzifəsində işləmişdir. 1977-ci ilin axırlarında onun işlədiyi laboratoriya yenidən Coğrafiya İnstitutuna qaytarılmışdır. 1977-ci ildən 1981-ci ilədək İqtisadi və sosial coğrafiya şö’bəsində baş elmi işçi vəzifəsində işləmişdir.

1981-ci ilin axırlarında müsabiqə yolu ilə Bakı Dövlət Universitetinin iqtisadi və sosial coğrafiya kafedrasına dosent vəzifəsinə seçilmişdir. Hazırda fakültədə "İstehsalat texniki-iqtisadi əsasları", "Azərbaycanın iqtisadi və sosial coğrafiyası" və s. fənnlər üzrə mühazirələr aparır. Bakı Dövlət Universitetində işləyə-işləyə həm də 1995-1997-ci illərdə Asiya Universitetində "Ekologiya" fakültəsində dekan vəzifəsində işləmişdir.

Cümşüd Abbasovun 60-dan artıq elmi əsəri çap olunmuşdur. O, cümlədən "İstehsalın texniki-iqtisadi əsasları" (1991) və "Azərbaycanın iqtisadi və sosial coğrafiyası" (1998). Bunlardan əlavə onun "Xəzərin iqtisadi problemləri" (1970) adlı kitabçası da nəşr olunmuşdur. Hazırda universitetdə mühazirələr aparmaqla yanaşı, Xəzər dənizinin iqtisadi problemlərinə dair elmi-tədqiqat işlərini davam etdirir.

CÜMŞÜD QABULOV

Cümşüd Mahmud oğlu Qabulov 1947-ci ildə Borçalının Sarvan kəndində anadan olmuşdur. 1954-cü ildə 2 saylı Marneuli Azərbaycan orta məktəbinin birinci sinfinə getmiş, 1965-ci ildə isə 1 saylı Marneuli şəhər Azərbaycan orta məktəbini bitirmişdir. 1965-ci ildə Azərbaycan Dövlət Universitetinin fizika fakültəsinə daxil olmuş, 1970-ci ildə isə həmin fakültəni başa vurmuş və yarımkeçiricilər kafedrasında baş laborant vəzifəsində saxlanılmışdır. 1972-ci ildə ADU-nun (indiki BDU-nun) elmi şurasının qərarı ilə AzPİ-nin (indiki ATU-nun) fizika kafedrasında əyani aspiranturaya qəbul olunmuşdur. Aspiranturanı bitirdikdən sonra həmin kafedrada kiçik elmi işçi və assistent vəzifələrində işləmişdir. 1978-ci ildə istilik fizikası üzrə dissertasiya işini Cövhər Qala (Qroznı) neft institutunda müdafiə edib, texnika elmləri namizədi elmi dərəcəsi almışdır. 1980-cı ildə çalışdığı fizika kafedrasında baş müəllim, 1982-ci ildən isə dosent kimi fəaliyyətini davam etdirmişdir. Cümşüd Qabulovun elmi və pedaqoji fəaliyyəti 80-ə yaxın elmi əsərdə, beş dərs vəsaiti, beş metodik göstərişdə öz əksini tapmışdır. O, bir neçə dərs vəsaitinə elmi redaktor olmuşdur.

Cümşüd Qabulov keçmiş Sovet İttifaqı termodinamik cədvəl üzrə işçi komissiya qrupunun üzvü olmuşdur. Onun elmi nəticələri dövlət standartlar xidməti mə’lumatlar bürosuna daxil olmuş və elmdə geniş tətbiqini tapmışdır.

Cümşüd Qabulov 1984-cü ildən akademik M.D. Milyonşikov adına Cövhər Qala Neft İnstiututunun müdafiə Şurasının üzvü olmuşdur.

O, indiyədək 20 beynəlxalq və ittifaq, 25 dəfə isə respublika səviyyəli simpozium, konfrans və müşavirələrdə çıxış edib, məqalələr çap etdirmişdir. Cümşüd Qabulovun elmi və pedaqoji fəaliyyəti bunlarla bitmir. O, Borçalı soydaşlarının birliyi və bütövlüyü naminə yaradılmış ictimai və mə’nəvi təşkilata ağsaqqallıq edir.

Cümşüd Qabulov hal-hazırda ATU-nun fizika kafedrasında dosent kimi pedaqoji fəaliyyətini davam etdirir.

CÜMŞÜD ƏHMƏDOV

Cümşüd Süleyman oğlu Əhmədov 1939-cu il avqustun 1-də Borçalının Keşəli kəndində kolxozçu ailəsində anadan olmuşdur. 1946-cı ildən 1954-cü ilə qədər Keşəli 8-illik məktəbində təhsil almışdır. 8-illik məktəbi ə’la qiymətlərlə başa vurmuş və imtahansız Marneuli Pedaqoji Məktəbinə qəbul olunmuşdur. 1958-ci ildə pedaqoji məktəbi bitirdikdən sonra M.F. Axundov adına Azərbaycan Pedaqoji Rus Dili və Ədəbiyyatı İnstitutuna qəbul olunmuşdur. Lenin adına təqaüdə layiq görülmüşdür. Axırıncı kursda təhsil alarkən Respublika komsomol təşkilatının çağırışı ilə 1962-1963-cü dərs ilində Kəlbəcər rayonunun Aşağı Ayrım 8-illik məktəbində rus dili və ədəbiyyatı müəllimi işləmişdir.

1963-cü ildə M.F. Axundov adına Azərbaycan Pedaqoji Dillər İnstitutunun rus dili və ədəbiyyatı fakültəsini fərqlənmə diplomu ilə bitirdikdən sonra C.S. Əhmədov məqsədli aspiranturaya göndərilmiş və Leninqrad Dövlət Universitetinin ümumi dilçilik kafedrasının nəzdində ümumi dilçilik ixtisası üzrə aspiranturaya daxil olmuşdur. 1964-cü ilin fevral ayından 1965-ci ilin avqust ayının axırlarına kimi ordu sıralarında hərbi xidmətdə olduqdan sonra aspiranturaya bərpa olunub təhsilini davam etdirmişdir.

1968-ci ilin oktyabr ayının 1-dən M.F. Axundov adına APDİ-nin rus dilçiliyi kafedrasına müəllim vəzifəsinə işə götürülmüşdür. 1970-ci ildə "Müasir Azərbaycan dilində predikativlər" mövzusunda namizədlik dissertasiyası müdafiə edib, filologiya elmləri namizədi elmi dərəcəsi almışdır. 1970-ci ildə yeni açılmış hazırlıq şö’bəsinə müdir tə’yin olunmuş, 1971-ci ildə baş müəllim vəzifəsinə keçirilmişdir. 1974-cü ildən dosentdir. 1973-cü ilin dekabrında ümumi dilçilik kafedrasına müdir seçilmişdir. 1976-cı ildə Azərbaycan Pedaqoji Rus Dili və Ədəbiyyatı İnstitutunun tədris işləri üzrə prorektoru vəzifəsinə tə’yin olunmuşdur. 1982-ci ilin dekabrında ümumi və rus dilçiliyi kafedrasında dosent olmuş, 1994-cü ildə həmin kafedranın müdiri vəzifəsinə seçilmişdir. 1999-cu ildə təkrarən həmin kafedraya müdir seçilmişdir.

Cümşüd Əhmədov 40-a yaxın elmi məqalənin, bir neçə tədris proqramı və metodiki vəsaitin müəllifidir. Hazırda axırıncı cildi nəşriyyatda olan dördcildlik "Azərbaycanca-rusca lüğət"in İnstitut Elmi Şurası tərəfindən tə’yin olunmuş rə’yçilərindən biridir.

CÜMŞÜD HACIYEV

Cümşüd Məhəmməd oğlu Hacıyev 1931-ci ildə Borçalının Sarvan kəndində anadan olmuşdur. 1937-ci ildə Marneuli Pedaqoji Texnikumunun nəzdindəki ibtidai məktəbin birinci sinfinə getmiş, 1941-ci ildə ibtidai məktəbi bitirib, indiki 1 nömrəli orta məktəbin 5-ci sinfinə getmişdir. 1945-ci ildə bu məktəbin 8-ci sinifini başa vurduqdan sonra Marneuli Pedaqoji Texnikumuna daxil olmuş və 1949-cu ildə texnikumu bitirmişdir. ADU-nun (indiki BDU-nun) tarix fakültəsini fərqlənmə diplomu ilə başa vurmuşdur.

1954-cü ildən 1963-cü ilə kimi indiki 2 saylı Marneuli orta məktəbində tarix, məntiq və ictimaiyyət fənlərindən dərs demişdir. 1966-cı ilin oktyabrından 1967-ci ilin dekbrına kimi ADU-nun fəlsəfə kafedrasında fəlsəfə kabinetinin müdiri vəzifəsində işləmişdir. 1967-ci ilin aprelində fəlsəfə elmləri namizədi elmi dərəcəsi almaq üçün "Şəhərlə kənd arasındakı mühüm fərqlərin aradan qaldırmasında şəxsiyyətin hərtərəfli inkişafı" mövzusunda dissertasiya müdafiə etmişdir.

1967-ci ilin dekabrından 1969-cu ilin dekabrına kimi fəlsəfə kafedrasında müəllim işləmişdir. 1969-cu ilin dekabrından 1972-ci ilin yanvarına kimi baş müəllim olmuşdur. 1972-ci ilin dekabrından fəlsəfə kafedrasında dosent vəzifəsinə keçmişdir. 1974-cü ilin sentyabrından bu günə kimi Xarici Dillər İnstitutunun fəlsəfə kafedrasında dosent kimi fəaliyyət göstərir.

Onun indiyə kimi 25-dən çox elmi və elmi-publisist əsərləri işıq üzü görmüşdür.

Cümşüd Hacıyev bu müddətdə 15 beynəlxalq və respublika səviyyəli konfranslarda çıxış edib, məqalələr çap etdirmişdir.

DAVİD NƏSİBOV

David Nəsibov 1955-ci ildə Borçalının Alget (Meçidli Gorarx) kəndində müəllim ailəsində anadan olmuşdur. 1962-ci ildə doğma kəndində 1 saylı orta məktəbə getmiş, 1972-ci ildə həmin məktəbi bitirmiş, Azərbaycan Dövlət Universitetinin mexanika-riyaziyyat fakültəsinə daxil olmuşdur. 1977-ci ildə həmin fakültəni başa vurmuşdur.

1978-1981-ci illərdə Marneuli rayonunda "Qruz-nerud" İstehsalat Birliyində böyük iqtisadçı vəzifəsində işləmişdir. 1981-ci ildə Bakıya qayıtmış, Azərbaycan Politexnik İnstitutundakı hesablama mərkəzində riyaziyyatçı-proqramist işləmişdir. 1985-ci ildə Politexnik İnstitutunun materiallar müqaviməti kafedrrasının dissertantı olmuşdur. 1989-cu ildə Bakı Dövlət Universitetinin ixtisaslaşdırılmış Elmi Şurasında namizədlik dissertasiyası müdafiə edib elmi dərəcə almışdır.

1992-ci ildən EHM və sistemlər kafedrasında assistent, baş müəllim, dosent işləmişdir.

David Nəsibovun elmi və pedaqoji fəaliyyəti 10 elmi əsərdə öz əksini tapmışdır. O, respublikada keçirilən bir sıra elmi konfranslarda mə’ruzələrlə çıxış etmişdir.

Hazırda EHM və sistemləri kafedrasının dosentidir.

DURSUN HÜMBƏTOV

Dursun Oruc oğlu Hümbətov 1930-cu il martın 10-da Borçalının Kürtlər kəndində anadan olmuşdur. 1945-ci ildə səkkizillik kənd orta məktəbini ə’la qiymətlərlə bitirdikdən sonra orta təhsilini Marneuli Pedaqoji Texnikumunda davam etdirmişdir. 1949-cu ildə texnikumu fərqlənmə diplomu ilə bitirərək Azərbaycan Pedaqoji İnstitutunun (indiki ADPU) fizika-riyaziyyat fakültəsinə qəbul olunmuşdur.

D.O.Hümbətov 1953-cü ildə institutu bitirdikdən sonra tə’yinatla Jdanov (indiki Beyləqan) şəhər orta məktəbində müəllimlik etmiş, sonra doğma Borçalıya qayıdaraq, 1961-ci ilədək əvvəlcə Gorarxı (indiki Algeti), sonra isə Baydar kənd orta məktəblərində pedaqoji fəaliyyətini dvam etdirmişdir.

D.O.Hümbətov 1961-ci ildə Azərbaycan SSR EA Fizika İnstitutunun aspiranturasına daxil olmuş və Moskva şəhərindəki Üzvi Elementlər Birləşməsinin Kimya və Tenxnologiyası Dövlət Elmi-Tədqiqat İnstitutuna e’zam olunmuşdur. Burada professor V.N.Kostryukovun rəhbərliyi ilə elmi araşdırmalara başlamış və 1965-ci ildə Minsk şəhərində namizədlik disssertasiyası müdafiə etmişdir. 1964-1966-cı illərdə Azərbaycan EA Fizika İnstitutunda kiçik elmi işçi vəzifəsində işləmiş, 1966-cı ildə M.Əzizbəyov adına Azərbaycan Neft-Kimya İnstitutunun fizika kafedrasında assistent vəzifəsinə keçərək ömürünün axırına kimi bu təhsil ocağında elmi-pedaqoji fəaliyyətini davam etdirmişdir. Dursun Hümbətov 1967-ci ildə kafedranın baş müəllimi, 1970-ci ildə isə dosent vəzifəsinə irəli çəkilmişdir.

Dursun Hümbətov 50-dən çox elmi məqalə, monoqrafiya və dərs vəsaitlərinin müəllifi olmuş, onun rəhbərliyi ilə bir sıra elmlər namizədi yetişdirilmişdir. Onun özü isə ömürünün axırlarına yaxın "Bərk maye cisimlərin istilik tutmunun texniki tədbirləri" mövzusunda doktorluq dissertasiyasını tamamlamış və elmi müzakirəyə təqdim etmişdi.

Dursun Hümbətov 9 sentyabr 1990-cı ildə qəflətən vəfat etmişdir.

DÜNYAMALI VƏLİYEV

Dünyamalı Əmir oğlu Vəliyev 1942-ci il martın 13-də Borçalının Qasımlı kəndində anadan olmuşdur. 1959-cu ildə Qasımlı kənd orta məktəbini bitirdikdən sonra indiki BDU-nun iqtisad fakültəsinə daxil olmuşdur. Universiteti 1964-cü ildə bitirmiş və tə’yinatla SSRİ Tikinti Bankının Bakı şəhər idarəsində işə başlamışdır. 1971-ci ilə qədər bu idarədə müxtəlif vəzifələrdə çalışmışdır.

Dünyamalı Vəliyev 1966-cı ildə Azərbaycan EA-nın Şərqşünaslıq İnstitutunda istehsalatdan ayrılmamaqla aspiranturaya daxil olmuş və 1971-ci ildə "Müasir Türkiyənin dövlət borcları" adlı dissertasiya müdafiə edib, iqtisad elmləri namizədi elmi dərəcəsi almışdır. O, 1971-1979-cu illərdə Rostov-Don Dəmir yolu Mühəndisləri İnstitutunda dosent vəzifəsində işləmişdir.

Dünyamalı Vəliyev 1979-1992-ci illərdə Azərbaycan EA-nın Şərqşünaslıq İnstitutunda baş elmi işçi, Türkiyə tarixi və iqtisadiyyatı şö’bəsinin müdiri və institutun elmi işlər üzrə direktor müavini işləmişdir. Bu dövrdə "Atatürk", "Türkiyə-Turqut Özal: iqtisadi mö’cüzələr" (həmmüəllif) və "Dövlət maliyyəsi və Türkiyənin sosial-iqtisadi inkişafı" adlı kitabları çap olunmuşdur.

Dünyamalı Vəliyev 1993-1994-cü illərdə Azərbaycan Respublikası Nazirlər Kabinetində xarici iqtisadi əlaqələr şö’bəsinin müdiri vəzifəsində işləmişdir.

Dünyamalı Vəliyev 1995-ci ilin yanvarından Aəzrbaycan Universitetində İqtisadi nəzəriyyə və Beynəlxalq iqtisadi münasibətlər kafedrasına rəhbərlik edir.

Onun 1994-cü ildə çap etdirdiyi "Erməni terrorizmi və cinayətləri: Azərbaycanda, Türkiyədə, Dünyada" adlı kitabı erməni işğalçılarının vəhşiliklərinin ifşa edilməsi məqsədinə xidmət edir. Kitab ərəb dilinə tərcümə edilərək ərəb ölkələrində yayılmışdır.

Dünyamalı Vəliyev 7 kitab və 50-dən çox elmi məqalənin müəllifidir. Onun əsərlərinin ümumi həcmi 100 çap vərəqindən çoxdur. Bakı, Moskva, Kiyev, Tbilisi, Ankara, İstanbul, Tehran və Tokio şəhərlərində keçirilmiş konfrans, simpozium və seminarlarda iştirak etmişdir.

ELMİRA HƏSƏNOVA

Elmira Ayat qızı Həsənova 1969-cu il martın 7-də Moskva şəhərində ziyalı ailəsində anadan olmuşdur. Elmira Həsənovanın atası Borçalının Qaçağan kəndindəndir.

1976-cı ildə 195 saylı Moskva şəhər rus orta məktəbinin 1-ci sinfinə getmiş, 1986-cı ildə həmin məktəbi bitirmişdir.

Həmin ildə M.V. Lomonosov adına Moskva Dövlət Universitetinin Biologiya fakültəsinə daxil olmuş və 1991-ci ildə həmin fakültəni başa vurmuş, tə’yinatla həmin Universitetin biologiya kafedrasında əmək fəaliyyətinə başlamışdır. İki il stajirovka keçdikdən sonra Universitetin aspiranturasına daxil olmuş və 1999-cu ildə müvəffəqiyyətlə namizədlik dissertasiyası etmiş, kimya elmləri namizədi elmi dərəcəsi almışdır.

Elmira Həsənovanın elmi və pedaqoji fəaliyyəti 7 elmi əsərdə və 2 elmi hesabatda öz əksini tapmışdır.

Elmira Həsənova 10 ildir ki, elmi işlə yanaşı pedaqoji fəaliyyət də göstərir.

Hazırda M.V. Lomonosov adına Moskva Dövlət Universitetinin kimya fakültəsində müəllim işləyir.

ELLARA MƏMMƏDOVA (TAĞIZADƏ)

Ellara Camal qızı Məmmədova 1949-cu ildə Marneuli şəhərində anadan olmuşdur. 1956-cı ildə Marneuli şəhər 2 saylı Azərbaycan orta məktəbinin 1-ci sinfinə getmiş, 1966-cı ildə həmin məktəbi qızıl medalla bitirmişdir. 1966-cı ildə Azərbaycan Politexnik İnstitutunun Texnologiya fakültəsinə daxil olmuş, ali məktəbi 1971-ci ildə müvəffəqiyyətlə başa vurmuşdur. 1978-ci ildə yeni təşkil olunmuş Azərbaycan İnşaat-Mühəndisləri İnstitutunun fəaliyyətə başlaması ilə əlaqədar Ellara Məmmədova da bu institutun nəzəri mexanika kafedrasına işə düzəlmişdir. 1986-cı ildə "Eninə sürüşmə deformasiyasını nəzərə almaqla lövhələrin və az meylli örtüklərin hesablanması" mövzusunda namizədlik dissertasiyasını müdafiə edib, fizika-riyaziyyat elmləri namizədi elmi dərəcəsi almışdır.

Ellara Məmmədovanın elmi və pedoqoji fəaliyyəti çap olunmuş 10-a qədər əsərdə öz əksini tapmışdır. Respublikanın ali məktəblərində keçirilmiş bir sıra konfranslarda mə’ruzələr etmiş və məqalələr çap etdirmişdir.

Ellara Məmmədova hazırda Azərbaycan İnşaat Mühəndisləri İnstitutunun nəzəri mexanika kafedrasında baş müəllim vəzifəsində çalışır.

ELXAN POLUXOV

Elxan Polux oğlu Poluxov 1971-ci ildə Marneuli rayonunun Sadaxlı kəndində anadan olmuşdur. Orta məktəbi 1987-ci ildə bitirib və Leninqrad Dövlət Universitetinin tarix fakültəsinə qəbul olmuşdur. Ali təhsili uğurla başa vuraraq beynəlxalq münasibətlər sahəsində gənc mütəxəssis kimi tanınmışdır.

Elxan Poluxov 1999-cu ildə Sankt-Peterburqda dissertasiya müdafiə etmiş, tarix elmləri namizədi elmi dərəcəsi almışdır. Bakıda, Tbilisidə, Alma-Atıda, Budapeştdə, habelə ABŞ-da və Kanadada elmi nəşrlərdə maraqlı məqalələri çap olunmuşdur. Bu tədqiqatlar qərb-şərq münasibətlərinə, beynəlxalq humanitar təşkilatların fəaliyyətinə, ABŞ-ın Azərbaycan və onun qonşuları barədə münasibətlərinə, başqa mühüm problemlərə həsr edilmişdir.

O, Amerikada, Kanadada, Qazaxıstanda, Gürcüstanda, başqa ölkələrdə 15 elmi konfransın, beynəlxalq tədbirlərin iştirakçısı olmuş, materiallar çap etdirmişdir.

Axır vaxtlar Elxan Poluxov ali məktəbdə yeni tədris proqramları hazırlanmasında yaxından çalışır. Son illər müxtəlif ölkələrin təhsil ocaqlarında, beynəlxalq məclislərdə E. Poluxovun mühazirələri maraqla qarşılanır. İndi o, bir il müddətinə yenə ABŞ-da elmi və pedaqoji e’zamiyyətdədir.

ELŞƏN NƏSİBOV

Elşən Mustafa oğlu Nəsibov 1957-ci ildə Borçalının Qaçağan kəndində ziyalı ailəsində anadan olmuşdur. 1964-cü ildə Qaçağan orta məktəbinin birinci sinfinə getmiş, 1974-cü ildə həmin məktəbi qızıl medalla bitirmişdir. 1974-cü ildə Azərbaycan Dövlət Universitetinin kimya fakültəsinə daxil olmuşdur. 1979-cu ildə tə’yinatla Azərbaycan EA-nın Biologiya Elmi-Tədqiqatlar Mərkəzində baş laborant vəzifəsində çalışmışdır. Göndərişlə 1980-1983-cü illərdə Riqada Üzvi-Sintez İnstitutunda çalışmışdır.

1983-1997-ci illərdə Azərb. EA-nın Bioloji Mərkəzində (hazırda BİO İstehsalat Birliyi), kiçik elmi işçi, elmi işçi və baş elmi işçi vəzifələrini icra etmişdir. 1990-cı ildə dissertasiya işi müdafiə edib, kimya elmləri namizədi elmi dərəcəsini almışdır. 1997-ci ildən Azərbaycan Dövlət Neft Akademiyasının Üzvi-Kimya kafedrasında dosent vəzifəsində pedoqoji fəaliyyətə başlamışdır. Elşən Nəsibovun elmi pedaqoji fəaliyyəti 25 elmi məqalədə və 1 metodik kitabçada öz əksini tapmışdır. Elşən Nəsibov elmi məqalələrlə yanaşı, elmi-populyar məqalələr də dərc etdirmişdir. Onun 10-a yaxın məqalələri çap olunmuşdur.

Elşən Nəsibov bir neçə beynəlxalq simpoziuma də’vətnamələr almış və kimyanın bir sıra (üzvi və bioloji) sahələri üzrə elmi çıxışlar etmişdir.

Hazırda Azərbaycan Neft Akademiyasının üzvi kimya kafedrasında dosent vəzifəsində çalışır.