ŞABAN QARALOV

Şaban İbrahim oğlu Qaralov 1931-ci il may ayının 5-də Başkeçid rayonunun Ormeşən kəndində anadan olmuşdur. İlk təhsilini kənd 8 illik məktəbində almış, 1946-cı ildə Bolnisi rayonunun Darbaz orta məktəbini bitirmiş, həmin ildən Ormeşən 8 illik məktəbində ibtidai sinif müəllimi işləmişdir.

1949-cu ildə Azərbaycan Dövlət Pedaqoji İnstitutunun Azərbaycan dili və ədəbiyyatı fakültəsinin əyani şö’bəsinə daxil olmuş, 1953-cü ildə oranı müvəffəqiyyətlə bitirib, orta məktəbdə Azərbaycan dili və ədəbiyyatı müəllimi ixtisasını almışdır.

1958-ci ildən 1978-ci ilə kimi Dmanisi rayonunda orta məktəb direktoru, rayon xalq maarif şö’bəsində inspektor vəzifələrində çalışmışdır.

1978-ci ildə Bakı şəhərinə köçmüş və hazırda Bakı Slavyan Universitetinin Azərbaycan dili və ədəbiyyatı kafedrasında dosent kimi fəaliyyt göstərir.

Şaban Qaralov 1984-cü ildə "İbtidai siniflərdə orfoqrafik səhvlər üzərində iş şagirdlərin savadlılığının artırılmasının mühüm vasitəsi kimi" mövzusunda namizədlik dissertasiyasını müdafiə edib, pedaqoji elmlər namizədi elmi dərəcəsi almışdır. O, 60-a qədər qəzet, 50-dən çox jurnal məqalələrinin və 13 dərslik və proqramın müəllifidir.

Azərbaycanın tarixində ilk dəfə olaraq Şaban Qaralov tə’lim gürcü dilində olan məktəblərin V-VI, X-XI sinifləri üçün "Azərbaycan dili", II sinif üçün "Əlifba" dərsliklərini, zəifeşidən və sonradan karlamış uşaqlar internat məktəbi üçün 9 çap vərəqində Azərbaycan dili proqramı və I sinif üçün "Əlifba" dərsiyini yazmışdır. Hazırda tə’lim gürcü dilində olan məktəblərin IV, VII-VIII, IX sinifləri üçün "Azərbaycan dili" dərslikləri üzərində işləyir.

1990-cı ildən Bakı Slavyan Universitetində müəllim işləyir. 1996-cı ildən dosentdir.

ŞAHBAZ ŞAMIOĞLU

Şahbaz Şamı oğlu Musayev 1961-ci il aprel ayının 20-də Başkeçidin Qızılkilsə kəndində ziyalı ailəsində anadan olmuşdur. 1978-ci ildə Qızılkilsə kənd orta məktəbini ə’la qiymətlərlə bitirmişdir. Onuncu sinifdə oxuyarkən Azərbaycan dili və ədəbiyyatı fənni üzrə keçirilən respublika miqyaslı olimpiadada birinci yeri tutmuş və xüsusi diploma layiq görülmüşdür.

Ş. Şamıoğlu 1979-1983-cü illərdə indiki Azərbaycan Dövlət Pedaqoji Universitetinin filologiya fakültəsində oxumuşdur.

1988-ci ildə Azərbaycan EA Nəsimi adına Dilçilik İnstitutunun türk dilləri üzrə aspiranturasına daxil olmuş, sonra elmi yaradıcılığını Azərbaycan EA Milli Münasibətlər İnstitutunda (indiki Azərbaycan EA Beynəlxalq Münasibətlər İnstitutu) davam etdirmişdir. Azərbaycan EA Beynəlxalq Münasibətlər İnstitutunun direktoru, filologiya elmləri doktoru, professor Vaqif Arzumanlının rəhbərliyi altında "Gürcü ədəbi qaynaqları və Borçalıda gedən etno-siyasi proseslər (XIX-XX əsrlər)" mövzusunda dissertasiya işini başa vurmuşdur.

Ş. Şamıoğlu Borçalışünas tədqiqatçı kimi tanınır. Borçalı tarixi, etnoqrafiyası, şivəsi və ədəbi-mədəni mühitinə, regiondakı milli münasibətlərə dair 50-dən çox elmi məqalənin müəllifidir. Onomastika, terminologiya, dialektologiya və filologiyanın müxtəlif sahələrinə dair qiymətli tədqiqatları vardır

Ş. Şamıoğlu "Borçalıda etnik proseslər və millətlərarası münasibətlər (XIX-XX əsrlər)" monoqrafiyasının müəllifi, "Müstəqil Azərbaycan 80 il tarix səhnəsində" kitabının müəlliflərindən biridir. Müxtəlif dərgi və toplularda Azərbaycan, rus, ingilis və türk dillərində elmi əsərləri dərc olunmuşdur. "Etno-siyasi proseslər və Borçalı ədəbi-mədəni mühiti" adlı növbəti monoqrafiyası çap ərəfəsindədir.

Ş. Şamıoğlu bədii yaradıcılıqla da məşğul olur. Povest və hekayələri dərc edilmişdir.

TAMİLLA ƏLİYEVA

Tamilla İsrafil qızı Əliyeva 1965-ci ildə Başkeçid rayonunun Dmanisi şəhərində anadan olmuşdur. 1972-ci ildə Dmanisi şəhər orta məktəbinin birinci sinfinə getmiş, 1983-cü ildə həmin məktəbi bitirmişdir.

Orta məktəbi bitirdikdən sonra, 1984-cü ildə M.F. Axundov adına APRDƏİ-na daxil olmuş və 1989-cu ildə həmin institutu fərqlənmə diplomu ilə bitirmişdir. 1991-1994-cü illərdə həmin institutun əyani aspiranturasında oxumuş, 1994-cü ildən ədəbiyyat nəzəriyyəsi kafedrasında çalışmışdır. 1998-ci ildə namizədlik dissertasiyası müdafiə etmişdir.

TAHİR SÜLEYMANOV

Tahir Süleyman oğlu Süleymanov 1956-cı il avqustun 9-da Başkeçid rayonunun Səfərli kəndində anadan olmuşdur. 1963-cü ildə Səfərli kənd orta məktəbinin birinci sinfinə getmiş və 1973-cü ildə həmin məktəbi bitirmişdir. 1973-cü ildə Azərbaycan Dövlət Neft və Kimya İnstitutunun istehsal proseslərinin avtomatlaşdırılması fakültəsinə daxil olmuşdur. 1978-ci ildə akademiyanı bitirdikdən sonra tə’yinatla respublika maddi-texniki təchizat idarəsinin hesablama mərkəzinə göndərilmişdir. 1978-1983-cü illərdə həmin idarədə mühəndis-proqramçı, böyük mühəndis-riyaziyyatçı vəzifələrində çalışmışdır. 1983-cü ildə "Maye, qaz və plazma mexanikası" ixtisası üzrə ADNA-nın aspiranturasının əyani şö’bəsinə daxil olmuşdur. 1986-cı ildə aspiranturanı ə’la

qiymətlərlə başa vurmuş, 1991-ci ildə namizədlik dissertasiyası müdafiə etmişdir.

1986-cı ildən Azərbaycan Dövlət Neft Akademiyasının nəzəri mexanika kafedrasında assistent kimi çalışmışdır. 1995-ci ildən həmin kafedranın dosentidir.

O, 20-yə qədər elmi-metodiki əsərin, 3 müəlliflik şəhadətnaməsinin və bir patentin müəllifidir. Azərbaycan Respublikası Təhsil Nazirliyi tərəfindən təsdiq edilmiş və 1999-cu ildə dərs vəsaiti kimi çap olunmuş irihəcmli kitabın müəlliflərindən biridir. Ən yaxşı elmi nəticələrinə görə keçmiş SSRİ-nin Xalq Təsərrüfatı Nailiyyətləri Sərgisinin bürünc medalını almışdır. Onun əsərləri Rusiya, İran və Çexoslovakiyada çap olunmuşdur.

Hazırda doktorluq dissertasiyasını tamamlamaq üzrədir. Tahir Süleymanov nailiyyətlərinə görə - atası və müəllimi Süleyman müəllimə minnətdardır. Süleyman müəllim hazırda ömrünün ahıl vaxtında Səfərli səkkizillik məktəbinin direktorudur.

Tahir Süleymanov 1999-cu il dekabrın 12-də ilk dəfə keçirilmiş bələdiyyə seçkilərində qalib gəlmiş və Xətai bələdiyyəsinin üzvüdür.

TOFİQ ƏLİYEV

Tofiq Məmməd oğlu Əliyev 1956-cı il sentyabrın 7-də Başkeçid rayonunun Səfərli kəndində anadan olmuş, 1973-cü ildə Səfərli kənd orta məktəbini başa vurmuşdur. Həmin il Azərbaycan Xalq Təsərrüfatı İnstitutunun (indiki ADİU) ümumi iqtisad fakültəsinə qəbul olunmuşdur. 1978-ci ildə həmin institutu siyasi iqtisad müəllimi ixtisası üzrə fərqlənmə diplomu ilə bitirmişdir.

1978-ci ildə Azərbaycan Respublikası Ali Təhsil Nazirliyinin tə’yinatı ilə Azərbaycan Politexnik İnstitutunun (indiki ATU) elmi kommunizm kafedrasına göndərilmişdir. 1979-cu ilin mayından 1980-ci ilin oktyabrına qədər Ordu sıralarında xidmət etmişdir. O, Azərbaycan Texniki Universitetində müəllim, baş müəllim işləmişdir, hazırda fəlsəfə və politologiya kafedrasının dosenti vəzifəsində çalışır. Texniki Universitetdə politologiya və sosiologiya fənnini tədris edir.

Tofiq Əliyev Azərbaycan Dövlət Universitetinin elmi kommunizm kafedrasının aspirantı olmuş və 1989-cu ildə "İstehsal kollektivlərində əmək intizamının möhkəmləndirilməsinin sosial amilləri" mövzusunda namizədlik dissertasiyası müdafiə etmişdir. 1998-ci ildə isə "Keçid dövründə sosial idarəetmə və intizamın qarşılıqlı əlaqəsi (sosial-fəlsəfi təhlil)" mövzusunda fəlsəfə elmləri doktoru elmi dərəcəsi almaq üçün dissertasiyanı yekunlaşdırıb müdafiəyə təqdim etmişdir.

Tofiq Əliyev 60-dan çox elmi məqalənin, dərs vəsaitinin, dərsliyin və monoqrafiyanın müəllifidir. O, "Politologiya" fənninə dair iki, "Sosiologiya" fənninə dair bir dərs vəsaitinin, "Politologiya fənninin tədrisinə dair metodik göstərişlər" və fəlsəfə fənninə dair dərsliyin müəlliflərindəndir.

VAHİD ŞƏRİFOV

Vahid Sə’di oğlu Şərifov 1945-ci ildə Gürcüstanın Başkeçid rayonunun Armudlu kəndində kəndçi ailəsində anadan olmuşdur.

1952-ci ildə kənd orta məktəbinin 1-ci sinfinə getmiş, 1962-1963-cü tədris ilində həmin məktəbi qızıl medalla bitirmişdir.

1963-cü ildə indiki Azərbaycan Dövlət Neft Akademiyasının neft-kimya fakültəsinə daxil olmuş, 1968-ci ildə həmin fakültəni fərqlənmə diplomu ilə başa vurmuşdur. Tə’yinatla keçmiş SSRİ-nin Yaroslavl şəhərinə göndərilmişdir. Bir müddət bu şəhərdə işlədikdən sonra. Onu Volqlqrad vilayətinin Volsk şəhərinin neft bazası işə göndərilir.

Vahid Şərifov neft bazasında direktor vəzifəsini icra edir. Əmək fəaliyyətilə yanaşı o həm də elmi işini də davam etdirir.

1980-ci illərin ortalarında namizədlik dissertasiyasını tamamlamış və 1987-ci ildə müdafiə edib elmlər namizədi adına layiq görülmüşdür. Bir müddətdən sonra ittifaq məhsullarının baş mühəndisi, Volqoqrad şəhərində neft məhsullarının baş mühəndisi vəzifəsinə irəli əçkilmişdir. Sonra isə yüksək Neft-qaz sənayesinin ali mütəxəssisi kimi üç illiyə Anqola dövlətinə e’zam olunmuşdur.

1993-cü ildə Anqoladan Volqaqrada qayıdan Vahid Şərifov "LUKOYL" şirkətinə baş direktor tə’yin olunmuşdur.

1995-ci ildə o, Moskvaya də’vət almış və Moskva şəhərində Neft-qaz sahəsində yeni bir vəzifəyə tə’yin edilmişdir. Həmin ildə Rusiya dövlətinin əməkdar neftçisi kimi ada layiq görülmüşdür.

Vahid Şərifovun əmək və elmi fəaliyyəti üç fundamental elmi kitabda, 100-ə qədər elmi qəzet və jurnal məqalələrində öz əksini tapmışdır. O, 20 beynəlxalq, ittifaq simpozium və konfranslarda çıxış edib materiallar çap etdirmişdir.

Vahid Şərifov hazırda neft-qaz sahəsində geniş fəaliyyət göstərən ilk Borçalı ziyalısıdır ki, "LUKOYL" şirkətinin vitse-prezidenti vəzifəsini icra edir.

VƏLİ PAŞAYEV

Vəli Möylə oğlu Paşayev 1940-cı il iyunun 25-də Başkeçid rayonunun Məmişli kəndində anadan olmuşdur. 1947-ci ildə orta məktəbin 1-ci sinfinə getmiş, 1958-ci ildə həmin məktəbi bitirib Sovet Ordusu sıralarına çağırılmışdır. 1962-ci ildə baş leytenant rütbəsində ordudan tərxis olunmuşdur.

1963-cü ildə keçmiş M.F. Axundov adına ADPİ-nin rus dili və ədəbiyyatı fakültəsinə daxil olmuş, 1969-cu ildə isə həmin institutu bitirmişdir.

Əmək fəaliyyətinə Tovuz rayonunda başlamış, sonra isə anadan olduğu kənd orta məktəbində müəllim işləmişdir. Bir neçə il həmin məktəbdə tədris işləri üzrə direktor müavini vəzifəsində çalışmışdır.

1973-cü ildən 1984-cü ilə qədər Bakı şəhərində kimya-biologiya təmayüllü 5 saylı respublika internat məktəbində müəllim, 1984-cü ildən 1991-ci ilə qədər həmin məktəbdə tə’lim-tərbiyə işləri üzrə direktor müavini işləmişdir. 1989-cu il fevral ayından 1991-ci il fevral ayına qədər Azərbaycan Politexnik İnstitutunun Azərbaycan və rus dilləri kafedrasında saat hesabı müəllim işləmişdir. 1991-ci il fevral ayında isə Azərbaycan Texniki Universitetinə müsabiqə yolu ilə müəllim keçmişdir.

1992-ci ilin aprel ayından Azərbaycan Texniki Universitetinin Azərbaycan dili kafedrasında baş müəllim, 1994-cü ilin noyabr ayından indiyə qədər dosent vəzifəsində çalışır, 1985-ci ildən filologiya elmləri namizədidir. Vəli Paşayevin elmi-pedaqoji fəaliyyəti 30-dan artıq elmi-əsərdə öz əksini tapmışdır. O, cümlədən 1 metodik məcmuənin, 2 metodik vəsaitin və bir dərs vəsaitinin müəllifidir.

VİDADİ ORUCOV

Vidadi Ömər oğlu Orucov 1956-cı il mayın 12-də Başkeçid rayonunun Qızılkilsə kəndində anadan olmuşdur.

1973-cü ildə kənd orta məktəbini bitirmişdir. 1974-cü ildə Azərbaycan Dövlət Universitetinin (indiki BDU) fizika fakültəsinə daxil olmuş, 1982-ci ildə həmin fakültəni başa vurmuşdur.

1998-ci ildə "Karbon və azot atomlarının dəmir-nikel və dəmir-manqan ərintilərində atomların paylanmasına, faza keçidlərinə və xassələrinə tə’siri" mövzusunda namizədlik dissertasiyası müdafiə edib, fizika-riyaziyyat elmləri namizədi elmi dərəcəsi almışdır. Əmək fəaliyyətinə 1973-cü ildə Bakı Tunel-Tikinti İdarəsində fəhləliklə başlamışdır. 1983-cü ildə Bakı şəhər 25 saylı texniki-peşə məktəbinin azad komsomol təşkilatı katibi, 1990-cı ildə Nizami rayon "Bilik" cəmiyyətinin mə’sul katibi, 1992-ci ildən Təhsil Nazirliyinin ali və orta ixtisas təhsili idarəsində çalışmışdır.

1997-ci ildən Bakı Sənaye-Pedaqoji Texnikumunun direktorudur.

1983-cü ildə Bakı şəhər Nizami rayon Xalq Deputatları Sovetinin deputatı seçilmişdir.

Onun elmi-pedaqoji fəaliyyəti 12 elmi əsərdə öz əksini tapmışdır.

Vidadi Orucov 10-a qədər beynəlxalq və respublika səviyyəli elmi konfranslarda iştirak edib, məqalələr çap etdirmişdir.

YASİN QARAMƏMMƏDLİ (İSMAYILOV)

Yasin Alı oğlu Qaraməmmədli 1938-ci il dekabrın 1-də Başkeçid rayonunun Muğanlı kəndində anadan olmuşdur. Səkkizillik təhsilini (1946-1954-cü illər) doğma kəndlərində almış, 1954-1958-ci illərdə Marneuli Dövlət Pedaqoji Məktəbində oxumuş, 1963-cü ildə APİ-nin tarix-filologiya fakültəsini fərqlənmə diplomu ilə bitirmişdir.

Saatlı rayonunun Krasnoselsk və Sabirabad rayonunun Aleksandrovsk kəndlərində müəllim və tədris hissə müdiri işləmiş, 1964-cü ilin yanvarında Bakıya qayıdaraq burada fəaliyyətini davam etdirmiş - 19 nömrəli şəhər texniki peşə məktəbində tərbiyəçi, Azərbaycan SSR Nazirlər Soveti Dövlət Mətbuat Komitəsinin Baş Mətbuat İdarəsində (Qlavlit) senzor işləmiş, həmin ilin noyabrından Azərbaycan Dövlət Radio və Televiziya Verlişləri Komitəsinə işə də’vət olunmuş, 20 ildən artıq bir müddət ərzində burada tərcüməçi, şərhçi, böyük redaktor və baş redaktorun müavini vəzifələrində çalışmışdır.

Mətbuat sahəsində çalışdığı illərdə elmi-pedaqoji fəaliyyətindən ayrılmamış, Azərbaycan SSR EA Fəlsəfə və Hüquq İnstitutunda "Bədii xarakter anlayışı" mövzusunda tədqiqat işi aparmış, bir sıra elmi nəşrlərdə məqalələr dərc etdirmiş, 1978-ci ildə dissertasiya müdafiə edərək estetika ixtisası üzrə fəlsəfə elmləri namizədi elmi dərəcəsi almışdır. Eyni zamanda 1975-ci ildən Azərbaycan Xarici Dillər İnstitutunda, 1978-ci ildən APİ-də müəllimlik fəaliyyətinə başlamışdır. 1984-cü ilin noyabrında müsabiqə yolu ilə APİ-nin fəlsəfə kafedrasında baş müəllim vəzifəsini tutmuş, kafedranın dosenti seçilmiş, 1986-cı ilin mayından 1990-cı ilin dekabrına qədər həmin kafedranın, sonra isə institutda onun təşəbbüsü ilə təzə yaradılan mədəniyyətşünaslıq kafedrasının müdiri, 1996-1998-ci illərdə Pedaqoji Universitetin tərbiyə işləri üzrə prorektoru vəzifələrində çalışmışdır. Hazırda ADPU-nun fəlsəfə kafedrasının dosenti kimi elmi-pedaqoji fəaliyyətini davam etdirir, fəlsəfə, estetika, etika, mədəniyyətşünaslıq, habelə Bakıdakı bir sıra özəl universitetlərdə konfliktologiya və müasir dünya siyasəti fənlərini tədris edir.

Y.A. Qaraməmmədli geniş profilli mütəxəssis kimi xüsusilə ümummarif xarakterli nəşrlərə daha çox meyl edir: "Azərbaycan Sovet Ensiklopediyası"nın IX-X cildlərinin, "Fəlsəfə ensiklopedik lüğəti"nin (1997) müəlliflərindəndir, "Davranış estetikası" kitabını tərcümə edərək ön sözlə nəşr etdirmiş (1978), orta məktəb üçün bir sıra tarix dərsliklərinin tərcüməçmsi və elmi redaktoru olmuşdur.

ZAHİD AŞUROV

Zahid Gülməmməd oğlu Aşurov 1942-ci ildə Başkeçid rayonunun Qəmərli kəndində anadan olmuşdur. 1949-cu ildə orta məktəbin 1-ci sinfinə getmiş, 1960-cı ildə həmin məktəbi bitirmişdir. 1962-ci ildə Azərbaycan Neft Kimya İnstitutunun mühəndis-iqtisad fakültəsinə daxil olmuş, 1967-ci ildə Azərbaycan Xalq Təsərrüfatı İnstitutunu bitirmişdir.

1969-cu ildə Azərbaycan EA İqtisadiyyat İnstitutunun aspiranturasına qəbul olmuş, 1973-cü ildə namizədlik dissertasiyası müdafiə etmişdir. Həmin ildən 1985-ci ilə kimi Azərbaycan SSR EA İqtisadiyyat İnstitutunda elmi işçi və baş elmi işçi işləmişdir. 1985-ci ildən indiyə qədər Azərbaycan Dövlət Neft Akademiyasında Mühəndis-İqtisad və Beynəlxalq iqtisadi əlaqələr və Menecment fakültəsinin dosentidir.

Zahid Aşurovun elmi pedaqoji fəaliyyəti 50-dən çox elmi-pedaqoji məqalədə əks olunmuşdur. O, çap olunmuş 1 monoqrafiyanın müəllifidir.

ZİYƏDDİN QURBANOV

Ziyəddin Qara oğlu Qurbanov 1938-ci il oktyabrın 3-də Başkeçid rayonunun Lök-Candar kəndində anadan olmuşdur. Səkkizillik məktəbi öz kəndlərində, orta məktəbi isə Hamamlı kəndində bitirmişdir. Bir il kolxozda işləmiş, 1959-cu ildə indiki Bakı Dövlət Universitetinin filologiya fakültəsinə daxil olmuş və 1964-cü ildə oranı bitirmişdir. 1964-cü ilin sentyabrından 1966-cı ilin noyabr ayına qədər Goranboy rayonunun Borsunlu kənd orta məktəbində müəllim işləmişdir. 1966-cı ilin noyabrından 1968-ci ilə qədər Gəncə Dövlət Pedaqoji İnstitutunun istehsal təcrübəsinin rəhbəri vəzifəsində işləmişdir. 1968-ci ilin sentyabrından indiyə qədər institutun Azərbaycan dili kafedrasında müəllim, baş müəllim işləmiş, indi isə həmin kafedranın dosentidir.

1972-ci ildə "XVII əsr Azərbaycan ədəbi dilinin leksikası" mövzusunda namizədlik dissertasiyasını müdafiə edib filologiya elmləri namizədi elmi dərəcəsi almışdır. 1984-cü ildən kafedranın dosentidir.

"XVII əsr Azərbaycan ədəbi dili" mövzusunda doktorluq işini tamamlayıb müzakirəyə təqdim etmişdir. 29 jurnal, onlarca qəzet məqaləsinin müəllifidir.

"XVII əsr Azərbaycan ədəbi dili və üslubu" (1995), "Azərbaycan ədəbi dilinin XVII əsr mərhələsi" (1997) kitablarının və "Yazılı abidələrin dilində fonetik, leksik və qrammatik fərqlər" adlı dərsliyin müəllifidir.