ELMLƏR NAMİZƏDLƏRİ

AĞBULAQ, ASPİNDZA, ADIGÜN, AXALSIX BÖLGƏLƏRİ

[A-Z]

ADİL QƏHRƏMANOV

Adil Şamil oğlu Qəhrəmanov 1942-ci ildə Gürcüstanın Adıgün rayonunun Mlaşe kəndində anadan olmuşdur.

1961-ci ildə 66 nömrəli Tbilisi rus orta məktəbini qızıl medalla bitirmiş və Azərbaycan Dövlət Universitetinin mexanika-riyaziyyat fakültəsinə daxil olmuşdur. 1966-cı ildə universiteti bitirib Azərbaycan Elmlər Akademiyasının Riyaziyyat İnstitutunun aspiranturasına daxil olmuş və 1972-ci ildə dissertasiya müdafiə edərək fizika-riyaziyyat elmləri namizədi elmi dərəcəsi almışdır. 1976-cı ildən pedaqoji fəaliyyətə başlamışdır. 1980-cı ildən Bakı Dövlət Universitetində müəllim, baş müəllim, 1983-cü ildən isə dosent vəzifəsində çalışır. Adil Qəhrəmanov 35 illik elmi-pedaqoji fəaliyyəti ərzində 30-a yaxın elmi məqalə çap etdirmişdir.

Hazırda M.Ə. Rəsulzadə adına Bakı Dövlət Universitetinin dosentidir.

ASLAN ASLANOV

Aslan Murtuz oğlu Aslanov 1941-ci ildə Ağbulaq rayonunun Kosalar kəndində anadan olmuşdur. 1948-ci ildə onun ailəsi Bolnisi rayonunun Həsənxocalı kəndinə köçmüşdür.

1950-ci ildə Arıxlı kənd orta məktəbini bitirmiş və ADU-nun iqtisadiyyat fakültəsinə daxil olmuş, 1965-ci ildə oranı bitirmişdir.

İqtisadçı kimi Lənkəran şəhər bankına tə’yinat almışdır. 1965-ci ilin noyabrından 1966-cı ilin dekabrınadək ordu sıralarında xidmətdə olmuşdur. Ordudan tərxis olunandan sonra yenidən bank sistemində iqtisadçı vəzifəsində işləmişdir.

1969-cu ildə Azərbaycan Xalq Təsərrüfatı İnstitutu nəzdində statistika üzrə aspiranturaya daxil olmuş və 1972-ci ildə aspiranturanı bitirmişdir. Həmin ildən e’tibarən institutda əvvəlcə assistent, sonra baş müəllim və dosent vəzifələrində çalışmışdır.

1977-ci ildə Moskva şəhərində namizədlik dissertasiyası müdafiə etmiş və iqtisad elmləri namizədi elmi dərəcəsi almışdır. Alimin 20-dən çox elmi əsəri çap olunmuşdur.

Hazırda Azərbaycan Dövlət İqtisad Universitetində statistika kafedrasının dosentidir.

QASIM MƏMMƏDOV

Qasım Hümbət oğlu Məmmədov 1930-cu il aprelin 12-də Ağbulaq nahiyəsinin Kosalar kəndində anadan olmuş, ilk təhsilini kənddəki 7 illik məktəbdə almışdır. 1942-ci ildə 7-ci sinifi bitirdikdən sonra 1948-1949-cu tədris ilində kənddəki 8 illik məktəbin axırıncı sinfində oxumuş və məktəbi bitirdikdən sonra Marneuli rayonundakı Pedaqoji Texnikuma daxil olmuşdur.

Pedaqoji texnikumu bitirdikdən sonra 1953-cü ildə Bakı şəhərində K.Marks adına Xalq Təsərrüfatı İnstitutunun mühasibat uçotu fakültəsinə daxil olmuşdur. Qasım Məmmədov institutu fərqlənmə diplomu ilə bitirdikdən sonra Azərbaycan KP Mərkəzi Komitəsinin nəzdində fəaliyyət göstərən Bakı Ali Partiya Məktəbində əvvəlcə Sovet iqtisadiyyatı kafedrasında kabinet müdiri, sonralar isə baş müəllim vəzifəsində çalışmışdır. Qasım Məmmədov 1961-ci ildə Elmi-Tədqiqat Kənd Təsərrüfatının İqtisadiyyatı İnstitutunda məqsədli aspiranturaya daxil olmuş və Moskva şəhərinə göndərilmiş, 1964-cü ildə dissertasiyası müdafiə etmişdir. Sonra Bakıya qayıtmış və 1965-1966-cı illərdə AzETKİ-də baş elmi işçi və əməyin təşkili və ödənişi şö’bəsinin müdiri vəzifəsində işləmişdir. Qasım Məmmədov eyni zamanda institutunun Həmkarlar İttifaqı Komitəsinin sədri olmuşdur.

Qasım Məmmədov 1967-ci ildən indiyədək ADİU-də dosentdir. Onun 160 çap vərəqi həcmində 155 elmi əsəri, o cümlədən 7 kitabı işıq üzü görmüşdür. Statistika fənni üzrə 6 tədris vəsaitinin müəlliflərindən biri və elmi redaktorudur. Onun rəhbərliyi altında bir neçə namizədlik dissertasiyası müdafiə edilmişdir.

İSA MUSAYEV

İsa Kərim oğlu Musayev 1947-ci ildə Ağbulaq (indiki Tetriskaro) rayonunun Kosalar kəndində anadan olmuşdur. 1954-cü ildə Bolnisi rayonunun Kolagir 8-illik məktəbinin 1-ci sinfinə daxil olmuş, 1959-1961-ci illərdə Kosalar 7-illik məktəbində oxumuş, 1965-ci ildə Bolnisi rayonunun Arıxlı orta məktəbini ə’la qiymətlərlə bitirmişdir.

1965-ci ildə indiki Azərbaycan Dövlət Universitetinin iqtisad fakültəsinə daxil olmuş və 1970-ci ildə fərqlənmə diplomu ilə bitirərək "iqtisadçı-mühəndis" ixtisası almışdır.

1970-ci ildə D. Bunyadzadə adına AzXTİ-nin (indiki ADİU-nun) iqtisadi kibernetika kafedrasında assistent vəzifəsinə də’vət olunmuşdur.

1982-ci ildə "Mürəkkəb iqtisadi sistemlərin modelləşdirilməsi və optimallaşdırılması (pambığın ilkin e’malı misalında)" mövzusunda namizədlik dissertasiyası müdəfiə edərək iqtisad elmləri namizədi elmi dərəcəsi almışdır.

1994-cü ildə Azərbaycan Dövlət İqtisad Universitetinin iqtisadi informatika və AİS kafedrasının dosenti vəzifəsinə seçilmişdir.

İsa Musayev ümumi həcmi 60 çap vərəqindən çox olan 40-dan artıq elmi əsərin, o cümlədən, 7 dərs vəsaiti və 3 monoqrafiyanın müəllifidir.

MAHAL QACARLI

Mahal İbrahimxəlil oğlu Qacarlı 1938-ci il sentyabr ayının 12-də Ağbulaq rayonunun (indiki Tetriskaro rayonunun) Kosalar kəndində anadan olmuşdur.

İlk təhsilini 1947-1955-ci illərdə Kosalar kənd səkkizillik məktəbində almış, sonra Marneuli Pedaqoji Texnikumuna daxil olmuşdur.

Mahal Qacarlı texnikumu 1959-cu ildə bitirdikdən sonra Kosalar kənd məktəbində müəllimlik etmiş və oradan da ordu sıralarına getmişdir. Əsgəri xidmətdən tərxis olunduqdan sonra, kəndlərində müəllim işləmişdir.

1963-cü ildə Mahal Qacarlı Qorki (indiki Nijni-Novqorod) şəhərinə getmiş və N.İ. Lobaçevski adına Dövlət Universitetinin tarix fakültəsinə daxil olmuşdur. 1967-ci ildə Universiteti bitirib yenidən doğma Kosalar kəndinə gəlmiş və məktəbdə tarix müəllimi işləmişdir.

1973-cü ildə o, Bakıya köçmüş və keçmiş M.F. Axundov adına APRDƏİ-nin tarix kafedrasında əmək fəaliyyətinə bişlamışdır.

Mahal Qacarlının elmi məqalələri 1975-ci ildən çap edilməyə başlamışdır.

1983-cü ildə ADU-nun (indiki BDU) birillik aspiranturasına göndərilmiş və 1984-cü ildə "Yerli Sovetlərin işinə Azərbaycan KP-nın rəhbərliyi (1966-1975-ci illər)" mövzusunda namizədlik dissertasiyası müdafiə etmişdir. Dosentdir.

Mahal Qacarlı 1978-ci ildə Daşkənd Dövlət Universitetində, 1987-ci ildə M.V. Lomonosov adına Moskva Dövlət Universitetində ixtisasartırma kurslarının dinləyicisi olunmuşdur. O, 15 elmi məqalənin və bir çox metodik vəsaitlərin müəllifidir.

Mahal Qacarlı fakültə partiya komitəsinin katibi, 1972-1975-ci illərdə yerli Sovetin deputatı olmuşdur. O, 2000-ci ildə "Nalto-Press" nəşriyyatında çap olunmuş "Elimizin fəxri, elmimizin fədaisi" adlı sənədli povestin müəllifidir.

1987-1989-cu illərdə Siyasi Elmlərin Sovet Assosiasiyası Cəmiyyətinin (Moskva) üzvü olmuşdur.

MƏMMƏD ƏLİYEV

Məmməd Arif oğlu Əliyev 1962-ci il sentyabrın 18-də Bakı şəhərində anadan olmuşdur. Valideynləri Axalsixe şəhərində yaşamışlar.

O, 1969-cu ildə Bakı şəhər 16 saylı orta məktəbin birinci sinfinə getmiş, 1979-cu ildə həmin məktəbi bitirmişdir.

1979-1980-ci illərdə Bakıdakı Mərkəzi Hövzə Poliklinikasında sanitar işləmişdir.

1980-1985-ci illərdə Azərbaycan Dövlət Universitetinin filologiya fakültəsində oxumuşdur.

1985-1987-ci illərdə M.F. Axundov adına APRDƏİ-nin (indiki Bakı Slavyan Universiteti) fəlsəfə kafedrasında laborant, 1987-1988-ci illərdə fakültə komsomol komitəsinin katibi, 1988-ci ildə institutun komsomol komitəsi katibinin müavini, 1989-1994-cü illərdə fəlsəfə kafedrasında baş laborant işləmişdir.

1992-ci ildə namizədlik dissertasiyası müdafiə etmişdir.

Hazırda Bakı Slavyan Universitetində elmi-pedaqoji fəaliyyətlə məşğuldur.

Məmməd Əliyevin elmi və pedaqoji fəaliyyəti 18 elmi əsərdə, o cümlədən, 3 metodik işləmədə, 6 məqalə və 9 tezisdə öz əksini tapmışdır. O, pedaqoji fakültənin Elmi Şurasının üzvü və kafedra müdirinin müavinidir.

SAMİR MUSAYEV

Samir Bədirxan oğlu Musayev 1966-cı ildə Bakı şəhərində anadan olmuşdur. 1973-cü ildə Bakıdakı 91 saylı orta məktəbə daxil olmuş və 1983-cü ildə həmin məktəbi qızıl medalla bitirmişdir. 1983-cü ildə Moskva Dövlət Universitetinin fizika-riyaziyyat fakültəsinə qəbul olmuş, 1989-cu ildə fərqlənmə diplomu ilə bitirmişdir. Həmin il Moskva Dövlət Universitetinin aspiranturasına daxil olmuş, 1992-ci ildə namizədlik dissertasiyasını müdafiə edib, fizika-riyaziyyat elmləri namizədi elmi dərəcəsini almışdır. 1992-ci ildən Bakı Dövlət Universitetinin nəzəri fizika kafedrasında müəllim işləyir. Xarici dövlətlərdə 10-a yaxın elmi məqalə nəşr etdirmişdir. Elm sahəsində xidmətlərinə görə 1997-ci ildə Nyu-York Akademiyasının həqiqi üzvü seçilmişdir. 1995-ci ildə Azərbaycan Dövlət İqtisad İnstitutunun maliyyə-kredit ixtisasının qiyabi şö’bəsinə daxil olmuş və ikinci ali təhsili 1999-cu ildə fərqlənmə diplomu ilə bitirib, ali təhsilli iqtisadçı peşəsinə yiyələnmişdir.

Hazırda BDU-da elmi-pedaqoji fəalyyətini davam etdirir.

SEVİNC MUSAYEVA

Sevinc Bədirxan qızı Musayeva 1970-ci ildə Bakı şəhərində anadan olmuşdur.Əslən Borçalıdandır. 1977-ci ildə Bakıdakı 21 saylı orta məktəbə daxil olmuş və oranı 1987-ci ildə qızıl medalla bitirmişdir. Həmin ildə Azərbaycan İqtisad institutuna daxil olmuş və 1992-ci ildə fərqlənmə diplomu ilə bitirmişdir. 1992-1995-ci illərdə Respublika Dövlət Plan Komitəsində aparıcı və daha sonra baş iqtisadçı vəzifəsində işləmişdir. 1992-ci ildən Azərbaycan Dövlət İqtisad İnstitutunun qiyabi aspiranturasına daxil olmuş və oranı 1995-ci ildə bitirib, namizədlik dissertasiyası müdafiə etmişdir. 1995-1998-ci illərdə İngiltərənin Notinqem-Trent Universitetində idarəetmə ixtisası üzrə təhsilini davam etdirmiş və menecer ixtisası üzrə mütəxəsis diplomu almışdır. 1997-ci ildə Azərbaycan Respublikası Nazirlər Kabineti yanında Xalq Təsərrüfatı Sahələrinin İdarəetmə İnstitutunun prorektoru vəzifəsinə tə’yin edilmişdir.

10-dan çox elmi məqalələr nəşr etdirmişdir. İngilis, Fransız, Rus və Türk dillərində sərbəst danışır və yazır. Hazırda Xalq Təsərrüfatı Sahələrinin İdarəetmə İnstitutunda prorektor vəzifəsini icra edir. Doktorluq dissertasiyası müdafiə ərəfəsindədir.

SİMA AĞAYEVA

Sima Abbas qızı Ağayeva 1932-ci il martın 15-də Axalsix şəhərində qulluqçu ailəsində anadan olmuşdur. Orta məktəbin 8-ci sinfini Tbilisi şəhərində başa vurmuş, 1952-ci ildə ailəsi Bakı şəhərinə köçmüş və həmin ildə Əzim Əzimzadə adına Azərbaycan Rəssamlıq məktəbinə daxil olmuş, 1957-ci ildə oranı bitirmişdir.

1957-ci ildə Tbilisi Rəssamlıq Akademiyasına qəbul olunmuş və 1964-cü ildə həmin Akademiyanı bitirmişdir. Bir müddət tələbəlik illərində Tbilisi şəhər Azərbaycan orta məktəblərində rəsmxətt müəllimi işləmişdir. 1964-cü ildə yenidən Bakıya qayıtmışdır.

1967-ci ildə Sima Ağayeva Azərbaycan Rəssamlar İttifaqının üzvü olmuşdur.

1972-ci ildə Azərbaycan Rəssamlar İttifaqı Rəyasət He’yətinin üzvü seçilmişdir.

1962-ci ildən Ümumittifaq, Respublika və xarici ölkələr sərgilərində çıxış edir.

Sima Ağayeva 40 ildən artıqdır ki, Azərbaycan ali məktəblərində pedaqoji fəaliyyətlə məşğul olur. Onun 40-dan artıq yaradıcılıq əsəri işıq üzü görmüşdür.

Sima Ağayeva 1964-cü ildən bu vaxta kimi indiki ADPU-nun təsviri sənət kafedrasının dosentidir.

VİLAYƏT QACAROV

Vilayət İbrahimxəlil oğlu Qacarov 1940-cı il dekabrın 15-də Ağbulaq (indiki Tetriskaro) rayonunun Kosalar kəndində anadan olmuşdur. 1957-ci ildə Kosalar kənd səkkizillik məktəbini ə’la qiymətlərlə bitirmiş, 1957-1960-cı illərdə Marneuli şəhər 1¹-li Azərbaycan orta məktəbində təhsilini davam etdirmişdir. Orta məktəbi gümüş medalla bitirmişdir.

1961-ci ildə Vilayət Qacarov keçmiş M.F. Axundov adına Azərbaycan Pedaqoji Dillər İnstitutunun rus dili və ədəbiyyatı fakültəsinə daxil olmuşdur. İnstitut illərində ordu sıralarına çağırılmış, üç il xidmət etdikdən sonra yenidən təhsilini davam etdirmiş və 1969-cu ildə institutu bitirib Tər-tər rayonunun Söylən orta məktəbində rus dili müəllimi işləməyə başlamışdır. 1971-1973-cü illərdə Bakıya qayıtmış və daxili işlər orqanlarında və başqa təşkilatlarda çalışmışdır.

1973-cü ilin aprel ayında o, doğma instituta qayıtmış və laborant vəzifəsində işə başlamışdır. 1975-ci ilin noyabrında Vilayət Qacarov M.V. Lomonosov adına Moskva Dövlət Universitetinin Sovet ədəbiyyatı kafedrasında məqsədli aspiranturaya daxil olmuşdur. Moskva Dövlət Universitetində onun elmi rəhbəri görkəmli tədqiqatçı, Azərbaycanın əməkdar elm xadimi, professor Əziz Şərif olmuşdur. Vilayət Qacarov "Azərbaycan şifahi xalq yaradıcılığının tədqiqi" mövzusunda dissertasiya müdafiə edərək filologiya elmləri namizədi elmi dərəcəsi almışdır.

1981-ci ildən rus ədəbiyyatı tarixi kafedrasının baş müəllimi olmuş, sonra dosent seçilmiş və ömrünün axırına kimi burada çalışmışdır.

Vilayət Qacarov 1994-cü ilin iyun ayında Bakıda vəfat etmişdir.

ZAHİD MUSTAFAYEV

Zahid Hacıəli oğlu Mustafayev 1941-ci il aprelin 8-də Gürcüstanın Axalsixe rayonunun Ani kəndində müəllim ailəsində anadan olmuşdur. 1944-cü ildə məshəti türklərinin həmin ərazidən məcburi köçürülməsindən sonra valideynləri ilə birgə Qarayazı (indiki Qardabani) rayonunun Qara Təhlə kəndinə, 1948-ci ildə isə Birlik kəndinə köçmüşdür.

1952-ci ildə Birlik kənd ibtidai məktəbini, 1956-cı ildə həmin rayonda Kalinin natamam orta məktəbini, 1958-ci ildə Qardabani orta məktəbini bitirmişdir. 1959-cu ildə Bakıda Azərbaycan Dövlət Pedaqoji İnstitutunun fizika-riyaziyyat fakültəsinə daxil olmuş və oranı 1964-cü ildə bitirmişdir. Tə’yinatla institutda saxlanılsa da, Bakı şəhərindəki 31 ¹-li orta məktəbə işə keçmiş, həmin məktəbdə dərs hissə müdiri və fizika müəllimi işləmişdir.

1966-cı ildə Azərbaycan EA Fizika İnstitutunun aspiranturasına daxil olmuş,

Leninqraddakı A.F. İoffe adına Aqrofizika İnstitutunun yarımkeçiricilər fizikası bölməsinə məqsədli aspiranturaya göndərilmişdir. Elmi rəhbəri A.F. İoffenin tanınmış tələbələrindən biri - professor A.F. Çudnovski olmuşdur. 1971-ci ildə "Nazik təbəqələrdə ginetik hadisələr" adlı dissertasiya müdafiə etmişdir. Fizika-riyaziyyat elmləri namizədidir. 1976-cı ilədək Azərbaycan EA Fizika İnstitutunda kiçik elmi işçi, böyük elmi işçi vəzifələrində işləmişdir. 1976-cı ildən Azərbaycan Ensiklopediyasında işləyir. 1976-1991-ci illərdə Azərbaycan Ensiklopediyası baş redaksiyasında fizika, riyaziyyat və kimya elmləri redaksiyasının müdiri, 1992-1993-cü illərdə "Azərbaycan Ensiklopediyası" Nəşriyyat-Poliqrafiya Birliyində təbiət elmləri üzrə baş redaktor olmuş, 1993-cü ildən baş direktorun müavinidir. Bir sıra elmi məqalələrin, VI siniflər üçün "Təbiətşünaslıq" dərsliyinin (Ə. Hüseynovla birlikdə) müəllifidir. Y. Pompeyevin "Qarabağ qan içində" kitabını Azərbaycan dilinə tərcümə etmişdir. Azərbaycan EA Fizika İnstitutunun nəşri olan iki toplunun tərtibçilərindəndir. Üç kitabın elmi redaktoru olmuşdur. Dövrü mətbuatda müntəzəm çıxış edir. Azərbaycan Jurnalistlər Birliyinin üzvüdür. 1981-ci ildə Moskvada Ensiklopediyaçıların Ümumittifaq müşavirəsində, 1982-ci ildə Bakıda Zaqafqaziya Ensiklopediyaçılarının müşavirəsində iştirak etmişdir. Azərbaycan Respublikası Ali Sovetinin Fəxri Fərmanı ilə təltif olunmuşdur.

ZİYƏDDİN ORUCOV

Ziyəddin Həsənəli oğlu Orucov 1946-cı il avqustun 8-də Ağbulaq (Tetriskaro) rayonunun Kosalar kəndində müəllim ailəsində anadan olmuşdur. 1959-cu ildə yeddiillik məktəbi Kosalar kəndində bitirdikdən sonra təhsilini Bolnisi rayonunun Arıxlı orta məktəbində davam etdirmiş, 1963-cü ildə həmin məktəbi bitirmişdir.

1963-1965-ci illərdə Kosalar məktəbində pioner baş dəstə rəhbəri işləmişdir. 1965-ci ildə Azərbaycan Politexnik İnstitutunun texnologiya fakültəsinə daxil olmuş və oranı 1971-ci ildə bitirmişdir. 1973-1974-cü illərdə ordu sıralarında xidmət etmişdir. 1974-1983-cü illərdə Bakıda 26 saylı texniki-peşə məktəbində tə’lim-tərbiyə işləri üzrə direktor müavini işləmişdir. 1983-1988-ci illərdə Dövlət Texniki Peşə Təhsili Komitəsində metodist vəzifəsində çalışmışdır.

1986-cı ildə "Şagirdin peşə hazırlığında təbiət-riyaziyyat və texniki peşə biliklərinin qarşılıqlı əlaqələrinin tə’min edilməsi" mövzusunda Tbilisi şəhərində namizədlik dissertasiyası müdafiə etmişdir. 60-a qədər elmi əsərin müəllifidir. Dərslik, dərs vəsaiti, tədris plan və proqramların və metodiki tövsiyyələrin müəllifidir. 1988-ci ildən Pedaqoji Kadrların İxtisasartırma və Yenidən Hazırlanması Baş İnstitutunda baş müəllim, dosent, fakültə dekanı işləmişdir. Hazırda Müəllimlər İnstitutunda kafedra müdiri vəzifəsində işləyir.